Wiadze Mfɛndzanan Ehyiadzi
Ɔbarimba no a Ɔnye Jehovah Kasae
Ɔbɛsɛ 2024 wiadze mfɛndzanan ehyiadzi
11:8

Ɔbarimba no a Ɔnye Jehovah Kasae

Elder Kyle S Mckay ne Kasaa

Ɔkã Eduosuon no ho

Ɔyɛɛ “nhyira maa [Joseph Smith] dɛ obue mberano a odzi ekyir no,’’ na ɔyɛ nhyira ma hɛn dɛ ɔyɛe.

Mo botae ndɛ na aber nyina nye dɛ megye Jesus Christ ho dase, dɛ Ɔyɛ Nyankopɔn ne Ba no, wiadze Bɔfo na Agyenkwa no, hɛn Gyefo na Pomfo. Osiandɛ “hɛn nyamesom n’asɛmpa fapem no nye asomafo na nkɔnhyɛfo hɔn dasegye, wɔ Jesus Christ ho,’’ ndɛ menye hom kyɛ me nyimdzee na Agyenkwa no ho dase dɛ ma ɔsomafo na nkɔnhyɛnyi tsitsir bi n’abrabɔ na nkyerɛkyerɛ ahyɛ no dzen ma no mu adɔ no.

Enyansasɛm n’Ahyɛase no

Da kor anapa fɛɛfɛw bi a nna wimu atsew wɔ afe 1820 fefɛw ber mu no, mfe-14 Joseph Smith kɔɔr ndua kwaa bi mu a ɔbɛn ne fie kɔbɔɔ mpaa fa no bɔn ho na obisaa asɔr a ɔndɔm. No nokwar mpaabɔ no, a ɔdze gyedzi a onnhihim no, nyaa wiadze mu nhyɛdo no tum a ɔkrɔn ankasa no asõkyɛn, a Egya na Ɔba no kã ho. Na abɔnsam no. Yinom mu kor biara nna dɛm mpaabɔ na banyimba no ho hia no papaapa.

Dza sesei yɛfrɛ no Enyido-Adzehu a Odzi Kan no nye ndzɛmba nyinara hɔn nsanananmu ahyɛase wɔ mberano a odzi ewiei yi mu. Mbom, Joseph dze, sũahu yi yɛɛ nankasa ne dze na nsiesie so. Dza nna ɔpɛ nyinara nye bɔnfakyɛ na akwankyerɛ. Ewuradze dze ebien no maa no. Nna nkyerɛkyerɛ no dɛ mma “[ɔ]nnkɔdɔm [asɔr asɔr] no mu biara’’ no yɛ ɔmon. Nna nsɛmfua “Wɔdze wo bɔn akyɛ wo” no yɛ ɔgye.

Nokwar afɛɛfɛw nyinara a yebotum esũa efi Enyido-Adzehu a Odzi kan mu no, ebia nna Joseph no mbuae tsitsir ara nye, “Mehu James ne dase dɛ ɔyɛ nokwar—dɛ nyimpa a ne nyansaa tɔ sin no botum ebisa Nyama, na woenya.’’

Dɛ mbrɛ nwomasũanyi bi hyɛɛ no nsew no: “Enyido-Adzehu a Odzi Kan no n’adze tsitsir nye yebohu dɛ ɔyɛ Nyankopɔn no sũ dɛ ɔdze nyansa ma hɔnnom a hɔn dze tɔ sin no. … Nyankopɔn No a Oyii Noho kyerɛɛ Joseph Smith wɔ kwã krɔnkrɔn mu no yɛ Nyankopɔn a oyi mbasirmba ano wɔ hɔn ɔhaw ber mu.’’

Joseph no sũahu wɔ kwaa mu no maa no awerɛhyɛmu dɛ n’abrabɔ nkaa nyinara no ombisa bɔnfakyɛ na akwankyerɛ. No sũahu asan ama mo so awerɛhyɛmu dɛ m’abrabɔ nkaa nyinara no mimbisa bɔnfakyɛ na akwankyerɛ.

