A Na Nakoraoi Bwaai ni Kabane Ibukin Berita aika Tabu n te Tembora
Akea te bwai teuana ae kakaawaki riki nakon karinean berita aika tabu ake ko karaoi ke ko na karaoi n te tembora.
Tariu ao mwaaneu aika kam tangiraki, e a tia n riki te tetere n te maungatabu ni kabuta aei, irou, bwa te tai ae tabu. I rangi ni kakaitau ibukin te tibwanga n taetae nakoia mirion Aomata Aika Itiaki ni Boong aika Kaitira ao raoraora ni kabuta te aonaaba. I tangiri ngkami, ao I ataia ae e tangiri ngkami te Uea.
Inanon 50 tabun te ririki n nako, I karekea te tibwanga ni beku bwa te beretitenti n te Ricks College i Rexburg, Idaho. N te moaningabong n 5 Tuun 1976, kainabau, Kathy, ao Ngai ti buti mai Rexburg nakon te Idaho Fall Tembora ni kaea kabaeakiia raoraora aika ti taneiai ma ngaiia. E koaua, ma natira mwaane aika a uarereke aika aman ni mweengara n te tai anne, e na koro nanon mwanangara nakon te tembora ti man ana ibuobuoki te tia taraia natira ae ninikoria! Ti katikuiia natira aika kakateke n ana tararua ao ni karaoa te mwananga ae e uarereke, 30 te miniti maanna.
Te bwai ae ti rinanona n te tembora n te bong anne e rangi n tamaroa, are bon arona ni katoatai. E ngae n anne, imwiin tokin te kabaebae n te tembora—ao ngke ti a katauraoira n okira mweengara—ti noria bwa a mwaiti taan mwakuri n te tembora ao ake a roko ni mamarooro ma te nakonnano n te tabo n tataninga n te tembora. N te tai ae waekoa, temanna te tia mwakuri n te tembora e kaongoira bwa e a uruaki nnen te Ran i Teton ae boou are e a tibwa karaoaki i Idaho mainiku! E raka iaon 80 te mirion te kaaran n ran (300 te mirion te cubic meters) ae biri rinanon nnen te ran n nakon 300 te tikuea maire (775 tikuea km) n te mwanono ni kawa ake a kaan. Angiin te kawa i Rexburg a iekaki ni mena iaan te ran, ma auti ao taian kaa a katikaki nako man raangan te ran. Uoua te katenimwakoro man te mwaiti ae 9,000 taan maeka ai akea ngkai mweengaia.
N aron ae kam ataia, ara iango ao tabeaiangara a waekoa n oki nakon kamanoaia ao aroia natira aika a tangiraki, ataein te reirei aika bubua mwaitiia ao taan mwakuri, ao te komiunite ae ti tatangiria. E kee iaan 30 te maire (50 km) raroara man mweengara, ma n te bong aei, imwaain taian mobaire tareboon ao tekiti, bon akea te anga n reitaki ni waekoa ma natira, ke ni karaoa te mwananga mai Idaho Falls n oki nako Rexburg, ngkai a bane ni kainaki kawai.
Ti te bwai ae ti kona ni karaoia ti na tiku n te outero i Idaho Falls. Ti katorobubua Ngai ao Kathy i nanon ara outero ae e uarereke ao ni bubutiia Tamara are i Karawa ma te nanorinano ibukin kamanoaia natira aika a tangiraki ao ibukiia ngaa n aomata ake a rootaki n te kangaanga ae riki aio. I uringa ae e a nanakonako Kathy inanon aoa aika mwaiti ni karokoa e a ingabong ma te raraoma ibukiia natina. Irarikin ae bon raraomau, e reke angau ni karaua nanou ao n tokina I a matunako.
E aki maan imwiin anne kainnabau n aki toki ae kakateke e kautai ao n taku, “Hal, ko kanga ni matu n te tai ae aekan aei?”
Taeka aikai a roko n rangi ni mataata nakon au iango ao nanou. I taku nakon kainabau: Kathy, bwa tera ae riki, a na bane n nakoraoi bwaai ni kabane ibukin te tembora. Ti a tia ni karaoi berita aika tabu ma te Atua ao n tia ni kabaeaki bwa utu n aki toki.”
