Bukin tera I Kainnanoa Iesu Kristo

Iroun Tracy Y. Browning

Kauoman ni Kauntira n te Beretitentii ni Kabuta n te Moanrinan

E kakawaki bwa ti na mataata n ara reitaki ma te Tia Kamaiu.

“Bukin tera I kainnanoa Iesu Kristo?” Bon te titiraki ae kakawaki ae ko na titirakiniko iai—tiaki ikotakiia “ni kabane” kaain “ara utu.” Ma, ni koauana, “Ngai.” Tera au kaeka nakon te titiraki anne?

Te kaeka ae I karekea bon ibukiu e roko rinanon karaoan mwakuri n te onimaki; te kekeiaki ni katoa bong ni maiuakin au berita aika tabu, n raonaki ma au berita n te bwabetito, ao n reirei ni kakauongo nakon bwanaan te Uea rinanon Tamneina. Ao ae kakawaki riki, e boboto iaon au reitaki ma au Tia Kamaiu.

Te Reitaki ma te Tia Kamaiu

I kona ni koroi ni karabai bukina ngkai I kainnanoia au karo ke raoraou aika I rang ni kaan mangaiia. I a tia ni karikarekei reitaki aikanne n taainako. Kakawakiia ni maiu a bon rang ni kakawaki n aron te tai ao te mwakuri ae I katikua ni kaan mangaia rinanon bwaai aika bebete n aron te marooro ae teimatoa, ni moanna ni kinaia, ao ni kariai wanawanaia aika raraoi bwa a na kakorakora maiu.

Ara reitaki ma Iesu Kristo e kona n ira te kawai n aron naba anne. E bon riai bwa ti na tataro ni katoa bong nakon Tamara are i Karawa n aran Iesu Kristo. Ao karekean naba kinakin te Tia Kamaiu man ukoran booki aika tabu, warekan aia taeka burabeti ao abotoro, ao te kakauongo nakon te Tamnei ae raoiroi. I kakorakora riki te reitaki anne ngkana I kariaiq ni kabane bwaai ake I reiakinna ni kanakoraoa iai maiu ao kateiu.

Iangoa naba, te babaire ni kamaiu. Te “babaire ni kamaiu,” anne e nanonaki n ae ngkoe ao ngai—aomata ni kabane—a kainnanoa te kamaiuaki ao te kamaiuaki anne bon mwakoron te babaire ibukin te maiu aei. Ti kainnanoa te ibuobuoki ao ti aki kona ni kamaiuira i bon iroura.

Ma e kanakoira te Atua nakon te aonaaba ao E berita bwa E na katauraoa te Tia Kamaiu, Iesu Kristo, are e na tokanikai iaon kangaanga ake a kamaenakoira ma te Atua.¹ Ao ngkana ti karaoa te berita ma te Atua, E berita bwa E na karaoi bwaai ni kabane aika E kona, n aki anaa inaomatara n rinerine, ni buokiira ni kawakin ara berita aika tabu nako Ina.²

I Kainnanoia n Ataia bwa E Oota Iai

I bwabetitoaki ngke e koro 16 au ririki ao ni maeka i New York City. N te moantai I namakinna ae kanga I kabanea te tai ae mwaiti n rinanon au koaua ae boou, ma ana berita n reitakina ma te Atua, ao au reitaki ma raoraou.

I raraoma n akean raoraou n te reirei ae I kona n reitaki ma ngaia. Ma a taneiai raoraou ni karaoi bwaai aika I atai bwa ana kakamaaku nakon tamneiu ao n aki titebo arora ni katoka iaou aran Iesu Kristo. I ataia ae tangirai Iesu Kristo bwa n na karaoi rinerine aika raraoi riki.

Te bwai ae I aki ataia bon ataakin au namakin ni kakaitara iroun te Tia Kamaiu. E moanna ni kangaanga ni katoa bong ngkana I kaoaki bwa n na karaoi bwaai aika I atai bwa aki raoiroi. N tabetai ao I kakoauai bwa bwaai aika akea te kangaanga iai, ma I ataia bwa I kariai bwaai aika I riai n aki butimwaai.

I tangiria ni kan ataia bwa e ataa aron maroaau ao kairuau te Tia Kamaiu ngke n na iangoia ni kamemerea aron bonganan ana kainibaire te euangkerio bwa I aonga n namakina au reitaki ma raoraou. I namakinna ae kanga e a bua au iango. I kainnanoa te kamaiuaki. I kainnanoa Iesu Kristo.

