ယေရှုခရစ်တော်နှင့်သူ၏ဧဝံဂေလိအား အာရုံစိုက်လော့
ကျွန်တော်တို့က လောကရဲ့အနှောင့်အယှက်တွေကို လျစ်လျူရှုပြီး ခရစ်တော်နဲ့ သူ့ရဲ့ဧဝံဂေလိကို အာရုံစိုက်မယ်ဆိုရင်၊ အောင်မြင်မှုရဖို့အာမခံချက်ရှိပါတယ်။
၁၉၉၆ ခုနှစ်မှာ၊ နိုင်ဂျီးရီးယားအမျိုးသားဘောလုံးအသင်းက အမေရိကန်နိုင်ငံ၊ အတ္တလန်တာမြို့ မှာ ကျင်းပတဲ့ အိုလံပစ်အားကစားပြိုင်ပွဲမှာ ရွှေတံဆိပ်ရခဲ့ပါတယ်။ အဆုံးသတ်ပွဲပြီးနောက်မှာ၊ ဂုဏ်ယူဝင့်ကြွားတဲ့လူအုပ်ကြီးက နီဂျီးရီးယားနိုင်ငံရဲ့ မြို့တိုင်း၊ မြို့နယ်တိုင်းရဲ့လမ်းတွေပေါ် ဒရဟော ရောက်ရှိလာပါတယ်၊ လူသန်း ၁၁၀ ကျော်ရှိတဲ့ ဒီနိုင်ငံက နံနက် ၂ နာရီမှာ ကြီးမားများပြားတဲ့ အောင်ပွဲခံအခမ်းအနားကြီးတစ်ခုအဖြစ် ချက်ချင်းပြောင်းလဲသွားခဲ့ပါတယ်။ လူတွေက စားသောက်၊ သီချင်းဆို ၊ ကခုန်ကြရင်း ဝမ်းသာမှု ၊ ပျော်ရွှင်မှု နဲ့ စိတ်လှုပ်ရှားမှုတွေက ကူးဆက်ပျံ့နှံ့နေပါတယ်။ အဲဒီအခိုက်အတန့်မှာ၊ နိုင်ဂျီးရီးယားနိုင်ငံက စည်းလုံးနေခဲ့ပြီး နိုင်ဂျီးရီးယားနိုင်ငံသားတိုင်းက နိုင်ငံသားဖြစ်ရတာကိုပဲ ကျေနပ်နေခဲ့ကြပါတယ်။
အိုလံပစ်ပွဲတွေမစခင်မှာ၊ ဒီအသင်းက များပြားလှတဲ့စိန်ခေါ်မှုတွေနဲ့ ရင်ဆိုင်ခဲ့ရပါတယ်။ ပြိုင်ပွဲစတာနဲ့၊ သူတို့ရဲ့ ငွေကြေးထောက်ပံ့မှု အဖြတ်ခံခဲ့ရပါတယ်။ အသင်းက သင့်လျော်တဲ့ ပစ္စည်းကိရိယာတွေ၊ လေ့ကျင့်ရေးနေရာတွေ၊ လုံလောက်တဲ့ အစားအစာနဲ့ ဒိုဘီဝန်ဆောင်မှုတွေမပါဘဲ ပြိုင်ပွဲပြီးဆုံးခဲ့ပါတယ်။
ဂျေရိုမီ ပရီဖော့စ်ထ်/ ဂတ်တီ ဓာတ်ပုံ။
အဆင့်တစ်ခုမှာ၊ သူတို့ပြိုင်ပွဲကနေ နှုတ်ထွက်ရဖို့အချိန်အနည်းငယ်ပဲလိုတော့ပေမယ့်၊ နိုင်ဂျီးရီးယားအသင်းက မဖြစ်နိုင်တာကိုကျော်ပြီး နိုင်ပွဲရခဲ့ပါတယ်။ အဲဒီ ထူးခြားတဲ့အချိန်ခဏတာက သူတို့ကိုယ်သူတို့ မြင်ပုံကို ပြောင်းလဲပေးလိုက်ပါတယ်။ အဲဒီအသစ်တွေ့ရှိသွားတဲ့ယုံကြည်မှုနဲ့အတူ၊ တစ်ဦးချင်းနဲ့အဖွဲ့ လိုက်အားထုတ်မှုနဲ့ မဆုတ်မနစ်တဲ့စိတ်ပိုင်းဖြတ်မှုတွေနဲ့၊ သူတို့က စည်းလုံးစွာ အနှောင့်အယှက်တွေကို လျစ်လျူရှုပြီး အနိုင်ရဖို့ အာရုံစိုက်ခဲ့ပါတယ်။ အဲဒီအာရုံစိုက်မှုက သူတို့ကို ရွှေတံဆိပ် ဆွတ်ခူးစေပြီး၊ နိုင်ဂျီးရီးယားနိုင်ငံသားတွေက သူတို့ကို “အိပ်မက်အသင်း”လို့ အမည်ပေးခဲ့ကြပါတယ်။ ၁၉၉၆ ခုနှစ်ကအိုလံပစ်မှာ အိပ်မက်အသင်းအကြောင်းကို နိုင်ဂျီးရီးယားအားကစားကဏ္ဍမှာ ကိုးကားပြောဆိုနေတုန်းပါပဲ။
ဒေးဗစ် ကန်နွန်/အော်စပေါ့ထ်/ဂတ်တီ ဓာတ်ပုံ။
နိုင်ဂျီးရီးယားဘောလုံးအသင်းက သူတို့ရင်ဆိုင်နေရတဲ့ အနှောင့်အယှက်တွေအများကြီးကို လျစ်လျူရှုပြီး သူတို့ရဲ့ပန်းတိုင်ကို အာရုံစိုက်ဖို့ သင်ယူလိုက်တာနဲ့၊ သူတို့ဖြစ်နိုင်မယ်လို့တွေးထားတဲ့အရာထက် ကျော်လွန်အောင်မြင်ခဲ့ပြီး ကြီးမားတဲ့ဝမ်းမြောက်ခြင်းကို ခံစားခဲ့ရပါတယ်။ (နိုင်ဂျီးရီးယားနိုင်ငံက ကျွန်တော်တို့တွေလည်း အဲဒီဝမ်းမြောက်ခြင်းကို ခံစားခဲ့ရပါတယ်။)
အလားတူစွာ၊ ကျွန်တော်တို့က လောကရဲ့အနှောင့်အယှက်တွေကို လျစ်လျူရှုပြီးခရစ်တော်နဲ့ သူ့ရဲ့ဧဝံဂေလိကို အာရုံစိုက်တဲ့အခါ၊ ကျွန်တော်တို့ အဆုံးစွန် တွေးနိုင်တာထက် ကျော်လွန်အောင်မြင်ပြီး ကြီးမားတဲ့ဝမ်းမြောက်ခြင်းကို ခံစားရမယ်ဆိုတာ အာမခံချက်ရှိပါတယ်။ “ယေရှုခရစ်တော်နဲ့သူ့ရဲ့ဧဝံဂေလိအပေါ် ကျွန်တော်တို့ရဲ့အသက်တာကို အာရုံစိုက်လိုက်တဲ့အခါ၊ ကျွန်တော်တို့အသက်တာထဲမှာ ဘယ်လိုအရာတွေဖြစ်ဖြစ် မဖြစ်ဖြစ် ကျွန်တော်တို့က ဝမ်းမြောက်ခြင်းကို ခံစားနိုင်ပါတယ်”လို့ ဥက္ကဋ္ဌ နယ်လဆင်က သွန်သင်ခဲ့ပါတယ်။
သန့်ရှင်းသောဝိညာဉ်တော်က ကျွန်တော်တို့ကိုယ်စီကို၊ ကျွန်တော်တို့ရဲ့အသက်တာကို “ယေရှုခရစ်တော်နဲ့ ဧဝံဂေလိ” အပေါ်အာရုံစိုက်ဖို့ ဥက္ကဋ္ဌ နယ်လဆင်ရဲ့ ဖိတ်ခေါ်ချက်ကို လိုက်နာဖို့ကူညီပေးရန်ကျွန်တော်ဆုတောင်းပါတယ် ၊ အဲဒါမှသာ ကျွန်တော်တို့ရဲ့အသက်တာထဲမှာ ဘယ်လိုအရာတွေဖြစ်ဖြစ် မဖြစ်ဖြစ် ခရစ်တော်၌ ဝမ်းမြောက်ခြင်းကို ခံစားရမှာဖြစ်ပါတယ်။
