Ɔnnkyebo Asetsena no Botae no Yɛ Edwuma!
Ɔmmfa ho haw horow a hɛn nyinara yehyia no, hɛn Ɔsor Egya dɔfo ahyehyɛ enygiye ho nhyehyɛɛ no dɛ ɔnnyɛ hɛn nkrabea dɛ yebedzi ɔkõgu.
Wɔmaa me asodzi dɛ mensera akyerɛbaa panyin bi a ɔwɔ mo ward mfe pii. Nna abrabɔ nnda famu mma no. Nna ɔwɔ apɔwmudzen haw horow pii na onyaa yaw wɔ ne bra nyina mu ɔnam akwanhyia bi a onyaa no ne mbafober mu wɔ agodzibea no ntsi. Wogyaa no awar ber a oedzi mfe 32 a okitsa mbofra baanan a ɔsɛ dɛ ɔtsetse hɔn na ɔhwɛ hɔn no, ɔsanee war bio ber a oedzi mfe 50. No kun a ɔtɔ do ebien no wui ber a nna akyerɛbaa yi edzi mfe 66, na akyerɛbaa yi tsenaa ase mfe 26 kãa ho dɛ kunafo.
Ne bra nyina mu haw horow nyina ekyir no, odzii nokwar maa n’ahyɛmudzi horow dze kodur ewiei. Nna akyerɛbaa yi yɛ ebusuasantsen nhwehwɛmunyi mapã, temple nkɔreenyi, na ɔhwehwɛ na ɔkyerɛw ebusua abakɔsɛm horow. Nna ɔwɔ haw dzendzen pii dze, naaso asɛmbisa biara nnyi ho dɛ nna ɔtɔfabi a ɔtse awerɛhow na ankonamyɛ nkã eso nna ɔwɔ enyigye wɔ n’enyim na ɔwɔ ahomka su.
Abosoom akron ekyir a owui no, ne mbabanyin hɔn mu kor nyaa sũahu soronko bi wɔ temple. Ɔnam Sunsum Krɔnkrɔn no tum do hun dɛ ne maame wɔ asɛm bi ma no. Ɔnye no kasae, nnyɛ wɔ enyido-adzehu mu anaa nsɛm a wɔtse mu. Asɛm trɔdɔdɔ a odzi do yi fi ne maame hɔ baa ɔbabanyin no n’adwen mu: “Mepɛ dɛ ihu dɛ ɔnnkyebo asetsena no botae no yɛ edwuma, na mepɛ dɛ ihu dɛ seseiara metse siantsir a dza osisii wɔ m’abrabɔ mu nyina no sii wɔ kwan a osii no do ase—na ne nyinara ye.”
Asɛm yi yɛ nwanwa yie sɛ ehwɛ akyerɛbaa no ne gyinabew na atseetsee horow a ɔsɔwee na odzii do konyim a.
Enuanom na nkyerɛbaa, ɔnnkyebo asetsena no botae no yɛ edwuma! Wɔahyehyɛ no dɛ ɔbɛyɛ edwuma! Ɔmmfa ho haw, akomayaw, na atseetsee horow a hɛn nyinara yehyia no, hɛn Ɔsor Egya dɔfo, nyansafo a Odzi mu no ahyehyɛ enygiye ho nhyehyɛɛ no dɛ ɔnnyɛ hɛn nkrabea dɛ yebedzi ɔkõgu. Ne nhyehyɛɛ no ma hɛn kwan ma yedzi hɛn ɔnnkyebo asetsena mu sintɔ horow do. Ewuradze akã dɛ, “Iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.”
Naaso, sɛ yebenya Ewuradze “[N’edwuma] na … [N’enyimnyam]” ho ndzinoa a, mpo “bɛkyebo na onnyiewiei nkwa” a, otwar dɛ hɛn enyi da kwan dɛ wɔbɛtsetse hɛn na wɔakyerɛkyerɛ hɛn, na yɛafa namfo gya no mu—ɔtɔfabi a ɔyɛ dzen papaapa ma hɛn. Dɛ yebokwetsir ɔhaw, atseetsee, na nkõdzen a ɔwɔ wiadze yi mu korakoraa no kyerɛ dɛ yɛdze nhyehyɛɛ no a ohia ankasa ma ɔnnkyebo asetsena no botae no aba mu no esi nkyɛn.
