“Hom yɛ M’Anyɛnkofo”
Muhu dɛ Agyenkwa Ne dawurbɔ “hom yɛ M’anyɛnkofo” no yɛ ɔfrɛ dɛ yɛnkyekyer nkitahodze a ɔkrɔn na ɔyɛ krɔnkrɔn wɔ Nyankopɔn Ne mba nyina ntamu.
Wiadze a wentwiwentwi na mpaapaamu ahyɛ mu mã, a atsɛmbu na atwetwesi ahyɛ enyidzi nkitahodzi do, na anyɛnkofa abɛyɛ nkyerɛkyerɛmu, mebohu dɛ fasusu pefee, a ɔnnyɛ kyinkyinɛnn na ofi sor, bi wɔ hɔ a yebotum dze enya koryɛ, ɔdɔ, na mbɛkaho. Dɛm fasusu no nye Jesus Christ. Megye dase dɛ Ɔno na Ɔdze koryɛ kɛse ba.
Yɛyɛ N’anyɛnkofo
Mumu afe 1832 mu no, ber a “ɔhaw a orupuepue wɔ amanaman ntamu no” “reda edzi” kyɛn nkyɛ mbrɛ ɔtse dadaw no fitsi ber a wɔkyekyeer Asɔr no no, Latter-day Saintfo baanodzifo a wɔwɔ Kirtland, Ohio, boaa ano yɛɛ ehyiadzi. Wɔbɔɔ “ankorankor mpaa na wɔbɔɔ mu frɛɛ Ewuradze dɛ Ɔnda Ne pɛ edzi nkyerɛ [hɔn].” Nyame gyee asɔrmba anokwafo yinom hɔn mpaabɔ wɔ ɔhaw dzedzenndzen ber mu, na Ɔkyekyee hɔn werɛ, a Ɔkãa nsɛm a nsɛmfua ebien a tum wɔ mu kyerɛɛ Ahotseweefo—“M’anyonkofo.”
Jesus Christ fitsii frɛ N’akãdofo nokwafo no N’anyɛnkofo nnyɛ ndɛ. Nkyerɛkyerɛ na Ahyɛmudze mu no, Agyenkwa No bɔ kasafua nyɛnko mpɛn duanan dze kyerɛ nkitahodzi krɔnkrɔn a ɔsom bo. Ɔnnyɛ nyɛnko dɛ ma wiadze kyerɛ mu— a ogyina nyimpa dodow anaa “pɛ horow” a ewɔ wɔ social media. Wɔnnkotum dze hashtag anaa nkanee wɔ Instagram do anaa X do akyerɛ mu.
Megye to mu dɛ, me mbasirba ber mu no, mekaa nkɔmbɔdzi ahorow a menyaa nyiano yaayaw “yebotum ayɛ anyɛnkofo ara?” anaa “yɛnnyɛ anyɛnkofo a nnyɛ biribiara na ɔkã ho.” Beebiara nnyi kyerɛwsɛm krɔnkrɔn mu a Ɔkã dɛ “Hom yɛ M’anyɛnkofo ara.” Dɛ mbrɛ Jesus Nankasa kãa no: “Obi nnyi dɔ a ɔsõ kyɛn yi, dɛ obi dze no nkwa bɔto hɔ ama ne nsɛfo.” Na “hom nye hɔn a m’Egya dze hom ama me; hom yɛ M’anyɛnkofo.”
Adwenkyerɛ no yɛ pefee: Agyenkwa No nyim hɛn ankorankor na Ɔhwɛ hɛn do. Dɛm ɔweɔn soronko yi nnyɛ enyido anaa dɛ onnhia. Mbom, ɔyɛ ntowdo, mpegya mu, na onnyiewiei. Muhu dɛ Agyenkwa Ne dawurbɔ “hom yɛ M’anyɛnkofo” yɛ ɔfrɛ dɛ yɛnkyekyer nkitahodze a ɔkrɔn na ɔyɛ krɔnkrɔn wɔ Nyankopɔn Ne mba nyina mu “ama yɛaayɛ kor.” Yɛyɛ iyi ber a yɛbɔmu hwehwɛ akwan a ɔdze nkabɔmu na mbɛkaho bɛbra obiara.
Yɛyɛ kor wɔ No mu
Agyenkwa No kyerɛ iyi wɔ kwan fɛɛfɛw do wɔ No ɔfrɛ dɛ “bra, bɛka mo do.” Ɔfrɛ N’esuafo fii nyimpa kuw horow a wokitsa akyɛdze na ankorankor suban. Ɔfrɛɛ nam enufo, zealotfo, enuanom a wokitsa senaman su, mpo towgyenyi. Hɔn gyedzi wɔ Agyenkwa No mu na hɔn pɛ dɛ wɔtwe bɛn No ma wonyaa nkabɔmu. Wɔhwɛɛ dɛ wobenya akwankyerɛ efi No hɔ, wohun Nyame su wɔ No mu, na “ntsɛmara wɔdan asawu no gyae na wobedzi N’ekyir.”
