“Ngkoe ao te Tia Kamaiu ni kaitaraa te Aonaaba,” Ibukin Kakorakoraia Kairake, Maati. 2024.
Te Korakora ni Kaitarai Kaibwabwarun Bwain te Aonaaba Aei
Ngkoe ao te Tia Kamaiu ni Kaitaraa te Aonaaba
Kamangaongao, kariiri, bwainikirinaki—e a tia Iesu Kristo n tokanikai ni bwain te aonaaba aei ao e kona ni kakorakorako n tokanikai iaoia naba.
Kamataata n te tamnei iroun Alex Nabaum
E tokanaikai Iesu Kristo ni bwain te aonaaba aei, ao E kaoira bwa ti na karaoia naba. Ma tera “te aonaaba,” ao tera nanon ae ti na tokanikai iaona?
E kateia Beretitenti Russell M. Nelson n aron kawaina aei: “[Tokanikai iaon te aonaaba] e nanonaki n ae te tokanikai iaon te kataaki ao n tabeakin riki bwain te aonaaba aei nakon ana bwai te Atua.”1
“Bwain te aonaaba” e kona n ae am bwai, kinakim, te mwaaka, kamoamoakim, kukureim, ke bwaai riki tabeua ae na kukurei iai te aro n aomata ni maiuna n te maiu ae mamate. Riki ngkana tabeua man bwaai aikai aki kona ni buakaka, ngkana e bua ara taratara iroun te Atua bukina bwa ti a tabeakin riki bwain te aonaaba aei, ao ti na kariki kangaanga aika buakaka aika a na teimaan.
E reireiniira Iesu Kristo ae ti na kaitibo ma te kakaitara ao te bwainikirinaki ngkana ti tokanikai iaon te aonaaba (taraa Ioane 15:18–21). Ma ti teimatoa ni kona ni karekea te rau ao “kam na kabebetei nanomi” bukina bwa E a tia ni kataea ana kai te aba (Ioane 16:33).
A kunea te korakora kairake n ataeinnaine aikai iroun Iesu Kristo ngke a kataea ana kai te aonaaba, ao ngkami kam kona naba!
Kamangaongaon te Aonaaba
I kabanea te tai ae maan n takakaro n te kaombiuta ni katoa bong inanon ririki aika mwaiti. I kuneia raoraou, ao I namakina bwa i bongana. Ma I mwiin au takakaro, ao I namakina te nanokawaki, n aron ae kanga iai te bwai ae bua. I aki rang kukurei.
I tangiria ni kabanea riki au tai iaon bwaai aika a na kona ni kakukureiai ao ni buokai n nakoraoi riki. I moanna n tataro n tainako. Ngke I kaota te bwai ae mena n au iango ao n au namakin nakon Tamau are i Karawa, I namakina te namakin ae moan te korakora ibukin te tangira.
I tangiria ni karaoi bwaai ake a na kona ni kaniiai riki nakon Kristo, bwa I aonga ni kabanea riki au tai iaon bwaai aika bebete n aron kamatebwaian booki aika tabu ao te tataro ni katoa bong, kabanean au tai ma aomata aika iai irouia te Tamnei, ao ni kataia n aki irekereke ma bwaai aika a na kona ni kabirinakoa te Tamnei ae Raoiroi. E a bitaki maiu. E rang kakukurei aei irou.
Ngke I a kaan riki nakon Kristo, I ataia ae iai bwaai aika kakawaki riki nakon takakaro n te kaombiuta ngkana I tangiria raoi ni kan kukurei. Iai bwaai aika akea tokiia.
Alina U., 18, Lithuania
Kangangan Bwain te Aonaaba Aei
N te reirei, ao I bwainikirinaki ao ni kaenaenaaki ibukin au koaua. Ibukin anne ao kakaewenako riki ake tabeua, I namakinna ae ti tebo ma e a moanna ni kangaanga kaitaraakin te maiu irou ni katoa bong. Ma e kaungaai tinau bwa n na onimakina Ana Mwakuri ni Kamaiu Iesu Kristo bukina bwa E ataa marakiu ao e kona ni karekea te rau ao te mweengaraoi mai irou (taraa Reirei ao Berita aika Tabu 19:23).
I baireia bwa n na berita nakon Tamau are i Karawa bwa n na kakaraoa au aki mamatam. I Bubutia bwa e na buokai ni mamaarau ao n au kangaanga, ao E a tia ni karaoia man te tai are e berita iai bwa e na teimatoa ni kakaraoa ana aki mamatam.
E a tia te aki mamatam ni uotai ni kaniai riki nakon Tamara are i Karawa ao Iesu Kristo. I ataia bwa A teimatoa n anga te ibuobuoki ao te boutoka nakoia aomata, ao n anganai te korakora n tokanikai iaon kakaewenako ao ni karekea te kukurei ni koaua. E kamaoi ikoakiu Iesu Kristo ao e buokai ni kaokai nakon Tamau are i Karawa.
Vera R., 17, Brasília, Brazil