Kyerɛwsɛm Krɔnkrɔn—Gyedzi ne Fapem no
Yennkotum ebu kyerɛwsɛm krɔnkrɔn no ho hia a ohia no adze kakraba wɔ nsakyeree na yɛrokɔ do ayɛ anokwafo wɔ asɛmpa no mu.
Ɔnnkyɛree biara emi na me yer Mary, yehun T-shirt bi a buuku no mfonyin wɔdo na asɛm a wɔakyerɛw wɔ n’enyim no ɔkenkan dɛ: “Mbuukuu: Dza Wokitsa no Nsamu Edzikan.”
Modween nsɛm a ɔyɛ ahomka yi ho na mbrɛ dza wokitsa no nsamu ahorow no abɛyɛ. Modwendwen ho kɔr ekyir no, muhun dɛ adze biara anaa ma ɔwɔ abaɛfor nyansa mpo no noho rinnhia anaa ɔrennyɛ adze tsitsir nnkyɛn sunsum mu kwankyerɛ a ofi sor nyikyerɛ mu ba.
Sɛ ɔyɛ dza wokitsa no nsamu anaa abaɛfor no, Nwoma Krɔnkrɔn na Mormon Nwoma no: Jesus Christ Ahyɛmu Kor so no ma hɛn sunsum mu kwankyerɛ na nkyerɛkyerɛ fi Jesus Christ, wiadze Agyenkwa no hɔ. Nwoma yinom som hɛn bo ɔnam asodzi tsitsir a wɔkyerɛɛw Nyame no kwankyerɛ maa tsetse nkɔnhyɛfo na nkorɔfo na kwankyerɛ a wɔdze ma hɛn wɔ hɛnankasa hɛn ankorankor abrabɔ mu no.
Yɛdze kã nkɔnhyɛfo atseasefo hɔn nkyerɛkyerɛ ho a, kyerɛwsɛm krɔnkrɔn yinom ma nkyerɛkyerɛ kwankyerɛ ma hɛn wɔ ndɛ wiadze yi mu. Kyerɛwsɛm yinom yɛ ndam kɛse ber a wɔma nkyerɛkyerɛ, ntsentsenee na awerɛkyekyer, ama ankorankor na ebusua ebusua a wɔhwehwɛ kwankyerɛ fi Ewuradze hɔ.
Kyerɛwsɛm no, wɔdze kã sunsum mu nkenyan a ofi Sunsum Krɔnkrɔn hɔ no ho a, ɔkɔ do yɛ fibea tsitsir a ɔboa nsakyeree ma hɔn a hɔn akoma abobɔ na sunsum abotow na wɔpɛ dɛ wɔka Jesus Christ do. Kyerɛwsɛm no boa ma wɔtow fapem a obotum egyina otsĩafo no ne daa daa mbɔdzembɔ dɛ ɔbɛsɛɛ gyedzi.
Afoforfo a wɔasakyer no woehyira na wɔayɛ Asɔr n’ahom wɔ n’abakɔsɛm mu nyina. Mfatoho kor bi som mo bo. Ber a meyɛ bishop a n’enyi mmfir pii no, nna nkyerɛbaa asɛmpasomafo anwanwafo beenu bi rekyerɛkyerɛ William Edward Mussman ebusua no. Egya no, mbranyimnyi a ɔawea papaapa no, nna ɔyɛ edwuma kɛse bi hɔn mbranyimnyi edwuma mu. Ne yer, Janet a ɔdɔ no no, nna ɔroboa ebusua no ma wɔabɔ mbɔdzen dze Christ-su abɔ bra.
Hɔn babanyin na babaa soronko, beenu no nyina a nna wonndzii mfe 25, nna wɔrekyerɛkyerɛ hɔn so. Baanan no nyina agye adzesũadze no na wɔba asɔr. Nkyerɛbaa asɛmpasomafo no nna woetsĩ Mormon Nwoma n’akenkan na mpaabɔ mu ama wɔdze enya kyerɛwsɛm krɔnkrɔn ho dasegye. Ɔyɛ nwanwa dɛ, mpaabɔ mu ara ebusua no kenkaan Mormon Nwoma no nyina wɔ mber tsiabaa mu.
Stake asɛmpasomafo, a beenu no nyina a wɔasom dɛ Relief Society presidentfo dada, kãa hɔnho wɔ sacrament nhyiamu mu.
Ber a ebusua no rebɛn enuma no, wonyaa nsɛm a wɔakyerɛw pii a ɔkasa tsia Asɔr no. Iyi yɛ ansaana internet reba, naaso ndzɛmba no hyɛɛ cardboard adaka kɛse bi mã.
