Jesus Christ Nkyerɛkyerɛ no Nnyɛ Kyinkyinɛnn.
Megye dase wɔ edwuma krɔnkrɔn a wɔdze kyerɛkyerɛ Ɔsor Egya ne mba Jesus Christ nkyerɛkyerɛ a ɔda famu ho.
Hɛn nyina yɛwɔ ebusua mu mba a yɛdɔ hɔn a Satan, ɔsɛɛfo no a, ɔbɛpɛ dɛ Nyame ne mba nyina dzi awerɛhow no, n’ahom rehaw hɔn dzendzenndzen a onngyaa. Hɛn mu dodowara no, yɛakɔ nda a yɛannda. Yɛabɔ mbɔdzen dɛ nkorɔfo yi a wɔwɔ esian mu no yɛdze ahom a wɔdze yɛ papa biara botwa hɔnho ehyia. Yɛatotɔ aserɛ ama hɔn wɔ mpaabɔ mu. Yɛadɔ hɔn. Yɛayɛ fasusu pa a yebotum ayɛ biara.
Alma, tsetse mber nkɔnhyɛnyi onyansafo no, hyiaa nsɔhwɛ a ɔtse dɛm. Nkorɔfo a ɔdɔ hɔn na odzii hɔn kan no nna aber biara atamfo abɔyafo tu hyɛ hɔn do, naaso nna wɔrobɔ mbɔdzen dɛ wɔbɛtsetse mba atseneneefo wɔ emumuyɛdze wiadze mu. Alma nyaa atsenkã dɛ no konyimdzi ho enyidado nko nye ahom a ɔtɔfabi a yebu no totooba na yɛnntaa mmfa nndzi dwuma. Ɔtotɔe serɛɛ Nyame no mboa.
Nna Alma nyim dɛ ama Nyame aaboa no, wobehia hɔn a odzi hɔn kan na n’atamfo no so hɔn nnuhu. Dɛm ntsi, ɔfaa kwan soronko do dze dzii esi.
Mormon Nwoma no kã ho asɛm wɔ kwan yi do:, “Na afei, sɛ wɔkã asɛm no a onya tum kɛse bi wɔ nkorɔfo no do ma ogya hɔn ma wɔyɛ dza ɔtsen—nyew, onya tum kɛse wɔ dɔm no hɔn adwen do sen nkrantsee, anaa adze biara a oesi hɔn do pɛn—dɛm ntsi Alma hun dɛ obeye dɛ wɔdze Nyame n’asɛm no nokwar no bedzi dwuma ahwɛ.’’
Nyame n’asɛm nye nkyerɛkyerɛ a Jesus Christ na No nkɔnhyɛfo kyerɛkyerɛɛ no. Nna Alma nyim dɛ nkyerɛkyerɛ nsɛmfua no wɔ tum kɛse.
Nkyerɛkyerɛ na Ahyɛmudzi ɔfã a otsĩa 18 mu no, Ewuradze yii Ne nkyerɛkyerɛ ne fapem no kyerɛe.
“Na, hwɛ, mehyɛ nyimpa nyinara a wɔwɔ beebiara dɛ wonnu hɔnho. …
“Na, hwɛ, Ewuradze wo Pomfo wui wɔ honam mu, dɛm ntsi ɔsɔɔw adasa nyinara hɔn yaw, ama adasa nyinara eenu hɔnho na wɔaaba no hɔ.
“Na ɔasoɛr bio efi ewufo mu, ama ɔanam nnuhu ngyinado do, ɔaatwe adasa nyinara aba no hɔ.”
“Na hom nkotow na hom nsɔr mma Egya no wɔ me dzin mu.
“… Ɔsɛ dɛ hom nu homho, na wonuma hom wɔ Jesus Christ dzin mu.”
“Hom mbisa Egya no wɔ me dzin mu, hom ngye ndzi dɛ hom nsa bɛkã, na hom benya Sunsum Krɔnkrɔn no.’’
“Na afei, hom nsa akã iyi ekyir no, hom ndzi me mbrasɛm do wɔ adze nyinara mu.”
“Hom mfa Christ ne dzin nto hom do, na hom nkã nokwar wɔ botooyɛ mu.
“Na dodowara a wonu hɔnho na wonuma hɔn wɔ me dzin mu, a ɔyɛ Jesus Christ no, na wotsim kodu ewiei no, hɔn na wɔbɛgye hɔn nkwa.”