Ningai ae Na Kakorakoraaki iai Au Reitaki ma Ngaia

Au reitaki ma Iesu Kristo e kakorakoraaki ngkana I kakaea bon ibukiu bwa bukin tera I Kainnanoia. Bon ngke I moanna ni mwaing man ti atakina ae I riai ni maiuakina te euangkerio bwa iaonga n ataia bwa bukin tera I tangiria ni maiuakina te euangkerio ao ni bubuti ibukin te ibuobuoki ni karaoana. I waekoa n teirake iaon bubuan waeu ao ni kaota au iango ao au namakin nakon te Atua, ma te kantaninga ae E tabe ibukiu ma au kangaanga, bwa te babaire ni kamaiu e kateaki bwa e na buokai, bwa kukureiu bon mwakoron te babaire.

E a tia Beretitenti Russell M. Nelson n reirei, “N te tai are ngkoe ao ngai ti karaoa te berita ae tabu ma te Atua, ara reitaki ma Ngaia e rikirake ni kaan nakon riki ara berita ae tabu. … Ibukin ara berita ma te Atua, E na bon aki kua n Ana mwakuri ni buokiira, ao ti na bon aki kabuaa Ana nanomatoa n Tangira nakoira.”³

I taetae nakon Tamau are i Karawa iaon au namakin n aron au kairua, I kanga n aki ataa te bwai ae n na karaoia ni kawakina aroarou ao raoraou. I tuangnga ae I namakina te aki kukurei ao ni kainanoa Ana ibuobuoki.

Ngke I katorobubua n tataro ao I moanna n namakina te rau. Namakinan te rau aei e buokai n ataia ae te Tia Kamaiu e ata aron au namakin ao E bon tabeiainga—ni bon arona, n ae bati.

Ngke I a tabe ni ikawai ao I a kona n ata ae bati riki, I a ataia ae n tainako ngkana I nakon te Atua ni bubutia ibukin te ibuobuoki ke te kabwarabure, I taraa n ae I a uotaki nakon te Onaroka are i Ketetemwane, ike e ruru ni maraki iai ara Tia Kamaiu ao ni moanna n rotaki n rabwatana ao n tamneina ibukin kairuaia ao aia bure ake a kaokoroira iai ma te Atua.⁴ Bon te kauring nakoiu bwa E ata te Atua te bwai ae I rinanona—e ataia riki nakoia aomata.

Tiaki n Ti Ngai

Ngke I teirake mai iaon bubuan waeu, e buoaki te Tamnei ni katikui bwaai tabeua ao ni kaungaai bwa n na karaoi bwaai ake tabeua. Te moan, I uringa temanna raoraou ae kaain te Muslim ao n aki kona n tuangaki bwa e na kaota ana kainibaire bukina bwa ti karinea ana onimaki ao n ataia naba ae iai bwaai tabeua aika e riai n na aki karaoi. I namakina te unganano n tibwaua au onimaki ae boou ma raoraou bwa aonga naba n ae a kona n ataa riki arou ao bukina bwa a kakawaki irou au kainibaire aika boou.

I moanna man karaoan bwaai aika uarereke. I tuanga raoraou temanna bwa I kanga n tia ni karawawataaki. E akoi ao e karinerine. E buokai ngke I taetae ma raoraou ake tabeman. Tiaki ni kabane aika a ota iai, ma inanon te tai, I noria bwa a karaoi babaire are I kona n iri inanona are e aki kaitarai au berita ma te Atua.

I ataia ae ngaira ni kabane ti kona ni kabonganai riki korakora n totokoa ana kairoro te aonaaba. Kawakinan berita aika tabu e na ibuobuoki ma anne, ao Iesu Kristo e mena i nukan ara berita aika tabu.⁵ Aio are I kunea bon ibukiu—bukin tera I kainnanoa Iesu Kristo.

Te oki rikaaki nakon mwengara i karawa ma te Atua tiaki te bwai ae I kona ni karaoia i bon irou. A mwaiti kawai aika uarereke ao taneiai ni katoabong are ngai—ao ngaira ni kabane—ti na karaoa te kawai nakon mwengara anne. Ma ai kakabwaiara ngaira ngkai taan karaoi berita aika tabu ao taan kawakin berita aika tabu bwa te Atua “E na bon aki kua n Ana mwakuri ni buokiira” ni karokoa ae ti roko ikekei.