Katomaan Tuua Aika Uoua Ake a Korakora
Arora n iriira Iesu Kristo e boboto i aon korakorara ao ara konaa n maiuna te moan ao te kauoua n tua ni kabaeranti ao ni kakaonimaki nako iai ni kauoua.
Moantaeka
Ngke ti mwananga ni katabeara Ngai ma kainnabau, Lesa, n te aonaaba, ti kukurei n reken te kaitiboaki ma ngkami ni bootaki n taromauri aika a bubura ao aika a uarereke. A kaungai nanora ao ni boutokaira ami akakaonimaki nakon ana mwakuri te Uea ao a tiku bwa kakoaua nakon ana euangkerio Iesu Kristo. Ti okirikaaki nakon mweengara man mwananga nako ao ni iangoia ngkana ti a tia n anga ae bati n aron ae ti a tia ni karekei.
N te mwananga, e reke te tai teutana ni mamataku. Ma, n angaraoina, I kabanea tabeua te tai ibukin ae tatangiria nanou. E mamate nanou n taian kateitei ao aron karaoaia ao nanou ae raka n onoti ma taian buriiti. A rangi n anaana nanou buriiti ake a nim ma keeboro i etaia. Bwa tao te Buriiti ae Rainbow i Tokyo, te Tsing Ma Buriiti i Hong Kong, te Tower Buriiti i Ronton, ke tabeua ake I a tia n noori, I miimi ni kateakiia n te wanawana n intinia ae a kangaanga aroia. A uotiira buriiti nakon taabo ake e kangaanga bwa ti na kona n nako iai. (I mwaain ae I waakinako, I karekea bwa man katauraoan te rongorongo aei, e riki te kabuanibwai ae karina nakon te buriiti i Baltimore. Ti nanokawaki ni buan maiuia aomata ao n anga ara karauranano nakoia utu ake a rootaki.)
Te Buriiti ae Rianako Karaoana
N te tai ae aki maan n nako, e kamwanangaai katabeakiu n te maungatabu nako California, ike I a manga riaon te Buriiti ae te Golden Gate, are e taekinaki bwa kamiimin te mwakuri ni intinia n te aonaaba. Te mwakuri ae kaawaki aei e botii tamaroan teina, bukin karaoana, ao rianakon aron karoana. Bon te buriiti ae tamaroa ma kamatoaana taian taua, ake a boutokaaki ni boua biiti aika a totoa. Taua aika uoua aika a rangi n rianako buburaia, ma rawawataia a biri rieta i aon tari ike a kateaki iai moan kamatoa. Ni bootaki a nangoa te tinebu n raababan keeboro man te moan keeboro ao te keebero are e kaineti rake, ake a kamatoaa te kawai ni buti are i aana. Korakoran kamatoa ae rianako—korakoran te taua—, bon te mwakuri ae kamimii n te mwakuri ni intinia n te buriiti.
Golden Gate Bridge District
Tamnei ni moan karaoan te buriiti a bon anga te kakoaua n waakin te mwakuri n intinia aei. Taua n tatabeua a karaoa te kamatoa ae bwanin nakon rabwatan te buriiti ni kabane.
Getty Images/Underwood Archives
Ngke e a tia karaoan te buriiti, ma taua uoua aika a korakora man kamatoaaki ni nneia ao bouana ake a kamatoaaki nakon burooan marawa, bon bannan te korakora ao te tamaroa.
I kaoi ngkami n te bong aei n taraa te buriiti ae kakamataku aio—ma rietan taua uoua aika a kateaki i aon nnena ae matoatoa—rinanon rentin te euangkerio.
I nanon ana tai ni beku Iesu Kristo, n te tai ae aranaki bwa te Wiiki n Tabu, temanna te Baritaio ae te tia reireia te tua e titirakina te Tia Kamaiu te titiraki ae e ataia bwa e na kangaanga kaekaana: “Te tia Reirei, tera te tua ae korakora i buakon taian tua?” Te tia reirei te Tua, e “titirakinna” ao ni ukora te kaeka man iteran te tua, ma te nano ae aki raoiroi, e karekea te kaeka ae koaua, ae e tabu.
