Te Korakora n Nako ni Beku

I kona n Ibuobuoki Ngkana I aki Bobo ma Aomata?

Iroun Jessica Anne Lawrence

Ana Maekatin te Ekaretia

E kona te Tia Kamaiu ni kakorakoraira e ngae ngkana e kangaanga iroura kawarakiia aomata.

Ngke I reirei n te reirei ae rietaata, n au iango ao I aki tau n riki bwa ana reirei Iesu Kristo bukina bwa e kangaanga irou te taetae nakoia aomata. Bon te aomata ngai ae iaki bobo ma aomata—I bon rang ni mamaama! Bukina bwa I rang ni mamamaa e bon kangaanga irou karekeaia raoraou ao n tiku n tingai irarikiia kaain au kiraati n te reirei ao n te taromauri.

Ibukin anne, ao I mamaa ni karekei nakoa n te Bootaki n Ataeinnaine ao n namakinna ae I aki rang n reitaki ma te tamnei tiaki aroia raoraou ake a rang n tataetae ao ni bobo ma aomata riki nakoiu.

Ngaia ae ngke e a bane au tai n au reirei ae rietaata ao n iangoia bwa n na nako ni mitinare, e nako nanou!

I namakinna ae e tangirai te Atua bwa n na nako ni mitinare, ma au moan n iango e kangai, “Bukin tera te Atua e tangira temanna n ai arou bwa n na nako ni mitinare? I aki kona n taetae nakoia aomata!”

Ma nakon nanou n aron are mai imwaina, I baireia bwa n na onimakina te Atua ao n nako ni karaoa au mitinare.

Onimakinan Korakoran Kristo

Ngke I nako ni mitinare, n te moan n tai ao a kangaanga bwaai, ma ngke I reitinako ni kataia (ao ni kariaia bwa n na kerikaaki), I kunea bwa E kakorakoraai te Uea bwa n na karaoa te mwakuri are E tuangai bwa n na karaoia.

N ana Boki Moomon te Uea e taku, “Ngkana a roko aomata nakoiu N na kaota nakoia mamaaraia. I anganiia aomata mamaaraia bwa aonga n nanorinano; ao e tau au akoi nakoia aomata ni kabane ake a kananorinanoia i matau, ma n onimakinai, ao ngkanne N na karaoa mamaaraia bwa a na riki bwa korakoraia.” (Ita 12:27).

N au tai ni mitinare I kunea bwa e kona Iesu ni karaoi bwaai aika kamimi n tiaki ibukin korakorau ma bon Ibukina. Ao I kunea naba bwa e aki roko irou Korakorana bukina bwa ngai te mitinare, ma bon te bwai ae I kona n tia n onimakinna n te reirei ae rietaata.

Te bwai ae kakukurei ibukin Iesu Kristo bwa ti aki kainnanoa beeba aika bubura man te iuniwetiri ke rongorongom n am mwakuri ke n am reirei ngakana ko na beku n Abanueana ao n riki bwa ana reirei Iesu aika marurung! Ngkai ti nanorinano ao n iangoia i nanora bwa ti na beku, e na anaira Iesu Kristo n arora ae ngkai, te tabo ae ti mena iai, ao n anganiira te ibuobuoki ao te korakora ni beku Ibukna.

E Kakorakorako Ngkai Ko Beku Ibukiia Tabeman

“Iai ana tai te Uea irarikim n namakina ao n tibwaua Ana tangira. … Ko na namakina ana tangira te Uea ibukim ao ibukia naake ko na reireiniia. N am tai ni buokiia natin te Atua n aia kanganga, ko na namakinna ae am kanganga a na taraa ni bebete riki. E na kakorakoraaki am onimaki ma am kantaninga.”

Beretitenti Henry B. Eyring, Te Kauoman ni Kauntira n te Moan Beretitentii, “Kataia, Kataia, Kataia,” Okitobwa. 2018 maungatabu ni kabuta (Ensign ke Riaona, Nobembwa. 2018, 92).

“E aki boboto ana tangira te Atua iaoia naake aki bobo ma aomata ke ngkana a rawata riki raoraom nakoia tabeman; e boboto iaon te bwai ae mena i nanom. Ma n Ana tangira, ao ngkana ko nanorinano ao ni karinerine, ao ko kona n reirei te koaua nakoia ake irarikim. I tangiria ni kakaonimaki bwa I aonga n tibwauai bwaai aika e tangiria te Atua bwa n na karaoi.”

Jocelyn R., 13

Tuoa te Gospel Living app n te namwakaina aei ibukin reirei riki tabeua mairoun Jessica ao tabeman ake a tabe ma te maama ao te nano ni kan bobo ma aomata.