Rongorongo ni Kakawari n Reirei

Riiki Bwa Te Bwai ni Mwakuri Ni Bain te Atua man Kataneiakim n te Bwai ae Mimitong

Tataromwaaka n rinei ao ni wareware man te rongorongo aei taian koroboki aika tabu ao taian reirei ake a na buoka kainanoia aine ake ko kawariia. Tibwauaia ma ngaia am atatai ao am kakoaua. Kaoia naake ko reireiniia bwa ana karaoa naba te bwai are ko karaoia.

Tera te Kataneiai n te Bwai ae Mimitong?

Beretitenti James E. Faust, Kauoman ni Kauntira n te Moan Beretitentii: “Te Mimitong bon ngaia korakoran te aomata. E reke man te onimaki ao rinanon te ongotaeka nakon ana tua ao ana otenanti te Atua. E kaitiaka te nano man te onimaki te Atua, ao te nano e a kaitiakaki man mwakuri aika aki itiaki ao aika aki kororaoi. Ngkana e koro nanon te mimitongi man irakin ana kantaninga ni kabane te Atua, ao ko kona n namakina te bwai ae bure… .

“… Ti ria n nakon te tembora, irarikin bukina riki tabeua, ni kawakina oin mimitongira ao ara utu.

“Irarikin te tembora, ao iai riki te tabo teuana n te aonaaba ae riai ni mimitong bwa bon mweengara… .

“… E na kakabwaiaira te Uea ni katabeakira ni ukoukora te mimitong nakon te Uea ngkana ti tei n taabo aika tabu. Anne te tabo are ti kona iai ni kunea katanan tamneira are ti kainnaoia ibon ibukira ao ara utu” (“Standing in Holy Places,” Riaona, Meei 2005, 62, 67–68).

Unimwane Dieter F. Uchtdorf kaain te Kooram n te Tengaun ma Uoman n Abotoro: “Karikirakean anuan Kristo ni maiura tiaki te mwakuri ae bebete… . Ti na kunea bwa ti a tia ni karikirakea iroura anuan maiun Kristo ngkana a nooraki anuan Kristo i nanon maiura—ngkana ngaira bu mwane ao bu aine, ngkana te karo ke te tina, ngkana naati mwaane ao aine, n ara iraorao, n ara mwakuri, n ara bitineti, ao n ara kakakibotu. Ti kona ni kinai rikirakera, ao kaain rarikira naba, ngkana ti tabe ni karikirakea ara konabwai ni ‘mwakuri ma te mimitong [i Matana]’ (D&C 43:9)” (“Christlike Attributes—the Wind beneath Our Wings,” Riaona, Nobembwa. 2005, 102).

N na kanga ni kataneiaai ni karaoa ae Mimitong ao N riki bwa te Bwai ni mwakuri Ni Bain te Atua?

Kathleen H. Hughes, moan kauntira man te beretitentii ni kabuta n Aia Bootaki Aine: “Antai mai ibuakora ae aki kan nabeakinaki, n tararuaki, ni karauaki nanona, ao man reiakinaki ni bwaai mairoun te Atua? E na kanga n riki? Teuana te akoi, teuana kaotan te tangira, teuana te mwannano, ao teuana te bwai ni ibuobuoki n te tai teuana. Ma e aki kaineti au rongorongo nakoia naake a karekea te mwakuri n tangira ma bon nakoira ngaira aikai ni kabane ake ti na kataneiaira ni karaoa te mwakuri ae mimitong ni katoa bong. Ngkana ti kan riki n ai aron Iesu Kristo, e reirei te Burabeti Iotebwa Timiti, ‘ko riai n ribanai namakin ibukin te tangira ae koaua’” (“That We May All Sit Down in Heaven Together,” Liahona, Nobembwa. 2005, 110).

Bonnie D. Parkin, te beretitenti ni kabuta n te Bootaki n Aine: “Berita aika tabu—ke berita aika kamatoaki imarenara ma Tamara are i Karawa—a kainnanoaki ibukin te rikirake are akea tokina. Te rangata-ma te rangata, E reireiniira bwa ti na riki n ai Arona ma ni karini arara n Ana mwakuri. N te bwabetito ao ti berita bwa ti na Tangiria ma nanora ni kabane man tangiriia tarira ao mwanera n aron tangirara ibon iroura. Ti berita riki n te tembora bwa ti na ongotaeka, ti na aki ti tabeakiniira, kakaonimaki, karinerine, tangira. Ti berita bwa ti na karaoi mwakuri n anga nano ao n anga ara bwai ake i nanon baira… .

“E a tia te Uea ni weteira bwa ti na karaoi bwaai ni kabane ake ti karaoi ma te ‘te nano ae mimitong’ [D&C 46:7]. Ao te mimitong bon mwiin maiuakinan ara berita… . Te Mimitong e kariki taeka aika ‘Aio Ngai; kanakoai’ ” (“With Holiness of Heart,” Riaona, Nobembwa 2002, 103, 105).