Nkyerɛbaa asɛmpasomafo no too nsa frɛɛ me dɛ meyɛ mfe 34 bishop a wɔfrɛɛ me ɔnnkyɛree dɛ monkɔboa ma wonyiyi nsɛmbisa a woebisa no ano. Yɛboaa ano wɔ hɔn asado no, nna adaka kɛse bi a mbuuku nkakraba a wɔkasa tsia Asɔr no si dan no ne finimfin. Mpaabɔ mu ara na medze baa dwuma yi ho. Mbuei mpaabɔ no mu no, Sunsum no wɔsaa kyerɛ me dɛ, “Onyim dada dɛ ɔyɛ nokwar.” Nna iyi hia dodow! Nkyerɛbaa no nna wɔgye dzi dɛ ebusua nkaa no enya dasegye dada. Nna wonnyim egya no ne dze.
Mekãa kyerɛɛ no ntsɛmara dɛ Sunsum no ekenyan me dɛ oenya dasegye dada. “Ana ɔyɛ nokwar?” Ɔhwɛɛ me dzinn na ɔkãa dɛ Sunsum no esi Mormon Nwoma no na Asɔr no nokwar no pi akyerɛ no.
Nkyii mibisaa dɛ ana obehia dɛ yɛbobɔ mbuukuu nkakraba yinom do, sɛ yenya sunsum mu pisi dada a.
Egya no buaa dɛ onnkehia. Ebusua nkaafo no nyina peen no mbuae no do.
Ɔkãa dɛ ɔwɔ asɛmbisa kor a ohia: Siantsir kor a onyaa nsɛm a wɔakyerɛw pii a otsia Asɔr no nye dɛ wɔyɛ nyamesom bi asɔrmba. Dza ɔkã ho no, nna ɔabɔ anohoba kɛse dɛ ɔbɔboa dɛm nyamesomfo no ma woesi asɔrdan fofor. Ɔkãa kyerɛɛ me dɛ nkyerɛbaa asɛmpasomafo no akyerɛkyerɛ no ebupɛn du no ho hia ohia ho nsɛm, a ɔgyee too mu enyisɔ mu ara, mbom nna ɔrodwen ho dɛ ana obomuo dɛ obedzi anohoba a ɔabɔ no dada no do. Mekãa kyerɛ no dɛ sɛ otua a anohoba ebien no nyina ɔbɛyɛ enyidzi na wɔafata.
Mussmanfo a wɔnye hɔn babanyin, asew basia, na akyerɛbaa.
Wonumaa ebusua no nyina. Afe kor ekyir no wɔsɔɔw hɔn ano dɛ ebusua wɔ Oakland California Temple. Ɔyɛɛ me adom dɛ nna mowɔ hɔ. Babanyin no wie mbranyimfo skuul, na odzii nyim wɔ California Mbranyimfo Nsɔhwɛ mu, na ntsɛmara ɔkɔsoom asɛmpakã dwuma nokwar mu wɔ Japan. Mahwɛ mfe rugu mu no, ber a ebusuasantsen a wodzi do egyina pintsinn wɔ asɛmpa no mu. Ɔyɛɛ me adom dɛ meyɛɛ nana mbabaa mu baako no nsɔwano.
Nsakyeree a ɔrokɔ do wɔ hɛn nda yi mu no yɛ nwanwa dɛmara. Ndaansa Obiradzi yi, emi na Coach Andy Reid, Kansas City Chief bɔɔlbɔ kuw hɔn coach panyin nye binom so a wogyina hɔ ma hɛn som na nyamesom binom so, kasaa wɔ nyamesom ahorow dwumadzi ase wɔ Riverside Church a ɔwɔ New York City. Coach Reid tsĩi mpɛn ebien kwan na erubua nsato na kwan a wɔdze yɛ adze mu, a ɔyɛ dza Jesus Christ asɛmpa no kyerɛ. Adzekyee no, yɛnye hɛn nyernom, Tammy Reid na Mary no, yɛkɔr sacrament nhyiamu wɔ Manhattan Second Ward. Som no yɛɛ sunsum mu nkenyan. Nna afoforfo a wɔasakyer pii wɔ mboanofo no mu. Asɔrmba beenum a ndaansa yi ara wonumaa hɔn no, mbanyin baanan na aberantsɛba baako kã Aaron Asɔfodzifo a wɔdze sacrament no kɔɔr aporow hɔn ho. Ɔyɛ me enyigye dɛ mobɔ amandzɛɛ dɛ asɔrmba afoforfo reba Asɔr no mu tse dɛm ara wɔ beebiara.
Ɔyɛ hɛn enyisɔ dɛ hɔn a wobua nsato krɔnkrɔn, wɔsesã hɔn abrabɔ, na wɔgye kwan no to mu dɛ wɔbɛka Jesus Christ do hɔn dodow reyɛ kɛse. Wodua gyedzi, nnuhu, enuma, na pisi , dɛ mbrɛ wɔkyerɛkyerɛ wɔ Nwoma Krɔnkrɔn na Mormon Nwoma mu no, do hɛn ahyɛmu anamɔn kwan no mu.
