Mfe Kakraabi Ntamu no
Sɛ yenndzi nokwar na yɛannyɛ setsie a, yebotum asesã prɔmprɔmyɛ nhyira a Nyame dze ama no ma ɔabɛyɛ ndom ahantanyɛ a ɔdan na ɔtwe hɛn.
Mo nuanom na nkyerɛbaa adɔfo, metsena enyim ha ndɛ yi, mahwɛ Ehyiadzi Asoɛe yi, a mber a odzi kan fitsi COVID ber no, a ɔayɛ mã mpɛn ebiasa. Hom yɛ Jesus Christ esuafo nokwafo a hom ayɛ krado ara yie dɛ hom bosũa adze. Mekamfo hom wɔ hom nokwardzi ho. Na “Modɔ hom.”
Ezra Taft Benson soom dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President fitsi Ɔberɛfɛw afe 1985 dze kesi Esusow Aketseaba afe 1994. Nna medzi mfe 33 ber a ɔbɛyɛɛ Asɔr no ne President na mfe 42 ber a otwaa mu kɔree no. Na ne nkyerɛkyerɛ na dasegye enya nhyɛdo nwanwa wɔ mo do na wɔ akwan tsitsir mu.
Dza ɔda edzi wɔ President Benson no som mu yɛ ne ntsimii wɔ Mormon Nwoma no no botae na hia a ohia do. Osii do ara tsĩi mu dɛ “Mormon Nwoma no yɛ hɛn nyamesom no botantsim—hɛn dasegye no botantsim, hɛn nkyerɛkyerɛ no botantsim, na hɛn Ewuradze na Agyenkwa ho dasegye ho botantsim.” Nna ɔtaa so tsĩ nkyerɛkyerɛ na kɔkɔbɔ horow a ɔfa ahantan no bɔn a wohu no wɔ nda a odzi ekyir Jesus Christ ahyɛmu no mu.
President Benson ne nkyerɛkyerɛ pɔkyee bi a okitsaa me ara yie na ɔkɔ do nya nhyɛdo wɔ me Mormon Nwoma adzesũa do. Ɔsee dɛ:
“Mormon Nwoma no … wɔkyerɛɛw no ma hɛn nda yi. Nephifo no ennya buukuu no dabiarada; dɛmara so na tsetse Lamanfo no ennya. Hɛn ntsi na wɔkyerɛwee. Mormon kyerɛɛw no akã kakra ma Nephifo enyibue no aba n’ewiei no. Nyame a Ohu adze nyina fi ahyɛase no, wɔ Ne nkenyan ase no, [Mormon] twitwaa mfe aha aha nkyerɛwee do esinesin, ɔsaan mu yiyii nsɛm, nsɛmkã, na dza osisii a ɔbɛyɛ mfaso ara yie ama hɛn.”
President Benson sɔɔw do dɛ: “Mormon Nwoma n’akyerɛwfo etsitsir mu kor biara gyee dase dɛ ɔrekyerɛw ama ndaamba ebusuasantsen. … Sɛ wohun hɛn nda yi, na wɔsaan mu yiyii dɛm ndzɛmba horow a ɔbɛyɛ mfaso kɛse ama hɛn a, ana ɔno nnkyerɛ mbrɛ ɔsɛ dɛ yesũa Mormon Nwoma no? Ɔsɛ dɛ daa yebisa hɛn ho dɛ, ‘Dɛn ntsi na Ewuradze kenyaan Mormon … ma ɔdze [asɛm yi] kãa ne nkyerɛwee ho? Ebɛn adzesuadze na mubotum esũa efi [afotu yi] mu a ɔbɔboa me ma matsena ase nda yi na wɔ mber yi mu?’”
President Benson ne nsɛm no boa hɛn ma yɛtse ase dɛ Mormon Nwoma no nnyɛ abakɔsɛm tsitsir ara a otsim dza wɔabɛsen kɔ do. Mbom, kyerɛwsɛm nwoma yi tsim ndaamba do na nkyerɛkyerɛ, kɔkɔbɔ horow, na adzesũadze a ohia papaapa a ɔbɔboa hɛn ndɛ gyinabew na ɔhaw horow mu. Dɛm ntsi, Mormon Nwoma no yɛ nwoma a ɔfa hɛn ndaamba ho na mber a yɛtse mu sesei na ma ɔreba no ho.
Mobɔ mpaa dze hwehwɛ Sunsum Krɔnkrɔn no mboa ber yi a yesusu adzesũadze horow a ɔwɔ hɔ ma hɛn ndɛ fi Helaman nwoma no a ɔwɔ Mormon Nwoma no mu.