Dɛm nyiyimu kakrabaa yinom mu no, Agyenkwa no ma hɛn fasusu a odzi mu wɔ mbrɛ ɔsɛ dɛ yɛkyerɛkyerɛ Ne nkyerɛkyerɛ no. Nkyerɛkyerɛ no nye dɛ gyedzi wɔ Ewuradze Jesus Christ mu, nnuhu, enuma, eregye Sunsum Krɔnkrɔn akyɛdze no, na iritsim ekodu ewiei no hyira Nyame ne mba nyina.
Ber a yɛkyerɛkyerɛ fapem yinom kyerɛ hɔn a yɛdɔ hɔn no, Sunsum Krɔnkrɔn no bɔboa hɛn ma yehu nokwar no. Osiandɛ yehia Sunsum Krɔnkrɔn no ne nkenyan no, otwar dɛ yekwetsir adwen nsusui hun anaa ankorankor nkyerɛkyerɛ mu a ɔtra dza nokwar nkyerɛkyerɛ kyerɛkyerɛ no.
Ɔno bɛyɛ dzen dɛ ibɛyɛ ber a edɔ nyimpa kor a erobɔ mbɔdzen dɛ ibɛsɛkyerɛ no. Bia na oebu n’enyiwa egu nkyerɛkyerɛ no a wɔakyerɛkyerɛ no do. Ɔyɛ enyika dɛ ebɔsɔ biribi fofor anaa enyigyedzi bi ahwɛ. Naaso Sunsum Krɔnkrɔn beyi nokwar sunsum no akyerɛ a, nna gyedɛ eyɛ ahwɛyie ma nntra nnkyerɛ adze ma ɔntra nokwar nkyerɛkyerɛ no do. Kwan pa kor a yebotum afa do a mpo yɛnnkɛbɛn ator nkyerɛkyerɛ ho nye yɛbɛma hɛn nkyerɛkyerɛ ada famu. Ɔnnyɛ kyinkyinɛnn no ma nokwar no da edzi, na dza ɔnnsɛ mmfora mu.
Hɛn adzekyerɛ reda famu no ma hɛn kwan ma yɛkyɛ nkyerɛkyerɛ a ɔgye nkwa no ntsɛm, ber a daadaafo no nsɔhwɛ a ekyir no wobehyia no nnkãa hɔn no, koraa ansaana social media ne dede, mfɛfo, na hɔnankasa hɔn ankorankor aperdzi amem nokwar no a wohia dɛ wosũa no. Kwan biara a yebenya no, ɔsɛ dɛ yɛnye mbofra no kyɛ Jesus Christ ne nkyerɛkyerɛ no. Adzekyerɛ mber yinom a ɔsom bo na ɔnndɔɔ sõ sɛ edze rototo ahom a ɔrokõ tsia a onngyaa da. Dɔnhwer kor biara a wɔhwer dze nkyerɛkyerɛ tsetse abofra n’abrabɔ no otsiafo no dze dɔnhwer pii a wonntum kan dze nsɛm na mfonyin a ɔnye dɛm nokwar a ɔgye nkwa no dzi esi.
Hom mu binom bɔdwen dɛ nkyɛ obeye dɛ hom bɔtwe hom mba abɛn hom wɔ enyikãdze mu, anaa hom botum ebisa sɛ bia abofra no ahyɛ ase renya atsenkã dɛ w’adzekyerɛ no reyɛ abor no do a. Mbom, ɔsɛ dɛ yesusu dɛ, “Mber kakraba ara mu yi na kwan kakraba na menya yi, ebɛn nkyerɛkyerɛ mu nsɛm na mubotum akyɛ a ɔbɛhyɛ hɔn dzen etsia hɔn gyedzi ho taferbanyinmbɔmu a ɔbɛba no? Nsɛm a ekyɛ no ndɛ no botum ayɛ dza wɔdze bɔkɔ, na ɔnnkɛkyɛr na ndɛ asen akɔ.
M’enyi gye me nana sum Mary Bommeli ho daa wɔ n’enyimpisi dɛ ɔbɛkyɛ Jesus Christ ne nkyerɛkyerɛ no. Asɛmpasomafo a wɔwɔ Switzerland kyerɛkyerɛɛ n’ebusua adze ber nna oedzi mfe 24.
