Hɛn Ɔpon ho Dɛwdzi no
Jesus Christ no dɔ na tum botum agye hɛn mu kor biara efi hɛn mfomdo, mberɛwyɛ, na bɔn mu na ɔaboa hɛn ma yɛabɛyɛ biribi mbordo.
Bɛyɛ mfe 10 a abasen kɔ no minyaa nkenyan dɛ mondorɔw Agyenkwa no mfonyin na menkeka mu. Mpo dɛ meyɛ mfonyinyɛfo no, nna nkyɛ ɔwɔ dɛ minya ahotodo dɛ mubotum ayɛ. Mibesi dɛn mebɛyɛ Jesus Christ ne nsaano mfonyin a No Sunsum wɔ mu? Hen na ɔwɔ dɛ mehyɛ ase? Na mebɛyɛ dɛn enya mber?
Medze nsɛmbisa no mpo, misii gyinae dɛ mobɔkɔ do na matwer Ewuradze dɛ Ɔbɔboa me. Naaso nna ɔwɔ dɛ mokɔ kan na migya dza obotum ayɛ yie no ma No. Mobɔɔ mpaa, dwendween ho, yɛɛ nhwehwɛ mu, na modorɔɔw ahyɛse dze no, na ɔyɛɛ me adom ma minyaa mboa ndzɛmba na mboa. Na dza nna ɔyɛ ɛwer fufuw no hyɛɛ ase dɛ ɔreyɛ adze fofor koraa.
Nna ne yɛ no nngow. Ɔtɔfabi a nna ɔnnyɛ tse dɛ dza m’enyi da do no. Ɔtɔfabi a nna ɔayɛ yie na adwenkyerɛ bi aba. Na mpɛn pii no, nna ɔwɔ dɛ mobɔ mbɔdzen wɔwdo yɛ no bio.
Mber a modween dɛ mewie mfonyin no yɛ koraa na awow no, mehyɛɛ ase dɛ medze edur a itum hu mu reyɛ do, dze abɔ ho ban efi fĩ na huntuma ho. Mber a mereyɛ no, muhun dɛ nhwi a ɔwɔ nsaano mfonyin no mu no ahyɛ ase resesa, ɔayeyɛ do, na ɔafora. Ntsɛmara na muhun dɛ medze edur a itum hu mu no yɛɛ do ntsɛm dodow, nna nsaano mfonyin no n’afã no da ho afɔw!
Nokwar ara nna medze edur a itum hu mu no apepa me nsaano mfonyin n’afã no. O, mbrɛ awerɛhow sii kãa me a. Ɔyɛɛ me dɛ hɔ no ara masɛe dza Nyankopɔn boaa me ma meyɛɛ no. Musũi na metsee no mo mu dɛ meyar. Abagura mu no, meyɛɛ dza obiara botum ayɛ ara wɔ gyinabew a ɔtse dɛ iyi mu: Mefrɛɛ me maame. Nyansa na ɔdwe mu no ɔkãa dɛ, “Wo nsa rennkã dza nna ewɔ no, mbom fa dza ewɔ no yɛ dza ibotum ayɛ no yie ankasa.”
Na Midzii, Kristin M. Yee yɛɛ nsaano mfonyin no
Ntsi mobɔɔ mpaa na mototɔe serɛɛ mboa, na anafua no nyina meyɛɛ nsiesie wɔ nsaaano mfonyin no ho. Na mekaa dɛ morohwɛ nsaano mfonyin no anapa—nna ɔyɛ fɛw kyɛn ahyɛse dze no. Dɛm no sii dɛn bɛyɛɛ? Dza modwen dɛ nna ɔyɛ mfom no a wosiesie a ɔnnkɛyɛ yie no nna ɔyɛ kwan ma N’ehumbɔbɔr nsa ada edzi. Nna Onnwie nsaano mfonyin no yɛ, na nna Ɔnye me nnwiee Dɛw na akomatɔmu na ɔhyɛɛ m’akoma mã. Miyii Ewuradze ayɛw wɔ N’ehumbɔbɔr, wɔ awanwadze yi a Ɔanngye nsaano mfonyin no nko, mbom Ɔkyerɛkyerɛ me No dɔ na tum ho asɛm yie dɛ Ɔgye hɛn mu kor biara fi hɛn mfomdo, mberɛwyɛ, na bɔn mu na Ɔboa hɛn ma yɛbɛyɛ biribi mbordo.
