“Am Taan Kawakin Tiibu Rinanon Mwaruan te Maaku,” Ibukin Kakorakoraia Kairake, Maati. 2024.
Te Korakora ni Kaitara te Tabeaianga ao te Maaku
Am Taan Kawakin Tiibu Rinanon Mwaruan te Maaku
N taai n ingainga, ti kona ni kakauongo nakon bwanaan ara Tia Kawakin Tiibu.
Bon Iehova te Tia Kawakinai, iroun Yongsung Kim
Teuana mwakoron booki aika tabu ae moan te kinaaki bon Taian Areru 23. Aomata aika kakaonimaki ni kabuta te aonaaba man aro aika mwaiti a teimatoa ni karekea te rau inanon kiibu aikai aika koreaki n ririki aika mwaiti n nako.
Bon Iehova te tia kawakinai ngkai kanga te tibu ngai; ane e na aki kai nanou n te bwai teuana.
E kaweneai n tawana n uteute aika mawawa: E kairirai nako rarikin ran aika e rau te aba iai.
E kamaiua tamneiu: e kairirai i nanoni kawain te raoiroi ibukin arana.
Ao ngkana tao I nakonako i nanoni maruan nun te mate, ao I aki maaka te bwai teuana ae buakaka: ba Ko memena i rarikiu; am kai ao okom, a kabebetea nanou.
Ko katauraoa te taibora i mwaiu i mataia taan ribaai; ko kabira a tuu n te bwa; e tao nako au mangko.
Ane e na bon irirai te raoiroi ma te atataiaomata n ua tokin au bongi ni maiu; ao N na mamaeka i nanon ana auti Iehova n aki toki.
Ko a tia ni mena irarikiia tiibu? A taraa ni kibakiba n aki akaka ao ni moana biriia ma n tatakarua ke mwaingingiia. Aki ataaki raoi ibukin aki maakuia! Ao tao anne te bwai ae ti kona n reiakinna man te kabotau aei—te Uea e ataia ae ti na bane n namakina te maaku. Akea te bwai ae kakamaku n te bwai anne! Bon mwakoron te kakaewenako n te maiu aei. N taai n ingainga aikanne, ti kona n ongora nakon bwanaan ara Tia Kawakin Tiibu. E kataia ni kairiira nakon “tawaana n uteute” n te rau ao te kamanoaki ae teimatoa. Aikai tabeua kawai ae E tangiriira bwa ti na Iria.
-
Kamatebwai ana taeka ara tia Kawakin Tiibu—n aron Ana reirei n te Nutetemanti, 3 Nibwaai, ke n Reirei ao Berita aika Tabu. Ngkana ti karaoia, ti kona n namakinna ae ti a kamwarakeaki n te tamnei ao ni kona riki ni kina Bwanaana n te tai ae na roko.
-
Tataro nakon Tamara are i Karawa n aran Iesu Kristo n te tai n aki akaka ni butiia ibukin te mwengaraoi ao te rau inanon maium.
-
Butimwaeia ae e kona ana ibuobuoki te Tia Kamaiu n anai aekaia aika mwaiti, n raonaki ma kaaro, taan kairiiri n te Ekaretia, raoraom, ao riki taokita ao taan rabakau ake tabeman.
-
Ikotiia ma tabeman ake a tangira te Tia Kamaiu, n aron ae n te taromauri ke n te tieminari. E kona n reitiira aei ma aia komiuniti Aika Itiaki ae tangiraki ae a botaki ni mwakuri n ira te Tia Kamaiu ao n tokanikai iaon tabeua kanganga aika kakamaku ma Ana ibuobuoki.
N tabetai te tokanikai iaon te maaku bon te mwananga, n aron te mwananga rinanon te mwarua ae rotongitong rinanon te mwarua ae ro, n aron are e taekinaki n Taian Areru 23 . Nicolas F., mai Brazil, e kona ni kakoaua ae ngkana ko teimatoa ni waaki nako, ao e na roko te kamaiuaki. E kekeiaki ma namakin ni kabwaka ao ni maaku ibukin te tai ae maan.
“I tataro n ae bati, ni butia te Atua bwa e na kanakoi iango aika buakaka man au iango, n tuangnga bwa e na kanakoi namakin aika buakaka,” e taku. E rinanon taai ni kamangaongao ao n teimatoa ni karaoi kairua aika e a tia ni karaoi.
“I kataia ni kakaea mwakan te Atua, ma I tuai n namakina Ana kamaiu,” e taku Nicolas. E ukori booki aika tabu ibukin kiibu aika a irekereke ma te tokanikai iaon te maaku ao ni kunea te korakora iaon taeka aikanne. E karekea te boutoka mairoun tinana ao tabeman riki.
N tokina, n te tawanou teuana, e namakinna ae e kamaiuaki ao ni kukurei. E ataia bwa raroara are e a tia n nako iai.
“Imwain ae I namakinna ae I a kabureaki,” e taku. “Ma ngkai I namakinna ae kanga n na tokanikai iaon te buaka. Ngkai I ukora ana ibuoibuoki te Uea, I namakina te kaantaninga.”
Tao namakinan te maiu aei titebo ma riringa n iteran te tabuki are teuana ke te mwarua ae nuu, iai am Tia Kawakin Tiibu ae Raoiroi, ao E na nakonako ma ngkoe. E Tangiriko! E na buokiko n rinanon aei. Tiku ni kaan nako Ina, ao E na kairiko nakon te rau.