N te tai naba anne, kanga ai aron Tamnein te Uea ae e kamatoaa i nanora ao ara iango n te bwai are ti a kaman ataia bwa e koaua: te berita ni kabaebae, are e reke n Ana auti te Uea ao ni karaoaki ma te kariaiakaki n te nakoanibonga ae koaua, e a tia ni kabaeira bwa taanga, ao a tia ni kabaeaki natira nakoira. Bon akea kainanoakin te maaku, ao ti kakaitau bwa a kamanoaki natira mwaane.
Tao te rongorongo mairoun Beretitenti Thomas S. Monson e kabwarabwara raoi te bwai are e namakinna Kathy ao Ngai n te tairaki are e ururingaki anne. “Ngkana ti roko n te tembora, e kona n roko nakoira iangoan te maiu n tamnei ao namakinan te rau. … Ti na karekea nanon raoi ana taeka te Tia Kamaiu ngke E taku: ‘I katuka te rau iroumi, I anganingkami au rau. … A na tai rawawata nanomi, ao a na tai maaku” [Ioane 14:27].’”
I a tia ni kakabwaiaki n namakina te rau anne ni katoa tai are I rin n te tembora ae tabu. I uringa te moan tai are I rinnako iai i nanon te Salt Lake Tembora. Bon te kairake n ataeinimwane ngai.
I tararake n taraa te tiiring ae mainaina are e kaota otana are kaanga e uki nako karawa. Ao n te tai anne, e roko te iango Irou n taeka aika matata aikai: “I a tia ni mena i nanon te tabo ae ota aei mai imwaina.” Ma imwiina n te tai naba ae waekoa e roko n au iango, tiaki n oin bwanaau, taeka aikai: “Tiaki, ko tuai n roko ikai mai imwaina. Ko tabe ni uringa te tai i mwain bungiakim. Ko mena n te tabo ae e tabu n aekan aio are e kona n roko iai te Uea.”
Tariu ao mwaneu, I kaotia ma te nanorinano bwa ngkana ti nakon te tembora, ti kona ni kauringaki n rikin raoi tamneira ae akea tokina, reitakira ma te Tama ao Natina ae rine, ao nanora are ti tangiria bwa n tokina ti na oki nakon mweengara are i karawa.
N taian marooro inanon maungatabu aika tibwa nako, e reirei Beretienti Russell M. Nelson:
“Te tabo ae mano n te maiu n tanmei bon maiuakinan baike inanon am berita aika tabu n te tembora!”
Ni kabane bwaai aika ti kakoauai ao ni kabane ana kakabwaia te Atua are E a tia ni karaoia ma Ana aomata i nanon te berita ae tabu a bane n roko i nanon te tembora.”
“Aomata nako ake a karaoi berita aika a tabu … n te tembora—ao ni kawakinii—e karikirakea karekean mwaakan Iesu Kristo.”
E reirei naba bwa “n te tai are ti karaoa te berita ae e tabu ma te Atua, e a toki ara kaiangatoa n rinean te raoiroi ao te buakaka n aki toki. Te Atua E na bon aki katoka Ana reitaki ma naake a bakaea reken te reitaki ma Ngaia. Ni koauana, ni kabane naake a karaoa te berita ae e tabu ma te Atua iai aia konaa ni karekea te aeka n tangira ao n nanoanga ae onoti.”
Iaan ana kairiiri Beretitenti Nelson ae kairaki iroun te tamnei, e a tia te Uea ni kabirimwaaka, ao e na reitinako ni kabirimwaaka, katean tembora ni kabutaa te aonaaba. Aio are e na karekea nakoia natin te Atua taian otenanti ni kamaiu ao ni karietataaki ao ni karaoi ao ni kawakin berita aika tabu. Karekean ae ko na tau ni karaoi berita aika tabu bon tiaki te bwai ae karaoaki n ti te taina ma bon i nanon nako maium. E a tia n taku te Uea bwa e na anaa nanora ni kabane, marurungira, ara iango, ao karakorara.
Iririakin karaoan otenanti n te tembora ni katoatai e kona ni karika tein aron te kakaonimaki nakon te Uea. Ngkana ko kawakin am berita aika tabu n te tembora ao n ururingii, ko kaoa ana iraorao te Tamnei ae Raoiroi ni kakorakorako ao ni kaitiakiko.
Ko na namakina ngkanne te oota ao te kaantaninga ni kakoauaa bwa a koaua kakabwaia. Ko na ataia bwa ni kabane berita aika a tabu ma te Atua bon te tai ae reke ni kaniiko riki Nakoina, are e na karika ae ko na tangiria i nanom ni kawakin berita aika tabu n te tembora.