Dɛm ntsi, sɛ mber a ɔyɛ dzen to hɛn a ɔnnsɛ dɛ ɔyɛ hɛn nwanwa. Yebehyia tsebew horow a wɔsɔ hɛn hwɛ na nkorɔfo a wɔma yetum sũasũa ayamuyie na abotar mapã. Naaso ɔsɛ dɛ yɛsɔw hɛn haw yie na yɛkaa, dɛ mbrɛ Ewuradze kãa no:
“Na obiara a ɔdze no nkwa bɔto hɔ wɔ me dwumadzi ntsi, nye me dzin ntsi no, benya no bio, dza ɔyɛ onnyiewiei nkwa no mpo.
“Dɛm ntsi, mma hom nnsuro hom atamfo [anaa hom haw, atseetsee, anaa ɔbra yi no nsɔhwɛ horow], osiandɛ mahyɛ ɔmom … , Ewuradze na ɔse, dɛ mobɔsɔ hom ahwɛ wɔ ndzɛmba nyina mu, dɛ gyangyanbiara hom bɛtsena m’ahyɛmu mu … ama woeebu hom bem.”
Sɛ yedzi yaw dzendzen anaa yɛtseetsee wɔ hɛn haw ho anaa yɛtse nkã dɛ ɔbra mu haw kyɛfã a hɛn nsa reka no bor hɛn do a, yebotum akaa dza Ewuradze kãa kyerɛɛ Israelmba no:
“Na kaa [akwan] nyinara a Ewuradze wo Nyankopɔn egya wo wɔ mu wɔ mfe eduanan yi wɔ sar no do no, dɛ ɔrebrɛ wo adze, asɔ wo ahwɛ, ehu dza ɔwɔ w’akoma mu, dɛ ibedzi ne mbransɛm do, anaa oho.”
Dɛ mbrɛ Lehi kyerɛkyerɛɛ ne ba Jacob no:
“Asɔw obene na edzi awerɛhow pii. … Naaso, … [[Nyankopɔn] behyira wo wɔ w’amandzehu mu ma eesi wo yie. … Dɛm ntsi, minyim dɛ wɔapon wo, osian wo Pomfo ne ndzeyɛtsenenee ntsi.”
Osiandɛ abrabɔ yi yɛ nsɔhwɛ bea na “ɔhaw mununkum sensɛn hɛn do na ɔdze suro sɛɛ hɛn asomdwee,” ntsi ɔboa dɛ yɛkaa dɛm afotu na anohoba a ɔwɔ Mosiah 23 tsir a ɔfa abrabɔ mu haw ho no: “Naaso—obiara a ɔdze no werɛ twer [Ewuradze] no, ɔnoara so na wɔbɛmaa no do wɔ da a odzi ewiei no mu.”
Meyɛ babun no, mankasa minyaa atsenka mu yaw kɛsenara na enyimguase ɔnam obi ne ndzeyɛɛ bɔn ntsi, a mfe pii no ɔkãa bo a mosom ma moho na m’emudzi ho atsenka wɔ Ewuradze n’enyim. Naaso, megye mankasa me dase dɛ Ewuradze botum ahyɛ hɛn dzen na Ɔamaa hɛn do wɔ haw biara a wɔafrɛ hɛn dɛ yɛmfa mu mu ber a yɛnantsew sũ bɔnsa yi mu.
Yenyim Paul no sũahu no:
“Na nyikyerɛ ntrado [a menya] no ntsi amma maamma moho do anntra do, wɔmaa me honam mu nsoɛ, Satan no bɔfoe, dɛ ɔbobɔ me ekutuku, amma maamma moho do anntra do.
“Na iyi ntsi meserɛɛ Ewuradze mpɛn ebiasa dɛ ɔmma omfi mo do.
“Na ɔsee me dɛ, M’adom dɔɔ sõ ma wo: na m’ahoɔdzen dzi mu wɔ mberɛw mu. Dɛm ntsi medze enyigye pii hyehyɛ moho mbom wɔ me mberɛw mu, ma Chirst ahoɔdzen aabɔsoɛ mo do.”
