“Ibukin Kakorakoraia Kairake: Ana Rongorongo te Tia Kamaiu Nakoim,” Ibukin Kakorakoraia Kairake, Maati 2024.
Te Kairi nakon Korakorana
Ibukin Kakorakoraia Kairake: Ana Rongorongo te Tia Kamaiu Nakoim
Te kairi aei e buokiko n reita am rinerine nakon Iesu Kristo ao Ana Reirei.
I Tei n te Mataroa ao ni Karebwerebwe, iroun J. Kirk Richards
Iangoia bwa aongkoa are ko maeka i Kariraia i nanon taai ake ngkoa, 2,000 te ririki n nako. Ko kaoaki ngkoe ma raoraom nakon aia bootaki n taromauri te roronrikirake n te auti n taromauri n te tabo, ma te tia anga te marooro te iruwa ae moan te kakannato: ae Iesu te Inatareta. Ao oin te kantaninga n Ana rongorongo, e kaoiia kairake ake ibuakoia aomata Iesu bwa a na titiraki Nakoina.
N am iango a na tera ana titiraki ake ko na ongo?
I taku bwa tabeua titiraki ana kaota te katei ao bwaai aika a riki ni waakin te tai. Ma I bon kakoaua raoi bwa angiina mai buakoia kanga bon titebo ma titiraki ake ti karekei n te bong aei.
Te katooto, n te Nu Tetemanti, tabeman aomata a titirakina te Tia Kamaiu n aron aikai:
-
Tera ae I riai ni karaoia bwa I aonga ni karekea te maiu are akea tokina?1
-
I butimwaeaki? I riki bwa kaaina?2
-
Ngkana iai ana bure mwaaneu irou, mwaitira te tai ae N na kabwara iai ana bure?3
-
Tera ae na riki nakon te aonaaba aei n taai aika a na roko? N na kona ni mano?4
-
Ko kona ni kamarurungiia aika a tangiraki irou?5
-
Tera te koaua?6
-
N na kanga n ataia bwa I toua te kawai ae eti?7
Ti aki bane ni mimiiakina te bwai ae ti te arona n te tai teuana ma teuana? I nanon bubua n ririki, bon akea bitakin taian titiraki. Ao akea naba bitakin ana nanoanga te Tia Kamaiu nakoia naake a titiraki. E ataa aron kangaangan ao kamangaongaon te maiu aei. E ataa aron kai buan kawaira. E ataia bwa ti raraoma n taai tabetai ibukin kanoan taai aika a na roko. Ao E taetae nakoim ao ngai, n arona naba ngke E taetae nakoia Ana taan iriiria n taai ake ngkoa:
Ngkana iai am rinerine aika a kakaawaki ae ko na karaoia, Iesu Kristo ma Ana euangkerio ae kaokaki bon rinerine aika taian kabanea n raoiroi. Ngkana iai am titiraki, Iesu Kristo ma Ana euangkerio ae kaokaki bon kaeka aika kabanea n tamaroa.
Aei bukina ngkai I tangira Ibukin Kakorakoraia Kairake: Te Kairi ibukin Karaoan Rinerine. E kairiira nakon Iesu Kristo bwa ti aonga ni karekea Korakorana. I kawakina te kaobi i nanon buuau n taainako. Ngke I kaitibo ma aomata ni kabuta te aonaaba ake a kan ataia bwa bukin tera ngkai ngaira, aika membwa n ana Ekaretia Iesu Kristo, ti karaoa are ti riai ni karaoa, I tibwa te kairi aei ma ngaiia.
Ibukin Kakorakoraia Kairake e reiakiniira koaua aika akea tokiia ibukin te Tia Kamaiu ao Ana Kawai. E kaoko bwa ko na karaoi rinerine ake a boboto i aon koaua akanne. Ao E tibwai kakabwaia aika a tia ni beritanaki bwa E anga nakoia naake a Iriiria. Taiaoka wareware, iangoia inanom, ao tibwa te kairi aei!
Kaoa nako Nanom
E tangiria Iesu Kristo n riki bwa raon maium—n taainako, ni katoabong i rarikim, i nanon taai aika a tamaroa ao n taai aika a bubuaka. E aki ti tei n tokin te kawai, n tataningaiko bwa ko na roko Irouna. E na nakonako ma ngkoe i nanon kawaim ni kabane. Bon ngaia te Kawai!