Dɛ ma me ndaase a ɔdɔ bun mu ma Agyenkwa no nyinii ber a ehumbɔbɔr mu ara Ɔboaa me ma mesiesie nsaano mfonyin no a “wosiesie a ɔnnreyɛ yie’’ no, dɛm na mankasa mo dɔ na ndaase ma m’Agyenkwa no mu ayɛ dzen ber a mahwehwɛ dɛ wɔ me mberɛwyɛ mu no menye No bɛyɛ edwuma na menya mo mfomdo ho bɔnfakyɛ. Mebɛda Agyenkwa no ase daa dɛ mubotum asesã na moho atsew. Modɔ No, na mowɔ enyidado dɛ mebɛyɛ adzebiara a Ɔbɛpɛ dɛ meyɛ na metu mpon.
Nnuho ma hɛn kwan ma yɛtse Nyankopɔn no dɔ nkã na yehu na yɛdɔ No wɔ akwanhorow mu a nnkyɛ yennkohu da. Ɔfa ɔbaa no a ɔseraa Agyenkwa no n’anan ho ngo no ho, Ɔkãa dɛ, “No bɔn a ɔdɔɔ sõ no, wɔdze akyɛ no; osiandɛ no dɔ sõ: na nyia wɔdze kumaabi akyɛ no, ɔdɔ kumaabi.” Ɔdɔɔ Jesus dodow osiandɛ Ɔdze dza ɔdɔɔ sõ kyɛɛ no.
Ahotɔ na enyidado dodow wɔ yeruhu dɛ yebotum abɔ mbɔdzen bio mu—dɛ mbrɛ Elder Bednar kyerɛkyerɛɛ no, ɔnam Sunsum Krɔnkrɔn n’ahotsew tum no do no yebotum akɔ do yenya hɛn bɔn ho bɔnfakyɛ ber a yɛdan hɛn akoma ma No na nokwar mu ara yenu hɛnho.
Jesus Christ no ɔpon tum no nye hɛn ahyɛmudzi horow ne nhyira akɛse no mu kor. Dwendwen iyi ho ber a edze woho hyɛ ayɛdze krɔnkrɔn horow mu. Sɛ yennya a, yennkotum asan akɔ hɛn Egya a ɔwɔ Sor n’enyim nna hɔn a yɛdɔ hɔn no.
Minyim dɛ hɛn Ewuradze na hɛn Agyenkwa, Jesus Christ, wɔ tum dɛ Ɔgye hɛn nkwa. Dɛ Nyankopɔn ne Ba a Ɔbɔɔ wiadze bɔn ho werdam na Ɔdze Ɔnoara No nkwa too hɔ na Ɔfaa no bio no, Okitsa ɔpon na wusoɛr ho tum no. Ɔama bɛkyebo ma obiara na onnyiewiei nkwa ma hɔn a wɔsan mu yi No no aba mu. Minyim dɛ Ɔnam No werdam afɔrbɔ do no yebotum yenu hɛnho na nokwar mu ara hɛnho atsew na Ɔapon hɛn. Ɔyɛ anwanwadze dɛ Ɔdɔ emi na ɔwo wɔ kwan yi mu.
Ɔkãa dɛ, “Ana hom rennsan mmba me nkyɛn, na hom nnu homho wɔ hom bɔn ho, ma wɔasakyer hom, ama maasa hom yarba?” Obotum asa wo kra ne “mbea a wɔayɛ amamfo’’ no yarba—mbea no a bɔn na awerɛhow ayɛ no wesee, kɛsɛɛ, na amamfo no, na—“ɔama [wo] sar do ayɛ dɛ Eden.’’
Dɛ ma yennkotum atse Christ n’amandzehu wɔ Gethsemane na mbeamudua do ne yaayaw na no bun ase no, dɛmara so “yennkotum esusu n’ano anaa dɛ yɛatse [No] bɔnfakyɛ krɔnkrɔn,’’ ehumbɔbɔr, na ɔdɔ no bun ase yie.