E kaeka Iesu nakoina: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.
“Aio te moan ao ni korakora n tua”. Te moan taua, bon te kabootau nakon ara moan buriiti!
“Ao ai aron naba are te kauoua, Ko na tangira raom n ai aron tangiram ibon iroum.” Aio bon te kauoua n taua!
“E bane te tua ma aia taeka burabeti nako n tauraki n tuua aika uoua aikai.” Ni kabane bwaai ake e karaoaki mai iai te buriiti!
Ti na tuoi tuua aika uoua aika moan te korakora aikai, ake a kaotaki ao n taekinaki n ana kaeka Iesu Kristo. Ni karaoana iroura, ti na katamneia n ara iango tamnein te buriiti ae rianako tamaroana aei.
Tangira te Uea
Te moan, ko na tangira te Uea n nanom ni kabanea, tamneim, ao wanawanam.
N te kaeka aio, e katuruturua kakaawakin te tua aei Iesu Kristo ake a kaotaki i nanon reirei aika a tabu n te O Tetemanti. Tangiran te Uea ae moamoa mai i nanom—n aroarom. E tuangko te Uea bwa ko na tangira ma tamneim ni kabanea—ao kabaneana—ko na tangira ma nanom ni kabanea—wanawanam ao ootam. Akea tian tangiran te Atua ke e reitinako. E reitinako ao akea tokina.
I bon irou, karaoan nanon te moan tua ae korakora e kona ni karekea bwa e na ti iangoaki, ao e kangaanga karaoana. I kakaaitau, bwa ngkana I iangoi taeka ake e taekinna riki Iesu, e kai karaoaki riki nanon te tua aei: “Ngkana kam tangirai, ao kam na tou mwin au tua.” I kona ni karaoa aio. I kona n tangira Tamara are i Karawa ao Iesu Kristo, are e na kairai ngkanne nakon te tataro, kamatebwaian koroboki aika tabu, ao te nebonebo n te tembora. Ti tangira te Tama ao te Nati rinanon kabwakaan kabwianibwai, katabuan te bong ae te Tabati, maiuakinan te riai ao te maiu ae e itiaki, ao te ongeaba.
Tangiran te Uea e baireaki man karaoan mwakuri aika a uarereke, mwaneka ni kawain te berita: ibukiia kairake, kabonganaan bwaai n reitaki ni karikirakean aaro nakon karawaawata; kitanan bobootaki ni kakukurei, tamnei, ke waaki ni kakukurei ake a kakaewenakoi aroaro; a kaota te rau ibukin bwaai aika a tabu.
Iangoa te katooto aio. Bon Tabatin te aki mamatam ngke Vance ao ngai ti karebwerebwere ni mataroan teuana te mweenga ae e uarereke. Ngaira ma tabeman rikan n te kooram ti kantaningai taeka, “Taiaoka rinnako,” te kaeka are mwaitoro n te tii n Tiaman ae tau ongoraeana rinanon te mataroa. Titia Muellar bon temanna mai ibuakoia taan maeka mai tinanikun te aba n ara uoote. E kangaanga kaukan ana matoroa ni waekoa, ngkai e bon aki matakii. Ngke ti rinnako i nanon mweengana ae tau ootan nanona, e butimwaeira ma titiraki aikai: Antai arami? Kam uara? Kam tangira te Uea? Ti kaeka ao n tibwaia bwa ti roko bwa ti na rikoa ana angabwai n aki mamatam. N rorora ae ti tuai rangi ni ikawai, e rangi n ootara arona n tatauraoi, ao man katekenano ana kaeka ae kaonaki n te onimaki: “I katuka te koin i aon te kaunta ngke e moaningabon riki. I rangin ni kukurei n anga au angabwai n aki mamatam. Kam kona n taiaoka ni karinna n te tinaniku ao ni korei taekan bebwan au angabwai n aki mamatam?” Ana tangira ibukin te Uea e bon tabekaarake ara onimaki ni katoa ngkana ti kitana mweengana.