Emi mara so mehu kwan a yɛrekyekyer nkitahodzi a ɔkrɔn na ɔyɛ krɔnkrɔn dze koryɛ ba. Adom mu ara emi, na me yer, Jennifer, tsetsee hɛn mba beenum no wɔ New York kuropɔn no mu. Dɛm kuropɔn no mu no, yɛnye hɛn fipamfo, skuul ayɛnkofo, edwumayɛfo, som horow baanodzifo, na asɔr mba nyaa nkitahodzi krɔnkrɔn a ɔsom bo.
Esusow Aketseaba afe 2020 mu no, ber a wiadze nye wiadze nyina mu nsan yarba no ridzi esi no, nyamesom ekuw baanodzifo a wɔka New York City Commission ho yɛɛ mpofirmu internet do ehyiadzi. Nna nhyehyɛ biara nnyi ho. Wɔannto nsa ammfrɛ ahɔho edzibewdzifo biara. Nna ɔyɛ ɔfrɛ ma som horow baanodzifo dɛ wonhyia mu ndwendwen dza ɔrokɔ do a ɔfa hɔn nyina ho. Nna Center for Disease Control akã dɛ COVID-19 wiadze nyina mu nsan yarba no gyina hɛn kuropɔn mu kyɛn nkurow a ɔwɔ United States nyina. Iyi kyerɛ dɛ mboano biara ronnkɔ do bio. Yɛmmbɔmu nhyia bio.
Som horow baanodzifo no dze, wɔregyae somdwuma, asɔrmba mboano, na dapɛn dapɛn som no kãa hɔn ankasa. Hɛn kuw kumaba a —cardinal, ɔsɔfo, rabbi, imam, ɔsomafo, na monsignor, na elder bi ka ho —tsie, dze awerɛkyekyer, na abamba maa hɛnho nkorkor. Yɛnntsim wɔ hɛn nsonsonee do, mbom yɛhwɛ dza ɔka hɛn bɔmu. Yɛkasaa fa dza obotum esi na ekyir dza onnkotum esi ho. Yɛkãa hɛn ho boaa ano na yeyii nsɛmbisa a ɔfa gyedzi na ndamba ho ano. Na nkyii yɛbɔɔ mpaa. Mpaa, a no mu yɛ dzen.
Kuropɔn a no mu ayɛ huenyann na amambra pii bɔ ebira no, yɛhun dɛ hɛn sonsonee reyew ber yɛbaa dɛ anyɛnkofo kor wɔ mpaabɔ na botae mu.
Nna yɛbɔmu hwɛ sor na nnyɛ ankorankor enyim. Nhyiamu ewiei biara yesi nkabɔmu gyinae dɛ yɛbɛma hɛn somdwuma do. Nkabɔmu na som dwuma a yedzii maa New Yorkfo mpem mpem no musua dɛ wɔ wiadze a otsim nkyekyemu, na ntsewho do no, dza ɔka hɛn bɔmu sõ kyɛn dza ɔkyekyɛ hɛn mu. Ewuradze serɛɛ hɛn dɛ, “Hom nyɛ kor, na sɛ hom annyɛ kor a, nna hom nnyɛ medze”
Enuanom na nkyerɛbaa, otwar dɛ yɛgyae dɛ yɛhwehwɛ dza ɔkyekyɛ hɛn mu na mbom yɛhwehwɛ dza ɔma “yɛyɛ kor.” Ɔdze akyɛdze na su soronko a ɔboa hɛn ma yesua na yɛboa ankorankor mpontu ehyira hɛn. Metaa kã kyerɛ M’adzesuafo dɛ sɛ meyɛ dza hom yɛ na hom so yɛ dza meyɛ a, nkyɛ yɛnnhia hɛnho. Na mennyɛ dza hom yɛ na hom nnyɛ dza meyɛ ntsi, yɛhia hɛnho. Na dɛm hia yi na ɔkã hɛn bɔmu. Nkyekyɛmu na dzi nyim nye abɔnsam ne nhyehyɛ a ɔdze sɛɛ anyɛnkofa, ebusua ebusua, na gyedzi. Ɔyɛ Agyenkwa No na Ɔka hɛn bɔmu.
Yɛyɛ No dze
Anohoba nhyira kor a yenya fi “yɛbɛyɛ kor” nye yenya atsenkã dzendzen dɛ yɛka ho. Elder Quentin L. Cook kyerɛkyerɛɛ dɛ “Mbɛkãho nokwar mu no ara nye dɛ enye Christ ayɛ kor.”
