Boua ao Oota
Ngaira naba ti kona ni karekei oin ara boua ae te ota—teuana te ota n te tai teuana.
Au rongorongo bon nakoia tekoraki ake a raraoma n aia koaua ibukina bwa a tuai karekei taneiai n tamnei aika a rangi n riao aroia. Au tataro bwa N na anga te rau ao te kaantaninga.
Ana euangkerio ae Kaokaki Iesu Kristo e moanaki ma kaotin otanakon te oota ao te koaua! Te teei ni mwaane ae tebwi tabun ana ririki i New York, ma te ara ae kabuta ae Iotebwa Timiti, e nako n te buakonikai n tataro. E raraoma ibukin tamneina ao arona imatan te Atua. E ukora kabwaraan ana bure. Ao e aki ataia bwa te aro raa ae na iria. E kainanoa kamatataana ao te rau—e kainanoa te oota ao te ataibwai.
Ngke e katorobubua Iotebwa n tataro ao ni “kaoti baike e tangiria [nanona],” e rabunna te rootongitong ae matenten. Te bwai ae buakaka, ae niniia, ao e bon koaua e kataia ni totokoia—ni kabaea newena bwa e aonga n aki taetae. Korakoran te rootongitong e a rangi ni korakora n te aro are e taku Iotebwa bwa e nang mate. Ma e “kabongan[a] korakora[na] ni kabane ni wetea te Atua bwa e na kamaiu[a] man mwaakan te kairiribai aei [are] e nini[a].” Ao n te “tai naba arei ngke [e] a tauraoi ni bwaka n taonaki nako n te bwarannano ao ni katuka[ki] nakon te kamaunaaki” ngke e aki ataia bwa e kona ni keiaki riki, te oota ae korakora e kaotanako te buakonikai, ni kamaenakoa te rootongitong ao ana kairiribai tamneina.
Te “boua ae te oota” ae riaon ootan taai e karaurau n ruo n toka iaona. E kaoti te aomata temanna, ao imwiina are temanna. Ae “raneaneaia ao mimitongiia e aki kona ni kabwarabwaraaki.” Te moan, Tamara are i Karawa, e wetea arana, “ni kotea are temanna—[Iotebwa!] Aio Natiu ae Tangiraki. Ongo Irouna!”
Ao man te oota ane e kaotanakoa te oota ao te koaua, e a moanaki Kaokan Bwaai. Te raanga ae korakora anne n te kaotioti mai ikarawa ao kakabwaia a na roko: koroboki aika tabu aika boou, kaokan kiing n te nakoanibonga, abotoro ao burabeti, otenanti ao berita aika tabu, ao manga katean ana Ekaretia te Uea ae koaua ao ni maiu, are n te bong teuana e na kaona te aonaaba n te oota ao te kakoaua iroun Iesu Kristo ao Ana euangkerio ae kaokaki.
Aikanne ni kabane, ao aika mwaiti riki, a riki man ana tataro ni kakaae te ataei ni mwaane ao te boua ae te ota.
Ngaira naba iai kainanora aika ti kakaei. Ngaira naba ti kainanoa kainaomataakira man mangaongaon te maiu n tamnei ao rootongitongin te aonaaba. Ngaira naba ti kainnanoia ni bon ataia i bon iroura. Aio teuana bukina ae Beretitenti Russell M. Nelson e a tia ni kaoira bwa ti na “Reiti[ira] ma ootan Kaokan Bwai ae mimitong”
Teuana te koaua ae korakora ni Kaokan Bwaai bwa e uki karawa—ao ngaira naba ti kona ni karekea te ota ao te ataibwai mai eta. I ataia bwa e bon koaua aio.
Ma ti riai n tarataraira raoi man taian kamwane n te maiu n tamnei. N tabetai kaain te Ekaretia aika a kakaonimaki a bwara nanoia ao n tokin te tai a taonnako ibukina bwa a tuai karekei taneiai n maiun tamneia ae korakora—ibukina bwa a tuai rinanon oin aia boua ae te oota. E kauring Beretitenti Spencer W. Kimball, “Kantaningaan te kamiimi, a mwaiti aika a na aki karekea bwaron kaotioti aika a katoatai n roroko.”
E uringnga ae ai aron aei Beretitenti Joseph F. Smith bwa “E tauii bwaai aika kamimi te Uea mai irou [ngke I kairake], ao e kaotii nakoiu koaua, teutana i mwin teutana, te reirei teuana i mwin teuana, ikai teutana ao ikekei teutana.”