Ɔto mber bi a itum tse nkã dɛ ɔnnkɛyɛ yie dɛ wɔbɔpon wo, dɛ bia eyɛ soronko fi Nyankopɔn no dɔ na Agyenkwa no werdam tum no ho osian dza iridzi ho aper ntsi anaa osian dza ayɛ no ntsi. Mbom megye me dase dɛ Agyenkwa no ne nsa sõ wo do. Agyenkwa no “sianee baa ndzɛmba nyinara ase’’ na ɔwɔ gyinabew krɔnkrɔn mu dɛ Ɔmaa wo do na Ɔgye wo fi mona tsentsen sunkamm mu na Ɔdze wo ba “ne kan nwanwa mu.’’ Ɔnam N’amandzehu do no, Ɔayɛ kwan ama hɛn mu kor biara ma yeedzi hɛn honandua mberɛwyɛ do konyim. “Ɔwɔ tum nyinara dɛ Ɔgye nyimpa biara a ɔgye ne dzin dzi no na ɔsow aba a ɔfata nnuho’’
Dɛmara dɛ okehiaa edwumayɛ na ntotɔserɛ ma minyaa ɔsor mboa dze yɛɛ nsaano mfonyin ne nsiesie no, ɔgye edwumayɛ, nokwar akoma, na ahobrɛadze ma “[yɛasow] aba a ɔfata nnuho.’’ Yɛdze hɛn gyedzi na awerɛhyɛmu wɔ Jesus Christ mu na No werdam afɔrbɔ mu ridzi dwuma, yɛdze akoma a abobɔ nye sunsum a abotow rema Nyame, yɛrekã hɛn bɔn na yɛrotwe hɛnho efi ho, yɛresan dza yɛasɛe no ananmu dɛ mbrɛ hɛn ahom botum yie no, na yɛreper abɔ bra tsenenee kã aba yinom ho.
Nokwar mu ara yebonu hɛnho na yɛasesa no, otwar dɛ yedzi kan “gye hɛn bɔn to mu.’’ Nyimpa nnhu hia a ohia dɛ ɔfa edur gyedɛ wɔtse ase dɛ wɔyar. Mber binom mu no bia a yennkenya pɛ dɛ yɛbɔhwɛ hɛnankasa hɛn mu na yeehu dza ohia ayarsa na nsiesie ankasa.
C . S. Lewis ne nkyerɛwee mu no, Aslan dze nsɛmfua yinom bisaa ɔbarimba bi a nna ɔnoara dze ne ndaadaa akyekyer noho dɛ: “O, [nyimpa dasanyi], mbrɛ enyitsew do ara esi dze dza obotum ayɛ wo yie nyinara etsia woho a.’’
Henfa na emi na ɔwo yebotum dze ndzɛmba a ɔbɛyɛ hɛn yie no dze betsia hɛnho?
Mma hom mma yentsia hɛnho mmfi dza oye a Nyankopɔn pɛ dɛ ɔdze hyira hɛn no ho. Mmfi ɔdɔ na ehumbɔbɔr a Ɔpɛ dɛ yɛtse ho nkã no ho. Mmfi kan na nyimdzee a Ɔpɛ dɛ ɔdze gu hɛn do no ho. Mmfi ayarsa no a onyim dɛ yehia no dzendzenndzen no ho. Mmfi ahyɛmudzi nkitahodzi a no mu dɔ na Ɔahyehyɛ ama Ne mbambanyin na mbabaa nyinara no ho.
Meserɛ dɛ yɛdze “ɔkõ ho akodze’’ biara a yɛagye enyim anaa mpo yɛnngyee enyim dɛ yɛafa dze betsia hɛnho efi Nyankopɔn no dɔ nhyira ho no bɔto nkyɛn. Ahantan akodze, pɛsɛankonya, suro, ɔtan, ebufuw, abotɔyamu, atsɛmbu a ɔnntsen, nyinkuntwe—adzebiara a obesiw hɛn kwan ma yɛnnkɛfa hɛn akoma nyinara adɔ Nyankopɔn na yesie hɛn ahyɛmudzi horow nyinara a yɛnye No edzi no.
Ber a yɛdze hɛn ahyɛmudzi horow bɔ bra no, Ewuradze botum ama hɛn mboa na tum a yehia ma yeehu na yeedzi hɛn mberɛwyɛ do konyim, a sunsum mu ɔdzesɛɛfo ahantan kã ho. Hɛn nkɔnhyɛnyi akã dɛ:
“Daa daa nnuho nye ahotsew no kwan, na ahotsew dze tum ba.”
“Na o, mbrɛ yebesi behia No tum wɔ nda a ɔreba no mu a.”
Tse dɛ me nsaano mfonyin no, Ewuradze nye hɛn nnwie sɛ yɛyɛ mfomdo a, anaa dɛ Onnguan sɛ yehinhim a. Hɛn hia dɛ yebenya ayarsa na mboa nnyɛ adzesoa mma No mbom ɔnoara nye siantsir kor a Ɔbae. Agyenkwa Noara see dɛ:
“Hwɛ, maba wiadze yi mu dze ɔpon rebrɛ wiadze, dze agye wiadze, efi bɔn mu.”
