“Emi Nye No”
Christ n’ayamuyie—a ɔda edzi wɔ nokwardzi emudzi mu ma Nyame ne pɛ no—ɔwɔɔw do na ɔkɔ do wɔw do.
Ɔyɛ Ahomgyeda no, na yɛaboa ano dɛ yɛrebɛkã Christ n’asɛm na Ɔno a wɔbɔɔ No mbeamudua mu no. Minyim dɛ mo Pomfo tse ase.
Hom nsusu dza osii yi wɔ Jesus no ɔnnkyebo abrabɔ ne dapɛn a odzi ewiei no mu. Nna dɔm aboa ano, a Rome nsordaafo a wokitsa mpotsibaa na nkrantse kã ho. Asɔfompanyin hɔn mpanyimfo a wokitsa ngyatsɛn wɔ hɔn nsamu, kuw yi a hɔn enyi aber yi nna wɔronnkɔ nnkɛfa kuropɔn bi. Anafua yi wɔrohwehwɛ ɔbarimba kor pɛr, ɔbarimba a wonnyim no dɛ okitsa akodze, ɔagye nsordaafo ntsetsee, anaa ɔnye obiara nnkõe wɔ n’abrabɔ nyina mu.
Ber a nsordaafo no bɛɛn Jesus no, Ɔrobɔ mbɔdzen dɛ Ɔbɔbɔ N’esuafo no ho ban no, Otuu anamɔn kɔr kan na Obisaa dɛ, “Hom rohwehwɛ woana?” Wobuaa dɛ, “Jesus Nazarethnyi no a.” Jesus see dɛ, “Emi nye no. … Na Ɔsee hɔn dɛ Emi nye no no, wɔdze hɔn ekyir [kɔɔr] hɔn ekyir kɔhwee daadze.”
Ma emi no, ɔno nye kyerɛwsɛm mu nsɛm kor a okitsa papaapa. Ndzɛmba binom kã ho no, iyi kã kyerɛ me ntsɛmara dɛ ewɔ Nyame Ne Ba N’enyim ara no—Ahyɛmu Dadaw mu Jehovah kokroko no na Guanhwɛfo Pa wɔ Fofor no mu no, nyia onnkitsa akodze biara no—Ehum mu Guandɔbew yi, dɛm Asomdwee Hen yi, dɛ eretse ne ndze no ara, sõ dɛ ɔbɛma hɔn a wɔkõ tsia no emunumunum asan ekyir, ahwehwe hɔnho do na wɔama dɔm no nyina apɛ dɛ nkyɛ wɔdze hɔn bɔto gyaadze edwumayɛ dɛm anafua no.
Nda kakra ara ansaana no, ber a Ɔhɛɛn kurow no mu konyimdzi mu, kyerɛwsɛm no se “kurow no nyina bɔɔ twitwi dɛ, Woana nye yi? Mutum susu dɛ “Woana nye yi?” yɛ asɛmbisa no a dɛm nsordaafo no a wɔayɛ basaa no nna woribisa sesei!
Asɛmbisa no ne nyiano no runntum nnyɛ No hwɛbea ho, osiandɛ nna Isaiah ahyɛ nkɔm mfe ahaesuon a abasen “dɛ onnyi ahoɔfɛw a ɔbɛma no ho ayɛ akɔndɔ.” Nna ɔnnyɛ wɔ N’afadze a ɔsom bo anaa N’ahonyadze, a Onnyi no mu biara. Nna ommfi N’asɔfodzi ntsetsee wɔ sɔn no mu nhyiamudan mu osiandɛ yennyi adanse biara dɛ Okosũaa adze wɔ hɔn mu biara hɔ, mpo Ne mbabun ber mu no, Otumii hyɛɛ akyerɛwfo na mbranyimfo a wɔawea ara yie fɛr a Ne nkyerɛkyerɛ yɛɛ hɔn ahobow “dɛ nyia ɔwɔ tum.”
Fi dɛm temple nkyerɛkyerɛ no kesi Ne Jerusalem nhɛnee konyimdzi mu na ewiei no, wɔkyeer No a Onndzi fɔ no, wɔmaa Jesus duaa gyinabew horow a ɔyɛ dzen, a ɔtaa omuo mu a, ber biara Odzii do konyim—nkonyimdzi a yennyi ho nkyerɛasee biara gyedɛ Ne DNA a ɔyɛ krɔnkrɔn no.
