“Ngkana Ko Rootaki n te Nanokawaki,” Ibukin Kakorakoraia Kairake, Maati, 2024.
Te Korakora n Taai n Nanokawaki
Ngkana Ko Rootaki n te Nanokawaki
Ngkana ko namakina te nanokawaki, ao e kona Iesu Kristo ni kakukureiko ma te kaantaninga.
Te Kamataata n te tamnei iroun Dean Macadam
Ko kona ni kakoroi bukiia ao ni karekei aika mwaiti n te maiu aei rinanon te mwakuri korakora ao te nano ni kan ukora totokoan kanganga. Ko kona ni moantaai ni matu, ni moantaai n uti (taraa Reirei ao Berita aika a Tabu 88:124), ao ni karaoi katei ao kaetieti bon ibukim aika raraoi ni katoa bong.
Ma a teimatoa, boong ake tabeua ni matoa riki nakon ake tabeua.
Ao ni boong ake tabeua … eng, a moanna ni matoa riki ao ko nang moanna n iangoia ae a nako boong aika raraoi n akea tokiia.
Tera ae ko karaoia ni boong aikanne? Tera ae ko karaoia ngkana am kabanea n tamaroa ni mwakuri, n raonaki ma am kabanea n tamaroa ni maiuakina te maiu ae raoiroi (te tataro, te aki mamatam, kamatebwaian koroboki aika tabu, te nakon te taromauri ao te tembora, etc.), aki taraa n tau? Ngkana ko mwakuri korakora ni kaitaraa te bwarannano, ma e tara ni manga oki n ae korakora riki?
Eng, rairaki nakon Iesu Kristo. Te kaantaninga bon ana bwai n tituaraoi te tamnei (taraa Moronaai 8:26). Ao bwaai n tituaraoi aikai a bane n roko mai iroun Iesu Kristo (taraa Moronaai 10:17).
Ngkana a bwaro iaom kangaangan te maiu kanga ai aron te maunga ae bwaka mai i karawa, e kona ana bwai n tituaraoi te kaantaninga n riki bwa am bwai ngkana ko kabanea riki am iango iaon Iesu Kristo.
“E Kabebetei Rawawatau te Uea”
E a kaman riki bwa te kangaanga te maiu aei irouia kaain Venezuela aika mwaiti imwain butanakon te aoraki ae te COVID-19 ae aki kantaningaaki n 2020, ma n te tai anne ao a moanna ni kangaanga aron kamaiuakiia aoraki. Ibukin Sebastian ae 11 ana ririki ao ana utu, e kainnanoaki te korakora mairoun Iesu Kristo bwa a na teimatoa ni marurung ao ni kukurei n taai n nanokawaki. “I namakina te aki rau ngke tiaki kona ni kabooi bwaai aika kakawaki n aron te amwarake, te kunikai, ao te bwainaoraki,” e taku Sebastian. “Ma iai au onimaki bwa e na teimatoa te Uea ni kakabwaiaira. I namakina te kakabwaiaaki ngke I kona ni karekea au kakabwaia n te tamanuea. E tuangai ni bwaai ake I a kaman beritanaki iai imwain ae I roko nakon te aonaaba.”
Kabanean ara iango iaon Iesu Kristo bwa kanga mwakoron ana botoniango te roronrikirake n te ririki ae nako (“I kona ni karaoi bwaai ni kabane rinanon Kristo” [I-Biribi 4:13]) e kakoauaaki bwa bon te ibuobuoki ae bubura. “Ibukin kangaanga aika e kaitarai abau, ana botoniango te roronrikirake man te ririki ae nako e kauringai bwa e na buokai Kristo n tokanikai iaon ao ni karaoi bwaai ni kabane Rinanona,” e taku Sebastian.
Bon te mwananga ae rang n abwabwaki, ma e a tia Sebastian ma ana utu n noori kakabwaia ao kaantaninga inanon kawaia. “E Kabebetei Rawawatau te Uea,” e taku. “Ngke I namakina te nanokawaki, I tataro, kamatebwai booki aika tabu, ao ni wareka au kakabwaia n te tamanuea. Te kakaitau nako Ina, bwa ara bitineti n utu iaon te titeitinari are ti wakinna teniua te ririki n nako e a rang n nakoraoi riki n te ririki aei. I tangiria n tuangiia kaain te roronrikirake ake tabeman bwa a riai n tatauraoi n tainako n onimakina Iesu Kristo. Ngkana I karaoa anne, ao I kona ni kaitarai au kangaanga.”
Te Korakora Rinanon te Taratara ae Nakoraoi Riki
Te burabeti Nibwaai, ae kaitara ma kangaanga aika korakora inanon maiuna, e reirei te koaua ae tikiraoi aei:
“Waaki nako man teimatoa i nanon Kristo, ma te kantaninga ae tamaroa ma ni kororaoi, ma tangiran te Atua ma aomata ni kabane. Ma ngaia ae kam na waaki nako, ni kaawakin ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina” (2 Nibwaai 31:20).
Te kaantaninga, bwa te mwaaka ni kaitara te nanokawaki, e na reke ngkana ti kabanea ara iango iaon Iesu Kristo. Aio te tai ae ko na bita iai am taratara nako Ina n ae mwaiti riki?