“Te Kaokoro ae Tamaroa ae Kona N Reke Man Ana Akoi Kristo,” Ibukin Kakorakoraia Kairake, Maati. 2024.
Te Korakora n Tokanikai Iaon te Bure
Te Kaokoro ae Tamaroa ae Kona N Reke Man Ana Akoi Kristo
Ngkana ti ataia ae e aki karekeaki ana tangira te Tia Kamaiu ma e tatauraoi n tainako, ao a na kona n riki bwaai aika kamiimi inanon maiura.
Kamataata n te tamnei iroun Jarom Vogel
Ngke I beku bwa te bitiobi, e bon kamimi norakin aia namakin aomata aika uarereke ngke a kawarai ni kaota aia bure bwa mwakoron aia rairannano. I teimatoa, n aki kona n ibuobuoki ma I noora te baeten ae okioki: aomata aika uarereke a na teimatoa ni kaoti aia bure, namakina te nakoraoi riki, ao ngkanne—ibukin nanoia ae te kabanea n tamaroa—a manga karaoa riki te kairua. Ngkanne a na manga kaota aia bure, namakina te nakoraoi riki, ao ni manga karaoa riki te kairua. Imwin teniua ke aua te tai rinanon te waaki anne, a na teimatoa ni bwara nanoia.
I rang ni kakaitau bwa a tia ataei aikai n reireinaki ae rinanon, Ana Mwakuri ni kamaiu Iesu Kristo, e anganiia aia tai n rairinanoia ao ni manga wakinna riki. E ngae n anne, ao I raraoma bwa tao aki rang n oota raoi ae iai riki te kakabwaia teuana ae e na anga te Tia Kamaiu: Ana tangira—te mwaaka ni mwakuri1, ibuobuoki mairoun te tamnei, ao “te anga te korakora ae ngaia ae ti rikirake iai man te aki kororaoi ao aomata aika tianaki ti a riki ngkai bwa aomata aika karietataaki.”2
I iangoia bwa n na anga reirei n ae mataata riki, n aron are e a tia Beeretitenti Russell M. Nelson n anga reirei iaona, bwa “te rairannano … bon te kawai”3 are e anaa te tai ao te korakora ae okioki.4 I tangiriia kaain au uoote bwa a na ataia ae e kaitibo te Atua ma ngaira n te tabo ae ti mena iai ao n anga te tangira bwa e na buokiira ni kabutaa te waaki ni kakororaoi, n aki tabe bwa maanra karaoana.
E Kanga Atakin te Tangira ni Buokiko
Tabeua te ririki n nako, te kamatebwai irouia kairake n ikawai ae raka iaon 600 mwaitiia n te Brigham Young University e oti iai bwa naake a ataa taekan ao n oota n te tangira a ribotina kerikakin kangaanga, nanoia, mamaaia, ao kororaoia.5 Te kamatebwai ae boou e kaotia bwa te koaua n te tangira e reitaki ma te karinan ae rietaata riki n te kakaitau, rikirakem bon iroum, nanona n te maiu, kukureina ma te maiu, ao te kantaninga.6
N taekana riki teuana, e na akea angin te maama ao n rin te ang irouia ngkana a mataata raoi bwa e reke buokaia ikai n te tai aei—tiaki imwiin are ti karekea ke ni kona n karekea. Ngkana ti ataia bwa e buokiira te Atua n aki tabe bwa tera ae ti a tia ni karaoia ke mwaitira te tai ae ti a tia n aki kakoroa nanon Ana kaantaninga Tamara are i Karawa, ti namakina te ungannano n teimatoa ni kataia.7
“I a Tia ni Uota Tamara are i Karawa Rikaaki”
N te tai ae aki maan n nako ao e ikoaki te mitinare n tain aia katauraoi-nakon aia waaki ni kakukurei n takakaro ao e kaokaki nakon mweengana bwa e na kamarurungnga. E korakora ana iango ibukin karekean te ibuobuoki ae kainnanoia bwa e aonga ni manga okira ana mition. Ngaia are, ngkana e a rang mwaiti ara tai aika aki barongaki raoi ao e na waekoa ni kamaunai katei ni kawai.
E rang n irekereke ma te bure are n ana iango e a tia n rairananona mai iai ao ni katikua imwiina imwain ana mition. E bwarananona ao e aki kukurei ibukin akean ana tararua bon irouna. Rakan korakoran nanokawakina ae karekea, ao bon rakan naba kamaiuana man katei aika bubuaka aikanne. Bon te kawai ae na uotiko rikaaki are e na waekoa ni uotia nakon te kawai ae buakaka.
“I namakinna ae kanga I a tia ni uota rikaaki Tamara are i Karawa,” te ataeinimwaane e tuanga ana tia kairiiri n te nakoanibonga. “I a tia n raira nanou man te bwai aei imwaina, ao e kabwara au bure te Atua. I berita bwa n na aki mang karaoia riki, ao aio ngai ae titebo ma I tuai man rairananou mai n te moan tai. I aki butimwaea ana kabwarabure ke ana ibuobuoki te Atua. Tiaki ngkai. I aki kona.”
E taku ana tia kairiiri n te nakoanibonga, “Ngkanne ko aki kukurei n ataia ae te tangira bon te bwai n tituaraoi? Tiaki n ae ko na karaoia ke ni karekea. Ko na ti rineia ni karekea man n teimatoa ni kataia ao n aki bwarannanoia.”8 Te tia kairiiri ngkanne e tibwauai taeka aikai mairoun Unimwaane Neil L. Andersen man te Kooram n Abotoro n te Tengaun ma Uoman: “Ti kona ni manga karaoa te bure are ti karaoia mai imwaina, ma ti waekoa n oki ao n nanorinano ni katorobubua ao ni manga waaki n te kawai ae eti.”9
Teuana riki, e oki te ataeinimwaane nako karawa, ao te Tia Kamaiu e mena ikekei bwa e na buokia. E aki ti kamaoaki ikoakin te ataeinimwaane, ma nanona naba. Teuana te kouru ae uarereke n te taina, ao ma te tangira are karaoaki iroun Iesu Kristo, e a moanna n nakoraoi riki. E waekoa n oki nakon ana mition ma te kakaitau, te tau bon irouna, atakin nanona, te nakoraoi ni maiuna, ao te aki nano uoua. Anne te kaokoro ae kona ni karaoaaki n ana tangira Kristo.