Wonumaa no ekyir no ɔpɛɛ dɛ ɔbɛkã Ahotseweefo no hɔn ho wɔ America, ntsi otuu kwan fi Switzerland baa Berlin na onyaa edwuma wɔ ɔbaa bi a ɔfaa no dɛ ɔwen atam mma n’ebusua mfura. Mary tsenaa nkowaa hɔn pia mu na ɔdze n’asadua no sii asado hɔ.
Dɛm aber no nna wɔbra dɛ wɔbɛkyerɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne nkyerɛkyerɛ wɔ Berlin. Naaso Mary hun dɛ onnkotum egyaa dɛ ɔnnkɛkyɛ ndzɛmba a oesũa no. Ɔbaa fie wura no na n’anyɛnkofo boaa ano wɔ asadua ne nkyɛn dɛ wobetsie Mary a ɔrekyerɛ adze. Ɔkãa Ɔsor Egya na Jesus Christ a Wopue Joseph Smith do, abɔfo nsera, na Mormon Nwoma ho asɛm. Ɔrekaa Alma ho nsɛm no, ɔkyerɛkyerɛɛ Wusoɛr nkyerɛkyerɛ ho nsɛm. Ɔgyee dase dɛ ebusua ebusua botum asan abɔmu bio wɔ celestial ahenman mu.
Annkyɛr na Mary n’enyigye dɛ ɔbɛkyɛ asɛmpa a wɔdze asan ananmu aba ne nkyerɛkyerɛ no dze ɔhaw bae. Annkyɛr na polisinyi bɛfaa Mary kɔɔr efiadze. Wɔnam kwan do no, obisaa polisinyi no ɔtsɛmbuafo a wɔdze no bɛba n’enyim adzekyee no ne dzin. Obisaa n’ebusua ho nsɛm dɛ sɛ ɔyɛ egya pa na kun pa a. Polisinyi no kyerɛɛ dɛ ɔtsɛmbuafo no yɛ wiadzenyi.
Ɔda efiadze no Mary bisaa pɛnser na krataa. Ɔdze anafua no kyerɛɛw krataa a ɔdze rekɛma ɔtsɛmbuafo no, regye ne dasee wɔ Jesus Christ No Wusoɛr no ho dɛ mbrɛ wɔakã ho asɛm wɔ Mormon Nwoma no mu, repɛnsanpɛnsa sunsum wiadze mu, na ɔrekyerɛkyerɛ nnuho mu. Osusuu dɛ ɔtsɛmbuafo no behia mber adwendwen n’abrabɔ ho ansaana oekehyia atsɛmbu a odzi ewiei no. Ɔkyerɛɛw dɛ onyim dɛ ɔwɔ beberee a ɔsɛ dɛ onu noho, beberee a ɔdze awerɛhow kɛse bɛhyɛ n’ebusua na ɔdze ahwerɛhow kɛse bɛhyɛ ɔnoara. Anapa no, ber a owie ne krataa no kyerɛw no, ɔdze maa polisinyi no na ɔserɛɛ no dɛ ɔmfa nkɛma ɔtsɛmbuafo no, na ɔpeen do dɛ ɔbɛyɛ.
Ekyir no, ɔtsɛmbuafo no frɛɛ polisinyi no dɛ ɔmbra no ɔfese. Krataa no a Mary akyerɛw no yɛ adanse a wɔnngye ho kyim dɛ ɔrekyerɛkyerɛ asɛmpa a wɔdze asan ananmu aba ne nkyerɛkyerɛ no, na ɔreyɛ dɛm no, nna ɔrotõ mbra. Naaso, annkyɛr na polisinyi no sanee baa Mary ne cell hɔ. Ɔkãa kyerɛɛ no dɛ woegyaa no wɔ sombo a wɔdze bɔɔ no nyina ho na dɛ ɔwɔ fahodzi dɛ ɔkɔ. Asɛmpa a wɔdze asan anan mu aba nkyerɛkyerɛ a ɔkyerɛkyerɛɛ no maa wɔdze no too efiadze. Na ɔrepaa mu akã nnuhu ho nkyerɛkyerɛ akyerɛ ɔtsɛmbuafo no ma woyii no fii efiadze.