Ndaansa yi nserahwɛ a menye m’ebusua kɔɔr Ghana, Africa Anee mu no, wɔdze amambra a ɔyɛ enyigye na ahobow hyiaa me. Yɛkodu asɔr anaa fie a, wɔdze nsɛmfua yi kyia “yɛma hom akwaaba.” Sɛ wɔdze edziban ba a fi wura no ka dɛ, “Bra ma yɛnndzidzi.” Dɛm nsato a ɔnnyɛ kyinkyinɛnn no wɔdze tsirmpɔw na enyidaho kã. Akwaaba. Bra ma yɛnndzidzi.
Yɛdze mpaamu kã yi bi fam hɛn asɔr dan mbobow ano. Naaso dɛm senkyerɛdze “Nserahwɛfo Akwaaba” nnhyɛ mã. Ana yɛdze ahokeka ma obiara a ɔba asɔr akwaaba? Enuanom na nkyerɛbaa adɔfo, ɔnnhyɛ mã dɛ yɛbetsena bɛnkye no do ara. Otwar dɛ yetsie Agyenkwa No ɔfrɛ dɛ yɛnye Nyankopɔn Ne mba nyinara. nnya nkitahodze a ɔkrɔn na ɔyɛ krɔnkrɔn. Mma Yɛmmfa hɛn gyedzi nnhuntsa! M’egya taa kaa me aber biara dɛ itsena bɛnkye do Kwesida no ara nnkyerɛ dɛ eyɛ Christianyi mapã dɛ ma ida ahɛnsibea mu a ɔnnkyerɛ dɛ eyɛ kaar.
Otwar dɛ yɛbɔ hɛn bra ama wiadze ennhu hɛn na mbom woedua hɛn mu ehu Agyenkwa No. Iyi nnsi Kwesida pɛ. Osi wɔ bea wɔtɔn edziban, wɔtɔn petrol, skuul nhyiamu, efiefi nhyiamu, mbea biara a sɔnmufo boa ano, hɛn ebusuafo asɔrmba a woenuma hɔn nye hɔn a wonnumaa hɔn nyina tse na wɔyɛ edwuma.
Mosom Kwesida dze kaa dɛ yɛhia hɛnho nkorkor na yɛbɔmu a yɛhia Ɔno. Hɛn akyɛdze na su soronko ɔkyekyɛ hɛn mu wɔ wiadze mu no, ka hɛn bɔmu wɔ bea krɔnkrɔn. Agyenkwa afrɛ hɛn dɛ yɛmboa, yɛmpegya, na yɛmfa ntowdo mma hɛnho nkorkor. Dɛm na Ɔyɛɛ ber a Ɔmaa ɔbaa bi a ɔyar bɔgyaagu nyaa ayarsa, Ɔmaa ɔkwantanyi bi ho san no, dze afotu maa ɔhen ba no a obisa dza wɔaka no, dɔɔ Nicodemus a onyim naaso ɔafom wɔ ne gyedzi mu, nye ɔbaa bi tsena bura ho a otsia amambra na Ɔkãa Ne messiah dwuma no kyerɛ no. Iyi nye asɔr ma me—bia yehyiamu nya mboa, nsiesie na yetsim yie. Dɛ ma President Nelson akyerɛkyerɛ no: “Asɛmpa asawu no nye asawu a ɔsõ papaapa wɔ wiadze mu. Nyankopɔn ato nsa afrɛ obiara dɛ ɔmbra No hɔ. … Kwan da hɔ ma obiara.”
Bia binom enya suahu bi a ɔma wɔnya atsenkã dɛ wɔnnka ho. Agyenkwa no rotõ nsa frɛ hɛn dɛ, “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.” Jesus Christ N’asɛmpa no nye bia a oyie ma hɛn. Asɔr mbae dze awerɛhyɛmu dɛ nda pa wɔ kan, anohoba dɛ yɛnnyɛ ankonam, na dɛ ebusua hia hɛn dɛmara dɛ ma yehia hɔn. Elder D. Todd Christofferson sii do dɛ Yɛnye Egya no, Ɔba na Sunsum Krɔnkrɔn no ayɛ kor no nye mbɛkã ho a ɔkrɔn papaapa a ekyingye nnyi ho.” Ma obiara wɔaman na ɔrohwɛhwɛ kwan aba bio, medze onnyiewiei nokwar na nsato ma wo: Eka ho. Fir edzi bra. Mber no nyi.
Wiadze a wentwiwentwi na nkyekyɛmu ahyɛ mu mã no, megye dase dɛ Agyenkwa Jesus Chirst nye nyia Ɔdze koryɛ mapã no ba. Moto nsa frɛ hɛn mu kor biara dɛ yemfata dɛ yɛgye Agyenkwa Ne nsato no dɛ “hom nnyɛ kor” na yɛmpaa mu nkã dɛ ma Ɔkãa no, “Hom yɛ M’anyɛnkofo;.” Jesus Christ ne dzin krɔnkrɔn no mu, amen.