Ti a tia ni beritanaki, “Ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n nanoanga nakoira.”
Bon rinanon te berita ni kabaebae n te tembora are ti kona ni karekea iai te kakoaua n reitakin te utu are e na reitinako imwiin te mate ao n teimatoa n aki toki. Karinean te mare ao berita aika tabu n te utu are a karaoaki n Ana tembora te Atua a na karekei kamanoakira man buakakan te nano n riribai ao te kainikatonga.
Kaaro, te teimatoa n tararuaia tarira ao mwanera i bon imarenara e na roko ti man te kekeiaki ae teimatoa ni kaira am utu n Ana kawai te Uea. Anganiia aia tai ataei n tataro i bon ibukiia n tatabemaniia nako. Waekoa ataa moan rikin te itabarara, ao kinai mwakuri n ibuobuoki aika aki bangaomata, riki bon nakoia i marenaia. Ngkana tariia ao mwaneia a tataro i bon ibukiia ao ni beku i marenaia, a na kamarauaki naano ao a na ibuobuoki i marenaia ao nakoia aia karo.
Aio mwakoron, are e kabwarabwaraaki iroun Maraki ngke e taetae iaon te burabeti ae Eria: “E na unikia te berita i nanoia naati are a tia ni karaoaki nakoia taama, ao a na rairi nanoia naati nakon tamaia. Ngkana tiaki ngaia anne, te aonnaba ae e bwanin e na bon urubekebekeaki n rokona.”
A na roko nakoira ni kabanekakatai, kangaanga, ao uruaki n nano. Bon akea temanna ae e na aki rotaki man “te bwai ni kateketeke n te iriko.” Ma, ngkai ti nakon te tembora ao n uringii ara berita aika tabu, ti kona n tauraoi ni karekei bon oin kairara mairoun te Uea.
Ngke ti mareaki ngai ma Kathy ao ni kabaeaki n te Logan Utah Tembora, bon Unimwaane Spencer W. Kimball n te tai anne ae e karaoa te kabaebae. Inanon tabeua taeka ake e taekini, e anga te reirei aei, “Hal ao Kathy, maiu bwa ngkana e roko te wewete, e kona ni beebete kitanakin temanna ke te bwai teuana.”
Mai moana, ti aki mataata bwa teraa nanon te reirei anne ibukira, ma ti kabanea ara konaa ni maiu n te kawai are ti kona ni katauraoi ni beku ibukin te Uea ngkana e roko te wewete. Imwiin mareakira n ae kaniia 10 te ririki, e roko te wewete ae aki kantaningaaki mairoun te Kamitina n Reirei n te Ekaretia, Neal A. Maxwell.
Te reirei ae tamaroa are e anga Beretitenti Kimball n te tembora bwa e na “bebete kitanakin temanna ke te bwai teuana” e a mataata raoi. Kathy ao Ngai ti karekea te wewete ni kiitana te utu ae tamaroa i California ni beku ni mwiokoara ao n te tabo ae I aki ataia mai i mwaina. Irarikin anne, a tauraoi ara utu ni mwananga ibukina bwa te burabeti, n te tembora ae e tabu, ae e reke iai te kaotioti, e noora te bwai n taai aika a na roko are n te tai anne ti a tauraoi nako iai.
Tariu ao mwaneu aika kam tangiraki, I kaota au kakoaua bwa bon akea te bwai ae kakaawaki riki nakon karinean te berita ae tabu are ko a tia ni karaoi ke ko na karaoia n te tembora. N aki tabe bwa ko mena ia ni mwanangam i aon kawain te berita, I kaungako bwa ko na tau ao ni kona ni kawara te tembora. Kamwaita kakawarana ngkana e bon reke taina. Karaoa ao kawakin berita aika tabu ma te Atua. I kona ni kakoauaa nakoim koaua n te koaua are I tibwaia ma Kathy ni bwakanakon te tai n te tairiki n ae kaniia nimaua te ririki n nako n ruun te utero ae uarereke i Idaho Falls: “Bwa tera ae riki, a na bane n nakoraoi bwaai ni kabane ibukin te tembora.”
I kaota nakoimi au kakoaua bwa Iesu bon te Kristo. E maiu ao ni kaira Ana Ekaretia. Taian tembora bon ana auti te Uea. Beretitenti Russell M. Nelson bon ana burabeti te Uea n te aonaaba. I tangiria ao I tangirii ngkami ni kabane. N aran Iesu Kristo ae tabu, amen.