I a Uringia ngkoa Taian Bwaeoniia
Ngke 19 au ririki ao I weteaki bwa N na rin n ana taanga ni buaka Sweden. N nakoau ae te tia karekea te itoman imarenaia taani kairiiri n taiani kati ake a bubura, I beku bwa te tia mwakuri inanon te ka Waniua ni Kambwana, ae te botaki ae kaira te waki.
N te aoa 4:00 n te ingabong teuana n Tianuare, ara aobitia a tuangira bwa ti na katokai ara kunnikai ma ara bwai ni buaka ni kabane ao ni ikotaki itinaniku inanon 20 te miniti. Ni kua man baki mai mwiin te waaki n te bong are imwaina, I namakinna ae kanga I a bon tiba matu, ao ngkai I a manga katauraoi naba ni kaaitara te kataneiai ae boou. I bon teimatoa ni uringa aron namakinana, n otinakou man kabuebuen ara auti ni matu nakon te kamwaitoro ae aki kona ni kabotauaki.
E roko te bwati ae bubura ae aia bwati tautia ni uotira, ao ti a tuangaki bwa ti na nako Stockholm ibukin te tutuo ae bubura bwa ti nang nooraki ngkana ti na bwaati ibukin reitakin ara kataneiai. N rokora n te kawa ae bubura anne, ti bwenauaki nakon teniua te kurubu, ma taian mabe aika kakaokoro ao tokin kawaira ae uamaenako.
Ti rianna inanon kawain Stockholm, n tauraoi ma bwaai ni buaka, kanoan kati, ao bwaai riki tabeua. Ni katoai taabo n tutuo ao ti tangiraki bwa ti na karaoi tutuo ibukin kataan korakoran rabwatara, n aron te reitaki ma taan ioawa ngkana a taua temanna, te buaka inanon kawain te kaawa, te biri rinanoni mwarua ma taian auti, ao bwain aorakian ae ikoaki. Imwin karaoan taian tutuo ao e kuri n aki reke katokan kuuara bwa ti a manga mananga naba nakon te tabo n tutuo are imwina.
Korakoran mwaitoron te kawai e roota waeu ao aikoa namakinaba, ao a kairikamate tabonangau man rawawatan bwaai ni buaka. Ma I keiaki ni waaki nako man aki ngurengure. Ti rinanon te angibuaka ae korakora ma katakira aika kangaanga, ma ti bon teimatoa ni mwaati n aroia taari. Inanon touan kawaira, ti aitara ma kaain te kaawa aika a miimi man ngare, ni kotokotoira n tabonibaia, ao n tatakarua nakoira.
I kua, I mariiri, I barekareka, ao I nimarakiraki ngke ti a roko n tokin kawaira are e anaira iai te bwati. Inanon kawaira n okira ara tabo, I a uringi taian kakatai ake I a tia n rinanona ma raou ni buaka, ao I titirakinai ngkana te kataneiai aei e materaoi irarikin te katoka meetera n tokin te waaki. I bon titirakinai ngkana iai riki tabeman irarikira ake a tia naba n rinanon te kakatai are ti a tia ni karaoia n te bong anne.
Ngkanne, e reke Irou iangoan te karawawataki ao te korakai irouia taian bwaeaonia inanon moan bongin waakinan te Ekaretia. I kauringi karaki ibukin bakiia, maririia, ao marakia; aroia ni kaenaenaaki; ao n nakonako ni maaire aika akea tokiia—ai bon titebo ma bwaai ake I rinanoi n te bong anne. Te kaokoro ae korakora bwa I bon ti keiakina aio inanon ti teuana te bong. Taian bwaeaonia a mwananga inanon te kamwaitoro ao te tino, te karau ao te kabuebue, n nakonako rinanon te bokaboka ao te bubu. A mwananga ma ti tabeua aia bwai ibukin kamanoaia, ma ti te onimaki bwa e na kamanoia te Uea. A nakonako bwaeaonia ni kakaea Tion ibukina bwa iai ana mwakuri te Uea ae moan te kamiimi nakoia kaain te ekaretia aikai ae a na karaoia.
Ngkanne, n aki iango, I a moanna naba n anenea “Waaki Ngkami” (Anene n taromauri, no. 30), ao ikanne iaon te bwati are I a moanna n namakina te bitaki inanou. E a biri inanou namakinan te kukurei ae moan te korakora. I bon aki kakaonimaki nakon te Ekaretia n te tai anne ao I taku bwa N na bon aki kona n oki, ma n te tai ae karina e roko irou te namakin ae kangai, “Oki nakon te ekaretia.”
Ngke I a roko n te kaawa ni buaka, I tareboonia au karo ao I tuangia ae I tangiriia ao I a kan oki nakon te ekaretia. Te Taabati are imwina bon te kakatai ae korakora nakoiu n nooran te ninikoria n oki ibukina bwa I a bon maan ni kitana te aro. Te bwai ae aki bebete te oki, ma e bon kakawaki. A buokai ni butimwaeai n okiu au utu ao tabeman kaain te ekaretia.
I a moana au katauraoi nakon te mwakuri ni mitinare ao uoua te ririki imwina ao I a karekea weteakiu nakon te mition ni mwakuri i Cape Verde Praia Mition. Ngke I a roko i Salt Lake City iaon kawaiu nakon te Tienta ni Kataneiai ibukiia Mitinare, I a noora te mwakuri ae moan te kamiimi ake a tia ni karaoaki irouia taian bwaeaonia ae katean te tembora ae moan te tikiraoi ao bairean raoi aron katean te kaawa ae bubura man tara raoi. I wirikiriki ao I taku, “Kam rabwa.”
N te bong aei, ngkana I titirakinai bwa te kakatai n te tautia arei iai bongana, I kaeka n taku bwa e bon bongana, n arona ni kabane, ibukina bwa n te tai ae moan te kakawaki arei I a karekea iai te noraba ngke I mena iaon te bwati ma raou n tautia, ao I a namakina aron kakawakin ana mwakuri te Uea. E bon bongana ibukina bwa I a okira te Uea ao ngkai I a karaoa Ana mwakuri ao Ana kaantaninga.