Wogyaa Mary Bommeli no amma oenngyaa nkyerɛkyerɛ n’adzekyerɛ. Ne nsɛm a wɔkyerɛwee dze nokwar nkyerɛkyerɛ brɛɛ ebusuasantsen a wonnyaa nnwoo hɔn. Ɔgye dzi dɛ nyia ɔasakyer fofor mpo botum akyerɛ Jesus Christ nkyerɛkyerɛ no ama n’asefo ebenya ahoɔdzen wɔ hɔnankasa hɔn nsɔhwɛ aperdzi mu.
Ber a yɛbɔ hɛn mbɔdzen biara dɛ yɛkyerɛkyerɛ hɔn a yɛdɔ hɔn no Jesus Christ ne nkyerɛkyerɛ ho nsɛm no, hɔn mu binom renngye. Ekyingye botum ahɛn w’adwen mu. Bia ibebisa dɛ ana inyim Agyenkwa ne nkyerɛkyerɛ no ara yie a ibotum akyerɛkyerɛ yie a. Na sɛ abɔ mbɔdzen akyerɛkyerɛ a, ibɔdwen ho dɛ dɛn ntsi na nnhu nsunsuando pa biara no. Mma nngyaa woho mma dɛm ekyingye no. Dan kɔ Nyame hɔ kɛgye mboa.
“Nyew, sũ frɛ Nyankopɔn wɔ mboa biara a ihia ho; … ma w’akoma ndɔ Ewuradze afebɔɔ.”
“Na afei mepɛ dɛ hom brɛ hom ho adze, na hom yɛ setsie na botoo; hom yɛ asomberɛw; hom ma abotar nye penkyɛr hyɛ hom mã; hom to hom bo ase wɔ adze nyinara mu; hom mia homho dzi Nyankopɔn ne mbrasɛm do mber nyina; hom bisa dza hom hia, wɔ sunsum nye honam afamu nyina; na aber nyinara hom mfa ndaase mma Nyankopɔn wɔ biribiara a hom benya ho.”
Sɛ ibɔ mpaa, sɛ enye Nyame kasa, na sɛ etotɔ serɛ No mboa ma wo dɔfo no ho a, na sɛ ida No ase nnyɛ wɔ mboa nko ho mbom wɔ abotar na ɔdwe a ofi yerinnya dza yɛrohwehwɛ nyina hɔnara anaa yerinnya da mpo no, dɛm dza mobɔ hom anohoba dɛ hom bɔtwe abɛn No. Hom benya enyimia na penkyɛr su. Na nkyii hom botum ehu dɛ hom ayɛ dza hom botum ayɛ nyina dze aboa hɔn a wɔdɔ hɔn, na hɔn a hom bɔ mpaa ma hɔn no bodua Satan no mbɔdzembɔ dɛ ɔbɔtwe hɔn ekyir.
“Na hɔn a wɔtweɔn Ewuradze dze, wobonu hɔn ahoɔdzen mu fofor; wɔdze ntsaban botu afow sor dɛ nkɔr; wobotu mbirika, na wɔnnkɛbrɛ; wɔbɛnantsew, na wɔnnkɔtɔ bitsi.’’
Ibotum enya enyidado wɔ ebusua ebusua kyerɛwsɛm nkyerɛwee mu. Yɛkenkan hɔn a wɔdanee fii dza wɔkyerɛɛ hɔn ho anaa wɔnye Nyame ridzi aper rohwehwɛ No bɔnfakyɛ ho nsɛm, tse dɛ Alma Kakraba, Mosiah ne mbabanyin, na Enos. Hɔn ahokyer kɛse ber mu no, wɔkaa nsɛm a hɔn awofo akã, afa Jesus Christ ne nkyerɛkyerɛ nsɛm ho no. Ne nkae no gyee hɔn nkwa. Wo nkyerɛkyerɛ krɔnkrɔn n’adzekyerɛ no wɔbɛkaa.
Megye dase wɔ dwuma krɔnkrɔn a yɛkyerɛkyerɛ Ɔsor Egya ne mba Jesus Christ nkyerɛkyerɛ a ɔnnyɛ kyinkyinɛnn, a ɔma kwan ma wɔtsew hɛnho sunsum mu na ewiei wɔayɛ hɛn etuu wɔ Nyankopɔn enyim, yɛnye Ɔno na Ne Ba atsena enyimnyam mu afebɔɔ wɔ ebusua ebusua mu. Wɔ Jesus Christ ne dzin mu, amen.