Yennyim dza nna Paul no “honam mu nsoɛ” no yɛ. Oyii dɛ ɔrennkyerɛ mu sɛ ɔyɛ honam mu yarba bi, adwen mu anaa atsenkã mu yarba bi, anaa nsɔhwɛ bi. Naaso onnhia dɛ yenya dɛm nkyerɛmu no ana yehu dɛ ɔperee na ɔserɛɛ Ewuradze hɔ mboa, na ewiei no, Ewuradze n’ahoɔdzen na no tum na ɔboaa no wɔ mu.
Dɛ mbrɛ nna ɔtse ma Paul no, ɔnam Ewuradze no mboa do na ekyir yi mehyɛɛ dzen wɔ atsenka na sunsum mu, na ewiei no mubohun no mfe pii ekyir no dɛ daa nna meyɛ nyimpa a mosom bo na mefata asɛmpa ne nhyira no. Agyenkwa no boaa me ma midzii memmfata atsenka no do na medze bɔnfakyɛ a ofi m’akoma mu maa nyia a ɔfomee no. Ewiei no metsee ase dɛ Agyenkwa no No Werdambɔ no yɛ ankorankor akyɛdze ma me na dɛ mo Sor Egya nye Ne Ba no dɔ me emudzi mu. Osian Agyenkwa No Werdambɔ no ntsi, ɔnnkyebo asetsena no botae no yɛ edwuma.
Ber a ekyir yi wohyiraa me ma muhun mbrɛ Agyenkwa no sii gyee me na ogyinaa me nkyɛn nye me duaa dɛm sũahu no mu no, metse ase pefee dɛ dza ɔnnyɛ a osii wɔ me babun ber no yɛ emi mankasa m’akwantu na sũahu, a ne nyiano na ekyir nsunsuando no wonnkotum dze ama hɔn a wɔaberɛ na wogu do reberɛ wɔ binom hɔn emumuyɛ su ntsi.
Muhu dɛ abrabɔ mu sũahu—papa nye bɔn—botum akyerɛkyerɛ hɛn adzesũadze a ohia. Sesei minyim na midzi dase dɛ ɔnnkyebo asetsena no botae no yɛ edwuma! Mowɔ enyidado dɛ ɔnam m’abrabɔ mu sũahu nyina—papa nye bɔn ntsi—mibenya ayamuhyehye ama hɔn a wɔberɛ wɔ binom hɔn ndzeyɛɛ ntsi na mibenya tsema ama nyia ɔrosɔw atseetsee.
Mifi me yamu ara wɔ enyidado dɛ ɔnam m’abrabɔ mu sũahu—papa nye bɔn ntsi—mebɛyɛ ayamuyie ama binom, nye binom edzi dɛ mbrɛ Agyenkwa no bɛyɛ no, na menya ntseasee kɛse yie ama dzebɔnyɛnyi no, na dɛ mobɔwɔ emudzi a odzi mu. Ber a yɛba bɔtwer Agyenkwa no N’adom na yesie hɛn ahyɛmudzi horow no, yebotum ayɛ Agyenkwa no no Werdambɔ ho mfaso a ɔtsen kɔ ekyikyiikyir no ho fasusu.
Mema mfatoho a odzi ewiei a ɔkyerɛ dɛ ɔnnkyebo asetsena no botae no yɛ edwuma.
Elder Hales n’antse, Lois VandenBosch, na ne maame, Klea VandenBosch.
Me maame ennya abrabɔ a ɔda famu wɔ ɔnnkyebo asetsena yi mu. Oennya ayɛyi anaa wiadze abawdobɔdze na oennya kwan annkɔ n’enyim wɔ skuul adzesũa mu anntra nsɔwdo skuul. Mbubui yarba kãa no ber a ɔyɛ abofra no, a ogyaa no yaw na atseetsee wɔ ne nan bankum mu ne bra nyina mu. Ɔyɛɛ panyin no, ohyiaa honandua mu na sikasɛm ho nkõdzen na haw pii naaso odzii nokwar maa n’ahyɛmudzi na ɔdɔɔ Ewuradze.
