Yɛafam Jesus Christ ho: Yɛrebɛyɛ Asaase do Nkyen

Elder José A. Teixeira ne Kasaa

Ɔkã Eduosuon no hɔn Presidency ho

Ber a yɛda ho fam Ewuradze no, hɛn abrabɔ bɛda Ne kan no edzi, na yɛbɛba abɛyɛ asaase do nkyen.

Agyenkwa no kyerɛkyerɛɛ dɛ sɛ “wɔfrɛ [hɛn] ma [yɛba N’asɛmpa] a ɔwɔ hɔ daapem ho, na [yedzi] ahyɛmu a ɔwɔ hɔ daapem no a, wɔfa [hɛn] dɛ asaase do nkyen.” Ndzɛmba ebien a wɔabɔ mu na ɔyɛ nkyen. Hɛnara yerunntum nnyɛ nkyen; sɛ yɛbɛyɛ asaase do nkyen a, otwar dɛ yɛfam Ewuradze ho, na dɛm na muhu ber a menye Asɔrmba a wɔwɔ wiadze mfɛndzanan dzi nkitaho—muhu asɔrmba anokwafo a wɔafam Ewuradze ho, etu hɔnho esi hɔ wɔ hɔn mbɔdzembɔ mu dɛ wɔbɔsom binom na wɔayɛ asaase do nkyen.

Hom etu ho a onnhihim no yɛ mfatoho a ɔda nsew. Hom som yɛ enyisɔ na ɔsom bo.

Hɛn mbabun akyerɛ akokodur na etuhoakyɛ a ɔda nsew. Ahokekã mu ara woefua ebusua abakɔsɛm edwuma no, na kɔ a wɔtaa kɔ Ewuradze ne fie no dzi dase wɔ hɔn tu a woetu hɔnho esi hɔ ho. Hɔn pɛ dɛ wobotu mber na ahom esi hɔ asom asɛmpasomafo dwuma wɔ wiadze nyina no kyerɛ gyedzi a no mu dɔ na otsim hɔ. Wɔremmfa hɔnho nnhyɛ mu ara gyan, mbom wɔrekyerɛ kwan no a wɔdze yɛ esuafo a wɔafam Jesus Christ ho. Hɔn som no hyerɛn kan na enyidado, a ɔkã nyimpa pii hɔn abrabɔ. Ɔkɔ Asɔr no ne mbabun hom hɔ, yɛkyerɛ hɛn ndaase a ofi hɛn akoma mu ma hom nkenyan som. Hom nnyɛ Asɔr no ne ndaamba nko mbom ne mprɛmprɛ so. Na hom yɛ asaase do nkyen ampaara!

Modɔ Ewuradze Jesus Christ na metse dɛ ɔyɛ nhyira ma me dɛ minya kwan nye hom som wɔ Ewuradze N’Asɔr mu. Hɛn koryɛ na ahoɔdzen, a otsim wɔ gyedzi a yɛkyɛ mu, ma hɛn ahotodo dɛ yɛnnyɛ ankonam dabiarada wɔ akwantu yi mu. Yɛbɔ mu no, yebotum akɔ do akyekyer Nyankopɔn n’ahenman no a otsim wɔ ɔsom, ɔdɔ, na gyedzi a onnhihim do.

Ber a Jesus Christ kyerɛɛ adze wɔ Galilee Po no ho no, nna Ɔtaa dze daa daa ndzɛmba a n’etsiefo no nyim dze kyerɛ sunsum mu nkowar horow a no mu dɔ. Ndzɛmba no mu kor nye nkyen. Jesus paa mu kãe, “Hom nye asaase do nkyen,”asɛm a no mu dɔ wɔ nkyerɛase na mfaso mu, nkanka ma nkorɔfo a wɔwɔ N’aber do no a nna wɔtse nkyen no bo ahorow pii a ɔsom no ase.

Nkaano nkyen a wotsĩ edwumadze a ɔwɔ Algarve, a ɔwɔ me man Portugal n’anaafo apaamu no, kekã kɔ ekyir mfe mpempem dze kɔ Rome Ahenman ber do. Nwanwa mu ara, kwan a nkyen edwumayɛfo a wɔfrɛ hɔn marnotos, no faa do yɛɛ edwuma no, nnsesaa kɛse fi dɛm mber no. Dɛm edwumayɛfo a woetu hɔnho esi hɔ yi dze tsetse akwan, a wɔdze hɔn nsa ara yɛ hɔn edwuma, a wogu do dze egyapadze a wɔawɔ hɔ mfe aha na aha mu.