Daa daa Nnuho

Fankwa 21, 1823 da no, Joseph dze enyiber bɔɔ bɔnfakyɛ ho mpaa, onyaa ahotɔdo dɛ osian no sũahu wɔ kwã no mu mfe ebiasa a abasen no ntsi, Ɔsor bobua no bio. Na ɔyɛe. Ewuradze somaa ɔbɔfo Moroni dɛ ɔnkyerɛkyerɛ Joseph na ɔnkã tsetse nkyerɛwee a ekyir no ɔbɛma oedua Nyankopɔn no tum na n’akyɛdze do dze akyerɛ ase ho asɛm nkyerɛ no—Mormon Nwoma no.

Bɛyɛ mfe 13 ekyir no, Joseph na Oliver buu ntwɛr wɔ awɔse, kommyɛ mpaabɔ mu wɔ Kirtland Temple fofor a wotuu hyɛɛ Nyame ne nsa no mu. Yennyim dza wɔbɔɔ ho mpaa no, naaso ɔbɛyɛ dɛ ntotɔserɛ bɛkã hɔn mpaabɔ noho dze enya bɔnfakyɛ, osiandɛ, mber a wɔsoɛree no, Agyenkwa no puee hɔ na ɔpaa mu kãa dɛ, “Hwɛ, medze hom bɔn akyɛ hom; hom ho atsew wɔ m’enyim.’’

Abosoom na mfe pii wɔ sũahu yi ekyir no, Joseph na Oliver bɛyɛ bɔn bio. Na bio. Mbom dɛm mber mu no, ma dɛm mber no, hɔn ntotɔserɛ mbuae na ahosiesie ma nsaafee a wɔbɛsan no ananmu n’enyimnyam no a nna oribesi mu no, Jesus tseew hɔnho fii bɔn ho.

Joseph n’abrabɔ a ɔyɛɛ daa daa nnuho no ma me ahotɔdo dɛ “[memmfa] ndamyɛ mbra adom ahengua no enyim, na [me]nya ehumbɔbɔr.’’ Mesũa dɛ nokwar mu ara Jesus Christ “wɔ bɔfakyɛ su.’’ Ɔnnyɛ No somdwuma anaa No su dɛ obobu atsɛn. Ɔbaa dɛ ɔrebɛgye nkwa.

Oribisa Ewuradze!

“Ndzɛmba nyina ahyɛananmu,’’ n’anohoba n’afã bi no, Ewuradze nam Joseph Smith do, dze Mormon Nwoma no na nyikyerɛ bi so a ɔwɔ N’asɛmpa ne mãhyɛ mu no puei. Wɔmaa nokwar etsitsir ho pefeeyɛ na emudziyɛ ber a Joseph sii do hwehwɛɛ akwankyerɛ bi kãa ho. Susu dza odzi do no:

  1. Egya no na Ɔba no wɔ honam na mbiew nyimpadua “tse dɛ nyimpa dze.”

  2. Nnyɛ hɛn bɔn nko na Jesus faa dze too Noho do mbom hɛn nyarba nyarba, atseetsee, na mberɛwyɛ so.

  3. Nna No Werdambɔ no yɛ yaayaayaw ma dɛ ɔmaa Okyii bɔgyaa fii no honandua enyi.

  4. Dza yebotum ayɛ nyinara ekyir no wɔnam adom do na wɔbɛgye hɛn nkwa.

  5. Ngyinado kã Christ n’ehumbɔbɔr ho.

  6. Ber a yɛba Christ hɔ no, nnyɛ dɛ Ɔdze hɛn bɔn bɛkyɛ hɛn nko, mbom Ɔbɛsan so asesa hɛn su ankasa, “ama yennya pɛ biara bio dɛ yɛbɛyɛ bɔn.’’

  7. Aber nyina Christ ma No nkorɔfo mbra dɛ wonsisi temple, bea a Ɔbɛda Noho edzi akyerɛ hɔn na ɔdze adom akyɛdze tum fi sor behyɛ hom mã.

Megye dase dɛ nzɛmba yinom nyinara yɛ nokwar na wohia. Wɔyɛ mãhyɛ no a Jesus Christ nam Joseph Smith do dze maa Joseph n’akwankyerɛ ebisadze ho mbuae a ɔwɔw do no nsan ananmu ne ɔfa bi.

