“Te Kakai ae Ti Kainnanoia ni Katoa,Bong,” Ibukin Kakorakoraia Kairake, Maati. 2024.
Te Korakora n Tokanikai Iaon te Bure
Te Kakai ae Ti Kainnanoia ni Katoa Bong
Ngkana e tangiriira te Atua, bukin tera E tuangiira bwa ti na bitaki ao n rairinanora? Aikai tabeua koaua ibukin te bure ao ana mwakuri ni kamaiu Iesu Kristo.
Kamataata n te Tamnei iroun Adam Howling
Tera ngke ko kona n riki bwa te tia kakoaua n ana kakai Iesu Kristo ake e karaoi ni Maiuna iaon te aba? Matakuakinna ngke E katoki aoraki ao ni kauta te mate? E ngae ngke tiaki kona n okirikaaki n noori taian kakai aikanne, iai teuana mai ibuakon ana kakai Iesu Kristo ae ti kona n noria ni katoa bong. Ao bon teuana ae moan te kakawaki mai ibuakoia ni kabane: E tokanikai iaon te bure.
Te Koaua Iaon te Bure
Tabeman a na bon mimi bwa bukin tera ngkai anne te bwai ae kakawaki. Ao rekena e kangai bwa, e ngae ngke ti karaoa te bure ikai ao ikekei, e teimatoa te Atua n tangiriira, ngaia anne? Ngaia anne, eng, Tamara are i Karawa ao Iesu Kristo a rang n tangiriira. Ma bukina ae A rang n tangiriira, iai riki reirei ao atatai aika nano aika a na maroroakinaki ni kaineti ma te karaki aei.
Ngke E kawariia tenaan Nibwaaite, e reireiniira te Tia Kamaiu bukina ngkai e rang kakawaki te kona n tokanikai iaon te bure: “Akea te bwai ae bareka ae kona n rin n uean te [Atua]” (3 Nibwaai 27:19).
E aki taekina “akea te bwai ae itiaki ma ti buure tabeua aika uarereke.” E reirei bwa buure n aekaia nako (aki karinei ma nanoia ana tua te Atua) e na totokoira man okiran te Atua ao ni manga maeka riki ma Ngaia.
Anne te kangaanga. Ti tuai kona ni kororaoi ni kawakin ana tua te Atua . E koaua aei ibukiia aomata ni kabane—te kabanea n raoiroi ni burabeti, te tia bure ae te kabanea ni buakaka, ao ni kabane i marenaia. Ngkai tiaki kona ni kamaunai ara bure bon iroura, te bure e na totokoira man rinra nakon uean te Atua.
Te Kakai n Ana Mwakuri ni Kamaiu Kristo
Te kakaitau ae moan te bati, bwa Tamara are i Karawa ao Iesu Kristo a ataia ae ti kainnanoa te ibuobuoki. N te Onaroka are i Ketetemwane ao iaon te kaibangaki, Iesu Kristo e uoti i Aona marakira, aorakira, karawawataakira, mamarara, ao ara bure ni kabane (taraa Aramwa 7:11–13). Bukina ngkai Ngaia ni kauoman bon Natin te Atua ae kororaoi ao natin Maria n te maiu ae mamate, E kona ni kaboa te bure ae akea temanna ae kona ni kabooa.
Anne bukina ngkai E taekinna nakoia Nibwaite, “Ngaia are akea ae kona n rin i nanon ana rau te [Atua] ma ti naake a tia n teboki aia kunnikai n raraau, ibukin aia onimaki, ao aia rairannano man aia bure, ao aia kakaonimaki n uaa te toki” (3 Nibwaai 27:19).
Te kakai tera anne ibukin Iesu Kristo, ti kona ni kaitiakaki man ara bure! N te tai are ti ataia bwa ana mwakuri ni kamaiu te Tia Kamaiu e riai ibukira, ti kona n onimakina Korakorana ngkai iai ara onimaki Irouna, n rairi nanora man ara bure, ao n reitinako n Iria n te onimaki ni karokoa te toki. Bon te kakai ae kona n riki ni katoa bong ngkana ko onimakina Mwaakana ao ana mwakuri n te onimaki!