Kakai, Anera, ao Mwaakan te Nakoanibonga
Ngkana ko tangira ana kakabwaia te nakoanibonga, n raonaki ma kakai ao aia mwakuri anera, nakonako ni kawain te berita are e a tia te Atua ni katauraoia.
A mwaiti aomata ni boong aikai ae a taku bwa akea te kakai, anera bon karaki ni kewe, ao bwa e a in karawa. I taekina koauana bwa a tuai toki kakai, anera a mena i buakora, ao e bon tiku n uki karawa.
Ngke e mena ara Tia Kamaiu, Iesu Kristo, i aon te aba, E anga kingin te nakoanibonga nakon Ana Mataniwi n Abotoro ae Betero. Rinanon kiing akanne, Betero ao Abotoro ake tabeman a kaira Ana Ekaretia te Tia Kamaiu. Ma ngke a mate Abotoro akanne, e a anaaki kingin te nakoanibonga mai i aon te aba.
I taekina koauana bwa kingin te nakoanibonga ake rimoa a tia ni manga kaokaki. Betero, Iakobo, ao Ioane ao burabeti ake tabeman ngkoa a kaoti ma rabwataia ae manguti ni katokaa i aon te Burabeti Iotebwa Timiti te bwai are e kabwarabwaraa te Uea bwa “kiingin abanueau, ao tibwauakin te euangkerio.”
Kiing ae aekan akanne a tia n ruo mai iroun te burabeti nakon te burabeti ni karokoa te bong aei. Mwaane aika 15 a kamatoaaki bwa burabeti, taan mamata, ao taan karekei kaotioti ao ni kabongana ni kaira Ana Ekaretia te Tia Kamaiu. N aron taai ake ngkoa, bon iai temanna te mataniwi n Abotoro are e taua ao ni kariaiakaki ni kamwakurii kiing ni kabane. Bon Beretitenti Russell M. Nelson, te burabeti ao te Beretitenti n Ana Ekaretia Kristo are e kaokaki inanon ara bong: Ana Ekaretia Iesu Kristo ibukiia aika Itiaki ni Boong Aika Kaitira.
Rinanon Ana Ekaretia te Tia Kamaiu, ti karekei kakabwaia n te nakoanibonga—ni ikotaki ma mwaakan te Atua ni buokiira i nanon maiura. Iaan kariaia ni kiing n te nakoanibonga, ti karaoi kakabwaia aika tabu ma te Atua ao ni karekei otenanti aika tabu ake a katauraoira bwa ti na maeka i matana. E moanaki man te bwabetito ao te kamatoaaki, ao i mwiina i nanon te tembora, ti waaki rake i aon kawain te berita are e kairiira n oki rikaaki Nakoina.
Ni katokaan baai i aon atuura, ti karekea naba te kakabwaia n te nakoanibonga, ni ikotaki ma kairara, karaunano, reirei, kamarurung, ao te mwaaka n iriira Iesu Kristo. Inanon maiu, I a tia ni kakabwaiaaki man te mwaaka ae korakora aei. N aron ae kaotaki ni koroboki aika tabu, ti aranna bwa te mwaaka n te nakoanibonga ae te Merekitereka.
N au tai ni kairake I karekea karinean te mwaaka aio ae korakora, riki ngkai e kaotaki i nanon kakabwaia n te nakoanibonga. N au tai ni beku ngke te kairake ni mitinare i Chile, ngai ma toau ti kabureaki ao ni kamaenakoaki. Ti aki tuangaki bwa bukin tera. Bon tain te kaiangatoa n te tautaeka ae korakora. Ngaa aomata aika a katikaki ni kawakinaki irouia bureitimanin te taanga ni buaka ao e aki manga ongo te aba taekaia.
I mwiin tian kataetaeakiu n te aro ae aki riai, I a tiku n ti ngai n te karabuuti, n aki ataia ngkana N na manga noriia ake I tangiriia. I rairaki nakon Tamau are i Karawa, ni bubuti ma nanou ni koaua: “Tamau I aki toki n reireiaki bwa Ko tararuaiia Am mitinare. Taiaoka Tamau, akea arou ae raka, ma I a tia n ongotaeka ao I kainanoa Am ibuibuoki n te tairiki aei.”
Koraan Ana ibuobuoki a kaman unikaki i nanon ririki aika bwakanako. I mwiin bwabetitoakiu, I kamatoaaki bwa kaain te Ekaretia ao n anganaki te Tamnei ae Raoiroi. Ngke I tataro, n ti ngai, n te matawariki, e waekoa n roko te Tamnei ae Raoiroi irou ao ni karaua nanou. E uota te mwakoro n taeka nakon au iango ae rangi n onoti man au kakabwaia n tamanuea, are bon teuana te kakabwaia n te nakoanibong. I nanona, E berita te Atua nakoiu bwa rinanon au kakaonimaki N na kona ni kabaeaki n te tembora ibukin te maiu aei ao te maiu are akea tokina nakon te aine ae tamaroa ao ni itiaki ao n tangira, ao ti na riki bwa kaaro nakoia natira mwaane ao aine, ao N na kakabwaiaaki ao ni karikaki bwa te tama i Iteraera.
