Tao N na Manga Kona n Taetae?
I boni mwakuri ni mitinare n oin abau ae Peru inanon tabeua namakaina ngke I a kaitibo ma Santiago. E ira te Reirei n Taabati ibukia kaain te aro ake a boou, ma e tuai ni bwabetitoaki. E tuai naba ni maroro ma mitinare. I ataia ae iai baebaen ana taetae n te aro are kanga e aki rau nanona ni kangaangan ana reitaki.
N angin maiuna, e a bon tia Santiago ni kona n taetae raoi ao ni kakabwaiaki naba ma bwanana ae moan te tangiraoi n te anene. Ma imwina e taonaki n te bo. Imwin tikuna ni maan n te tabo ni kamarurung, e a tia n reireinna ni manga nakonako, ma e teimatoa ni iai ana kangaanga n taetae.
Ti bon rangi ni kukurei ngke e iangoia Santiago bwa e na marooro ma ngaira. Inanon ara moan tai ni kawaria, e bon kataia n taetae, ao ti bon kataia ni kaotaira n ana taetae. Teuaei e kukurei ni wareka Ana Boki Moomon n takarua. Ti bon tangiria ao ti kamoamoa.
N te bong teuana ngke ti maroroakin otenanti n te euangkerio, e a taekinna Santiago bwa e a tauraoi ibukin te bwabetito ao te kamatoaki. Imwin ae a bane ana reirei, e teirake, ma matana aika raneanea, ao ma te keiaki ae korakora e a titiraki, “Unimwaane, ngkana I a tia ni bwabetitoki, e na kona ni manga oki aron taetaeu?”
I bon rangi ni miimi ao I aki ataa te bwai ae n na taekinna inanon tabeua te tai ao I aki kona ni kaeka. Ma I kaeka iaan ana kairiiri te Tamnei, ao I taetae ma te onmaki, “Eng, ngkana iai am onimaki ae tau, e na anganiko te Uea kaekan ae ko tangiria.”
N te bong are e bwabetitoaki iai, I a uringa ana titiraki Santiago ngke e tuangaki bwa e na kaota ana koaua. N atakina bwa tabeua ana berita te Uea aki kona ni koro bukia ngkai naba, I a moanna n raraoma ngkana e a bwara nanon Santiago ibukin aki waekoan okin ana konabwai n taetae. Inanon boong ake imwina, e bon keiaki n taetae, ao e tara n ae aki tabe iai.
I a bon kamwaeweaki man aki manga noora Santiago ni karokoa tokin au mwakuri ni mitinare, ma I nakoina ni kabo ma ngaia imwain ae I a okira mweengau. Ngai ma toau ti bon aki kunea ni mweengana ao ti a moanna ni kitanna, ngke ti a karina n ongo te bwana ae korakora ae weweteira. Ai bon Santiago!
Ti rin inanon ana auti, ao e a taekina aron kukureina ngkai e kona ni kaaina te Ekaretia. Imwin tabeua te miniti ao I a moanna n ataia ae e bon taetae n te aro ae raoiroi. I a taku, ma te miimi, “Santiago, ko a taetae raoi ngkai!”
E taku bwa e ataia ae te Uea e na bon kaeka ana kantaninga. Ngaia are e kaota ana onimaki ao ni karaoa tibwangana, ni wareware n takarua man Ana Boki Moomon ao ni karaoi kamarurung ake e baireia nakoina ana taokita. “E a tia te Uea n noora aron au kekeiaki ao e a tia n anganai bwanau,” e taekina aei. “Ao e na bon aki maan ao e na kakabwaiai ma te konabwai ni manga kona n anene.”
I aki kona n taui ranni matau. N te bong anne ao Santiago e a tia n reireinai te reirei ae moan te kakawaki. Ana berita nako te Uea a bon aki kona ni kakoroaki nanoia n te tai ae waekoa, ma e ngae ngke tera a na bon kakoroaki nanoia.