Yennkotum ebu kyerɛwsɛm krɔnkrɔn no ho hia a ohia no adze kakraba wɔ nsakyeree na yɛrokɔ do ayɛ anokwafo wɔ asɛmpa no mu. Tsetse nkɔnhyɛfo a wɔkã hɔnho asɛm wɔ Mormon Nwoma mu no nna wonyim Jesus Christ no somdwuma ho asɛm na wɔkyerɛkyerɛ N’asɛmpa. Mormon Nwoma no boa hɛn ma yɛtwe bɛn Nyame yie ber a yesũa, yɛtse ase, na yɛdze ne nkyerɛkyerɛ no dzi dwuma. Nkɔnhyɛnyi Joseph Smith kyerɛkyerɛɛ dɛ “Obiara a obedzi [buukuu no] mu nsɛm do no ɔbɛbɛn Nyankopɔn kyɛn dɛ obedzi nwoma biara no mu nsɛm do.”
Ama eehu dɛ Mormon Nwoma no yɛ Nyame n’asɛm no, yehia dɛ yɛkenkan, yɛdwendwen ho na yɛbɔ ho mpaa na nkyii yedzi ne nsɛm do. Nkɔnhyɛnyi Moroni bɔɔ anohoba dɛ Nyame beyi nwoma no no nokwar akyerɛ hɛn ber a yɛdze nokwar akoma bisa, pra hɛn akoma mu, na yɛdze gyedzi wɔ Christ mu. Yerusũa Mormon Nwoma no hia papaapa ma nsakyeree etsim.
Ber a yɛdwendwen nkitahodzi a ɔda Bible na Mormon Nwoma ntamu dɛ dza wokitsa no nsamu no, bia obi bebisa asɛmbisa yi. Nwoma ebien yi wobesi dɛn wɔayɛ mfaso na wɔahyɛ hɔn ho mã sɛ Ewuradze kãa dɛ wɔdze bɔbɔ mu na “wɔayɛ kor wɔ wo nsamu.”? Ɔno nye dza Ewuradze kãa faa “Judah poma,” Bible no, na “Joseph poma,” Mormon Nwoma no ho.
Akwan tsitsir pii mu no, Mormon Nwoma no ma nkyerɛkyerɛ fapem a ɔma ntowdo na ɔtow wɔ Bible no do. Jesus Christ No Werdambɔ no ne nkyerɛkyerɛ no yɛ mfatoho yie.
Bible no kã Jesus Christ no honandua mu somdwuma, a No wu na Wusoɛr kã ho ho asɛm tɔɔtsen. Mormon Nwoma no da Jesus Christ No Werdambɔ no edzi pefee, dɛ biribi a nkɔnhyɛfo kyerɛkyerɛɛ mu ara yie ansaana Orubowu.
Alma tsir 42 ne tsir nsɛm no kyerɛ Jesus Christ No Werdambɔ nkyerɛkyerɛ no ho hia a ohia.
Ɔkenkan dɛ: “Asetsena a ɔnnkye bo yi yɛ nsɔhwɛber ama nyimpa eetum enu noho na ɔasom Nyankopɔn—Asehwe no dze honam nye sunsum mu owu baa adasamba nyina do—Ɔpon nam nnuho do ba—Nyankopɔn Nankasa abɔ werdam dze ama wiadze bɔn—Ehumbɔbɔr wɔ hɔ ma hɔn a wonu hɔnho—Hɔn a wɔaka no nyina hyɛ Nyankopɔn ne pɛrpɛrdzi ase—Osian Werdambɔ no ntsi na ehumbɔbɔr ba—Nyia oenu noho nokwar mu no na wɔbɛgye no nkwa.”
President Russell M. Nelson abɔ anohoba dɛ: “Ber a mpaabɔ mu ara irusũa Mormon Nwoma no dabiara, no ebɔbɔ adwenpɔw apapa—dabiara.” Mobɔ anohoba dɛ sɛ daa daa hom dze homho hyɛ Mormon Nwoma no mu a, hom botum edzi nyim etsia ndɛ no bɔn no do.’’