Aio bon aron raoi ana kawai te Uea, tariu ao mwaneu. Irarikin are e na kanakoa nakoira te boua n te ota, te Uea e kaota nakoira ootan te ota, ao imwiina teuana, ao teuana.
Otanakon te ota akanne a reitinako ni bwaro iaora. E reirei koroboki aika tabu bwa Iesu Kristo bon “ootan ao … maiun te aonaaba,” bwa “Tamneina e anga te oota nakoia mwaane [ao aine] ni kabane ake a roko nakon te aonaaba,” bwa Otana e “kaon[a] annang ae akea tokina,” n anga “te maiu nakon bwaai ni kabane,” Ootan Kristo e bon otabwaniniira.
Ngkana ti a tia ni karekea ana bwai n tituaraoi te Tamnei ae Raoiroi ao ni kekeiaki ni kamwakura te onimaki, te raira n nano, ao ni karinei ara berita aika tabu, ngkanne ti bon tau ni karekei oota mai karawa aikai ni katoatai. N ana mwakoro n taeka ae e ururingaki Unimwaane David A. Bednar, “ti ‘maeka inanon te kaotioti.’”
Ma irarikina, ti bon bane ni kakaokoro. A bon aki kona uoman aomata ni bon karekei raoi taneiai aika ti te arona n ana oota ao ana koaua te Atua. Anaa tabeua te tai ni iangoa aron ae ko kangaa n rinanon ootan ao Tamnein te Uea.
Ko na bae n tia n rinanon otanakon te ota ao te koaua n aron “te rau [ae taekinaki] n am iango ni kaineti ma [te bwai] aio” are e anganiko te raraoma.
Ke n aron te namakin—te bwana ae maraara—ae tiku “n am iango ao inanom” ao ni kairoroko ni karaoa te bwai ae tamaroa, n aron buokaia tabeman.
Tao ko a tia ni mena n te kiraati n te taromauri—ke n aia kaembwa kairake—ao ko namakina te nano ae korakora ni kan iriira Iesu Kristo ao n teimatoa n onimaki. Ke tao ko tei ni kaota am koaua ae ko kantaningaia bwa e koaua ao imwiina ko namakinna bwa e bon koaua.
Ke tao ko a tia n tataro ao n namakina te kimwareire ni koauan ae e tangiriko te Atua.
Tao ko a tia n ongo ae e kaota ana koaua temanna iaon Iesu Kristo ao e riinga nanom ao n anganiko te kaantaninga.
Ke tao ko wareware n Ana Boki Moomon ao teuana te kibu ae e taetae nakon tamneim, ngkai te Atua e katikua ikekei i bon ibukim—ao imwiina ko ataia ae E bon karaoia.
Tao ko a tia n namakina ana tangira te Atua ibukiia tabeman ngkai ko beku ibukiia.
Ke tao ko korakai n namakina te Tamnei n te tai anne ibukin te rawawata ke te nako n nano ma iai iroum te bwai n tutuaraoi n tanrikaaki ao te onimaki n tanrikaaki ao n atai “ana nanoanga te Uea.”
Te bwai ae I kataia n taekinna bwa e mwaiti kawai ni karekean ootan te kakoaua mai karawa. Aikai bon tabeua mai ibuakoia. Aaki rangi n anainano aroia, ma aikai ni kabane a kaota mwakoron ara kakoaua.
Tariu ao mwaneu, I tuai n noora te boua ae te ai, ma, n aromi, I a tia n rinanon taneiai n te oota mai karawai aika mwaiti. Inanon ririki aika bati, I a tia n nabei ni kawakin taneiai ae aekan aikai. I kunea bwa ngkai I karaoi, I atai ao n uringngi riki aika mwaiti. Aikai bon tabeua katooto man maiu. Ana bon bae n aki rangi n anainano irouia tabeman, ma a bon kakawaki irou.
I uringnga bwa bon te kairake ngai ae iaki rau n tain te bwabetito. Ngke e nang moanaki te bootaki n taromauri, I namakina ana kairoro nakoiu te Tamnei bwa N a tekateka ao ni kaota te karinerine. I tekateka ao n tiku n aki kakarongoaa inanon tain te taromauri.
