“N Ningai Ae na Toki Iai Namakinan te Kairua ao te Maama Irou?,” Ibukin Kakorakoraia Kairake, Maati. 2024.
Te Korakora n Tokanikai Iaon te Bure
N Ningai Ae na Toki Iai Namakinan te Kairua ao te Maama Irou?
N tabetai e kona n taraa n rang ni bebete riki namakinan te bwarannano ibukim nakon namakinan ana tangira te Tia Kamaiu ibukim—ma ae e ataia Nibwaai, e na aki taraaki n arona anne.
Ngkana ko karaoa te bwai ae bure, ko na bae n tia n iangoia n am iango ae ngkoe bon te tia bure. Bwa ko riai n ataa ae raoiroi riki. Bwa ko aki tau n tangiraki.
Mwakoron am iango aika raraoi, ko ataia ae akea mai ibuakon bwaai aikanne aika a koaua. Ko a tia n reiakina taekan kororaoim ae ngkoe bon natin te Atua te mwaane ke te aine, ao ko ataia ae te rairannano e bon koaua ao ni kona ni karaoaki. Ma, imwiin are ko a tia ni karaoa te bure ke ni karaoa te kairua, ko na bae ni kaririaki ni katuaeko n ae korakora riki nakoia ake tabeman ma iango aika kairua ao ni kamaama.
Tabeman aomata inanon koroboki aika tabu a namakina naba aei.
Nibwaai naba?
Imwiin korean rongorongon maten tamana, E koreia Nibwaai, “Ma e ngae ngke e korakora raoiroin te Uea, ngke e kaoti nakoiu ana mwakuri aika korakora ma ni kamiimi, e takarua nanou ni kangai: O te aomata ae kananoanga ngai! Eng, e rawawata nanou ibukin rabwatau; e rawawata nanou ibukin au bure. I otabwaniniaki n taiani kariri ao bure aika I kai rootaki iai. Ao ngke I a kan kukurei, ao e tang nanou ibukin au bure” (2 Nibwaai 4:17–19).
Aio Nibwaai are ti taekina rongorongona—te aomata naba are e kamanoi bwaatua aika buraati mairoun Rabwan, e bobaraaki n anga te karinerine n te buakonikai, ao e kabaa te kaibuke n akea raoi ana atatai n aron kabakina. Iai ana koaua iaon raoiroin te Uea; e ngae ngke, e namakina te aki tau ibukin ana bure ao mamaarana.
Ngaia ae, tera ae ti riai ni karaoia? Ngkana aomata aika ninikoria n ana Boki Moomon a kekeiaki ma namakinan te kairua ao te aki tau, tera ae ti kona ni karaoia ngkana ti namakina te aeka n namakin naba anne?
Te Kawai ni Koaua Bon Taraakin Iesu Kristo
E aki toki ikekei ana karaki Nibwaai. Te bwai ae riai ni karaoia Nibwaai bon kainetan ana taratara nakon Iesu Kristo.
Ngkai e rootaki n te nanokawaki Nibwaai, e taku, “E ngae n anne, I ataia bwa antai ae I onimakinna. Bon Atuau riki te tia buokai” (2 Nibwaai 4:19–20).
Imwiin te kamwaing n te iango aei, te aomata ae ninikoria ni booki aika tabu e aki kabanea ana iango iaon te kangaanga ae namakinna man ana bure. Irarikin anne, e kimwareirei iroun ana Tia Kamaiu! E taku Nibwaai, “Kimwareirei, O ngkoe nanou, ao taang nakon te Uea ni kangai: O te Uea, N na neboiko n aki toki; eng, e na kimwareirei tamneiu iroum, Atuau, ae te bwa ibukin kamaiuau” (2 Nibwaai 4:30).
N aron Nibwaai, ko kona ni karekea te tangira, te kabwarabure, ao te rau rinanon Iesu Kristo. Ko kona n aki namakinna ae ko kona ni bon anganiko te tangira, ma iai Temanna ae na anga. Unimwaane Jeffery R. Holland man te Kooram n Abotoro n te Tengaun ma Uoman e taku, “Ana akoi Kristo e anganiira tiaki ti te kamaiuaki man te rawawata ao bure ao te mate ma te kamaiuaki man kabuakakakira i bon iroura ae teimatoa.”1
Ngaia ae ngkana ko namakina te nanokawaki are ko aki kona iai n noora te kawai ni kabwarai am bure ao am kairua, ko na ataia bwa Tamara are i Karawa ao Iesu Kristo aki kona ni katoka tangirakim. Katuka am taratara iaon te Tia Kamaiu, ao E kona ni buokiko n tokanikai iaon am bure ao am kairua.