ယေရှုခရစ်တော်နဲ့ သူ့ရဲ့ဧဝံဂေလိအပေါ် အာရုံစိုက်ပြီး သူတို့ရဲ့အသက်တာတွေကို ပြောင်းလဲပစ်ခဲ့တဲ့လူတွေရဲ့ မှတ်တမ်းတွေ မော်မုန်ကျမ်းထဲမှာ များစွာရှိပါတယ်။
အယ်လမာအငယ်ရဲ့ အကြောင်းကို စဉ်းစားကြည့်ပါ။ သူက ပုန်ကန်ပြီး အသင်းတော်ကို ဆန့်ကျင်တိုက်ခိုက်ခဲ့ပါတယ်။ ဖခင်ဖြစ်သူ၊ အယ်လမာက၊ အစာရှောင်ဆုတောင်းခဲ့ပါတယ်။ ကောင်းကင်တမန်တစ်ပါးပေါ်လာပြီး အယ်လမာအငယ်ကို နောင်တရဖို့ မိန့်ခဲ့ပါတယ်။ အဲဒီအချိန်မှာ၊ အယ်လမာက “အပြစ်စီရင်ခံရသော စိတ်ဝိညာဉ်၏နာကျင်မှုများ”ကို စတင်ခံစားခဲ့ရပါတယ်။ သူရဲ့အမှောင်မိုက်ဆုံးအချိန်တွေမှာ၊ လောကီသားတို့၏အပြစ်များအတွက် အပြစ်ဖြေခြင်းငှာ ခရစ်တော် ကြွလာမည်ဖြစ်ကြောင်း သူ့အဘရဲ့ သွန်သင်ခြင်းကို အောက်မေ့ခဲ့ပါတယ်။ သူ့ရဲ့စိတ်က အဲဒီအတွေးအပေါ်ဆုပ်ကိုင်ထားမိတဲ့အခါ၊ သူကဘုရားသခင်ရဲ့ ကရုဏာတော်ကို တောင်းလျှောက်ခဲ့ပါတယ်။ ဝမ်းမြောက်ခြင်းက အဖြေဖြစ်ခဲ့ပါတယ်၊ အလွန်ထူးကဲသော ဝမ်းမြောက်ခြင်းတစ်ခု ဟုသူက ဖော်ပြခဲ့ပါတယ်။ ကရုဏာတော်နဲ့ ဝမ်းမြောက်ခြင်းက အယ်လမာဆီကိုလာခဲ့ပါတယ်၊ ဘာကြောင့်လဲဆိုတော့ သူနဲ့ သူရဲ့အဘက ကယ်တင်ရှင်ကို အာရုံစိုက်ခဲ့တဲ့အတွက်ဖြစ်ပါတယ်။
ဧဝံဂေလိကနေ ကင်းကွာနေတဲ့သားသမီးများရဲ့ မိဘများခင်ဗျာ၊ မျှော်လင့်ခြင်းရှိကြပါ။ ကောင်းကင်တမန်က သင့်သားသမီးကို နောင်တရအောင် ဘာလို့လာမကူညီတာလဲဆိုပြီး သိချင်နေမယ့်အစား၊ ကိုယ်တော်ရှင်က သူ သို့မဟုတ် သူမရဲ့လမ်းကြောင်းမှာ သေခြင်းရှိရာဘဝနဲ့ကောင်းကင်တမန်ကို နေရာချထားတယ်ဆိုတာ နားလည်ပါ၊ သူတို့တွေကတော့ သင်းအုပ်တွေ ဒါမှမဟုတ် တခြားအသင်းတော်ခေါင်းဆောင်တွေ ဒါမှမဟုတ် အမှုတော်ဆောင်ညီအကို၊ ညီအမများဖြစ်ကြပါတယ်၊ သင်က ဆက်ပြီးအစာရှောင်မယ်၊ ဆက်ပြီးဆုတောင်းမယ်ဆိုရင်၊သင်က