Dɛm tsetse kwan yi wɔdze yi dza wɔfrɛ no “nkyen ne nhyiren.” Ama aatse kwan dzendzen a wɔfa do yi nkyen ne nhyiren ase yie no, ohia dɛ etse bea a woyi fi no ase. Algarve no mpoano nkyen nsu asaase no ma bea pa a wɔdze yi nkyen. Wotwa po nsu no to nsutae horow a no mu nndɔ mu a, wɔfrɛ hɔn nkyen nkyɛnsee, na wogya nsu no hɔ wɔ mu ma ewia a ɔbɔ dzendzen no twe nsu no fi mu. Ber a nsu no rifi mu no, nkyen ne nhyiren no huntuhuntu no bɛda nkyen nkyɛnsee no enyi. Dɛm nkyen huntuhuntu yi yɛ krɔngyenn koraa na ɔyɛ dwerewdwerew soronko. Hɔn a wɔyɛ marnotos no tɔ bo ara dze edwindze soronko yi nkyen no fi nsu n’enyi, kwan a wɔfa do a ɔgye nyimdzee na ahwɛyie kɛse. Portugal hɔ no, dɛm nkyen papapaa a ɔtse dɛm no wɔfrɛ no “nkyen cream” osiandɛ wotum yi no bɔkɔɔ fi enyi tse dɛ cream a ɔbɛda merekye no sor no. Dɛm nkyen soronko yi som bo wɔ no krɔngyennyɛ na ne dɛw soronko ho, ntsi ɔyɛ adze a ɔsom bo wɔ edzibanyɛ edwuma mu.

Tse dɛ mbrɛ marnotos no dze mbɔdzembɔ kɛse dzi dwuma dze hwɛ yi nkyen a odzi mu korakoraa no, dɛm ara na hɛn so, dɛ yɛyɛ Ewuradze n’ahyɛmu nkorɔfo no, wɔdɛ yɛyɛ papa yie aber biara ama hɛn dɔ na fasusu aayɛ, dodow ara yebotum no, pefee dɛ hɛn Agyenkwa, Jesus Christ dze no.

Tsetse wiadze mu no, nna nkyen kyɛn adze a wɔdze to edziban mu ma ɔyɛ dɛw ara—nna ɔyɛ edziban koradze tsitsir na ɔyɛ ahotsew na ahyɛmudzi sɛnkyerɛdze. Nna nkorɔfo nyim dɛ nkyen hia ma edziban nkorae na ɔto adze ne dɛw mu. Nna wɔsan so tse nsunsuando no ase dɛ nkyen bɛyew ne dɛw ber a no mu ayɛ fĩ anaa wɔdze biribi afora mu.

Dɛ mbrɛ nkyen tum yew ne mfasoyɛ no, hɛn so yebotum ayew hɛn sunsum mu ahom sɛ hɛn gyedzi wɔ Jesus Christ mu bɛyɛ biarabiara a. Enyi do no bia yɛbɛyɛ dɛ ma yɛtse noara, mbom gyedzi a no mu yɛ dzen nnyi hɛn mu no, yɛyew hɛn tum dɛ yɛbɛyɛ nsesã wɔ wiadze mu na yɛaboa hɔn a woetwa hɛnho ehyia no ma wɔayɛ papa yie.

Ntsi, yebesi dɛn adan hɛn ahoɔdzen na mbɔdzembɔ dze ayɛ nsesã na yɛayɛ nsesã a wiadze no hia no ndɛ yi? Yebesi dɛn akora osuanyiyɛ do na yɛakɔ do ayɛ nhyɛdo pa?

Hɛn nkɔnhyɛnyi dɔfo ne nsɛm da ho wasa wɔ m’adwen mu: “Nyankopɔn pɛ dɛ yɛbɔ mu yɛ edwuma na yɛboa hɛnho nkorkor. Dɛm ntsi na Ɔdze hɛn ba asaase do wɔ ebusua ebusua mu na ɔkyekyer hɛn gu ward na stake ahorow mu no. Dɛm ntsi na Ɔse hɛn dɛ yɛnsom hɛnho nkorkor no. Dɛm ntsi na Ɔse hɛn dɛ yɛntsena wiadze no mu mbom yennfi wiadze.”

Sɛ botae na ɔsom hyɛ hɛn abrabɔ mu mã a, yekwetsir sunsum mu akwadweryɛ; naaso, sɛ botae krɔnkrɔn, sompa ma binom, na kwan krɔnkrɔn dɛ yɛbɔdwendwen adze ho nnyi hɛn abrabɔ mu a, nkakrankakra hɛnankasa hɛn dwumadzi na ahopɛdze men hɛn, a otum ma hɛn dɛw yew. Dza obesiw iyi ano nye dɛ yɛdze hɛnho bɛhyɛ som mu—a ahokekã mu ara yɛreyɛ ndwuma pa na yeetu hɛnho nye sɔn a yɛtse mu no mpon.

Mo nuambanyin na nkyerɛbaa adɔfo, ɔyɛ nhyira ma hɛn nyina ndɛ dɛ yɛwɔ Jesus Christ N’Asɔr mu na yɛwɔ kwan dɛ yɛsom wɔ N’Asɔr mu. Hɛn tsebew nnyɛ pɛr dze, naaso hɛn nyinara botum ayɛ nsesã.

