Berita aika Tabu ao Mwioko
E kinaaki ana Ekaretia Iesu Kristo bwa te ekaretia ae e katuruturui karaon berita aika a tabu ma te Atua.
“Tera kaokoron am ekaretia ma ake tabeua?” Au kaeka nakon te titiraki ae kakaawaki aei e a kakaokoro ngkai I a mwaane ao ngkai e a rikirake te Ekaretia. Ngke I bungiaki i Utah n 1932, ao kaain ara Ekaretia e kaniia 700,000, angiia riki a ikotaki i Utah ao n titeiki ake a uakaan. N te tai anne, bon ti 7 mwaitin tembora. N te tai aei mwaitiia kaain ana Ekaretia Iesu Kristo ibukiia Aika Itiaki ni Boong aika Kaitira e a raka iaon 17 te mirion n aba aika 170. Man Eberi 1 ti a tia ni katabui 189 tembora n aba aika a mwaiti ao 146 a babaireaki ao a mwakuriaki. I namakinna bwa N na taetae iaon oin kantaninga n tembora aikai ao rongorongo ao kakaawakin berita aika a tabu n ara nebonebo. Aio ena manga karikirakea katamroaan te reirei irouia taan taetae ake imwaaina
I.
Te berita bon te motinano ni kakoroi bukin mwioko. Motinano inanora a kakaawaki ibukin kabutan maiura n tatabemaniira ao ana kakamwakuri te botanaomata. Te iango aei n te tai aei e tei bwa te kakaewenako. Bwanaaia kurubu n aomata ae e karako a kaitara mwaakan tuua ao a kairoro bwa aomata a riai ni kainaomataaki man totoko n tianakn inaomataia n tatabemaniia. Ma ti ataia man are ti rinanona n te mireniam bwa ti kanakoi inaomataia tabeman ni karekean kabwaia ni maeka inanon baronga aika a barongaaki. Totoko n inaomatan temanna a boboto i aon motinano ke berita, ake a maroroakinaki ke a kaotaki ni kakoauaaki.
Aikai tabeua katooto ni kairan waakin mwioko iaon berita irouia ara botanaomata: (1) taan moti, (2) taanga ni buaka, (3) taan mwakuri n te onaoraki, ao (4) taan tiriai. Ni kabane ake a irekereke inanon nakoa aika kinaaki aikai a karaoi kabaeakiia—n tainako iaon te tua ke te berita—ni karaoi tibwangaia ake a katabeaki iai. Aroia naba ara mitinare aika bwanin aia tai. Oneaia aika okoro ke araia n aia taeki a kananonaaki bwa ana kaotiia bwa iai mwiokoaia iaan te berita ao iai tibwangaia n angareirei ao a riai ni boutokaki n aia beku anne. Te kantaninga bwa e na kauringiiia naake a bwainiia ibukin tibwangaia are a berita iai. Akea “mwaakan” oneaia aika a kaokoro ke kanikina, bon tii te kauring ae kainnanoaki ke ibuobuoki iaon te tibwanga ae onoti iroun are e bwainna. Te katoto naba ke kanikinaa n te kabae ke te mwamwa ni mare ao tabena are e kaotia nakoia ake a nooria ke te kauring nakon teuare ke neiere e kabongana n tibwanga n aia berita.
II.
Te bwai are I a tia n taekinna iaon te berita bon aan kairakin maiuia aomata ni kaineti riki ma te tua ke te berita n te ekaretia. Aan ao rongorongoia ekaretia aika a mwaiti ni kabaeakiia ao katauakiia e boboto i aon te berita. Te katoto, ana berita Aberaam e riki bwa boton kateia aaro aika a mwaiti aika a rang ataaki. E kaota te iango ae mimitong n ana berita te Atua are e berita iai nakoia Natina. N te OTetemanti e tataekini ana berita te Atua ma Aberaam ao ana kariki.
Te moan itera n ana Boki Moomon, are e koreaki n tain te O Tetemanti, e kamatata taben te berita n rongorongoia ao n aia nebonebo kaain Iteraera. E tuangaki Nibwaai bwa aia koroboki bon “rongorongoia Iutaia, are kanoana bon taekan ana berita aika a tabu te Uea, are e a tia ni karaoi nakoia kaain te bata are Iteraera.” N ana boki Nibwaai e okiokira naba rongorongon ana berita ae e tabu Aberaam ao nakoia Iteraera bwa “ana aomata inanon te berita ae tabu te Uea.” Kakaraoan te berita ma te Atua ke ma taan kairiiri n te aro e koreaki naba n Ana Boki Moomon n rongorongon Nibwaai, Iotebwa i Aikubita, te Uea are Beniamina, Aramwa, ao Kaaben Moronaai.
