“Te mwakuri ma te Mamaara bon Taben te Tia Kamaiu,” Ibukin Kakorakoraia Kairake, Maati. 2024.
Te Korakora n te Mamaara
Te Mwakuri ma te Mamaara bon Taben te Tia Kamaiu
E kona Iesu Kristo ni buokiira n rikirake rinanon taian kangaanga, n aki ti rin i nanona.
Kamataata n te tamnei iroun Uran Duo
Mason e aki namakina ana tangira te Atua n aron are rimoa. E a tia ni kaitara ma te nanokawaki inanon tabeua ririki ma teutana nakoraoina, ao e raraoma bwa a na aki kona ni koro bukin miina.
Anna e ongo aia taeka tabeman kairake iaon aia taneiai ma te kaotioti ao taian kakai. E ngae ngke e kataia, e aki namakinna ae e a karekei kaeka ke ni karekei taneiai n tamnei n aroia aomata n tatabemaniia nako.
E mimi Ethan ngkana e na aki kona n namakina te itiaki ke te manga tau riki. E a tia ni karekei kataaki n taai aika mwaiti are e a namakina iai buan ana konabwai n tararuaia ao ni mimi ngkana e a tia ni kabuai ana kakabwaia n te berita. E mimi ngkana e na aki kona ni kabwaraaki ana bure ao n rikirake n namakina te kairua n te taromauri.
E mengo Madison ma aron babarean amwarakena. Olivia iai ana kangaanga n ana kamatebwai. E kekeiaki Conner n totokoi karaoan mwakuri aika bure (teimatoan ururingakin kairua). E a tia Abigail ni bwainikirinaki ao n namakinna ae kanga ai akea uaana. A rinanon te raure ana karo Jake, ao e namakina te rawawata ao te mangaongao n ana iango. E a tia Jayden ni bwainikirinaki ao e namakinna ae e aki kona ni kabwarabure.
A rawata aia kangaanga aomata, ma iai teuana aron katokana. Te bwainaoraki anne bon iai arana—Iesu Kristo. Aomata aikai a tangiria n namakina te korakora, te itiaki, te kukurei, ao te manga ikotaki, ma aki kona n buoka aia kangaanga i bon irouia. Ma e anga te ibuobuoki Iesu Kristo. Ni koauana, te mwakuri ma te mamaara anne bon Tabena ae onoti. E aki roko Ana ibuobuoki n aron ae ti tangiria bwa e na kanga ao ningai, ma e na bon roko.
Aika tabeua reirei aika a na buokira ni butimwaea ana kakao te Tia Kamaiu n nakonako ma Ngaia (taraa Mote 6:34), riki ngkana ko korakai ma te mamaara.
E Nanonaki te Maiu bwa te Bwai ni Kataaki
E tangiriko riki te Atua nakon tangiran te anua ni maiu ao te rau are inanom. Mwaitira aomata aika ninikoria n tia n ti rinanon te rau ao te tokanikai? E taraa n ae, a okioki ni kaitaraki ma te kakaitara ao te kangaanga ae korakora. Ngkai bon mwakoron kataakira n te maiu aei, “e nooria te Uea bwa e riai ni katuaia ana botanaomata; eng, e katai taotaonakin nanoia ma aia onimaki” (Motiaea 23:21). Ti kona n aki tangiria, ma n tainako ao katakira aika matoatoa a katauraoira ma rikirakera aika kamimi.
Te Mamaara Tiaki te Kanikina n Ana Aki Kariaia te Atua
A mwaiti aomata n taai ake rimoa ae a kakoaua bwa aorakin te rabwata ao te iango bon kanikina ibukin ana katua te Atua (taraa Ioane 9:2). Ma te mamaara bon mwakoron te maiu ae reke man te Bwaka. Te kaunrabwata ma kakaewenako n te maiu bon mwakoron ana babaire Tamara are i Karawa ae kakawaki, ti bon aki kona ni kaitarai kangaanga aikanne i bon iroura. E aki kanakomaiakaki Iesu Kristo bwa e na motiki taekara; E roko bwa e na tangiriira ao ni buoka kaokaia naake a bua, mamaara, ke ni maroa—are bon ngaira ni kabane (taraa Ioane 3:16–17; Ruka 15).
Bwaai Aika Mamaara A Korakoraaki rinanon Kristo
E kakawaki bwa ti na kabwarabwaraira n ara reitaki n ara berita ma Kristo ao ara onimaki ni Kororaoina nakon ae kinakira man ara aki kororaoi. E aki kona Iesu Kristo ni katinanikuia aomata ake a botumwaaka n Nakoina ma te onimaki. E anganiia aomata te Atua “mamaaraia bwa aonga n nanorinano; ao e tau [Ana] akoi nakoia aomata ni kabane ake a kananorinanoia i [Matau] … ao n [Onimakinna],” ao ngkana a karaoi, “ao ngkanne [E] nakraoi baika mamaara bwa a na riki bwa korakoraia” (Ether 12:27). Ngkana ti uoti korakaira nakon te Uea ma te nano ae uruaki ao te tamnei ae raraoma (taraa 3 Nibwaai 9:20), E na bon aki waekoa ni uoti nako, ma E na buokiira ao ni kakorakoraira.
Bwaina te Taotaona n nano
Kawain te berita bon te kawai ae rang n abwabwaki, tiaki te kawai ae uarereke. Irakin te kawai anne e na buokiira rinanon te rarikiriki ao te rairaki, te waerake ao te ruorikaaki, te kakukurei ao kabuanibwai, otan taai ao angibuakan te maiu. A mwaiti reirei aika kona n reiakinaki inanon mwanangara ae abwabwaki aei. Ana akoi Iesu Kristo e kaoti n tainako iaon te tai, tiaki ti n taai aika kaokoro ke ni mwakuri aika kamimi.
Reitaki ma Kristo
Ngkana ko namakina te mamaara ke ni kekeiaki, butimwaea ana kakao te Tia Kamaiu: “Bane mai nako Iu, ngkami akana kam kua ao kam rawawata, ao N na motiki rawami” (Mataio 11:28). Kakaei kawai aika a na buokiko ni kona n reitaki ma Ngaia. Ngkana ko nako Ina, ao ko na kunea ae e a tia ni kataia ni buokiko Iesu Kristo ao e na aki kona ni bwara nanona iroum! E aki kona ni kororaoi te maiu aei, ke ni kainaomataaki man te maraara, te maraki, ke n am kekeiaki. Ma e na nakoraoi riki ngkana e mena Iesu irarikim bwa e na kamaiuko ngkana ko bwaka, kabaea ikoakim, ao ni kairiko nakon kawai aika a na kairiko nakon te kimwareirei ae akea tokina.
Iesu Kristo e korakora nanona ni mwakuri ma aika a mamaara. E korakora nanona ni kan mwakuri ma ngkoe!