Karekea Korakoram iroun Iesu Kristo

Iroun Unimwaane Jeffrey R. Holland

Man te Kooram n Abotoro n te Tengaun ma Uoman

Iesu Kristo bon korakoraia kairake—kairake ni kabane iaon te aba—ao anne are bon ngkoe naba!

I kukurei ni kabwarabwara te rongorongo ae onoti aei Ibukin Kakorakoraia Kairake maekatiin. Taian koroboki, waaki ni kakukurei, ao karaki mairouia kairake ni kabuta te aonaaba e na ibuobuoki ni kakorakora am kakoaua n te koaua ae nano ao n akea tokina are kabwarabwaraaki iroun te Moan Beretitentii. A katanoatai bwaai aikai ibukin Iesu Kristo, “Ngaia bon ‘korakoraia kairake.’”¹ Nanon aei bwa Iesu Kristo bon ngaia korakoram. I tataro bwa ko na butimwaea te koaua aei ma te kukurei n te tai ae moan te kakawaki aei ni maium, ngkai ao n aki toki.

Ni Kabane Aomata a Kainnanoa te Korakora iroun Kristo

E aki manenanti ke ni kairua rokom n te maiu aei. Ko rineia bwa ko na nakomai nakon te aonaaba bwa ko na reiakina, karikirakei, karaoi bwaai aika kamimi, ao n riki n aron Tamam are i Karawa. Inanon am borau, ao ko na rinanon te kangaanga, te kataaki, te bwarannano, ao te aki kukurei ake a kona ni karika namakina te rawawata. Ko na namakinna ae ko na aki kona ni buoka kataakim ae moan te kangaanga anne n te maiu aei.

N taai aikanne, taiaoka uringnga bwa e tangiriko Tamam are i Karawa. Iai irouna n taainako, ao E na teimatoa ni karaoia. Ibukin Ana tangira ae akea tiana ao ni kororaoi, E kanakoa Natina, Iesu Kristo, bwa e na kakorakorako ao ni buokiko bwa ko na waaki nako. Ao e roko Iesu ibukina bwa E rang n tangiriko naba.

Te kananokawaki, bwa tabeman aomata aki ataia ae e kona ni buokaki kainnanoia iroun te Tia Kamaiu. Aki ataia ae ngaiia, n aroia aomata ni kabane, a na karaoi buure ae aki kona ni kabwarai, buan taneiai aika aki kona ni manga kaoki, ao n rinanoi kangaanga ao kabuanibwai aika aki kona ni katoki bon irouia. Ke ni kona n tokanikai iaon te bure ao te mate i bon irouia. E nanonaki n aei bwa ngaiia—ao aomata ni kabane—a kainnanoa Ana Mwakuri ni kamaiu Iesu Kristo, ma te korakora ae kona ni uotia.

“E tikiraoi anne, Unimwaane Holland,” ko na bae n iangoia ni kangai, “ma n na kanga ni karika Iesu Kristo bwa korakorau?” Ni buokiko ni kaekaa te titiraki aei, taiaoka anganai te kariaia bwa n na tibwauai tabeua ana kawai Iesu Kristo aika aki kona ni warekaki ni kakorakorako ni katoa bong.

Iai Mwaakana ni Kakorakorako

N Ana kabanea n tairiki n te maiu ae mamate, ao Iesu Kristo e rin inanon te Onaroka are i Ketetemwane. Ikekei, E katorobubua ibuakon kaai aika tenaan oriwa ao ni moanna ni katokai Iaona buren te aonaaba. Te karawawata ae korakora ao n reitinako aei “e karika [nakoina], … te kabanea ni korakora i buakomi ni kabane, bwa n na ruru ibukin te maraki, ao ni wawanako te rara man bwangabwangan kuniu” (Reirei ao Berita aika Tabu 19:18).

Imwiina ngkanne ao e uotaki Iesu nako Calvary ao a tauria iai n te kaibangaki. Ikekei are E a kabanea naba iai Ana mwakuri ni kamaiu. E a tia n anga Maiuna ma nanona ni koaua, ao imwiina ao E a mangauti man te mate. N te tai are e bukamaruaki iai te Itita aei, ao I kukurei ni katanoata bwa e maiu Iesu Kristo! I katanoata naba bwa E aki ti buokira ni karekea te kaantaninga ngkana ti rawawata ibukin ara bure ma e “kainna[no] ni maraki ma te karawawataaki ao te kaririaki n aekaia nako” ni karaoan aei (Aramwa 7:11; e kairaki ma katuruturuana).