ဘုရားသခင်အတွက် အချိန်ဇယား ဒါမှမဟုတ် နောက်ဆုံးအချိန်ကို သတ်မှတ်မထားဘူးဆိုရင်၊ ကိုယ်တော်ရှင်က သူ့လက်တော်ကို ရှေ့သို့ဆန့်တန်းပြီး သင့်သားသမီးကို ကူညီမယ်ဆိုတာ ယုံကြည်မယ်ဆိုရင်၊ အနှေး နဲ့ အမြန်၊ သင့်ရင်သွေးကနားထောင်ဖို့ ရွေးချယ်မယ်ဆိုရင် ဘုရားသခင်က သူ့ရဲ့နှလုံးသားကိုတွေ့ထိတာကို သင်တွေ့မှာပါ။ အဲဒါကဘာကြောင့်လဲဆိုတော့ ခရစ်တော်က ဝမ်းမြောက်ခြင်းဖြစ်လို့ပါပဲ၊ ခရစ်တော်က မျှော်လင့်ခြင်းဖြစ်လို့ပါပဲ၊ သူက “နောင်လာမည့်ကောင်းမြတ်သောအရာများ၏ ကတိတော်ဖြစ်ပါတယ်။” အဲဒါကြောင့် သင့်ရဲ့သားသမီးနဲ့ ပတ်သက်ပြီး ယေရှုခရစ်တော်ကို ယုံကြည်ပါ၊ ဘာကြောင့်လဲဆိုတော့ သူက မိဘတိုင်း၊နဲ့ သားသမီးတိုင်းအတွက်ခွန်အားဖြစ်လို့ပါပဲ။
ခရစ်တော်၌ ဝမ်းမြောက်ခြင်းကို ခံစားမိတာနဲ့တစ်ပြိုင်နက်၊ အယ်လမာအငယ်က အဲဒီဝမ်းမြောက်ခြင်းနဲ့ပဲ နေထိုင်သွားခဲ့ပါတယ်။ သို့သော် သူက အခက်အခဲနဲ့စုံစမ်းခံရခြင်းများရှိသော်လည်း အဲဒီဝမ်းမြောက်ခြင်းကို ဘယ်လိုထိန်းသိမ်းခဲ့ပါသလဲ။ သူ က ပြောခဲ့ပါတယ်၊
“ထိုမှတစ်ပါး၊ ယင်းအချိန်မှစ၍ ယခုအထိတိုင်အောင်ပင်၊ ငါသည် မရပ်မနားဘဲအလုပ်လုပ်လေသည်ကား၊ လူတို့ကို နောင်တရခြင်းသို့ ဆောင်ယူနိုင်စေကြောင်း၊ ငါတွေ့ကြုံခဲ့သည့် အလွန်ဝမ်းမြောက်ခြင်းကို ကြုံစေရန် သူတို့ကိုဆောင်ယူနိုင်စေကြောင်းပေတည်း။ …
“ကိုယ်တော်ရှင်သည် ငါ့အား ငါ့လုပ်အား၏ အသီးအပွင့်၌ အလွန်ကြီးစွာသောဝမ်းမြောက်ခြင်းကို ပေးတော်မူ၏။ …
“ငါသည် စုံစမ်းခံရခြင်းများနှင့် ဒုက္ခအမျိုးမျိုးရှိစဉ်၌ ထောက်မတော်မူခြင်းကို ရလေပြီ။”
အယ်လမာက ခရစ်တော်၌ ယုံကြည်ခြင်းကို လိုက်နာကျင့်သုံးပြီး ကရုဏာတော်တောင်းလျှောက်တဲ့အခါ ခရစ်တော်၌ ဝမ်းမြောက်ခြင်းက စတင်ခဲ့ပါတယ်။ အဲဒီနောက်မှာတော့ အယ်လမာက တူညီသောဝမ်းမြောက်ခြင်းကို တစ်ပါးသူများခံစားနိုင်ဖို့အတွက် ခရစ်တော်၌ သူရဲ့ယုံကြည်ခြင်းကို