Naaso abakɔsɛm ber mu dodowara atoto No famu a wommbu No na Ne dasegye wɔ Ne nyimpa ban ho. Wɔatsew Ne tseneneeyɛ do ayɛ no ketseeyɛ ara, Ne pɛrpɛrdzi do ayɛ no ebufuw ara, anaa N’ehumbɔbɔr do ayɛ no ngyagyaamu ara. Otwar dɛ yenndzi fɔ wɔ No su a wɔasesã no koraa ho ma yetum bu enyiwa egu nkyerɛkyerɛ a ɔhaw hɛn no do. “Nkyerɛkyerɛ a wohuan do” yi mpo ayɛ nokwar afa su a ɔda No edzi yie, No dɔ ho.
No ɔnnkyebo somdwuma ber mu no, Jesus kyerɛkyerɛɛ dɛ mbrasɛm akɛse ebien na ɔwɔ hɔ. Wɔakyerɛkyerɛ no wɔ ehyiadzi yi mu na wɔbɔkɔ do akyerɛkyerɛ no daapem: “Dɔ Ewuradze wo Nyankopɔn [na] dɔ wo nyɛnko dɛ ɔwoara woho.” Sɛ yɛbɛka Agyenkwa no do nokwar mu ara wɔ mbrasɛm ebien yi a ohia papaapa na wɔbɔ mu dzi dwuma no a, otwar dɛ yesuo dza Ɔkãe ankasa no mu dzen. Na dza Ɔkãe ankasa nye, “Sɛ hom dɔ me a, hom ndzi me mbrasɛm do.” Dɛm ewimbir noara no, Ɔkãa dɛ ɔsɛ dɛ “[yɛdodɔ hɛnho] nkorkor, dɛ mbrɛ [ɔadɔ hɛn] no.”
Dɛm kyerɛwsɛm mu no, dɛm nkasasin a ɔkyerɛ nokwar Christ-su ɔdɔ mu—ɔtɔfabi a wɔfrɛ no ayamuyie no—ho hia tsitsir.
Wɔkyerɛ ebɛnadze mu? Jesus sii dɛn kyerɛɛ ɔdɔ?
Odzi kan, Ɔdze “[N’akoma,] ahom, adwen na ahoɔdzen nyina,” dze kyerɛɛ ɔdɔ, a Ɔmaa Otumii saa yaw a ɔkɔ bun mu yarba na Ɔkãa nokwar mapã ayɛ dzen no. Ne sin ara nye dɛ, Ɔno nye nyia obotum ama adom na Ɔahwehwɛ nokwardzi aber noara mu. Dɛ mbrɛ Lehi kãa wɔ ne nhyira ma ne babanyin Jacob no, “Ɔpon bodua Messiah Krɔnkrɔn no do aba; osiandɛ adom na nokwar ahyɛ no mã.” No dɔ ma kwan ma nkuranhyɛ mfua ber a wohia na kuraba wenwen ber a ɔsɛ dɛ wɔnom. Ntsi yɛbɔ mbɔdzen dɛ yɛdɔ a—yɛdze hɛn akoma, ahom, adwen, na ahoɔdzen nyina—osiandɛ dɛm nye kwan a Ɔdze dɔ hɛn.
Jesus N’ayamuyie krɔnkrɔn no su a ɔtɔ do ebien no nye Ne setsie ma asɛm biara a ofi Nyankopɔn N’anomu ba no, ber biara Ɔdze Ne pɛ na suban hyɛ No Ɔsor Egya dze no mu.
Ber a Oboduur Anee Mantɔw Afamu no No Wusoɛr ekyir no, Christ kãa kyerɛɛ Nephifo no dɛ “Hom nhwɛ, Emi nye Jesus Christ. … na manom kuraba wenwen no a Egya no dze maa me no ano, … na no mu na fitsi ahyɛse no maayɛ Egya ne pɛ.”
Akwan ahorow a nkyɛ Obotum dze ada Noho edzi no, Jesus kãa Ne setsie ma Egya Ne pɛ dze yɛɛ dɛm—naaso nna ɔnnkyɛree biara ana No dɔnhwer a Obehiaa kɛse papaapa no, Ɔba a Wɔwoo no Kortoo no nyaa atsenka dɛ N’Egya apow no. Christ n’ayamuyie—a ɔda edzi wɔ nokwardzi emudzi mu ma Nyame ne pɛ no—ɔwɔɔw do na ɔkɔ do wɔw do, nnyɛ wɔ nda a ɔyɛ mberɛw na ahotɔ mu nko, mbom nkankara ma ɔyɛ sum na ɔyɛ dzen ara yie no mu.
Nna Jesus yɛ awerɛhow nyimpa,” kyerɛwsɛm no se. Ɔyaw abra no, ɔberɛ, abagura, na wɔpoow no. Mber yinom mu na mber nyina no, Jesus No dɔ mmpa, na N’Egya Ne dze so dɛmara. Ɔdze ɔdɔ mapã—ma ɔyɛ fasusu, ɔma tum, na ɔma no—hɛn dze so remmpa.