E beritana te korakora ae kamiimi te uea ae Beniamina ibukiia ake a iriira te moan tua ae korakora. “I tangiria bwa kam na iangoa te kakabwaia ma te aro ni kukurei irouia ake a kaawakin ana tua. … A kakabwaiaki ni bwaai ni kabane, … ao ngkana a teimatoa ni kakaonimaki ni karokoa te toki ao a na butimwaeaki nako karawa … n te aro ni kukurei ae aki totoki.”
Tangiran te Uea e karekea te kukurei ae akea tokina!
Tangiria Raom
E taku ngkanne Iesu, “Ao ai aron naba are te kauoua, Ko na tangira raom n ai aron tangiram i bon iroum.” Aio bon te kauoua n taua n te buriiti.
E katomaa ikai ara taratara nako karawa Iesu, bwa ti na tangira te Uea, ma nanora n aomata n tarataraa tinanikura, n tangiriia raora nako. Teuana e irekereke ma are teuana. E aki tabwanin tangiran te Uea ngkana ti aki tabeakiniia kaain rarikira. Te tangira n tangiriia aomata bon ibukiia ni kabane natin te Atua n aki taraia bwa te mwaane ke te aine, aroia, tera aia reeti, te namakin n tangira, aia karekemwane, te ririki, ao te katei. Ti ukoriia ake a maraki ao n uruaki, naake a rootaki n ae e aki raoiroi, ibukin “titebo aroia ni kabane i matan te Atua.” Ti “buokiia ake a mamaara, tabekirake baai ake a tine, ao ni kakorakorai bubuaniwae aika aki konamaki.”
Iangoa te katooto aei: E kubanako te Tari Evans ngke e kairaki n te wirikiriki bwa e na tiringa ana ka ao n karebwerebwere n aia mataroa te utu ae e aki kinaiia. Ngke e kauka te mataroa te tina ae e a tia ni mate buuna ae riaon 10 natina, e noora aroia ae kangaanga ao kainnanoan te buoka ae korakora. Te moan bebete karaoana, bon beeniakin mweengaia, are e rimwiiaki n te ibuobuoki n te maiu n rabwata ao n tamnei ae reitinako n ririki aika a bati.
I mwiina e korea te reta te tina aei ni kakaaitau ibukin te rao ae karokoaki mai karawa: Ko a tia n kabanea maium n buokiira ngaira aika ti rang mangori. I rangi ni kan ongo te bwai ae na taekinna te Uea nakoim ngke E kaota ana kakaaitau ibukin te tamaroa ae ko karaoia n te mwane ao n te maiu n tamnei ibukiia aomata ae bon ti ngkoe ao Ngaia ae a ataia. Ko rabwa ibukin kakabwaiaakira n aanga aika a mwaiti, … ibukiia mitinare ake ko karokoia. … I iangoia n taainako ngkana e rineiko n ti ngkoe te Uea, ke ngkana bon ti ngkoe ae ko kakauongo.”
Tangiraia raom bon karaoan aron Kristo n akoi ao n ibuobuoki. Ko kona ni katoka te riribai, kabwarai aia bure am kairiiribai, ao beku nakoia raom, ao ni buokiia kaara? E na kaonaki nanomi n tatabemani ngkami ni katean ami taua n tangira ibukiia raomi.
E reirei Beretitenti Russell M. Nelson: “Karaoan te ibuobuoki nakoia tabeman—karaoan te mwakuri ae man te nano n tabeakiniia tabeman n ae bati ke i aona nakon ae ti tabeakiniira—bon kimwareireira. Riki … ngkana e angabuaka ao ngkana e kamwawaira man te tabo are ti na mwengaraoi iai. Maiuakinan te kauoua n tua ae korakora anne bon te kiingnakon te riki bwa ana reirei ni koaua Iesu Kristo.”