Taeka akanne ibukin maiu nakon taai rimwii a kaona nanou n te rau. I ataia bwa a roko mai iroun Tamara are i Karawa ae tatangira, are E aki toki ni kawakina Ana berita. N te tai anne, I karekea koauan ae N a kainaomataaki ao ni maiu n nora kakoroan nanon berita akanne.
Tao teuana te ririki i mwiina, ao e kakabwaiai Tamau are i Karawa ma kainabau ae rang botonnaine ao n tamaroa ao n tatangira. Ngai ao Lynette ti kabaeaki n te tembora. Ti kakabwaiaaki ma teniman natira mwaane ao aman natira aine aika kakateke. I riki bwa te karo, n aron are e beritanna te Atua i nanon au kakabwaia n tamanuea are I karekea ngke te teinimwaane ngai ngke 17 au ririki.
“Ngaia are, tariu [ao mwaneu] aika kam tangiraki, a tia n toki kakai ibukina bwa e a tia Kristo n nako karawa?…
“A tuai; ao a aki toki naba anera ni karaoa te ibuobuoki nakoia natia aomata.”
I kaota koauan ae te kakai ao mwakuriana a reitinako n riki i nanon maiura, a riki bwaai aikai man mwaakan te nakoanibonga. Tabeua kakabwaia n te nakoanibonga a koro nanoia n te tai ae waekoa, ni kawai ae ti kona n norii ao ni mataata iai. Ake tabeua a roko ni karaurau ao a na aki kona n ataaki raoi n te maiu aio. Ma e kawakina ni kabane Ana berita te Atua, n tainanko, n aron ae kaotaki ni karakin rongorongon ara utu:
Tibu te unimwaane ae kanga te karo, Grant Reese Bowen bon te mwaane ae korakora ana onimaki. I uringnga raoi ongou irouna bwa e kanga ni karekea oin ana kakabwaia n tamanuea. I nanon ana tieno, e koreia: E beritanna nakoiu te tamanuea te bwaintangira ni kamaiuaki. E taku,‘E na marurung are e aoraki. Eng, a na kamaiuaki maate ake iaan baim.”
Ririki i mwiina, e kaibetaotaoi bwariko ni wiita tibu te unimwaane ngke e namakina kairana bwa e na oki nakon te auti. E kaitibo ma tamana ae nakonako ni kaitaraa. “Grant, e a tia ni mate tinam,” e taku tamana.
I taekina are e i nanon ana tieno tibu te unimwaane: “I aki tei ma I kawaekoaai n rin i nanon te auti ao n otinako iaan te bwaranta are e wene iai i aon te kainiwene. I taraia ao I kona n noria bwa akea te kakamwakuri ni kanikinaean te maiu irouna. I uringa au kakabwaia n tamanuea ao te berita are ngkana I kakaonimaki, rinanon au onimaki a na kamaiuaki aoraki; ao a na kateirakeaki maate. I katokai baiu i aon atuuna, ao I tuanga te Uea bwa ngkana e koaua te kakabwaia are e anganai iroun te tamanuea, ao e na kaotia n te tai aei ao ni kateirakea tinau ni kamaiua. I berita Nakoina bwa ngkana E karaoia, N a aki manga baenikai ni buoka katean Abanueana ma korakorau ni kabane. Ngke I tataro, e kaurea matana ao n taku, ‘Grant, kateirakeai. I mena n te Aonaaba n Tamnei, ma ko weteai ni kaokai. E na riki aio n tainako bwa te kakoaua nakoim ao nakoia ni kabane au utu.’”
E a tia n reireiniira Beretitenti Russell M. Nelson bwa ti na ukora ao ni kariai kakai. I kaota koauana bwa ibukina ngkai e a tia ni kaokaki te nakoanibonga, mwaakan ao ana kariaia te Atua a mena i aon te aba. Rinanon wewete ao botaki ni kauntira, mwaane ao aine, ataei ao kaara, a kona ni ikarekebai n te mwakuri. Bon te mwakuri ni kakai, ae kairaki irouia anera. Bon te mwakuri mai karawa, ao e kakabwaiaia natin te Atua ni kabane.
N 1989, ara utu ae itiman mwaitiia a oki man ana kamangang te uoote. E a bon bwakanako te tai. E bikoukoua ara kaonoman n nati Lynette. E namakina ana wirikiriki te tamnei bwa e na kabaea roona n ana kaintekateka, ngke e a tia ni mwaninga ni karaoia. Tabeua te tai i mwiina ao ti a roko n te kabao n te kawai; tewana te ka ae e a toka naba i aon kawaira. Butira tao 70 te maire (112 km) n te aoa, I kabwakee bwa ti na aki untaba ma te ka are e roko. E minimino ara ka, ni bwaka n rarikiriki i nanon te kawai, ao ni buti nako rarikin te kawai ni karokoa e toki, ma ana itera te bwatintia n te kaa ae onrake n te baerekareka.
