Te Rekooti n Bwaai ake I a Tia n Noori ma n Ongo
Bon akea te tai ae e tamaroa n riki bwa te membwa n ana Ekaretia Iesu Kristo nakon te bong aei.
I mwiin au angabeba man te reirei i aon te tua, ngai ao kainnabau, ae Marcia, ti rineia bwa ti N na mwakuri n te kambwana n tua are e onoti ana mwakuri i aon ongoraean tuua. Ngke I a moana au kataneiai i aon te mwakuri, I kabanea angiin au tai ni katauraoia taan kakoaua ake ana kakoaua n tain te ongora. I reiakinna ni waekoa bwa e kona ni kuneaki te koaua i nanon te ruu ni kabowi bwa taan kakoaua, a kakoauai koauan bwaai ake a tia n noori ao n ongo. Ngke a kaota aia kakoaua taan kakoaua, a tauaki mwiin aia taeka ao a kawakinaki. Bonganaia taan kakoaua aika a bon koaua raoi e riki n taainako bwa au moan kakatauraoi.
E aki maan ataakina irou bwa taeka ake I kakabonganai ni katoabong ngkai te rooia ngai bon taeka naba ake I kakabonganai n au tai ni mamarooroakina te euangkerio. “Taan kakoaua” ao “kakoaua” bon taeka ae ti kabonganai ngkai ti tibwai atatai ao namakin ibukin koauan ana euangkerio Iesu Kristo.
Ngke I moan kamatoaki bwa te Itingaun n te Aono ae boou, ao I kauki koroboki aika a tabu n reiakina tabeu ao ni wareka Tuua ma Berita aika a Tabu 107:25, ae e kangai, “Itingaun a weteaki naba … bwa taan kakoaua aika a onoti nakoia Tientaire ao te aonaaba ni kabane.” N aron ae ko kona ni iangoia, e katikaki matau nakon te taeka ae “taan kakoaua ae a onoti.” E a mataata nakoiu bwa iai tabeu ni kaota au koaua—ni kakoaua te ara ae Iesu Kristo ao Ana euangkerio—n taabo nako ake I mwananga iai n te aonaaba.
A rangi ni mwait katooto ni koroboki aika a tabu irouia ake a nooria ni mataia ao ake a kakoaua ni bwaai ake a nooria ao n ongo.
Ao ngke e moana tauan mwiin rekooti te burabeti n taai ake ngkoa ae Moomon, e koreia, “Ao ngkai, Ngai ae Moomon, I a koroi rekooti n bwaai ake I a tia n noori ma n ongo, ao I aranna bwa Ana Boki Moomon.”
Ana Abotoro te Tia Kamaiu aika Betero ao Ioane a kamaiua te mwaane n aran Iesu Kristo te I-Natareta. Ngke a tuangaki bwa a na aki manga taetae n aran Iesu, a kaeka,:
“Tao e raoiroi riki i matan te Atua te ongo i roumi nakon te ongo iroun te Atua.
“Bwa ti aki kona n aki taekini baike ti nori ma n ongo.”
Teuana te koaua ae e rangi n anainano are e roko mairouia aika a Aomata aika Itiaki n ana Boki Moomon ake a noora rokon te Tia Kamaiu Iesu Kristo. Ongora nakon aia kabwarabwara taan kakoaua: “Ao imwin aio ao a taua mwiina: Akea te mata ae e a tia n nooria, ao akea te taninga naba ae e a tia n ongo, mai i mwaain bwaai aika kakannato ma ni kamimi n aron are ti a tia n noori man ongo are e taekin Iesu nakon te Tama.”
Taariu ao mwaaneu, n te bong aei ao I kaota au kakoaua ao ni karaoi rekootin bwaai ake I a tia n noori ao n ongo i nanon au tai ni karaoa te beku ae e tabu ngkai ana Itingaun te Uea Iesu Kristo. Ni karaoan aei I kakoaua nakoimi te Tama are i Karawa ae e tatangra ao Natina ae e akoi, Iesu Kristo, are a tia ni maraki, mate, ao ni manga uti bwa ana anga te maiu are akea tokina nakoia natin te Atua. I kakoaua te “mwakuri ae e rangi n tamaroa ao ni kamimi” ao bwa e na kauoua arorani baina te Uea ni kaoka Ana euangkerio i aon te aba rinanon Ana burabeti ae e maiu ao abotoro. I kakoauaa bwa i aon bwaa ake i a tia n noori ao n ongo, akea riki te tai ae e raoiroi ni kaaina ana Ekaretia Iesu Kristo nakon te bong aei. I ataa aio man oin wanawanau, n akea rekereken bwaai riki tabeua, ibukina bwa I a tia n noori ao n ongo.