M’ehumbɔbɔr abasa no atsen wɔ hom do, na obiara a ɔbɛba no, ɔno na mebɛgye no; na nhyira akã hɔn a wɔba me nkyɛn.”
Ntsi hom mbra—hom a hom ahaw, aberɛ, na hom werɛ ahow, hom mbra na hom mbenya ahomgye wɔ Ɔno a ɔdɔ hom dodow mu. Hom mfa No kɔndua nto hom do, osiandɛ Ɔdwe na Ɔberɛ Noho adze wɔ akoma mu.
Hɛn Ɔsor Egya na Agyenkwa hu hom. Wonyim hom akoma mu. Dza ɔfa woho no fa Hɔnho, a hɔn a hom dɔ hɔn no kã ho.
Agyenkwa no botum apon dza ɔyewee no, a yɛnye hɛn ebusua na hɔn a yɛdɔ hɔn no nkitahodzi a woebubu na wɔasɛe kã ho. Ɔbɔɔ kwan ma wɔapon dza wɔahwe ase nyinara—ɔdze nkwahwea bogu dza ɔyɛ dɛ oewu na onnyi enyidado mu.
Sɛ edze gyinabew bi ridzi aper a edwen dɛ nkyɛ sesei dze ɔwɔ dɛ idzi do konyim a, mma mmpa aba. Nya abotar ma woho, sie w’ahyɛmudzi horow, taa nya nnuhu, sɛ okehia a hwehwɛ wo baanodzifo hɔ mboa, na taa kɔ Ewuradze fie dɛ mbrɛ ibotum. Tsie na kyɛn asõ ma nkenyan a Ɔdze ma wo no. Onnkegyaa Ne ahyɛmudzi nkitahodzi a Ɔnye wo wɔ no mu.
Nkitahodzi a ɔyɛ dzen na hu baa m’abrabɔ mu a medzi ho aper na nokwar mu ara mohwehwɛɛ dɛ mubotu no mpon. Nna ɔtɔ mber bi a, nna metse dɛ miridzi nkogu daa daa. Modwendween ho dɛ, ana mannyɛ ndzɛmba yie daano no a? Ana menndzi me mberɛwyɛ do konyim nokwar mu ara? Mber rugu mu no mesũa dɛ nnyɛ dɛ motɔ sin; mbom, ɔtaa dɛ beberee wɔ hɔ a ɔwɔ dɛ meyɛ ho edwuma na ayarsa beberee a mihia.
Elder D. Todd Christofferson kyerɛkyerɛɛ dɛ: “Nokwar ara Ewuradze yerɛw n’ano wɔ nyia a ɔpɛ dɛ ɔdze emudzi ba atsɛmbu, nyia ɔdze enyimpisi yɛ edwuma dabiara dze ahoɔdzen hyɛ mberɛwyɛ ananmu. Nokwar nnuho, nokwar nsesa botum ehia mbɔdzembɔ mpɛn pii, naaso biribi wɔ hɔ a ɔyɛ mpontu na krɔnkrɔn wɔ aperdzi a ɔtse dɛm mu. Bɔnfakyɛ krɔnkrɔn na ayarsa hɛnhɛn ɔkra a ɔtse dɛm.’’
Osian Jesus Christ ntsi dabiara yɛ da fofor a enyidado na dza ɔyɛ yie ahyɛ mu mã. Dabiara no emi na ɔwo yebotum ebohu, dɛ mbrɛ Enã Eve bɔɔ ho dawur no dɛ, “hɛn mponee ho dɛwdzi no,’’ hɛn ayarsa ho dɛwdzi, Nyankopɔn no dɔ a ɔmmbɔadze da ma hɛn ho dɛwdzi no, yɛtse ho nkã.
Minyim dɛ hɛn Ɔsor Egya na Agyenkwa dɔ hom. Jesus Christ nye adasa nyina Agyenkwa na Pomfo. Ɔtse ase. Ɔnam No werdam afɔrbɔ do no, wobubuu bɔn na owu mpokyerɛ mu afebɔɔ ama yeetum enya fahodzi dɛ yɛbɛsan mu eyi ayarsa, ɔpon, na onnyiewiei nkwa a yɛnye hɔn a yɛdɔ hɔn no. Na megye dɛm nokwar yinom ho dase wɔ Jesus Christ dzin krɔnkrɔn mu, amen.