Nephifo na Lamanfo
Helaman na ne mbabanyin hɔn nkyerɛwee no kã nkorɔfo a wɔrotweɔn Jesus Christ N’awoe ho nsɛm. Mfe ɔha ne fã a wɔkã ho asɛm wɔ kyerɛwsɛm nkyerɛwee no mu no, da Lamanfo hɔn nsakyeree na tseneneeyɛ na Nephifo hɔn emumuyɛdze, etuatsew, na ekyiwadze edzi.
Ntõtõho a yɛbɛyɛ wɔ Nephifo na Lamanfo ho fi tsetse nkyerɛwee mu no yɛ adzesũadze mapã ma hɛn ndɛ.
“Lamanfo no mu kɛsenara bɛyɛɛ atseneneefo ara ma hɔn tseneneeyɛ bɛkyɛɛn Nephifo no mpo osiandɛ nna hɔn gyedzi yɛ dzen.
“[Na], Nephifo no mu pii bɛyɛɛ asoɔdzenfo, a wonnyi nnuho biara na emumuyɛfo ara yie, dɛm ntsi wɔpoow Nyame n’asɛm nye nkyerɛkyerɛ na nkɔnhyɛ a ɔbaa hɔn mu no.”.
“Na dɛm na yehu dɛ Nephifo no hyɛɛ ase dɛ wɔrowodow wɔ gyedzi mu, na wonyinii wɔ emumuyɛdze nye ebusudze ne yɛ mu, wɔ aber a nna Lamanfo no hyɛɛ ase nyiin mbordo wɔ hɔn Nyankopɔn ho nyimdzee mu; nyew, wɔhyɛɛ ase dzii n’ahyɛdze nye ne mbrasɛm do, na wɔnantseew nokwar nye tseneneeyɛ mu wɔ n’enyim.
“Na dɛm na yehu dɛ Ewuradze no Sunsum hyɛɛ ase twee no ho fii Nephifo nkyɛn, osian hɔn emumuyɛdze nye hɔn akomadzen ntsi.
“Na dɛm na yehu dɛ Ewuradze hyɛɛ ase huee no Sunsum guu Lamanfo no do, osiandɛ nna wɔayɛ krado na woenya pɛ dɛ wɔbɛgye ne nsɛm edzi.”
Bia dza ɔyɛ ahobow na awerɛhow kɛse wɔ Nephifo hɔn asehwe wɔ etuatsew mu no nye nokwar no dɛ “dɛm emumuyɛ yi nyina baa hɔn do mfe kakraabi ntamu.”
Nephifo Danee Fii Nyame hɔ
Osi dɛn na nkorɔfo a nkyɛ mpɛn bi wɔyɛ tsenenee beprim hɔn akoma ayɛ emumuyɛdze wɔ mber kakraabi ntamu? Osi dɛn na nkorɔfo hɔn werɛ befir Nyankopɔn a Oehyira hɔn mbrodo no ntsɛm dɛm?
Kwan a ɔyɛ ndam na nwanwa mu no, Nephifo hɔn fasusu bɔn no yɛ adzesũa ma hɛn ndɛ.
“Ahantanyɛ … hyɛɛ ase hɛɛn … dɔm a nna wɔse wɔwɔ Nyame n’asɔr no mu … osian hɔn ahonya dodow nye hɔn prɔmprɔm a wɔayɛ wɔ asaase no do ntsi.”
“[Wɔdze] [hɔn] akoma esi [hɔn] ahodze nye wiadze yi mu egyangyandze do.” “osiandɛ [wɔama] kwan ma dɛm ahantanyɛ no ahɛn hɔn akoma mu, ɔno na ɔama [hɔn] do wɔ sor ma ɔabor dza oye do, osian [hɔn] ahonyadze mbordo ntsi!
Tsetse ndze fi huntuma mu totɔserɛ hɛn ndɛ dɛ yensũa daapem adzesũadze yi: prɔmprɔmyɛ, ahonyadze, na ahotɔ na ɔfora yɛ edur a n’ano yɛ dzen a obotum ama atseneneefo aanom sunsum mu ahantan no bɔr no.
Yɛrema kwan ma ahantan ahɛn hɛn akoma mu no begya hɛn ma yesi dza ɔyɛ krɔnkrɔn atwetwe; yɛagye kyim wɔ nkɔnhyɛ sunsum nye nyikyerɛ sunsum ho; yetsiatsia Nyankopɔn ne mbrasɛm do; yɛapow Nyame n’asɛm; yeyi hɔn edzi, esi hɔn atwetwe, na yɛakasa etsia nkɔnhyɛfo; na hɛn werɛ efir Ewuradze hɛn Nyankopɔn na “[yɛmmpɛ] dɛ Ewuradze [hɛn] Nyankopɔn a ɔbɔɔ hɛn no bɔhwɛ [hɛn] na oedzi [hɛn] do hen.”