I nanon au tai n tiniia n te reirei ae e rietata, i angabeeba man te tieminari, I anganaki au tai bwa N na atongi aran 15 ana tembora te Ekaretia. Tamnein tembora n tatabeua nako a mena i matara n ara umwanreirei, ao N na riai n ataia bwa e tei iaa te tembora aikai. Ngkai, tabeua te ririki i mwiina, bon te kakaewenako ae e rangi ni bubura—ma 335 tembora aika a mwakuri ke aika a katanoataaki—ni kinai n tatabeua. I a tia n noori angiin ana auti te Uea aikai ao ni kakoaua bwa E anga te Uea ana kakabwaia ao otenanti nakoia Natina ni kabuta te aonaaba.
A tia n reireinai raoraou ake n te FamilySearch bwa a karinaki ae raka iaon teuana te mirion aara aika a boou nakon te FamilySeracy ni katoa bong. Ngkana ko aki kunea am bakatibu ngkoananoa, I kaoiko bwa kona manga taraia riki ningabong. Ngkana e roko ni bobotiia Iteraera ni iteran te rabuna are teuana, akea riki te tai ae e tamaroa riki ni kaainakin ana Ekeratia Iesu Kristo nakon te bong aei.
Ngkai ti kaikawaiarake natira i Twin Falls, Idaho, e rangi ni uarereke au taratara i aon te Ekaretia n te aonaaba. Ngke I a weteaki bwa te Mataniwi ni Kabuta, ti kanakoaki ti katabeaki ngai ma Marcia bwa ti na mwakuri n te Aono n te Betebeke, te tabo ae ti tuai man roroko iai ma i mwaaina. Ti rangi ni kukukurei n noori titeiki man iteran New Zealand are mai i eta nako naano, ma te tembora ae e katabuaki n 1958. Bon teuana mai buakoia tembora ake 15 are I kataia ni kakauringnga n te tieminari. Ti kunei tembora n ana kaawa nako Australia aika a bubura ma titeiki ni kabuta aona. Iai katabeara i Samoa, are iai 25 titeiki i aona, ao Tonga, ike e kaania iteran te botanaomata aika a kaina te Ekaretia. Iai katabeakira ni mwakuri ibukin Kiribati, ike ti kunea iai uoua titeiki. Iai naba katabeakira bwa ti na karoko n noori titeiki i Ebeye i Mwatiare ao Daru i Papua New Guinea.
I mwiin ara tai ni beku i aban te Betebeke, tia manga kanakoaki bwa ti na mwakuri i Biribin. Ma te mimi, ana Ekaretia Iesu Kristo i Biribin e rangi ni korakora rikirakena i aon bwaai ake I a tia n ataia. Iai ngkai 125 titeiki, 23 mition, ao 13 tembora aika a mwakuri ke aika a katanoataaki. I kakoauaa te ekaretia ae e riaon 850,000 kaaina n te aba anne. I kangaa n aki ataa katean ana Ekaretia Kristo ni kabuta te aonaaba?
I mwiin teniua te ririki i Biribin, tia manga kaokaki, ao I a tuangaki bwa N na beku n te tabo are e tabe ma Mitinare. Katabeakiu aei e uotiira nakon taian mition i aon te aonnaba. N au taratara ao ana Ekaretia te Tia Kamaiu ni kabuta te aonnaba e a bon rangi n rikirake ni bubura. Ti katabeaki naba ngai ma Marcia bwa ti na kawarii taian mition i Atia. Ti kunea te titeiki tienta ae e rangi n tikiraoi i Singapore, ma kaaina aika a rangi ni tamaroa ao ni kakaonimaki. Ti kawaria kaain te Ekaretia ao mitinare n te umwantabu i Kola Kinabalu, Malaysia. Ti kaitibo ma mitinare i Hong Kong ao ni ira ana maungatabu te titeiki ma aika a kakaonimaki ao ni iitiaki.
E okioki te taneiai aei ngke tia manga kaitiboaki ma mitinare ao kaain te Ekaretia ni kabuta Europe, i Latin America, te Caribbean ao i Africa. Ana Ekaretia Iesu Kristo e rinanon te rikirake ae e korakora i Africa.
Ngai bon te tia kakoauaa reitinakoan kaokan ana euangkerio Iesu Kristo ao kakoroan nanon te taetae ni burabeti ibukin Iotebwa Timiti bwa “e na waaki nako koauan te Atua ma n ninikoria, karineaki, ao ni inaomata, ni karokoa e roko n aba nako, n roko n aono aika a kakaokoro, ni kabutaa aba n tatabeua nako, ao n ongoraeaki i nanon taninga nako.”