လိုက်နာကျင့်သုံးခဲ့ပါတယ်။ စုံစမ်းခံရခြင်းများနှင့် ဒုက္ခအမျိုးမျိုးများရှိစဉ်၌ပင်၊ အဲလိုဆက်လက်အလုပ်လုပ်ခြင်းက အယ်လမာ၌ ကြီးစွာသောဝမ်းမြောက်ခြင်းကို ဖြစ်စေပါတယ်။ သင်တွေ့ပါလိမ့်မယ်၊ “ကိုယ်တော်ရှင်က အားထုတ်မှုကို နှစ်သက်ပါတယ်၊” သူ့ကို အာရုံစိုက်တဲ့ အားထုတ်မှုက ကောင်းချီးတွေ ဆောင်ကြဉ်းပေးပါတယ်။ ပြင်းထန်သော စုံစမ်းခံရခြင်းများပင်လျှင် “ခရစ်တော်၌ ဝမ်းမြောက်ခြင်းဖြင့် လွှမ်းမိုးခံရလေသည်”။
ယေရှုခရစ်တော်နဲ့သူရဲ့ဧဝံဂေလိကို သူတို့ဘဝရဲ့ အာရုံစိုက်ရာအဖြစ် ထားပြီး ဝမ်းမြောက်ခြင်းကို ရှာတွေ့ခဲ့တဲ့ မော်မုန်ကျမ်းထဲက တခြားလူမျိုးစုတစ်စုကတော့ ဟေလမ်မြို့ကို တည်ထောင်ခဲ့တဲ့ သူတွေပဲဖြစ်ပါတယ်—သူတို့ရဲ့ကလေးတွေကို ပျိုးထောင်နိုင်ပြီး သာသာတရားလွတ်လပ်စွာကိုးကွယ်ခွင့်ရှိတဲ့နေရာဖြစ်ပါတယ်။ သူတို့တွေက ကောင်းမှုတွေပြုကြတဲ့ ဖြောင့်မတ်သောလူမျိုးတွေဖြစ်ပါတယ်၊ သူတို့က လှည့်လည်သောင်းကျန်းနေတဲ့အဖွဲ့ရဲ့ ကျွန်ပြုခြင်းကိုခံရပြီး အခြေခံလူ့အခွင့်အရေးဖြစ်တဲ့ သူတို့ရဲ့ဘာသာတရားကျင့်သုံးခွင့် ဆုံးရှုံးခဲ့ရပါတယ်။ တစ်ခါတစ်ရံ လူကောင်းတွေက မကောင်းတာတွေလည်း ကြုံတတ်ပါတယ်၊
“ကိုယ်တော်ရှင်သည် မိမိလူတို့ကို ဆုံးမရန် သင့်လျော်သည်ဟု ဆင်ခြင်တော်မူ၏။ ထိုမှတစ်ပါး၊ သူတို့၏သည်းခံခြင်းနှင့် သူတို့၏ယုံကြည်ခြင်းကို စမ်းသပ်တော်မူ၏။
“အဘယ်သို့ပင်ဖြစ်စေ—သူ့ကို ကိုးစားသူမှန်သမျှသည် နောက်ဆုံးသောနေ့၌ ချီးမြှောက်တော်မူခြင်းခံရလိမ့်မည်။ အမှန်စင်စစ်၊ ထိုကဲ့သို့ဖြစ်လေသည်ကား၊ ဤလူမျိုးတို့နှင့် စပ်လျဉ်းသည့်အမှုဖြစ်၏။”
