Boton Maiura Iesu Kristo
Ana titiraki nanora aika nano, ake a waerake inanon rawawatara ao moan kataakira, a tobwaki rinanon ana tangira Iesu Kristo are e aki bwaka.
Inanon mwanangara n te maiu ae e mamate, ti mena inanon taai ni kaitaraaki ma taian kataakii: kammarakin buan temanna ae tangiraki, te korakai ma te aoraki, kammarakin te motibuaka, kammarakin te kamwengabuaka ke te bwainikirinaki, kananokawakin te aki mwakuri, te itabaraara n te utu, te tang ni maroaa ae korakora, ke mwin te bubuaka aika a kauruaki nano. N taai akanne, ti ukoukora raun tamneira. Ti ukoria ni koaua ni kan ataia: E na reke iaa te bwam n rau? Are ti na onimakinna bwa e na buokiira n te aki nanokokoraki ao te korakora n tokanikai i aon kangaanga aikai? Antai ana bwai te taotaonannano, te tangira ae rooti bwai nako, ao te bai ae mwaakaroiroi are e na tabekiira man kamatoaira?
Ana titiraki nanora aika nano, ake a waerake inanon rawawatara ao moan kataakira, a tobwaki rinanon ana tangira Iesu Kristo are e aki bwaka. Irouna, ao rinanon kakabwaia ake a beritanaki man Ana euangkerio are e kaokaki, a reke kaekan ara titiraki. Bon rinanon Ana Mwakuri ni Kamaiu ae akea tiana are ti a karekea iai te bwaintituaraoi ae akea kabotauana—teuana man te kaantaninga, te kabebeteaki, ao kakoauaan teimatoan Ana kakawakin inanon maiura. E kona n reke aio irouia aomata ni kabane ake a arori baia ma te onimaki, n ramwanea te rau ao te kamaiuaki are E anganira n akea boona.
E taakin baina te Uea n anoira n tatabemaniira, te kanikina are bon aan Ana tangira ae e tabu ao Ana akoi. E rietaata riki Ana kakao nakon te wewete ae e mangori; bon te berita ae e tabu, are e kamatoaki ni mwakaroiroin ana akoi ae akea tokina. Inanon booki aika tabu, ao E tangiriira ni koaua:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; ba I nimamanei ao I nanorinano: ao e na reke i roumi iai motikan rawaia tamneimi.
“Ba e aoraoi amou, ao e bebetee uotau.”
Bebeten Ana kakao aika “nakomai nakoiu” ao “amoa amou” e kamatoaa kakawakin Ana berita—te berita ae e buburakaei man tabwanin raoi n te aro are e rabwatana Ana tangira, ao e anganira te raunnano: “Kam na karekea te rau.”
Ngkai ti botumwaaka n ukoukora kairan tamneira, ti na tiku i aon borauakinan te bitaki ni koaua are e na kamatoatoa ara koaua. Ngkai ti iangoa mwaitin Aia tangira ae e kororaoi Tamara are i Karawa ao Iesu Kristo, e kaona nanora n te kakaitau, ao te nanorinano, ao te motinnano ae booureirei n toua kawain te beku.
E reirei Beretitenti Nelson bwa “ngkana ti kabotoa maiura n ana babaire ni kamaiu te Atua … ao Iesu Kristo ma Ana Euangkerio, ti kona n namakina te kimwareirei n aki tarai bwaai ake a reke—ke ake a aki reke—inanon maiura. E reke te kimwareirei mairouna ao ibukina bwa iai Ngaia.”
E taku ana taeka Aramwa nakon natina ae Ereman: “Ao ngkai, O natiu ae Ereman, nooria, ko bon mena i nanon am tai n rikirake, ao ngaia are, I bubutiko bwa ko na ongo au taeka man reirei mai irou; bwa I bon ataia bwa ane a onimakina te Atua ao a na bon boutokaaki n rawawataia, ma aia kaangaanga, ma karawawatakiia, ao a na uotaki rake n te kabanea ni bong.”
E taku ana taeka Ereman nakoia natina mwaane n irekereke ma te reirei are kabotoan te Tia Kamaiu inanon maiura: “Ao ngkanne, natiu mwaane, uringnga, uringnga bwa bon i aon te bwaa are ara Tia Kaboomwi, are Kristo, natin te Atua, are kam na riai ni katea iai aami.”
Ni Mataio 14 ti reiakinna bwa ngke E ongo maten Ioane te Tia Bwabetito, E nako ni kaokoroa n ti ngaia Iesu. Ma e ngae n anne, e rimwiaki irouia aomata aika a uanao. Ibukin ana nanoanga ao ana tangira, e aki katokanikaia rawawatana bwa e na tukia man karaoan tibwangana, ngaia are e butimwaiia, ao e katoki aoraki ibuakoia. Ngke e a kaani bong, a kaitara ma te kangaanga ana reirei: a uanao aomata ao e karako te amwarake. A tuatua bwa e na kananako Iesu nakoia aomata bwa a na nako ni kabooi kanaia, ma Iesu, e onrake n te tangira ao te kantaninga ae abwabwaki, ngaia are e tua nakoia ana reirei bwa a na kamwarakeia.
Ngke a tabe n iangoa te kangaanga aei ana reirei, E kaota ana onimaki ao Ana tangira Iesu iroun Tamana, are e raonaki ma ana tangira ae e aki bwaka ibukia te botanaomata. E tua nakoia aomata bwa a na tekateka i aon te uteute, ao man ti nimaua te kariki ao uoman te ika, E kaitaua Tamana, ni karabwarabwa ibukin mwaakan te Atua are bon Kariaiakana ao mwaakana.
