Ne Nsa Ayɛ Krado dɛ Ɔbɔboa Hɛn
Sɛ yɛdze gyedzi kɔ Jesus Christ hɔ a, ɔwɔ hɔ dɛ aber nyina Ɔbɔboa hɛn.
Mber a nna musuar no, dɛ yɛyɛ ebusua no, yɛkɛgyee hɛn ahom wɔ mpoano wɔ mo kurow, Chile, hɔ. Menyi gyee dɛ menye m’ebusua hɛn enyi agye dɛ yeridzi ɔhyew ber mu nda kakra. Menyi so sanee gyee mbordo osiandɛ modwen dɛ mubotum akã ho na mayɛ dza nna mo nuanom mbanyin mpanyimfo no wɔtaa wɔyɛ dzi agor wɔ nsu no do no.
Da kor bi, mo nuambanyin no kɔree kedzii agor wɔ bea a nna asorɛkye akɛse rubu ba no, na minyaa nkenyan dɛ moso m’enyi efir yie a mbɛka hɔn do. Ber a meyɛɛ dɛ morokɔ bea hɔ no, muhun dɛ asorɛkye no yɛ akɛse koraa kyɛn ma nna yehu fi mpoano. Awerɛfir mu ara, asorɛkye bi buu ntsɛntsɛm bɛɛn me a, nna m’enyi nnda. Metsee dɛ nna ɔyɛ dɛ ɔdomankoma tum ahyɛ mo do, na otwuuw me adze kɔɔr epo no bun mu. Nna munntum nnhu adze anaa menntse ahyɛnsewdze biara ber a nna oruhwim me kɔ no. Dɛ mbrɛ modween dɛ bia m’akwantu wɔ asaase do reba ewiei no, metsee nkã dɛ nsa bi rotwe me aba sor. Ewiei no, mutumii hun ewia na muguu ahom.
Nna mo nuabanyin Claudia ehu mo mbɔdzembɔ a miridzi mpanyinsɛm na ɔbae bɛgyee me. Nna fi bea a mowɔ no nnyi ekyir fi mpoano hɔ. Mpo dɛ nna nsu no nndɔ no, meyɛɛ basaa na mennhu dɛ nkyɛ mubotum aboa moho. Claudio kãa kyerɛɛ me dɛ ohia dɛ mebɛyɛ ahwɛyie na sɛ mepɛ a, obotum akyerɛkyerɛ me. Nsu gallon pii a memenee ekyir no, nna m’ahantan na pɛ dɛ mebɛyɛ panyin no yɛ dzen, na mekãa dɛ, “Nyew.’’
Claudio kãa kyerɛɛ me dɛ ohia dɛ mobor dzendzen dze hyia asorɛkye no. Mekãe kyerɛɛ moho dɛ nokwar ara mibedzi nkõgu dze etsia dza ɔyɛ dɛ nsu fadum kɛse no.
Ber a asorɛkye fofor kɛse bi rebɛn no, ntsɛmara Claudio kãa dɛ: “Hwɛ me; mbrɛ wosi yɛ no nye yi.’’ Claudio tuu mbirika kɔr asorɛkye a ɔreba no ho na ɔdɔɔ mu esukɔ ansaana asorɛkye rubu. M’enyi gyee n’esukɔdɔ ho ara ma mennhu asorɛkye a nna ɔtoa do reba no. Ntsi, bio, mekɛhyɛɛ epo no bun ase na ɔdomankoma n’ahoɔdzen dze me kyinkyinii. Simaba kakra ekyir no, nsa bi yeer me dze, na ɔtwee me bio dze baa sor na mframa mu. Nna m’ahantan ne dzɛwee no rudum.
Aber yi, mo nuabanyin too nsa frɛ me dɛ menye no ndɔ esukɔ. Dɛ mbrɛ ɔtoo nsa frɛ me no, meka no do, na yɛbɔɔ mu dɔɔ esukɔ. Nna ɔyɛ dɛ ma miridzi nsɔhwɛ a ɔyɛ dzen dodow no do konyim. Nokwar ara, nna ɔnnyɛ mberɛw, naaso meyɛe, medze ndaase ma mo nuabanyin wɔ no mboa na ne fasusu a ɔkyerɛe. Ne nsa gyee me mpɛn ebien, ne fasusu kyerɛɛ me mbrɛ mibesi ahyɛ mo nsɔhwɛ do na medzi konyim dɛm da no.