III.
Ngke e roko tain kaokan bwaninin ana euangkerio Iesu Kristo, e wetea te burabeti te Atua, Iotebwa Timiti. Ti aki ata kanoan ana kaetieti ae bwanin te anera are Moronaai n taai akekei nakon te kairake ni burabeti ae e tabe n ikawai. Ti tii ataia bwa e tuanga Iotebwa bwa “Te Atua iai ana mwakuri ae e na [anganna] bwa e na karaoia” ao bwa “kabwaninan te Euangkerio ae akea tokina” e nang kaoti, n raonaki ma “berita nakoia kaaro.” Ti ataia naba ni koroboki aika a tabu bwa Iotebwa Timiti e kakorakora ni wareki koroboki aika a tabu—riki imwain ae e tuangaki bwa e na katea te ekaretia—n angiin reirei iaon berita ake e rairi inanon Ana Boki Moomon. Te boki anne moan te korakora ibukin kaokakin te euangkerio ae bwanin, n raonaki ma ana babaire te Atua ibukiia Natina, ao ana Boki Moomon e kaonaki ni booki ni kakoaua n te berita ae e tabu.
Ngkai e a tia ni wawarekia n te Baibara, e ata Iotebwa ana boki Ebera’ bwa e taekina ana kantaninga te Tia Kamaiu bwa e na “karaoa te berita nabangkai ma te bata are Iteraera ao ma te bata are Iuta.” Ebera e taekinna naba bwa Iesu ngaia “te tia raoi n te berita nabangkai.” Ae moan te kakawaki, rongorongon te Tia Kamaiu n te baibara n ana ibuobuoki iaon te aba e atunaki bwa, “Te Nu Tetemanti,” titebo nanona ma “Te Berita nabangkai.”
Berita aika a tabu bon aan kaokan te euangkerio. Aio e kaotaki n ana moan mwaneka te Uea are e kaira te Burabeti bwa e na karaoia ni katean Ana Ekaretia. Ngke e tia ni boretiaki ana Boki Moomon, te Uea e kaira katean Ana Ekaretia are e kaokaki, ao e aranna bwa Ana Ekaretia Iesu Kristo ibukiia Aika Itiaki ni Boong aika Kaitira. Te kaotioti are e tauaki mwiina n Eberi 1830 e kaotia bwa aomata “a na butimwaeaki ma te bwabetito inanon ana ekaretia” i mwiin ae a tia ni “kakoaua” (are nanona bwa a bon kakoaua) “bwa a rairi nanoia ni koaua man aia bure nako, ao a kukurei ni katoka iaoia aran Iesu Kristo, n nanomatoa ni beku irouna ni karokoa te toki.”
Te kaotioti naba anne e taekinna bwa te Ekaretia e na “ikotaki n taainako n anaa te kariki ma te wain [ran] bwa kauringaan te Uea ae Iesu.” Kakaawakin te otenanti aei bon kakoauana n taekan berita aika a tabu are e katereaki ibukin te unimwaane ke te ibonga are e tararua. E kakabwaia te kanikina n te kariki are “nako nanon tamneia ake a na bane n nimma …, bwa … aonga ni kakoaua nakoim, O te Atua te Tama ae Akea Tokina, bwa a bon kukurei ni katokaa i aoia aran Natim, ma n aki toki n ururingnga ma ni kawakin ana tua nako ake E a tia n anganiia.”
Tibwangan te berita ae e tabu are e boboto iaona e manga kamatoaki n ana kabwarabwara te Uea are e anga ni moan boretian Ana kaotioti. Ikanne te Uea e katanoata bwa E a tia ni wetea Iotebwa Timiti ibukiia kaain aon te aba “bwa a taonnako man au otenanti, ao n urua au berita ae tabu ae akea tokina.” Te kaotioti e kabwarabwara riki bwa Ana tua ake e anga “ bwa e aonga ni manga kamatoaaki au berita ae tabu ae akea tokina.”
Ni boong aikai ti a atatai n tibwangan te berita ae e tabu n te Ekaretia are kaokaki ao aia nebonebo kaina. E anga te kabwarabwara ae kimototo Beretitenti Gordon B Hinckley n te bitaki imwiin ara bwabetito ao anaakin te toa ni katoa wiiki: “Membwa n tatabemaniia ake a tia n rin n ranin te bwabetito a riki bwa taan bukamaru nakon te berita ae e tabu. Ni katoa tai are ti ana iai te toa n ana katairiki te Uea, ti kaboua te berita anne.”