Ma E aki kairoroa rokona i nanon maium. Ko kaoia, rinanon am rinerine. Aio bukina ae e rangi ni kakaawaki te kairi ibukin karaoan rinerine, n aron Ibukin Kakorakoraia Kairake. Ni katoaa te tai are ko karaoa te rinerine ae raoiroi ae boboto i aon ana koaua te Tia Kamaiu ae akea tokina, ko kaotia bwa ko tangiria ni maium. A kauka mataroan karawa rinerine akanne, ao E roko korakorana n raanga nako nanon maium.11
Karaoa te Reitaki ae Matoa
Ko kona n uringnga bwa e kabotauia nakanne te Tia Kamaiu ma ake a ongo ao karaoia e atongaki bwa ai aron te aomata ae wanawana are e “katea batana i aon te bwa.” E kabwarabwaraa:
“Ao e bwaka te karau, ao e waerake te ieka, ao e kare te ang, man orea te bata arei; ao e bon aki bwaka, bwa e kateaki i aon te bwa.”12
E aki bwaka te auti n te buaka ae korakora ibukina bwa e matoatoa te auti. E aki naba bwaka ibukina bwa e matoatoa te bwa. E aki bwaka te auti n te buaka ae korakora ibukina bwa e nim nakon te bwa ae matoatoa. Bon matoan te toma nakon te bwa ae kakaawaki.
N ai aron anne, ngke ti katea maiura, e rangi ni kakawaki karaoan rinerine aika a raraoi. Ao e rangi ni kakawaki te mataata n ana koaua te Tia Kamaiu ae akea tokina. Ma e roko te korakora are ti na kainnanoia ni kaaitaraa rokon te buaka ni maiura ngkana ti katomaa ara rinerine ma Iesu Kristo ao Ana reirei. Anne ae e buokira Ibukin Kakorakoraia Kairake ni karaoia.
Te katooto, tao e ataia raoraom bwa ko keiaki n aki kabonganai taeka aika a kamatauninga ke ni kammaraki. A kona n nooriko n kawara te ataei n te reirei are a kakatinanikua aomata ke ni bwainikirinna. Ma a ataia bwa ko kakaraoi rinerine aikai ibukina bwa e reirei Iesu Kristo bwa “ni kabane aomata bon tarimi ao mwanemi—ni ikotaki … aomata ake a kaokoro ma ngkoe”?13
Tao a ataia naba raoraom bwa ko nanako n taromauri ni katoa Tabati. A kona naba n nooria ngkana ko kamatea te anene teuana ke n aki butimwaea te kakao ke ni mataku n te aeka n tamnei teuana. Ma a ataia bwa ko karaoi rinerine aikai ibukina bwa iai iroum “te reitaki n te berita ae tabu ae kakukurei ma Tamara are i Karawa ao Iesu Kristo,” ao bwa mwakoron te motinnano anne bon iriiran te Tia Kamaiu, ko kakaaitau “ni karekea te Tamnei ae Tabu bwa raoraom n taainako”?14
Tao a taia aomata bwa ko aki momoi kamanging ke ni moko ke ni kabonganai kamanging aika turaki aika a karuanikai. Ma a ataia bwa ko kakaraoi rinerine aikai ibukina bwa E reirei Iesu Kristo bwa “e tabu rabwatam,” te bwaintituaraoi ae kamiimi mairoun Tamara are i Karawa,” ae karaoaki ni katotongana?15
Tao a ataia raoraom bwa ko aki aonikai ke ni kewe ao n taua ma nanom n am reirei. Ma a ataia bwa a riki aikai ibukina bwa E reirei Iesu Kristo bwa “e na kainaomataingkami te koaua”?16
Ma ae kakawaki riki, a ataia raoraom bwa ko karaoi rinerine aika a aki rangi ni tanoata aikai bwa ko na teimatoa ni kokoaua nakon ana kainibaaire Kristo ibukina bwa ko ataia bwa “bon korakoram Iesu Kristo”?17
Ngaia Bon Korakoram
I anganiko au kakoaua ae koaua bwa Iesu Kristo bon te Kawai nakon te maiu ae na roko ae otamwaaka ao ni mimitong—maium ae na roko. Ao bon Ngaia naba te Kawai nakon te maiu ngkai ae otamwaaka ao ni mimitong. Nakonako i nanon Kawaina, ao E na nakonako ma ngkoe. Ko kona ni karaoa aio!
Raoraou kairake aika kam tangiraki , Iesu Kristo bon korakorami. Teimatoa nakonako ma Ngaia, ao E na buokiko ni tabekiko rake “ni baia ni kiba ikare”18 nakon te kimwareirei ae akea tokina are E a tia ni katauraoia ibukim.