“Karekea Korakorana—Ngkai ao n Taainako,” Ibukin Kakorakoraia Kairake, Maati. 2024.
Te Korakora n Taai Nako
Karekea Korakorana—Ngkai ao n Taainako
Ko tau ni karekea korakoran ao ana ibuobuoki Iesu Kristo.
Kamataata n te tamnei iroun Alex Nabaum
Iangoia ae ko ririaki rinanon te buakonikai ao ni kaitibo ma te ataeinimwaane ae e a tia ni bwaka ao n toka iaon mwaanga ni kai aika a mate. Teuana mai ibuakon mwangan te kai anne e bon rang n rawawata bwa e na tabekia n tingaia.
Ko buokia? Ke ko tekateka moa ao n iangoia bwa e kainnanoa am ibuobuoki?
Eng ko buokia! Te iango ibukin rawam n ibuobuoki ni karokoa ae e bon tokanikai te ataeinimwaane e na bae n taraa n akea naona nakoim. Ao eng ti taku bwa ai ngaia aio arona ibukira—ma ti, n te kangaanga aei, ngaira bon ataei ae ti kainnanoia.
Ko Tau Nakon te Kamaiuaki
N aki tabe ma am ririki, bon te ataei ngkoe ni kabotauaki nakon Tamara are i Karawa ao Iesu Kristo. (Ngkoe, ni koauana, natin ni koaua te Tama are i Karawa.) Ao korakoram—n rabwatam, n te iango, n tamneim, ke n aorakin te iango—bon akea ni kabotauaki ma ake Aia bwai. Angiia mai ibuakora ti ota raoi n te reirei anne. Ma ngkana tiaki ota raoi iai bwa tera bukina, n tainako ti namakinna ae ti aki kona ni karaoa te ibuobuoki ni karokoa ae ti ataa raoi bukina. Anne e bon aki koaua.
Beretitenti Dieter F. Uchtdorf, ngkanne–te Kauoman ni Kauntira n te Moan ni Beretitentii, e taetae n te taina iaon te taeka ni kaikonaki iaon te tiibu are bua inanon Ruka 15.
“Te tiibu anne e kainnanoia ni kan ataa aron kabonganaan te bwai ni borau ni kaota n nena are e oti iaon te oraitan?” e titiraki. “E kainnanoia bwa e na kona ni kabongana te bwai ni borau ni kaota ana tabo? E kainnanoia bwa e na iai te tia rabakau ae na karaoa te bwai ni mwakuri ae na kona ni wewete ibukin te ibuobuoki? Te tiibu anne e kainnanoa te kariaiakaki iroun temanna ae iai te kariaiakaki irouna imwain ae na roko te Tia Kawakin Tiibu ae Tikiraoi nakon te kamaiu?
“E bon aki. Ae bon aki! Te tiibu e tau nakon karekean kamaiu mai karawa bukina bwa e tangiraki Iroun te Tia Kawakin Tiibu ae Raoiroi.
“Ngai irou, te taetae ni kaikonaki iaon te tiibu are bua bon teuana te rongorongo ae moan te ibuobuoki inanon ni kabane booki aika tabu.”1
Ngaira n tatabemaniira nako ti kona ni bua ni bukina aika mwaiti. Ngaira n tatabemaniira, ti ukoukouraki n taian buoka aika na roko mai i karawa.
E Tauraoi n Tainako te Ibuobuoki
E tauraoi n tainako te ibuobuoki nakoira tiaki ti ngkana ti karaoa te bure, ma ngkana ti maiuakina naba te maiu ae te kabanea n tamaroa. E reirei Unimwaane David A. Bednar man te Kooram n Abotoro n te Tengaun ma Uoman:
“I aki koaua raoi n te bwai ae na riki ngkana ti kabwaka ni butimwaea te bwai ni kakorakora aei n te Mwakuri ni kamaiu inanon maiura ao ni kairua ni kakoaua ae ti riai ni uoti rawawatara bon iroura—rinanon te kairoro aika matoatoa, nanom ae korakora, ao te aro ni kairiiri ao ma ara konabwai aika aki tau.
“Bon te bwai teuana ae na ataaki bwa e roko Iesu Kristo nakon te aonaaba bwa e na mate ibukira. Ma ti riai naba ni kakaitau ibukina bwa bon nanon te Uea, rinanon Ana Mwakuri ni Kamaiu ao man mwaakan te Tamnei ae Raoiroi, ni kaungaira —n aki ti ni kairiiri ma ni kakorakoraira ao ni kamaiura.”2
Ko tau ni kareea Ana ibuobuoki! N aki tabe ma te kawai ae ko tibwa nakonako iaona, Iesu Kristo e tei n tauraoi n nakonako n te kawai are imwiina ma ngkoe.