Ti a tia ni kauringaki iroui ataan marooro aika a mwaiti n te maungatabu aei bwa Beretitenti Russell M. Nelson e taekina n tainako bwa te babaire ni kamaiu bwa te “kawai n te berita,”are “e kairiira n okira [te Atua]” ao “bon taekan ni kabane ara reitaki ma te Atua.” E reirei aron kakawakin berita aika a tabu ni bukamaru n te tembora ao ni kairoroira n noora n noora te toki mai moa ao ni iangoa te abanuea are tiretio.”
IV.
Ngkai I a taetae iaon berita n te tembora. Ni kakoroan bukin tibwangana ni kaoka bwaninin ana euangkerio Iesu Kristo, te burabeti Iotebwa Timiti e kabanea nikiran ana kabanea n ririki ni kaira katean te tembora i Nauvoo, Illinois. Rinanona te Uea e kaoti reirei aika a tabu, tuua, ao berita aika a tabu ibukiia ake ana onea mwiina ni karaoi mwakuri n tararua n te tembora. I nanon te tembora ao aomata a katabuaki—n te bukamaru n te tembora are a aranna—bwa ana reireinaki n ana babaire ni kamaiu te Atua ao a kaoaki bwa ana karaoi berita aika a tabu. Naake a kakaonimaki ni maiuakin berita aikanne iai te berita nakoia ae a na nganaki te maiu ae akea tokina, ngaia are “bon aia bwai bwaai ni kabane” ao a na “maeka ma te Atua ao Kristo n aki totoki.”
Bukamaru n te entaumente n te Tembora i Nauvoo a karaoaki bon i mwaia ara bwaeoniia n taai akekei ake a mwananga ni waakina mwanagaia ae e ururingaki nakon maunga aika raroa i Maeao. E mwaiti ara kakoaua mairouia bwaeoniia akanne bwa te mwaaka are a karekea man kabaeakiia nakon Kristo n aia entaumente n te Tembora i Nauvo e anganiia te korakora ni karaoi mwanangaia ae abwabwaki ao ni katei aroia i Maeao.
Aomata ake a tia n entau n te tembora ae e tabu a katabeaki bwa a na kabonganai kaamenti n te tembora, te kunnikai ae aki nooraki ibukina bwa e kabonganaaki iaan te kunnikai are iaona. E kauringiia membwa ake a tia ni katabuaki n te berita ae tabu ake a tia ni karaoi ma kakabwaia ake a tia n taekinaki n te berita bwa e na reke n te tembora ae e tabu. Karekean kaantaninga aika a tabu akanne, ti tuangaki bwa ti na reitinako ni kabonganai kamenti n te tembora, ma bon ti naake aki kairaki bon naake iai bukina ae e riai. Ibukina bwa te berita e aki motirawa tebongina, iroun temanna bwa ena kanakoa ana kamenti e na kona n anaranaki bwa te kaki tabena ao ni kakabwaia ake a ana mai iai. Ni kaitaraana, aomata ake a kabonganai aia kamenti ma te kakaonimaki ao a kawakin aia berita n te tembora a kamatoai tibwangaia ae ana reirei te Uea Iesu Kristo.
Ana Ekaretia Iesu Kristo Ibukiia Aika Itiaki ni Boong Aika Kaitira e a katei tembora ni kabutaa te aonaaba. Oin te kantaningabwa bwa a na kakabwaiaia natin te Atua n nebonebo n te tembora n tibwangaia ae e tabu ao mwaaka ma kakabwaia aika a onoti ni kabaeaki ma Kristo ake a karekei man berita aika a tabu.
E kinaaki ana Ekaretia Iesu Kristo bwa te ekaretia ae e katuruturui karaon berita aika a tabu ma te Atua. A mena berita i nanon otenanti nako ni te kamaiuaki ao karietataaki ao ake a karaoaki i nanon te Ekaretia ae e kaokaki aei. Te otenanti n te bwabetito ao berita aika a tabu ake a irekereke ma ngaiia bon bwaai aika a kainnanoaki ibukin te rin n te abanuea are te tiretio. Otenanti ao berita ake a irekereke n te tembora bon bwaai aika a kainnanoaki aika kakaawaki ibukin te karietataaki n te abanuea are te tiretio, are bon te maiu ae akea tokina, “te bwai n tituaraoi ae moan te korakora mai i buakon ana bwai n tituaraoi nako te Atua”. Anne ana boto n iango Ana Ekaretia Iesu Kristo ibukiia Aika Itiaki ni Boong aika Kaitira.
I kakoaua iroun Iesu Kristo, are bon Ngaia kautuun te Ekaretia anne, ao n anga Ana kakabwaia nakoia ake a uokira ao ni kawakin aia berita aika a tabu. N aran Iesu Kristo, amen.