Me maame dzii 55 no, mo nua basia panyin wui, a ogyaa abosoom awɔtwe babaa wɔ ekyir, ɔyɛ mo wɔfase, dɛ onnyi nã. Siantsir binom ho ntsi, okowiee dɛ Maame tsetsee mo wɔfase yi mfe 17, a mber pii no nna ɔyɛ dzen ankasa. Eso, dza esisi yi mpo ho no, ɔdze enyigye na pɛ soom n’ebusua, anyɛnkofo, na ward mba na ɔsomee dɛ ayɛdze edwumayɛnyi wɔ temple mfe pii. N’abrabɔ n’ewiei mfe mu no, Maame nyaa dementia yarba, nna ɔtaa dɛ ɔnntse ndzɛmba ase, na ɔkɛdaa ayarsabea. Ɔyɛ yaw dɛ, nna ɔaka ɔno nko ber a owuu mpofir mu ara no.
No wu ekyir abosoom ara yie no, minyaa adaa sõ a mo werɛ mmfirii da. M’adaa sõ mu no, nna metse mo ɔfese wɔ Asɔr Nhwɛdo Dan no mu. Maame hɛn ɔfese hɔ. Nna minyim dɛ ofi sunsum wiadze bae. Mebɛkaa atsenkã a minyae no dabaa. Ɔannkã hwee, naaso ɔhyerɛnee wɔ sunsum ahoɔfɛw bi mu a munnhun bi da na munnkotum akyerɛkyerɛ mu.
Nna n’enyim na no su yɛ fɛw ankasa! Mekaa dɛ merekã kyerɛ no dɛ, “Maame, woho ayɛ fɛw dodow!,” merekyerɛ no sunsum mu tum na ahoɔfɛw. Ɔkyerɛɛ dɛ oehu me—a bio ɔannkasa. Metsee no dɔ ma me nkã, na nna minyim dɛ n’enyiwa agye na oenya ayarsa wɔ no widaze kɔdaannda na atseetsee ho na enyigye mu ara ɔrotweɔn “enyimnyam wusoɛr.” Minyim dɛ, ɔnnkyebo asetsena no botae no yɛɛ edwuma maa Maame—na dɛ ɔyɛ edwuma ma hɛn so.
Nyankopɔn n’edwuma na n’enyimnyam nye dɛ ɔdze nyimpa ne bɛkyebo na onnyiewiei nkwa bɔbɔ adze. Ɔnnkyebo asetsena mu sũahu horow no kã akwantu a ɔboa hɛn ma yenyin na yetu mpon kodu dɛm bɛkyebo na onnyiewiei nkwa no ho. Wɔammfa hɛn ammba ha dɛ yembedzi ɔkõgu mbom dɛ yendzi konyim wɔ Nyankopɔn ne nhyehyɛɛ ma hɛn no mu.
Dɛ mbrɛ Ɔhen Benjamin kyerɛkyerɛe: “Na bio, mebɛpɛ dɛ hom dwendwen nhyira nye ahomka tsebew a hɔn a wodzi Nyankopɔn ne mbrasɛm do no wɔ mu. Na hwɛ, woehyira hɔn wɔ adze nyina mu, wɔ honam nye sunsum nyina mu; na sɛ wosuo nokwar no mu dze kɔ ewiei a wɔbɛgye hɔn akɔ sor, ama wɔnye Nyankopɔn aakɛtsena wɔ enyigye a onnyi ewiei da tsebea no mu.” Asɛm no nye dɛ, ɔnnkyebo asetsena no botae no yɛ edwuma!
Megye dase dɛ ber a yɛgye asɛmpa n’ayɛdze, na yɛnye Nyankopɔn hɛn ahyɛmudzi mu na yesie dɛm ahyɛmudzi no, yenu hɛnho, yɛsom binom, na yɛsɔw kodu ewiei no, hɛn so yebotum enya ahotodo na awerɛhyɛmu a odzi mu wɔ Ewuradze no mu dɛ, ɔnnkyebo asetsena no botae no yɛ edwuma! Midzi Jesus Christ ho dase na dɛ hɛn enyimnyam ndaamba a yɛnye Ɔsor Egya bɛtsena no ba mu ɔnam Agyenkwa no n’adom na No Werdambɔ ntsi. Wɔ Jesus Christ ne dzin mu, amen.