E namakin ao E atai nanokawakiia ao rawawataia aomata te Tia Kamaiu ao ni kekeiaki, n oin ana kawai, ni kabane rawawata ao korakai aika ko rinanoi, ngai, ao tamnei ni kabane ake a tia ni maiu ao ake a na aki kona ni maiu. Ibukin te bwai are E rinanona ni maiuna n rabwata, ana iango, ao n tamneina ibukim, E ataa aron kakorakorakim.

Tao e na kangaanga iroum bwa ko na kakoaua ae e na iai nanon Iesu ni buokiko bwa temanna mai ibuakoia mirion n aomata aika ti tebo aia ririki. Ngkana akea iangoana iroum ae iai bwaai aika raraoi riki aika E na karaoi nakon kakorakorakim n am tai ni kainnano, Iangoia n te onaroka arei, Iangoia iaon te kaibangaki arei. “E korakai, e wanako raraana ao e mate”² ibukim bukina bwa E ataia ae ko tau ibukina. E teimatoa n ataa anne. E rang korakora nanona iai, ao ni kona ni buokiko—ngkai ao n aki toki. E anga Maiuna bwa E aonga ni kakorakorako ngkana ko butimwaea Ana kakao ibukin bitakin te maiu: “Bane mai nako Iu” (Mataio 11:28).

Rineia bwa ko na nakonako ma Ngaia

Bon am rinerine n ira Iesu Kristo ao ni karaoia bwa Korakoram. E a tia ni “mwakena te kawai ao ni kaira te kawai”³ n okira Tamara are i Karawa. Ni koauana, Bon ngaia “te kawai, te koaua, ao te maiu” (Ioane 14:6).

Ko na kunea te kawai ngkana ko butimwaea ana euangkerio Iesu Kristo ngkana ko kamwakura te onimaki Irouna ao n raira nanom man am bure. Ko kakorakora am reitaki ma Ngaia ngke ko rineia bwa ko na bwabetitoaki n Arana ao ni karekea ana bwaintituaraoi te Tamnei ae Raoiroi. Imwiina ao ko reitanako kawaim n Ana euangkerio man kawakinan tuua, karekei otenanti, karinei berita aika tabu, ao ni maiu n aroia Ana reirei.

Mwakuri aikai a karika te reitaki ae korakora—te reitaki n te berita ae tabu—are e karekea te kabaeaki ae korakora ma n teimatoa nakon Kristo—ao Ngaia nakoim. Ngkana ko ira Iesu Kristo ao Ana reirei, Ngaia ao te Tama a riki bwa kairam ao korakoram ni maiun n tamneim. Ko kona ngkanne ni waaki nako man te kamanoaki ao te kukurei ni katoa bong, n riki n Aroia, ao n te bong teuana ko na oki ni maeka ma Ngaia ao ni karekea te aeka ni maiu are a Maiuakinna.

Waaki Nako ma Korakorana

Ma nanou ni kabane, I kakoaua ae Iesu bon te Kristo. Ngkana ko karaoi kawaim nako Ina, n ukoukoria, ao ni butia te Tia Kamaiu bwa e na kakorakorako ni Mwaakana, E na kakabwaiako ma Tamneina ao ko na Kunea.⁴ Akea te rinerine ae ko kona ni karaoia are e na kona n te taina ni katikuko n te kangaanga are e na aki kona ni buokiko iai Iesu Kristo. I kakoaua raoi te bwai are I a tia n taekinna imwaina: “E na bon aki kangaanga ibukim [ke temanna riki] ni kerikaaki riki otana nakon otan Ana taura Kristo ni Kamaiu.”⁵

Ngkana ko na nakon Kristo, ao teimatoa n taainako ni kawain Ana tua ma “nanom ni kabane” (3 Nibwaai 18:32), E na raoniko inanon am borau n te maiu aei. E na taua baim ao n riki bwa am kantaninga. E na riki bwa korakoram. Ao e na uota te kukurei ae teimatoa, te rau ni koaua, ao te kimwareirei ae korakora nakoim.

Ngkai ngai temanna Ana tia kakoaua ae onoti, I kakoaua ao ni berita bwa e bon koaua .