Imwain au mition, I rangi ni maaku bwa e aki rangi ni matoatoa au koaua. Akea man au utu ae e a tia n nako ni mitinare, ao I aki ataia ngkana I kona ni karaoia. I uringnga bwa I kamatebwai ao n tataro ma nanou ni karekea raoi te kakoaua iaon Iesu Kristo. Ngkanne n te bong teuana, ngke I bubutiia Tamau are i Karawa, I namakina mwaakan te oota ao te abue. Ao I a ataia. I bon ataia.
I uringnga ae I uti n te tairiki teuana ririki imwiina ao I karekea te namakin n te “wanawana ae itiaki” are e tuangai bwa ae N na weteaki ni beku n te kooram n unimwaane. Uoua te wiiki imwiina I a karekea te wewete.
I uringa te maungatabu ni kabuta ike temanna ae tangiraki ae kaain te kooram n Abotoro n te Tengaun ma Uoman e taekinii raoi taeka ni kakoaua are I tuanga raoraou bwa I tangiria n ongo.
I uringnga ae I katorobubua ma tariu aika bubua mwaitiia n tataro ibukin raora ae tangiraki are e wene n aki namakinaaba are e kaikeikeaki n te onaoraki ae uarereke, ae raroanako imwiin tokin buroona. Ngkai ti katiteuanaaki n nanora ni bubuti ibukin maiuna, e uti n teirake ao ni buuta te bwai are e ikeike iai mai i buana. E beku ngkai bwa te beretitenti n te titeiki.
Ao I uringa ae I uti ma te namakin n tamnei ae korakora imwiin te mii ae mataata raoi bwa raoraou ae tangiraki are I kakairi irouna ae e moantaai ni mate, e katuka te nanokawaki ae korakora inanon maiu. E wingare ao ni kukurei. I ataia bwa bon akea ana kangaanga.
Aikai tabeua mai ibuakon au oota. Iai ae bon oin am taneiai—oin am oota ae onrake n otanakon am koaua. Ngkai ti kinai, n uring, ao ni booti oota aikai “n ti teuana,” ao a na moanna n riki bwaai aika a tamaroa man korakora. “Te oota e reitaki ma te oota”—“te koaua e butimwaea te koaua.” Koauan raoi ao mwaakan otanakon teuana te koaua e kamatoaa ao ni ikotaki ma are teuana, ao are teuana, ao teuana. Teutana imwin teutana, te reirei teuana imwin teuana, te oota ikai ao te oota ikekei—teuana ae uarereke, ni kawakin taai n namakinan te tamnei—ikanne are e na bwebwerake inanora oin raoi taneiai n tamnei aika onrake n te oota. Tao akea teuana te oota ae e tau korakorana ke n oota ni kaota te koaua ae bwanin, ma botaia ni kabane a kona n riki bwa te oota n te nanououa are e aki kona te roo n tokanikai iaona.
“O ngkanne, tiaki bwa e koaua aio?” E titiraki Aramwa. “I kangai nakoimi, Eng, ibukina bwa e oota.”
“Bwa ane mai iroun te Atua e bon oota,” e reireiniira te Uea, “ao ane e karekea te oota, ao n reitinako i nanon te Atua, e na karekea riki te oota; ao te oota anne e rikirake ootana ma n oota riki ni karokoa te bong ae kororaoi.”
Nanon anne tariu ao mwaneu, bwa inanon taina ao rinanon “te botumwaaka ae korakora,” ngaira naba ti kona ni karekei oin ara boua ae te oota—teuana te oota n te tai teuana. Ao ribuakon te boua anne, ti na kunea naba Tamara are i Karawa ae tatangira ae weteira n arara, ni kairiira nakon ara Tia Kamaiu Iesu Kristo, ao ni kaoiira bwa ti na “Ongo Irouna!”
I kakoaua Iesu Kristo, bwa bon Ngaia te oota ao maiuin te aonaaba ni kabane—ao n oin am aonaaba ao ngai.
I kakoaua bwa Ngaia bon te Nati ae koaua ao ni maiu iroun te Atua ae maiu, ao bwa E tei bwa atuun te Ekaretia ae koaua man ni maiu ao ni kairaki irouia Ana burabeti ao abotoro ni koaua ao a maiu.
Ti na kinaa ao ni karekea Ootana ae mimitong ao n Rineia iaon rootongitongin te aonaaba—ni katoa tai ao n aki toki. N aran Iesu Kristo, amen.