Taeka Tabeua

Te Rongorongo ibukin Tamau

Te Riaona n Tebetembwa 2006 e bon raka arona. I ataia bwa Beretitenti James E. Faust e bon kairaki raoi iroun te Tamnei ni korean ana rongorongo “The Father Who Cares.” E bon tara n ae e kaineti nakon au utu ao ai moara riki bon ngai. Iai ataei aika onoman inanon au utu, ao e a tia ni bua tinara. Imwin warekan te rongorongo, I aki tataninga ni manga angan tamau, are e a moanna n aki kakaonimaki. I ataia ae n na kakorakoraki iai.

Tshibasu M. E. Baron, Democratic Republic of the Congo

Te Banna ni Babaire ibukin Maiu

N te tairiki teuana ao I wareka te Riaona ibukin Tianuare 2006. Ana koroboki Beretitenti Gordon B. Hinckley inanon Nakomai Ongora nakon Bwanan te Burabeti, ae atuunaki n ae kangai “Walk the High Road,” e a bon katika nanou n te tai naba arei. Ao ngke I a wareka te rongorongo are moan te kaunganano aei, taian taeka ni kabane a bon kamataatai raoi bwaai ni kabane nakoiu. E a bon riki bwa te banna ni babaire nakoiu ae N na iria inanon mwanangau n au tai ni maiu.

Coleen Emily G. Mabilog, Philippines

E a Reirei te Mitinare

N te tai are I a okira te iuniwetiri imwin au mition, I a kunea bwa bwain te reirei a bon tara ni matoatoa ibukiu. Ngkai ngai te ataei ae I kaaina te koraki ibukin rabwakau aika boou ao te warebwai n te numera, I a tara n ae I a tia ni mwaninga te moan waaki n atatai ibukin te chemistry, physics, ao te mathematics mai mwiin au mition. E ngae ngke moan okiu nakon te iuniwetiri e bon kangaanga, bwaai ake I a tia n reiakin inanon au mition—n aron te kakaei ibukin karekean te kaeka—e anganai te kakorakoraki n au waaki n au tai ni kamatebwai n te reirei. I bon kukurei bwa I karimoa riki te Uea inanon maiu ao n nakou ni mwakuri ni mitinare. Te rongorongo ae “On the Lord’s Team,” iroun R. Val Johnson inanon te Riaona ni Maati 2006, e a bon kamatoai taian namakin aikai.

Aristotle Kyeremanteng Fokuo, Ghana

Kauringaaki ni Kainnanoia Tabeman

I taku n au iango bwa te Riaona n Okitobwa 2006 bon teuana ae moan te tamaroa n tia ni boretiaki. I ataia ae a mwaiti aomata ake a ukoukora taekan te Ekaretia ao ake a tia n namakinna bwa te boki aei e bon taetae nakoia. I a tia ni kaaina te Ekaretia inanon ririki aika mwaiti. I kunea bwa kaain te ekaretia ake a maan a kona ni mataki ibukin taian raraoma, taian maaku, ao kainnanoia naake a tiba kaaina te Ekaretia ke naake iaon kawaia ni kaaina. E a kauringai aia kainnano n te Riaona n Okitobwa.

Volker P. Gebhard, Germany

Taian Kamataata aika Koaua

I bon rangi n tekeraoi ngke I a kaitibo ma mitinare man ami ekaretia. Te karabwarabwa nakoia ataeinimwaane aikai, bwa I moanna ni kina iai te Riaona. Bon te maekatiin ae moan te kamiimi! E bon anga te taratara ae bwanin ibukin ana mition ao moan tuua ibukin ami ekaretia. E marooroakin kangaanga ma n reitaki ma aron katokaia. E bon taekina naba aron tein kawain te ekaretia nakon taai aika a na roko.

I wareka te rongorongo ae “The Fall of Adam and Eve” inanon te Riaona n Tuun 2006. I tangiria ni kaitauko ibukin kaotan koauan ana waaki tinara ae te moan tina, Ewa, ao ibukin aki kuami ni kakaei kamataata ibukin bwaai aika kamangaongao ake a riki mani kaotaki inanon te euangkerio.

Alla R. Muriseva, Russia