Anaia Ataei Mai Nanon te Ran!
Bon te bong ae tamaroa inanon Tuun 2003. I buti n te kaa ma natiu aika niman man mweengara i Logan, Utah, nako Bear Lake nakoia ana utu mwaaneu. E mena aia maeka ti tabeua te miniti raroana n te nakonako man te nei, ao imwin te marooro teutana ma ngaia ao I a iangoia bwa N na kairia natiu ma ai taria ake uoman, Kami ao Erin, nakoni bikena bwa ti na takakaro.
E bon abue te ran mai mataniwi, ao e karekare te ang ae bebete ngke I a tekateka iaon te kaintekateka, ni wareware ao ni motirawa. I taratara nako n tara te nei ao I a noora Kami bwa tao ai 50 te iaati (46 miita) mai mataniwin te bike, ni beibeti iaon te rabwa ae rangi ni beti. Ibukina bwa te nei e rangi ni marawa n aki raroa mai mataniwin te bike, I anoanoia man weteia bwa e na kania riki, ma a bon aki kona n ongo bwanau man te raroa arei.
Kanga n taai akanne ao I a moanna n aki rau ao I ongo ana wirikiriki te Tamnei bwa a riai ataei ni kitana te ran. I a weteia bwa a na kania riki mataniwin te bike, ao e ngae ngke aki bati ni kukurei a kekerake riki nakoiu. N te tai ae karina e roko man nene ao ni matata ana wirikiriki te Tamnei , “Anaia ataei mai nanon te ran!” I a rairaki n tarai taian maunga ake iakura ao I noora te nang ae roro ae a bwarikoriko. E kia te iti ae korakora i aan nang.
I takarua “Kitana nanon te ran,” I biri nakon Kami ae beibeti tao 75 te iati (68 miita) mani mataniwin te ran, man takarua riki “E a roko te iti!” N te tai naba anne ao e a oroira te ang ae baibati. Natiu te mwaane ae waniua-ana-ririki, Dallin, e kataia ni uota te rabwa ni beibeti mai nanon te ran, ma e oreaki n te ang n aron te ie ao e bwaka nako aon tano.
I kataia ni karekea Kami n aron au kabanea ni kona, ma e a bon uotaki nako n te ang ni kararoaki iaon te ran. Bon tiaki ngai te tia uaua ae korakora, ao ma taian nao ake a ririeta irarikiu, I keiaki n nakonako inanon te ran. I kona n noori rangana ae kamatoai n toutou te ran ngkana e rarikiriki iaon ana bwai ni beibeti, ma aei e bon uarereke nakon te ang ae baibati are e kaitara. E bon reitinako ni uotaki nako nakon are e marawa.
E a rikirake ni marawa riki te ran ngke I tabe n nakonako nakon are inano riki, ni karokoa ae e a roki I angau. Imwina ao waeu a roko ni katatin te nei inano. I a bon riai n toki ikai, ma ai bon ti 20 te iaati (18 m) raroau mairoun Kami. I kauka wiiu n takarua nakoina, ma n nakon nanou bon akea bwanau ae otinako. N tokina ngke e nako, bon te bono ni ike ni bwana. Boni ngkanne naba ae I a namakinna ae rangi ni mwaitoro te ran n te raroa aio. I namakinna ae I a rootaki n te kamwaitorotoro. I a bon aki kona naba n oki. Ti nang bon uaia ni bwabwa.
N te tai anne, I kabongana nikiran korakorau are tiku inanou, ao I takarua bwa e na ongo Kami au taeka man ataia ae I a tataro. “Tamara are i Karawa, taiaoka buokira ni karekea te korakora bwa ti na karaoa aei.” Inanon te tai ae waekoa I namakina te kabuebuea ae biri inanon rabwatau, ao e a manga oki korakorau. E a moanna n itiaki bwanau ao ni korakora, ao I a wetea neiei, “Kami, buuru ma baim!” Bain neiei ake ai tiba 10-ana-ririki a buuru n aron bain te kamea n uaua i moan te bwai ni beibeti. E bon aki korakora neiei ni kaitara korakoran te ang ae kakamaku aei, ma titebo ma iai te bai ae aintoa ae mena iakuna, ae karaurau ni kabutarake neiei nakon baiu are I aroria nakoina. I reitinako n takaruai taeka ni kaunga ni karokoa ae a kaitibo tabonibaira, ao n te tai anne I ataia bwa ngkai Tamara are i Karawa e bon uota neiei nakoiu, ti na bon tokanikai.
Iaon te bike e a bon tang Dallin bwa e a taerieri n te tano man te ang ae korakora. E a bon bane korakorau n anaia, n anaia naba ataei ake tabeman, ma bwaai ni beibeti ma bwaai n takakaro nako nanon te kaa. Ti a kona n ongo tangin te buu ni kaota te kangaanga man te tabo ae raroa, ni kaotia ae aura te ai iaon te tabuki mai mwin te iti. E tara n reitanako aron te nakonnano n te kangaanga n te tai arei, ma ti bon ataia ae ti a tia ni kamanoaki man te ibuobuoki mai karawa.
I tuangia ataei te bwai are e a tia n riki itinaniku inanon te ran, ao n te tai naba are ti roko iai n te auti ti bon anga ara tataro ni kaitau n aron Ana waaki ni kamanoi maiura. Ngke ti karaoa aei, I namakina korakoran ana tangira Tamara are i Karawa. I ataia bwa E bon mwannanoia natina, ao
I rangi ni kakaitau bwa E bon mena irarikira n te bong anne.