Yɛropropro Ahenman Yi

Afe 1842 mu no, Joseph kyerɛɛw ahobow ndzɛmba a ɔbɛba mu wɔ mberano yi a odzi ewiei no mu. Ɔpaa mu kãa dɛ wɔ hɛn mber mu no,“ ɔsor Asɔfodzi no nye asaase dze no bɛyɛ kor, dze botae horow akɛse no aba; na dɛm ber no nna yɛayɛ kor wɔ dwumadzi kor mu, dze epropro Nyankopɔn n’ahenman no, a ɔsor Asɔfodzi no nngyina hɔ kwa.’’

Ne nyɛnko Benjamin Johnson no, Joseph kãa dɛ, “Benjamin, [sɛ mowu] a menye wo ntamu renntwe, na sɛ wɔ ntwamutam n’afã ho no a, [mobɔkɔ] do nye wo ayɛ edwuma, a yɛdze tum a oetu mpon kɛsenara, dze epropro ahenman yi.’’

Obiradzi 27, 1844 da no, wokuu Joseph Smith na no nuabanyin Hyrum. Wosiee Joseph, naaso ne dasee kɔdo gyegye wɔ wiadze nyinara na wɔ me kra mu:

“Menya enyido-adzehu; minyim dɛm, na minyim so dɛ Nyame nyim, na munnkotum apow.’’

“Mannkã annkyerɛ wo dɛ midzi mu—naaso mfom biara nnyi nyikyerɛ a makyerɛkyerɛ no mu.’’

“Hɛn nyamesom n’asɛmpa fapem no nye Asomafo na Nkɔnhyɛfo, hɔn dasegye, wɔ Jesus Christ ho dɛ Owui, wosie No, na da a otsĩa ebiasa no Ɔsoɛree bio, na Ɔfowee kɔr sor, na ndzɛmba nyina a ɔfa hɛn nyamesom ho no yɛ iyi ho mbataho.”

Dza wɔkãa faa John Onumanyi ho no wobotum so akã afa Joseph Smith ho dɛ: “Wɔsomaa ɔbarimba bi Nyankopɔn hɔ, a nna ne dzin dze [Joseph]. … “Nnyɛ ɔno nye kan no, mbom ɔbae bedzii Kan no ho dase,’’ “dɛ ama adasa nyinara nam no mu agye edzi.”

Megye dzi. Megye dzi na minyim nokwar mu dɛ Jesus nye Christ no, tseasefo Nyankopɔn ne Ba no. Megye dase dɛ Nyankopɔn ɔtseasefo no yɛ hɛn egya dɔfo. Minyim iyi osiandɛ Ewuradze ne ndze na Ɔakã akyerɛ me, na dɛm so na No nkowaa, asomafo na nkɔnhyɛfo ndze akã, a Joseph Smith kã ho na ɔhyɛɛ ase.

Megye dase dɛ Joseph Smith nna ɔyɛ na ɔyɛ Nyame no nkɔnhyɛnyi, Ewuradze Jesus Christ ne dasegyenyi na n’akowaa. Ɔyɛɛ “nhyira maa no dɛ obue mberano a odzi ekyir no,’’ na ɔyɛ nhyira ma hɛn dɛ ɔyɛe.

Ewuradze hyɛɛ Oliver na hɛn nyinara mbra dɛ, “Yɛmboa n’akowaa Joseph nokwar mu ara.’’ Megye dase dɛ Ewuradze boa N’akowaa Joseph na Nsanananmu no a ɔdze duaa no mu no.

Sesei Joseph Smith kã dɛm ɔsor asɔfodzi ho a ɔkãa hɔn ho nsɛm no. Dɛ mbrɛ ɔbɔɔ Benjamin Johnson anohoba no, ɔnye hɛn ntamu nntwe, na wɔ ntwamutam n’afã ho no, a, ɔda ho nye hɛn reyɛ edwuma, na yɛdze tum a oetu mpon kɛsenara, dze epro ahenman yi. Medze dɛwdzi na ndaase no, mema me ndze do wɔ ayɛyi mu ma ɔbarimba no a ɔnye Jehovah kasae no.’’ Na dza ɔbor ne nyinara do no, ayɛyi nkã Jehovah a ɔnye ɔbarimba no kasae no! Jesus Christ ne dzin mu, amen.