Te Irekereke
E reirei riki Iesu, “E bane te tua ma aia taeka burabeti nako n tauraki n tuua aika uoua aikai.” E rangi ni mataata aio. Iai kakaawakin te irekereke i marenan tangiran te Uea ao tangiraia aomata. Ibukin te Buriiti ae te Golden Gate bwa e na karaoa tibwangana ngke e kateaki, a kaai ni matoatoa taua aika uoua n ti te arona ao n titebo korakoraia ni kaitarai tinebun keeboro, te kawai ni buti, ao te mwamwananga n te buriiti. N akean te rabakau n intinia, e na aki nakoraoi aron karaona, ao ni karekea te uruaki. Ni karaoan te buriiti n aron aio tera aron kateaia, a riai ni kaai ni mwakuri taua n te aro ni inanoi. N aron anne, arora n iriira Iesu Kristo e boboto i aon korakorara ao ara konaa n maiuna te moan ao te kauoua n tua ni kabaeranti ao ni kakaonimaki nako iai ni kauoua.
Rikiraken itabaraara n te aonaaba e kaotia, ma, n tabetai ti kabwaka n nooria ke n ururinga aio. A kabanea nanoia tabeman ni kawakinan tuua n te aro are a kaota karakon aroia nakoia ake a nooria bwa a karako raoiroia. Tabeman a kunea bwa e kangaanga bwa a na tangiriia ake a rineia ni maiuakina maiuia i tinanikun te berita ae tabu ke n raroa ma iriiran waakin te aro.
N arona teuana, iai tabeman ake a katuruturua kakaawakin tangiraia tabeman n akean ataakina bwa ti bane ni bukintaeka iroun te Atua. Tabeman a rawa n ataakina bwa iai te bwai ae e koaua ke te eti ke te kaairua, ao te bwai ae e ti kainnanoaki mai iroura bon te kariaia ao ni butimwaea aia rinerine tabeman. Aki baerantin aikai a kona ni karika buriitin maium n tamnei n ranganako ke ni bwaka.
E kabwarabwara aio Beretitenti Dallin H. Oaks ngke e kangai: Ti anganaki te tua bwa ti na tangiriia aomata nako, ngkai ana reirei ni kaikonaki Iesu i aon te Itamaria are e raoiroi e reireia bwa aomata ni kabane bon raoraora. Ma nanomatoara ni kawakina te kauoua n tua aio e na aki karikiira bwa ti na mwaninga are te moan, n tangira te Atua ma nanora, tamneira, ao wanawanara.”
Kabaneana
Ma ngaia are te titiraki nakoira n tatabemaniira bwa, Ti na kanga ni katea oin ara buriiti n onimaki ao n kokoaua—ni katei taua ni kauoua aika a totoa n tangiran te Atua ao raora? Ma, ti a tibwa moanna. A kona n riki ara mwakuri bwa ai aron te babaire ae koreaki i aon te kunikai ni kaobai ke te tamnei ni kairi n te buriiti are ti kantaningaia ni kateia. E kona n iai tabeua kouruni kamataata n ana euangkerio te Uea ke n berita n aki motika taekaia tabeman. Akea ae e uarereke ke e rangi ni kara ni moana waakinana.
N bon taina, n te babaire ae irianaki ma te tataro ao te iangomwaaka, a kanakoraoi iango aika a aki bati n nakoraoi. Mwakuri aika a boou a riki bwa anua. Moan kakatai a riki bwa kairiiri aika a rinanoaki man nakoraoi. Ti katea oin ara buriiti n tamnei ma naano ao iango aika a bane nakon Tamara are i Karawa ao Natina ae te Nati are te Rikitemanna ao ai nakoia tarira ao mwanera ake ti mwakuri , tatakaro, ao ni maeka ma ngaiia.
N taai aika ana roko, ngkana ko buti i aon te buriiti ae tamaroa ke ngkana ko noora te tamnei, ma tauana aika a biri rieta, I kaoko bwa ko na ururingi tuua ake uoua ake a korakora, ake a kabwarabwaraaki iroun Iesu Kristo n te Nu Tetamenti. Ke e kaungai nanora ana kaetieti te Uea. Ke a tabekakirake nanora ao ara iango n tangira te Uea ao n taraia ake i rarikira n tangiriia raora.
Ke e kakorakora ara onimaki aio iroun Iesu Kristo ao Ana Mwakuri ni Kamaiu, are I kakoaua iai, n aran Iesu Kristo, amen.