Ara mitinare aika a rangi n tamaroa ake a mwakuri te aonaaba bon 74,000 aika a korakora. A mwakuri ni ikotaki ma kaain te Ekaretia, a bwabetitoia e raka i aon 20,000 aomata ni katoa namwakaina. Bon kairake n ataeinimwane ao kairake n ataeinnaine aika ai tibwa 18-, 19-,ao 20- aia ririki are, man ana ibuobuoki te Uea, a tia ni karaoa te ikotaki ae e rangi ni kamimi aei. Ti kuneia kairake n ataeinimwane ao kairake n ataeinnaine aikai n te kaawa aika a uarereke i Vanuatu ao ni kaawa aika a bubura i New York, Paris, ao London. I matakuakiniia ngke a reirei i aon te Tia Kamaiu ao ni katea te Ekaretia n taabo aika a rangi ni kanganga te roko iai i Fiji ao bobotaki aika a bubura n taabo n aron Texas, California, ao Florida n te United States.
Ko na kuneia mitinare ni konan nako te aonaaba n taetae n 60 taetae aika a kakaokoro ao ni kakoroa nanon ana babaire te Tia Kamaiu are taekinaki ni Mataio 28. “Ma ngaia ae, kam na nako ni kakiritianiia botannaomata ni kabaneia, ni bwabetitoia nako nanon aran te Tama, ma te Nati, ma te Tamnei are Raoiroi.” I karineia mitinare n te Ekaretia ake ngkekei ao ngkai ao ni kauringiia te roro ae e rikirake n ana kakao Beretitenti Russell M.Nelson n roko ao ni bobota te bata are Iteraera.
I anga au kakoaua n te bong aei bwa I a tia n noora kaokan ana euangkeriao te Tia Kamaiu ae korakora n oin matau ao n ongo n oin taningau. Bon te tia kakoauaa ana mwakuri te Atua ngai ni kabuta te aonaaba. Bon akea te tai ae e tamaroa n riki bwa te membwa ngkoe n ana Ekaretia Iesu Kristo nakon te bong aei.
Tao te kakai ae moan te anai nano ni kaokan te Ekaretia are I a tia ni kakoauaa bon ngkami, kaain te Ekareka aika kam kakaonimaki n aba nako. Ngkami, Aomata aika Itiaki ni Boong aika Kaitira, kam kabwarabwaraaki iroun Nibwaai i nanon ana Boki Moomon ngke e noorii ara bong ao ni kakoaua, “Ao e roko irou bwa ngai ae, Nibwaai, I taua kingin ana Tiibu te Teei te Atua, are e ruo nako aoia aika itiaki n ana Ekaretia te Tiibu te teei, ao i aoia ana aomata ni berita aika a tabu te Uea, ake a uamaenako i aon te aonaaba, ao ni bwaini bwai ni buaka aika a etiruru ao ma mwakan te Atua ae e korakora mimitongina.”
I kakoauaa bwa I a tia n nooria n oin matau are e noria Nibwaai—ngkami, kaain te berita ae tabu ae Aomata aika Itiaki i aon aba nako,nangoaki ma te raoiroi ao mwaakan te Atua. Ngke I mena n te tabo n taetae n te aba teuana mai buakoia aban te aonaaba aika a korakora, e kaungaai te Uea n iangoan tabeua bwaai are e reireia te Uea ae Beniamina ni Motiaea 2 n ana Boki Moomon. Brent, “I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei;”
I kakoaua nakoim bwa I a tia n nooria n oin matau ao n ongo n oin taningau ngkai I kaitibo ma ngkoe, ae ana aomata te Atua ae e Itiaki ao ni kakaonimaki ni kabuta te aonaaba ake a kawakin tuua. Bon naati ni berita aika a tabu ngkami iroun te Tama. Bon ana reirei Iesu Kristo ngkami. Kam ataa naba te bwai ae I ataia ibukina bwa e a tia n reke iroumi ami kakoaua ni koauan kaokan ana euangkerio Iesu Kristo. . E reirei te Tia Kamaiu, “Ma a kabwaia matami, bwa a noraba,:ao taningami, bwa a ongo.”
Iaan ana kairiri te Uea ao te kairiiiri mairouia Ana burabeti ao abotoro, ti na reitinako ni katauraoia mitinare, karaoi ao ni kawakin berita aika a tabu, katea ana Ekaretia Kristo ni kabuta te aonaaba, ao ni karekei kakabwaia aika a roko ngkana ti kawakin ana tua te Atua. Ti katiteuanaaki. Ngaira Bon Natin te Atua. Ti Kinaa ao ti Tangiria.
I reitiingkami, raoraou, ngkai ti botaki ni kakoauaa bwa bwaai aikai a bon koaua. Ti karaoi tauan mwiin bwaai aika ti a tia n noori ao n ongo. Ngkoe ao Ngai bon taan kakoauaa. Ma mwaakan te kakoaua ni bootaki are ti reitinako ni waaki rake ma te onimaki i nanon te Uea Iesu Kristo ma ana euangkerio. I kaota au kakoaua bwa e maiu Iesu Kristo. Bon ara Tia Kamaiu ao te tia Kabooira. N aran Iesu Kristo, amen.