I mwin are E kakaitau, E tabeuta te kariki Iesu, ao e angania ana reirei bwa a na tibwaia nakoia aomata. Bon te kakai, e aki ti tau te amwarake ma e tabunako mwaitina, ao 12 te bwaene nikirana. Te kurubu are e kamwarakeaki aei bon nimaua tengaa mmwaane, n reitaki ma aine ma ataei.
E katerea te reirei ae moanibaan te kakawaki: ngkana ti aitara ma kangaanga, ti kabanea ara iango n te kanganaga. Ma, Iesu Kristo, E kaota mwakaroiroin kabanean ara iango iroun te Tama, te kakaitau, ao ataakina bwa e aki reke tobwaan ara kangaanga i bon iroura, ma e reke iroun te Atua.
Ngkana ti aitara ma kangaanga, ti kabanea ara tai n te kangaanga are ti mena inanona. Bon iai ara kangaanga ao ti baraakin, ma kingin te tokanikai e reke man are ti taraia. Karikan Kristo bwa moanibaan ara iango ao ara mwakuri, bon katomakira nakon Ana taratara ao korakorana. E aki kakeaa rawawatara karaoan aei; ma, e buokiira ni karekei kawai n tokanikai rinanon te kairiri ae e tabu. Uaan aei, ti karekei kaeka ao te korakora are e reke man te rabakau ae e rietaata riki. Te waaki rake inanon te taratara are e kabotoaki iroun Kristo, e kamatoaira n te korakora ao te wanawana n raira ara kangaanga nakon te tokanikai, are e kauringira bwa iroun te Tia Kamaiu, e kona n riki te kangaanga ae e buburakaei bwa kawain te rikirake ni maiura n tamnei.
Karakinan Aramwa te teei n Ana Boki Moomon, e kaota tamnein te kamaiuaki ae anainano ao mwakaroiroin kabotoan maiura iroun Kristo. Te moan tetere, e kaitara Ana Ekaretia te Uea Aramwa, ao e bati ae kairia nako man kawain te raoiroi. Ma, e kaoti mwaakan karawa, ngke e ruo te anera, man boaia man ana kairua nako.
N te rotongitong are e mena inanona, e maraki ana iango ao e tangira otinakona man rawawatan tamneina, E uringi ana reirei tamana Aramwa ake bon rongorongon Iesu Kristo ao mwaakan Ana Mwakuri ni Kamaiu. Ao nanona are e bwarua te kamaiuaki, e raira nanona ma te koaua ao e kakorakora ni bubuti ana nanoanga te Uea. Moan te kakawaki ngke e anga nanona ni kabanea, ike e a karika Kristo bwa moan ana iango n aron Aramwa n ukoukora Ana nanoanga ma te koaua, ngaia are e karekea te bitaki. E bua rawawatan ana iango ao korakaina man oneaki mwia n te kimwareirei ao te rau ae takaburinako .
Ti onimakina Iesu Kristo ao boni Ngaia kingin te tokanikai i aon kangaangan te maiu aei. Rinanon Ana anga karea, E kabooi ara bure man katokaa I aona korakaira—marakira, motibuaka, karawawata, ao te maaku—ao E kabwarai burera man kamaiura ngkana ti Onimakinna ao n bita maiura nakon te tamaroa. Bon te Tia katoki aorakira, are karaunano man kamaoi ikoakin nanora rinanon Ana tangira ao mwaakana, n ai aron are E katoki aorakia aomata ngke E mena i aon te aba. Boni ngaia te ran ni kamaiu, are katoka takan tamneira n Ana tangira ma Ana akoi ae teimatoa. Aio aron te berita are E angan ainen Tamaria n te mwanibwa, are “koburake mai iai te ran ni kamaiu.”
I kaota au koaua ma nanou bwa E maiu Iesu Kristo, ao E tararuaa Ana ekaretia, Ana Ekaretia Iesu Kristo ibukiia Aika Itiaki ni Boong aika Kaitira. I kaota au koaua bwa boni Ngaia te Tia Kamaiu n te aonaaba aei, Uean te Raoi, Aia King king, Aia Uea uea, te Tia Kabooa te aonaaba aei. I kamatoa ma te aki nanokokoraki bwa ti mena n tainako n Ana iango ao n nanona. Kanikinaean aei, E a tia ni kaoka Ana Ekaretia ni boong aika kaitira man wetea Beretitenti Russell M. Nelson bwa Ana burabeti ao te Beretitenti n Ana Ekaretia n te tai aio. I ataia bwa Iesu Kristo E anga maiuna bwa ti aonga ni karekea te maiu are akea tokina.
Ngkai ti kataia ni karikia bwa Ngaia boton maiura, a na rarangaki nakoira kaotioti, e ramwaneira Ana rau ae mwaaka, ao e na kabwaraki ara bure man katokaki aorakira man Ana Mwakuri ni Kamaiu ae akea tiana. Bon Mairouna are ti karekea iai te korakora n tokanikai, te ninikoria n botumwaaka, ao te rau are e riaon te atatai. Ti a kataia ni kaniia n te bong koraki, te oi are e reke mai iai te raoiroi ni kabane, te oota are e na kairiira nako matan Tamara are i karawa. N aran Iesu Kristo ae tabu, amen.