Ntsi, sɛ ɔtɔfabi a, ber a erobɔ mbɔdzen ara yie no, nna mbrɛana ɔyɛ dɛ ma ɔreyɛ dzen a; sɛ ebɔ mbɔdzen ara yɛ edwuma wɔ wo mberɛwyɛ na w’esintɔ ho a, ibohu obi anaa biribi a oesi nketse dɛ ɔnye wo gyedzi bedzi esi; sɛ, irutu woho esi hɔ ayɛ edwuma a, mber bi wɔ hɔ a eda ho ara tse suro a ɔhyɛ wo do no nkã a, kaa dɛ dɛmara na wɔayɛ ama anokwafo anwanwafo wɔ mber nyinara mu. Kaa so dɛ tum bi wɔ wiadze no mu a woesi nketse dɛ obetsia wo wɔ adze pa biara a ebɔ mbɔdzen dɛ ebɛyɛ ho.
Ntsi wɔ mbordo mu na ohia mu no, kokoa mu abawdobɔ na bagua mu kasatsia, wɔ Nsanananmu ndzɛmba krɔnkrɔn na nyimpa esintɔ so a mbrɛ ɔbɛdan biara ɔbɛkã ho mu no, yɛkɔ do yɛtsena Christ No nokwar Asɔr no mu. Dɛn ntsi a? Osiandɛ tse dɛ hɛn Pomfo no, adzesũa no nyina na yɛdze hɛn ho ahyɛ mu—nnyɛ nyienyim a odzi kan nsɔhwɛ tsiabaa bi mbom ama yɛdze ekodu nsɔhwɛ a wɔdze wie no. Enyigye a ɔwɔ iyi mu nye dɛ Headmaster no ama hɛn nyina nyiano ho buukuu a woebue mu ansaana yɛrehyɛ adzesũa no ase. Bio so, yɛwɔ akyerɛkyerɛfo piigyan a wɔkaa hɛn dɛm nyiano yinom wɔ egyinabea ahorow a ɔwɔ kwan no do. Mbom nokwar, iyinom nyina rennyɛ edwuma sɛ yɛkɔ do dɛ yɛmmba adzesũabea a.
“Hom rohwehwɛ woana?” Yɛdze hɛn akoma nyina no yebua dɛ, “Jesus Nazarethnyi no.” Sɛ Ɔse, “Emi nye No,” a yebu nkotodwe na yɛdze hɛn tɛkyerɛma ase dɛ Ɔno nye Christ tseasefo no, dɛ Ɔno nko na Ɔbɔɔ werdam maa hɛn bɔn, dɛ nna Ɔrosoa hɛn mpo ber a yɛdween dɛ Ɔapa hɛn.Sɛ yekegyina N’enyim na yehu N’epira kur no wɔ Ne nsamu na N’ananmu a, yɛbɛhyɛ ase atse ase dza Oduaa mu dze Aasoa hɛn bɔn na yaw abra no, dze ayɛ setsie emudzi mu ama Egya no—ne nyina ɔnam ɔdɔ mapã ma hɛn ntsi. Ama yeeyi gyedzi, nnuhu, enuma, Sunsum Krɔnkrɔn akyɛdze, na yɛregye hɛn nhyira horow wɔ Ewuradze ne fie enyim akyerɛ nkaafo no—iyinom nye “nkyerɛkyerɛ na ayɛdze horow” ho ahyɛse fapem a ewiei no ɔkyerɛ hɛn dɔ ma Nyankopɔn na hɛn nyɛnko na enyigye muara a ɔyɛ Christ no nokwar Asɔr no su.
Enuanom na nkyerɛbaa, megye dase dɛ Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo nye dza Nyame dze ama hɛn a ɔdze hɛn bɔkɔ nkwagye ntowdo mu. Asɛmpa no a ɔkyerɛkyerɛ no yɛ nokwar, na asɔfodzi no osi no nokwar pi no mmfi asaase ha. Megye dase dɛ Russell M. Nelson yɛ Nyankopɔn no nkɔnhyɛnyi, dɛ ma hɔn a wodzii no kan yɛɛ na hɔn a wobedzi no do no bɛyɛ. Na dakor dɛm nkɔnhyɛ akwankyerɛ no begya ebusuasantsen a wobohu hɛn Nkwagye ho Somafo dɛ Orisian tse dɛ “enyinam … fi boka,” na yɛbɛtsẽa mu, “Jesus Nazarethnyi.” Ɔdze abasa a Ɔatsen mu daapem na ɔdɔ a ndabraba nnyi mu, Obobua dɛ, “Emi nye no.” Mobɔ ho anohoba a medze ɔsomafo tum na Ne dzin krɔnkrɔn no tumdzi, Jesus Christ mpo, amen.