ဒီလူမျိုးတွေက သူတို့ရဲ့စမ်းသပ်ခံရခြင်းတွေနဲ့ နာကျင်ခြင်းတွေကို ဘယ်လိုကြံ့ကြံ့ခံခဲ့တာပါလဲ။ ခရစ်တော်နဲ့ သူ့ရဲ့ဧဝံဂေလိကို အာရုံစိုက်ခြင်းဖြင့် ဖြစ်ပါတယ်။ သူတို့ရဲ့ ဒုက္ခတွေက သူတို့ကို သတ်မှတ်ထားတာမဟုတ်ပါဘူး၊ အဲဒီအစား သူတို့ကိုယ်စီက ဘုရားသခင်ကို ကိုးစားကြပါတယ်၊သူတို့က ကိုယ့်ကိုကိုယ် ဘုရားသခင်ရဲ့သားသမီးတစ်ဦးအဖြစ်၊ ပဋိညာဉ်သားသမီးတစ်ဦးအဖြစ်၊ ယေရှုခရစ်တော်၏ တပည့်တော်တစ်ပါးအဖြစ် မြင်ကြလို့ပဲဖြစ်ပါတယ်။ သူတို့က မည်သူဖြစ်ကြောင်း သတိရပြီး ဘုရားသခင်ကို တောင်းလျှောက်တဲ့အခါ၊ ငြိမ်သက်ခြင်း၊ ခွန်အားနှင့် ခရစ်တော်၌ အဆုံးစွန်သော ဝမ်းမြောက်ခြင်းတို့ကို ရရှိခဲ့ပါတယ်။
“အယ်လမာနှင့် သူ၏လူတို့သည်လည်း စိတ်နှလုံးကို [ဘုရားသခင်]ထံသို့ သွန်းလောင်းကြ၏။ သူသည်လည်း ထိုသူတို့စိတ်နှလုံး၏ အတွေးအကြံများကို သိ၏။
“ဤသို့အားဖြင့်အချိန်တန်လာသောအခါ၊ ကိုယ်တော်ရှင်၏အသံသည် သူတို့ဆင်းရဲဒုက္ခများဖြစ်နေချိန်၌ ရောက်လာပြီး၊ မိန့်တော်မူလေသည်ကား၊ သင်တို့၏ဦးခေါင်းကို မော့၍၊ ကောင်းစွာစိတ်သက်သာခြင်းရှိလော့။ အကြောင်းမူကား၊ ငါ့ထံ သင်တို့ပြုထားလေသော ပဋိညာဉ်ကို ငါသိတော်မူ၏။ ထို့အတူ၊ ငါသည် ငါ၏လူမျိုးတို့နှင့် ပဋိညာဉ်ပြု၍၊ သူတို့ကို ကျွန်ခံရာမှ ကယ်လွှတ်တော်မူမည်။”
တုံ့ပြန်သောအားဖြင့်၊ ကိုယ်တော်ရှင်က “[သူတို့၏] ၏ပခုံးပေါ်၌ တင်ထားသော ဝန်များကိုလည်း ပေါ့စေတော်မူပါသည်။ … အထူးသဖြင့်၊ ကိုယ်တော်ရှင်သည် သူတို့ကို ခွန်အားဖြည့်ပေးတော်မူ၍၊ သူတို့သည် မိမိတို့၏ဝန်များကို လွယ်ကူစွာဖြင့် သယ်ဆောင်နိုင်၍၊ ကိုယ်တော်ရှင်၏အလိုတော်အလုံးစုံတို့ကို သာယာသောစိတ်နှင့်သည်းခံခြင်းတို့ဖြင့် လိုက်နာကြ၏။” ထိုသန့်ရှင်းသူများသည် သူတို့၏ဒုက္ခများ၊ နာကျင်ခြင်းများ နဲ့ စုံစမ်းခံရခြင်းများကို ခရစ်တော်၌ ဝမ်းမြောက်ခြင်းဖြင့် လွှမ်းမိုးခံခဲ့ရကြောင်းမှတ်သားထားပါ။ ထို့နောက်၊ သင့်တော်သည့်အချိန်တွင်၊ ကိုယ်တော်သည် အယ်လမာအား လွတ်မြောက်နိုင်မည့်လမ်းကို ပြခဲ့ပြီး ဘုရားသခင်၏ပရောဖက်ဖြစ်သူ အယ်လမာက ၎င်းတို့ကို ဘေးကင်းရာသို့ ပို့ဆောင်ခဲ့ပါတယ်။