Te bwai ae I ongo i mwiina bon bwanaan Lynette: “Shayne, ti riai n otinako n te mataroa man am itera.” I tinetine n te eea man kabaean au kaintekateka. E anaa tabeua te teekan n ataa te bwai ae riki. Ti moana tabekaia ataei ni kaotinakoia man te kaa man au winto, are e a reke ngkai bwa taubukin te kaa. A tang, ni miimii bwa tera ae e a riki.
Ti kunea i mwiina bwa natira te aine ae 10 ana ririki, Emily, e a bua. Ti takarua ni wetea arana, ma bon akea te kaeka. Kaain te uoote, ake a ira te mwananga n oki nakon mweengaia, ake a mena ikekei a ienikuri ni kakaea. E bon rangi n ro. I a manga tara riki nanon te kaa ma te tooti ao ma te maaku, I nora rabwatan Emily bwa e baee iaan te kaa. I takarua ma te kan buokaki, “Ti riai n tabeka te kaa mai i aon Emily.” I taua taubukin te kaa ao ni kookia rikaaki. Ti tabeman aika a buoka tabekan te kaa, ma e mino n tei te kaa nako aon rabwana n te aro ae kamiimii, n nako mai i aon rabwatan Emily.
E aki ikeike Emily. E a bwata ubuna kanga ai aron karan te uaanikai ae te plum ae beebo. I taku, “Ti riai n anganna te kakabwaia.” Raraou ae tangiraki ao tabeman kaain te uoote a katorobubua ma ngai ao man ana kariaia te Nakoanibonga ae te Merekitereka, n aran Iesu Kristo, ti tua bwa e na maiu. N te tai anne, e waekoa ni ikerake Emily.
I mwiin ae kanga e rangi ni maan, e roko te amburanti. E uotaki nako Emily nakon te onaoraki. Akea te eea ni buroona ao n ikoaki bubuan waena. Rotakin kaburorona bon te bwai ae ti raraoma iai ibukina bwa e maan n aki roko te ikeike iai. E tiku n aki namakinaaba Emily i nanon teuana ao teiterana te bong. Ti reitinako n tataro ao n aki mamatam ibukina. E kakabwaiaaki bwa e reke te marurung ae bwanin. Ngkai, Emily ao kainabana, Kevin, bon kaaro nakoia onoman natiia aine.
Te kamiimii, bwa ake nikiraia akea te bwai ae riki nakoia. Te ataei are e uouotia Lynette bon Tyson. Ngaia naba e kamanoaki man te kangaanga ao e bungiaki i nanon Beberuare are i mwiina. Waniua te namwakaina i mwiin, bungiakina nako aon te aba, e a okira mweengana Tyson nakon Tamara are i Karawa. Bon natira te mwaane ae ara anera ni kaiririira. Ti namakina arona i nanon ara utu ao ni ingainga ni manga bootaki riki ma ngaia.
Te koraki ake a buoka tabekan te kaa mai i aon Emily a namakinna bwa bon akea tinebuna. I ataia bwa anera mai karawa a tia n raoniia anera mai i aon te aba n tabeka te kaa mai i aon rabwatan Emily. I ataia naba bwa e kaokaki Emily ni manga maiu man mwaakan te nakoanibonga ae tabu.
E kaota te koaua aio te Uea nakon Ana toro: “Bwa N na rimoami. N na mena i angataimi ao n angamaingimi, ao Tamneiu e na mena i nanomi, ao au anera a mena ibuakomi, n tabekiko rake.”
I koaua bwa “te Nakoanibonga ae Tabu, n aron ana Karinan Natin te Atua”—te Nakoanibonga ae te Merekitereka—ma ana kiing, kariaia, ao mwaakana a tia ni kaokai nako aon te aba ngkai, ni boong aika kaitira. I ataia bwa ngkana aki riki bwaai nakon are ti kantaningaia ao n tataro ibukina, Ana kakai te Atua a bon aki toki n roko ni kaineti ma nanona, Ana tai, ao Ana babaire ibukira.
Ngkana ko tangira ana kakabwaia te nakoanibonga, n raonaki ma kakai ao aia mwakuri anera, I kaoko bwa ko na nakonako ni kawain te berita are e a tia te Atua ni katauraoia ibukira ni kabane. Membwa ao taan kairii n te Ekaretia ake a tangiriko a na buokiko n toua te mwaneka are i mwiina.
I kaota au koaua bwa Iesu Kristo, Natin te Atua, e maiu ao ni kaira Ana Ekaretia rinanoia ana burabeti aika maiu ake a taua ao ni kamwakura kiingin te nakoanibonga. E bon koaua te Tamnei ae Raoiroi. E anga maiuna te Tia Kamaiu ibukin kamaiuara, ni bootiira, ao n uotiira nakon mweengara.
I taekina koauana bwa a tuai toki kakai, anera a mena i buakora, ao e bon tiku n uki karawa. Ao o, ai tatauraoira! N aran Iesu Kristo, amen.