President Russell M. Nelson ato nsa afrɛ hɛn dɛ yɛndwen celestial adwen, na mepɛ dɛ midzi n’afotu do na medze fa me ɔhyew ber asɛm no ho.
Agyenkwa No Tum wɔ Ɔsɛɛfo do
Sɛ yɛdwen celestial adwen a, yɛbɛtse ase dɛ hɛn abrabɔ behyia tafɛrbanyimbɔmu a ɔyɛ dɛ ɔyɛ kɛsenara kyɛn hɛn ahom dɛ yebedzi hɔn do konyim. Hɛn ɔnnkyebo mber mu no, ɔsɛɛfo no ɔkõtsia no hyɛ hɛn do. Tse dɛ asorɛkye no a onyaa tum wɔ mo do dɛm ɔhyew ber da no, yebotum egyaa hɛn ho mu na yɛapɛ dɛ yegyaa hɛn ho mu ma ɔsɛɛ dzendzen no. “Ɔsɛɛfo no ɔkõtsia yerɛyerɛw” no botum epiapia hɛn akɔ ha aba ha. Mbom mma hom werɛ mmfir nyia a ɔwɔ tum wɔ asorɛkye no do, na nokwar, wɔ adze nyinara do. Ɔno nye hɛn Agyenkwa, Jesus Christ. Ɔwɔ tum no dɛ Ɔboa hɛn ma yefi awerɛhow tsebea anaa gyinabew bɔn biara mu. Sɛ yɛtwe bɛn No yie o, Ɔbɛda ho aboa hɛn wɔ bea a yɛwɔ dɛ mbrɛ yɛtse ara.
Ber a yɛdze gyedzi serɛ No mboa no, Ɔbɔwɔ hɔ aber nyina, na wɔ Ne mber pa mu no, Ɔbɛyɛ krado na Ɔapɛ dɛ Obosuo hɛn nsa mu dzen na Ɔatwe hɛn aba sor akɔ bea a hɔ yɛ dwudwoodwo.
Agyenkwa no na No Ɔsom Fasusu
Sɛ yɛdwen celestial adwen a, yebohu Jesus Christ dɛ Ɔyɛ ɔsom ho fasusu a mfom nnyi ho. Nhwɛdo wɔ hɔ ma hɛn wɔ kyerɛwsɛm no mu ber a Ɔno anaa N’esuafo boaa obi a ɔwɔ hia mu, wɔgyee no, wɔtseen hɔn nsa dze boae anaa wɔdze hyirae. Dɛ ma ɔwɔ m’asɛm mu no, nna minyim dɛ mo nuabanyin wɔ hɔ, naaso nna ɔwɔ hɔ ma me no nnsõ. Nna Claudio nyim dɛ mowɔ ɔhaw mu, na ɔboae pegyaa me fii nsu no mu.
Ber to ber no, yɛdwen dɛ yehia ara dɛ yɛbɔwɔ hɔ ama obi a ɔwɔ hia mu, na mber pii no, beberee wɔ hɔ a yebotum ayɛ. Yerenya onnyiewiei nhumu no botum aboa hɛn ma yeenya nyikyerɛ dze ama amonmu mboa ama binom a wɔwɔ hia mu. Yebotum adan Sunsum Krɔnkrɔn n’akwankyerɛ na nkenyan no do dze ehu mboa pɔtsee a wohia, sɛ ɔyɛ honandua mu mboa tse dɛ nkã-tse awerɛkyekyer, edziban, daa daa edwuma yɛ mboa, anaa sunsum mu akwankyerɛ dze aboa binom wɔ hɔn akwantu mu dze esiesie, ayɛ, na woedzi ahyɛmudzi krɔnkrɔn nyi a.