Dɛ mbrɛ mekãa no, ntseasee dɛ dza wokitsa no nsamu edzikan no—buukuu no, tɔɔ mo do. Naaso, muhu internet no ho hia ohia kɛse wɔ wiadze mu ndɛ. Abaɛfor dza wokitsa no nsamu kor botum ama nsɛm a, abakɔsɛm mu no, wɔahyɛ nwoma korabea kɛse mã. Ɔyɛ hɛn enyisɔ dɛ yɛtse mber a ɔtse dɛm mu. Ɔyɛ me enyisɔ dɛ ɔma kwan ma mbuukuu krɔnkrɔn na Asɔr ndzɛmba nsa kã no Internet do. Internet no yɛ edwindze a ɔyɛ ndam a wɔdze sũa asɛmpa no. Ndɛ, nkorɔfo dodow ara nye hɔn anyɛnkofo kyɛ kyerɛwsɛm a wɔyɛ no abaɛfor. Mfatoho, Mormon Nwoma app no, yɛ kwan nwanwa a ibotum ebue Mormon Nwoma no enyi akyerɛ anyɛnkofo na wobotum akyɛ no ntɔyɛɛ akwan mu beebiara a ewɔ biara.
Internet no ma nhyira pii, naaso, ɔyɛ yaw dɛ, tse dɛ mbuuku nkakraba no a wɔkasa tsia Asɔr no a medzi kan akã ho asɛm no, wɔdze ayɛ dza ɔdze ekyingye na ɔsɛɛ gyedzi wɔ asɛmpa fapem a ɔsom bo no ho. Obotum akã “ndɛ no bɔn no” ho a President Nelson kãa ho asɛm no.
Otsĩafo no na hɔn a wɔboa no no, dɛ wonyim anaa wonnyim no, wɔayɛ wɔ internet do dza ɔtse dɛ dza wɔakyerɛw a ɔkasa tsia Asɔr no adaka mã, a medzi kan akã ho asɛm, a no botae nye dɛ ɔbɔtwe hom efi Nyame no nokwar no ho.
Nsɛm a wɔkã no a ɔdze ekyingye ba mfe pii egu mu no, wɔatse dɛmara ma ɔyɛ nwanwa. Iyi yɛ nokwar nkankara sɛ edze hɛn nda yi toto mfe 1960 dze ho ber a nna mowɔ me mfe 20 mu no.
Kyerɛwsɛm no kyerɛkyerɛ hɛn dɛ yɛmfa adwen nyɛ adze na yɛnyɛ enyansafo wɔ adze nyina mu. Internet no wobotum dze edzi dwuma wɔ kwan pa anaa ɔsɛɛ kwan do.
Asɔrmba a wɔbaa mu akyɛr na afoforfo a worusua asɛmpa no wɔdɛ wɔgye enyim yi dza wɔbɔhwɛ. Mma hom mma ɔbra bɔn, ator, anaa dza ɔnntsen kwan. Sɛ hom yɛ a, mbrɛ woesi ahyɛhyɛ no bɛgya hom akɔ akwan a ɔsɛɛ gyedzi na osiw hom onnyiewiei mpontu. Wobotum nye hom edzi dwuma pa anaa dza omuo. Hwehwɛ tseneneeyɛ na kwetsir [dark internet rabbit holes and doomscrolling] internet mbea sunkamm a ɔnnyɛ nye nhwehwɛe hun. Fa dza ogya nkamfo, tsenenee adwenkyerɛ, ma w’enyi ngye, dzi agor mbom kwetsir dza ɔnnsɛ. Nsonsonee wɔ mu. Gyedzi ho nsɛmpɔw dza otsĩa duebiasa yɛ kwankyerɛ nwanwa. Ne nyina ekyir no, taa fa woho hyɛ Mormon Nwoma no mu, a ɔbɔtwe Sunsum no aba w’abrabɔ mu na ɔaboa wo ma ehu nokwar fi mfom mu.
M’afotu ma hɔn a kwan biara do wɔaman efi ahyɛmu anamɔn kwan ho no nye dɛ wɔbɛsan abafa kyerɛwsɛm krɔnkrɔn, nkɔnhyɛ kwankyerɛ, nyamesom ho ndzeyɛe wɔ fie, na gyedzi ndwom. Ɔkra biara som bo ma Ewuradze. Yehia hom! Ewuradze hia hom, na hom hia No. Wɔbɛyɛ wo akwaaba aber nyina. M’Asɔr som mfe pii mu no, nkorɔfo nwanwa a wɔasan aba ahyɛmu anamɔn kwan no do na nkyii wɔasom na woehyira obiara a wɔdɔɔ no anaa wɔnye no dzii nkitaho no asom mo bo.
Kyerɛwsɛm krɔnkrɔn na nkɔnhyɛfo atseasefo yɛ kwan tsitsir a Ɔsor Egya dɔfo ma Ne mba nyina hɔn nsa kã No nkwagye nhyehyɛɛ no.
Megye me dasegye nokwar a osi pi wɔ Jesus Christ no krɔnkrɔnyɛ na No Werdambɔ no nokwar ho, wɔ Jesus Christ ne dzin mu, amen.