ခရစ်တော်နဲ့ သူ့ရဲ့ပရောဖက်ကို ကျွန်တော်တို့အာရုံစိုက်တာနဲ့အမျှ၊ ကျွန်တော်တို့တွေက ခရစ်တော်နဲ့ သူ၏ဧဝံဂေလိ၌ ဝမ်းမြောက်ခြင်းကို ခံစားရမှာဖြစ်ပါတယ်။ ဥက္ကဋ္ဌ ရပ်ဆဲလ် အမ်၊ နယ်လဆင် သွန်သင်ခဲ့ပါတယ်၊ “ဝမ်းမြောက်ခြင်းက တန်ခိုးကြီးပြီး၊ ဝမ်းမြောက်ခြင်းကို အာရုံစိုက်ခြင်းက ကျွန်တော်တို့ အသက်တာတွေထဲကို ဘုရားသခင်ရဲ့တန်ခိုးတော် ဆောင်ကြဉ်းပေးပါတယ်။ ခပ်သိမ်းသောအရာတို့တွင်၊ ယေရှုခရစ်တော်က ကျွန်တော်တို့ရဲ့ အဆုံးစွန်သော ပုံဥပမာဆောင်သူဖြစ်ပြီး ‘ကားတိုင်၌ ဝေဒနာမခံစားရမီတွင် သူ့အတွက် ဝမ်းမြောက်ခြင်းကို ပြင်ဆင်ပေးပြီးဖြစ်ပါတယ်။”[ဟေဗြဲ ၁၂:၂]။”
ကျွန်တော်တို့ရဲ့အမေက မကြာသေးခင်က ကွယ်လွန်သွားခဲ့ပြီး၊ အဲဒါက ထိတ်လန့်မှုတစ်ခုဖြစ်ခဲ့ပါတယ်။ ကျွန်တော့်အမေကို ကျွန်တော်ချစ်ပါတယ်၊ ပြီးတော့သူမကို ငယ်ငယ်ရွယ်ရွယ်နဲ့ ဆုံးရှုံးဖို့ အစီအစဉ်မရှိခဲ့ပါဘူး။ ဒါပေမယ့် သူမရဲ့ ကွယ်လွန်ခြင်းအဖြစ်အပျက်ကနေတဆင့်၊ ကျွန်တော့်မိသားစုနဲ့ ကျွန်တော်ကဝမ်းနည်းခြင်းနဲ့ ဝမ်းမြောက်ခြင်း နှစ်ခုစလုံးကိုခံစားခဲ့ရပါတယ်။ ကိုယ်တော့်ကြောင့်၊ သူမ မသေကြောင်း၊ ကျွန်တော်သိပါတယ်၊ သူမက အသက်ရှင်ပါတယ်။ ခရစ်တော်နဲ့ ပရောဖက်ဂျိုးဇက်စမစ်အားဖြင့် ပြန်လည်ဆောင်ယူတဲ့ ယဇ်ပုရောဟိတ်အခွင့်သော့တွေကြောင့်၊ ကျွန်တော်က တစ်နေ့မှာ သူမနဲ့ဆုံစည်းရမယ်ဆိုတာ သိပါတယ်။ ကျွန်တော့်အမေကို ဆုံးရှုံးလိုက်ရတဲ့ ဝမ်းနည်းမှုက ခရစ်တော်၌ ဝမ်းမြောက်ခြင်းဖြင့် လွှမ်းမိုးခံခဲ့ရပါတယ်။ ဆီလက်ရှယ်လ်ကို စဉ်းစားဖို့” နဲ့ “ဘုရားသခင်အားအောင်နိုင်ခွင့်ပေး” ဖို့ ဆိုတဲ့ စကားစုတွေမှာ ခရစ်တော်၌ ရနိုင်တဲ့ ဝမ်းမြောက်ခြင်းကို အာရုံစိုက်ဖို့ ပါဝင်ကြောင်း ကျွန်တော်သင်ယူခဲ့ရပါတယ်။
သူက ချစ်ခင်စွာဖြင့် ဖိတ်ခေါ်ပါတယ်၊ “ဝန်လေး၍ပင်ပန်းသူအပေါင်းတို့ ငါ့ထံသို့လာကြလော့၊ ငါသည်ချမ်းသာပေးမည်။” ယေရှုခရစ်တော်၏နာမတော်အားဖြင့်၊ အာမင်။