Kaa hɔn a wɔyɛ marnotos, nkyen edwumayɛfo no; wɔdze edwindze a ɔda famu na wɔdze yi nkyen enyi apapa, nkyen papa paa no! Hɛn so yebotum ayɛ ndzɛmba a ɔda famu a, yɛdze mbɔdzembɔ a ɔkɔ do wɔ dwumadzi nketsenketse a ohia mu a, obotum ama hɛn suanyiyɛ na tu a yeetu hɛnho esi hɔ ma Jesus Christ no no mu adɔ. Akwan anan a ɔda famu, eso no mu yɛ dur a yebotum afa do aper dze ayɛ asaase do nkyen nye yi:

Yɛrema Ewuradze ne fie ayɛ adze tsitsir wɔ hɛn som mu. Seseiara a temple horow abɛn hɛn kyɛn nkaano no, yɛretaa ma ɔsom wɔ Ewuradze ne fie ayɛ ehiadze kɛse ma hɛn no bɔboa hɛn ma yeetsim wɔ dza ohia ankasa no do na yɛdze hɛn bra etsim Christ do. Temple mu no, yehu hɛn gyedzi tsitsir no wɔ Jesus Christ mu na hɛn hia papaapa dɛ yetu hɛnho si hɔ ma No.
Enyidaho mu ara yɛrobɔ mbɔdzen ahyɛ binom dzen ber a yɛrobɔ mu edzi asɛmpa no do. Yebotum ahyɛ hɛn ebusua ebusua dzen ber a yɛkɔ do dze enyidaho bɔ mbɔdzen dze asɛmpa fapem horow no ba hɛn abrabɔ nye hɛn efiefi mu.
Yerinya pɛ dɛ yɛbɛgye ɔfrɛ bi na yɛasom wɔ Asɔr no mu. Ɔsom wɔ hɛn sɔn mboanofo mu no boa hɛn ma yɛboaboa hɛnho nkorkor na yɛbɔ mu nyin. Nyɛ daa na som yɛ hɛn ahomka dze, naaso mfaso wɔ mu daa.
Na ewiei no, yɛdze abaɛfor nkitahodzi edwindze ridzi dwuma a botae bi wɔ mu. Ndɛ, abaɛfor nkitahodzi edwindze ma hɛn kwan ma yɛnye binom nya nkitahodzi kyɛn nkaano no. Tse dɛ hom mu pii no, mefa dɛm edwindze yinom do nye nuambanyin na nkyerɛbaa a wɔwɔ asɔr no mu na m’ebusua na m’anyɛnkofo dzi nkitaho. Ber a menye hɔn dzi nkitaho no, metse dɛ mebɛn hɔn yie; yebotum asom hɛnho nkorkor wɔ ohia ber mu ber a hɛnankasa yennyi hɔ. Ekyingye biara nnyi mu dɛ edwindze yinom yɛ nhyira, eso edwindze yinom kor yi ara botum so atwe hɛn efi nkitahodzi a mfaso wɔ mu ho na ewiei no wɔatwe hɛn akɛhyɛ ntɔyɛɛ su binom mu a wɔsɛɛ hɛn mber wɔ ndzɛmba a wonnhia kɛse ho. Yɛreper ayɛ asaase do nkyen no gye ndzɛmba pii kyɛn dɛ yɛrohwɛ video horow a ɔmmbɔadze da wɔ foon nkyis esia do.

Ber a yɛma Ewuradze ne fie yɛ adze tsitsir wɔ hɛn abrabɔ mu no, enyidaho mu ara yɛhyɛ binom dzen ber a yedzi asɛmpa no do, gye ɔfrɛ horow dɛ yɛnsom, na yɛdze abaɛfor edwindzi dzi dwuma a botae bi wɔ mu no, yebotum akora hɛn sunsum mu ahom do. Dɛ mbrɛ nkyen wɔ no krɔngyennyɛ mu no wɔ tum dɛ ɔma dɛw na ɔkora adze no, dɛm ara so na hɛn gyedzi wɔ Jesus Christ mu yɛ, ber a yɛnam hɛn etuhoakyɛ som na ɔdɔ tse dɛ Christ dze no do anyɛn no na yɛabɔ ho ban.

Ber a yɛda ho fam Ewuradze no, hɛn abrabɔ bɛda Ne kan edzi, na yɛbɛba abɛyɛ asaase do nkyen. Mbɔdzembɔ a ɔtse dɛm mu no, nnyɛ hɛn nko hɛn abrabɔ na ɔyɛ prɔmprɔm, mbom yɛhyɛ hɛn ebusua ebusua na hɛn sɔn ahorow so dzen. Hom mma yɛmper dɛ yɛbɔkɔ do afam Ewuradze ho, mma yɛnnyew hɛn dɛw, na yɛnyɛ nkyen aba kakraba a Ewuradze pɛ dɛ yɛyɛ no. Wɔ Jesus Christ ne dzin mu, amen.