Dɛm ntsi, sɛ yenndzi nokwar na yɛannyɛ setsie a, yebotum asesã prɔmprɔmyɛ nhyira a Nyame dze ama no ma ɔabɛyɛ ndom ahantanyɛ a ɔdan na ɔtwe hɛn fi onnyiewiei nokwar na sunsum mu ndzɛmba a ohia kɛse ho. Otwar dɛ aber nyina yɛda hɛnho do dze tsia ahantanyɛ a ahomemado mbordo dze ba, hɛnankasa hɛn ahodan ho ndaadaa nsusui, pɛsɛankonyasu kyɛn dɛ yɛbɔsom nkaafo.
Ber a ahantanyɛ mu yetsim hɛnankasa hɛn do no, sunsum mu enyifura yarba kã hɛn na pii na yennhu, ne kɛse, anaa bia dza ɔrokɔ do wɔ hɛn mu na hɛnho aporɔw nyina. Yenntum nnhwɛ na yentsim wɔ Jesus Christ do dɛ “ahwehwɛdze no” sɛ yehu hɛnho nko a.
Sunsum mu enyifura a ɔtse dɛm no botum so adan hɛn efi tseneeneeyɛ kwan ho, [yɛakɛfa] akwan a wɔabra hɛn ho no do na yɛayew. Ber a enyifura mu ara “yɛdan fa hɛnankasa hɛn akwan do” na yɛman fa akwan bɔn do no, yɛtɔ dɛ yɛtwer hɛnankasa hɛn ntseasee, yetuw wɔ hɛnankasa hɛn ahoɔdzen mu, na yɛdan hɛnankasa hɛn nyansaa.
Samuel Lamanyi no twaa Nephifo hɔn ndanee fi Nyame hɔ no tsia kofee: “Hom dze hom nkwa nda nyina peree hwehwɛɛ dza hom runntum nnya; na hom hwehwɛɛ enyigye wɔ emumuyɛ ne nyɛe mu; dza ɔnye tsenenee su a ɔwɔ hɛn Onnyiewiei na Tsir kokoroko no mu bɔ ebira.”
Nkɔnhyɛnyi Mormon hyɛɛ no nsew dɛ, “Dɔm no hɔn mu dodowara kɔr do tsenaa hɔn ntsɛnyɛ nye emumuyɛ mu, na hɔn mu kumaabi na wɔnantseew ahwɛyie mu wɔ Nyankopɔn enyim.”
Lamanfo no Danee kɔr Nyame hɔ
Mormon Nwoma mu no, Lamanfo a wɔrokɔ do yɛ tsenenee no ma Nephifof hɔn sunsum mu nwodowee tsɛm ara no da edzi pefee.
Lamanfo no danee kɔr Nyame hɔ na wɔtwee hɔn baa nokwar nyimdzee no ho, ɔnam dɛ wɔgyee nkyerɛkyerɛ a ɔwɔ kyerɛwsɛm mu na nkɔnhyɛfo no dzii, wɔdze gyedzi wɔ Ewuradze Jesus Christ dzii dwuma, wonuu hɔnho fi hɔn bɔn ho, na wonyaa akoma mu nsakyer kɛse.
“Dɛm ntsi, hɔn mu dodowara a wɔabɛkã ho yi, homankasa hom nyim dɛ wosi pi na wogyina pintsinn wɔ gyedzi mu, nye adze kor a ɔama woenya fahodzi no mu.”
“Hwɛ hɔn mu dodowara afa hɔn dwumadzi kwan do na wɔnantsew yie wɔ Nyankopɔn enyim, na wɔpen dɛ wobedzi ne mbrasɛm na ne nhyehyɛɛ do. …
“… Wɔreper enyiberdo dɛ wɔbɔtwe hɔn enuanom a wɔaka no aba nokwar nyimdzee no ho.”
Ɔnam dɛm ntsi “ma [Lamanfo hɔn] tseneneeyɛ bɛkyɛɛn Nephifo no mpo osiandɛ nna hɔn gyedzi yɛ dzen.”
Kɔkɔbɔ bi na Anohoba bi
Moroni paa mu kãa dɛ: “Hwɛ, Ewuradze eyi ndzɛmba nwanwa akɛse a ɔfa dza ɔrennkyɛr na wɔaba no akyerɛ me, da no a dɛm ndzɛmba yi bopue hom mu no.
Hwɛ, mekasa kyerɛ hom tse dɛ ma hom wɔ ha, naaso hom nnyi ha. Mbom hwɛ, Jesus Christ eyi hom akyerɛ me, na minyim hom ndzeyɛɛ.”