Agyenkwa no Ayɛ Krado dɛ Ɔbɛgye Hɛn
Mber a Peter, Ɔsomafo panyin no, “ɔnantseew nsu no do dɛ ɔrokɔ Jesus nkyɛn … osuroi; na ɔhyɛɛ ase rodɔ no,’’ nkyii “ɔkaa mu dɛ, Ewuradze, gye me.” Nna Jesus nyim gyedzi a Peter akyerɛ dɛ ɔreba No hɔ wɔ nsu no do no. Nna Ɔsan so nyim Peter no suro. Dɛ ma asɛm no tse no, Jesus “ntsɛmara … too ne nsa suoo no mu,’’ na ɔkãa nsɛm a odzi do no dɛ: “Ɔwo a wo gyedzi suar, ɔyɛ dɛn ntsi na egyee kyim?” Nna Ne nsɛm no nnyɛ dɛ obotwuw Peter n’enyim mbom ɔdze robɔ no nkaa dɛ Ɔno, Messiah no, ka ɔno na n’esuafo ho.
Sɛ yɛdwen celestial adwen a, yebenya pisi no wɔ hɛn akoma mu dɛ nokwar Jesus Christ nye hɛn Ɔgyefo, hɛn Dzimafo wɔ Egya no nkyɛn, na hɛn Pomfo. Ber a yɛdze gyedzi wɔ No mu dzi dwuma no, Ɔbɛgye hɛn efi hɛn asehwe tsebew mu, atra hɛn nsɔhwɛ, mberɛwyɛ, na ehiadze wɔ honandua abrabɔ yi mu, na ɔama hɛn akyɛdze nyinara mu dza ɔso wɔ mu, a ɔyɛ onnyiewiei nkwa.
Agyenkwa no Mmpow Hɛn
Mo nuabanyin no ammpow me dɛm da no mbom ɔwɔw do ama meetum eesũa mbrɛ mibesi ayɛ ama moho. Ɔwɔw do, mpo sɛ nna ohia dɛ ɔgye me mpɛn ebien. Ɔwɔw do, mpo sɛ mpo ahyɛase no ne nsa annka a. Ɔwɔw do, mpo ama meetum edzi mo nsɔhwɛ do na meedzi konyim. Sɛ yɛdwen celestial adwen a , yebohu dɛ hɛn Agyenkwa bɔwɔ hɔ mpɛn dodowara a ohia dze ama hɛn mboa sɛ yɛpɛ dɛ yesũa, yɛsesa, yedzi do konyim, yetum yɛ, anaa yedzi nkonyim wɔ adzebiara a ɔdze nokwar na daapem enyigye bɛba.hɛn abrabɔ mu no.
Agyenkwa no Ne Nsa
Kyerɛwsɛm no kaa Agyenkwa no ne nsa ho sɛnkyerɛdze na ho a ohia. No werdam afɔbɔ mu no, wɔdze mprɛgow fitsii ne nsa mu dze No saan mbeamudua no do. No Wusoɛr ekyir no, Opuei N’esuafo do wɔ nyimpadua a odzi mu mu, naaso asɛnkyerɛdze a ɔwɔ Ne nsa mu no ka hɔ dɛ N’afɔr a ɔmmbɔadze da ho nkaadze. Aber nyina Ne nsa bɔwɔ hɔ ama hɛn, mpo sɛ yenntum nnhu anaa ahyɛase no yɛnntse nkã a, osiandɛ hɛn Ɔsor Egya saa mu yi No dɛ ɔmmbɛyɛ hɛn Agyenkwa, adasamba nyinara Pomfo.
Ɔbɔtwe Hɛn, Jay Bryant Ward yɛɛ nsaano mfonyin no
Nyankopɔn ne Nsa, Yongsung Kim yɛɛ nsaano mfonyin no
Sɛ modwen celestial adwen a, minyim dɛ yɛnnyɛ ankonam wɔ abrabɔ yi mu. Ber a otwar dɛ yehyia ɔhaw na nsɔhwɛ no, hɛn Ɔsor Egya nyim hɛn ahoɔdzen na onyim dɛ yebotum asɔw anaa yedzi hɛn nkõdzen do konyim. Otwar dɛ yɛyɛ hɛn afamudze na yɛdze gyedzi dan kɔ No hɔ. No Dɔba, Jesus Christ, nye hɛn ɔgyefo na ɔbɔwɔ hɔ aber nyina. Wɔ Ne dzin mu, Jesus Christ ne dzin krɔnkrɔn no, amen.