Meserɛ hom nkaa dɛ Mormon Nwoma no hwɛ ndaamba na nkyerɛkyerɛ tsitsir, kɔkɔbɔ horow, na adzesũadze horow a ɔwɔ mu wɔ hɔ ma emi na ɔwo wɔ gyinabew na ɔhaw horow a ɔwɔ ndɛ hɛn nda yi mu.
Gyedzi ho asehwe botum aba wɔ ahyɛsedze ebien do—kuw nhyehyɛɛ na ankorankor. Kuw nhyehyɛɛ gyinabew no, Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no runndua gyedzi asehwe do nnyew anaa worinnyi mmfi wiadze yi mu.
Nkɔnhyɛnyi Joseph Smith paa mu kã dɛ: “Nsa a ho nntsew biara nnkotum asɛɛ edwuma no ne kankɔ … ; Nyankopɔn no nokwar no bopuei akokodur mu, enyimnyam mu, na obegyina n’anan do, kɛpem dɛ, ɔakɛhɛn asaasetɔw biara mu, ɔakɔ mantɔw biara mu, ɔatserɛw ɔman biara mu, na ɔagyegye asowa biara mu, kɛpem dɛ obowie Nyankopɔn no botae horow no, na Jehovah Kɛse no bɛkã dɛ Oewie edwuma no yɛ.’’
Ankorankor gyinabew no, otwar dɛ hɛn mu kor biara “hwɛ yie wɔ ahantanyɛ ho, amma hom ammbɛyɛ dɛ tsetseberdo Nephifo no.
Hom mma munsusu dɛ sɛ emi anaa ɔwo yɛgye dzi dɛ yɛyɛ dzen na yegyina pintsimm dɛ yebokwetsir ahantanyɛ ho ahomemado a, nna bia sunsum mu owuyar yi enya hɛn dada. Yɛkã no sin ara dɛ, sɛ emi anaa ɔwo nngye nndzi dɛ ahantan bɛkã hɛn a, nna mbom obotum akã hɛn na yɛwɔ sunsum esian mu. Mber kakraabi ntamu nda, adapɛn, abosoom, anaa mfe ekyir no bia yɛbɔhwer hɛn sunsum mu awoo mu panyin dze agye dza osuar koraa kyɛn edziban.
Sɛ, mbom, emi na ɔwo yɛgye dzi dɛ ahantanyɛ botum akã na oenya hɛn a, yebotum akɔ do ayɛ ndzɛmba nkakraba a ɔda famu a ɔbɛma hɛn bambɔ na wɔaboa hɛn ma yɛabɛyɛ “dɛ abofra, ogyaa noho ma; ɔdwe, ahobrɛadze, onya abotar, ɔdɔ hyɛ no mã, onya pɛ dɛ ɔbɔsɔw biribiara a Ewuradze noara nyim dɛ oye dɛ ɔdze ba [hɛn] do, “Nhyira akã hɔn a wɔbrɛ hɔnho adze a nnyɛ dɛ wɔhyɛɛ hɔn ma wɔbrɛɛ hɔnho adze.”
Yeridzi President Benson n’afotu do no na yebisa hɛnho siantsir a Ewuradze kenyaan Mormon ma ɔdze ne Helaman nwoma a oetwa no tsia kãa nsɛm no ho, afotu na kɔkɔbɔ horow dɛ mbrɛ ɔyɛe no a, mobɔ hom anohoba dɛ yɛbɛnya nhumu wɔ mbrɛ nkyerɛkyerɛ yinom fa hɛn ankorankor abrabɔ na ebusua ebusua gyinabew pɔkyee ho ndɛ. Yerusũa na yɛrodwendwen nkenyan nkyerɛwee yi ho no, wobehyira hɛn enyiwa a ohu adze, adwen a ɔbɛtse ase, na akoma a onya ntseasee wɔ adzesũadze a ɔsɛ dɛ yesũa dɛ “[yɛnhwɛ] yie wɔ ahantanyɛ ho, amma aannkɔ nsɔhwɛ mu”
Megye dase enyigye mu dɛ Nyankopɔn Onnyiewiei Egya no nye hɛn Egya. Jesus Christ nye Ne Ba a Wɔwoo No Kortonoo no na No Dɔba. Ɔyɛ hɛn Agyenkwa. Na megye dase dɛ ber a yɛnantsew ɔdwe mu wɔ Ewuradze No Sunsum mu no, yebokwetsir ahantanyɛ na yebenya asomdwee wɔ No mu. Megye ho dase wɔ Ewuradze Jesus Christ Ne dzin krɔnkrɔn no mu, amen.