Reitan Iango n Tibwauan te Tai, Turai 2007

Aikai reitan iango ake a na kona ni kabonganai taan kairiiri n te Moanrinan ma Tibwauan te Tai ae boretiaki inanon te Riaona n Tuurai 2007. Ibukin te reirei, kaetieti, ao waaki ake a kaineti ma iango aikai, tara “Onimaki n te Utu” iaon iteraniba R4 ao R5 ibukin aia mwakoro ataei inanon te boki aei.

1. Bwenaua te Moanrinan nakon uoua te kurubu. Tuangia teuana te kurubu bwa a na tara te Otinako 20:12 ao are teuana ana tara Motiaea 13:20. Kaoia bwa a na wareka aia kibu n te tai ae titebo. Kamataata bwa te koroboki ae tabu inanon te Otinako bon mwakoron Tuua ake Tebwina, ake e karekei Mote iaon te Maunga ae Tinai. Inanon Motiaea, Abinatai e taekina ana taeka Mote. Buokia ataei ni kamatenanoa te koroboki ae tabu ni katoaia ataei ni weteia n tuangia bwa a na taekina teuana te taeka. Angania bwa a na kabonganai aia boki aika tabu n aia moan tai.

   Karaoa te bootaki ni marooro (tara “Panel Discussions,” Teaching, No Greater Call [1999], 175–76). Kaoia teniman nakon niman kaain te uoote ke te mwaanga aika a kakaokoro aia ririki, ni ikotaki ma ataei, bwa a na roko nakon te Moanrinan ni kaekai titiraki ni kaineti ma karineakia kaaro. Kariaia kaain am bootaki ni marooro bwa a na atai titiraki ake ko na tabeki. N aron te katooto aei, “Tera teuana te bwai are e a tia ni karaoia am ataei ni karineko iai?” ke, “E na mwaitira am ririki imwain ae ko a kona n aki kakauongo nakoia am karo?” Kamatoa kakaawakin karineakia am kaaro n taai nako—ni ka-uoman bwa am karo iaon te aba ao am karo i karawa.

   Kaoti tamneia am karo, ao tibwaua te karaki ae kaineti ma aron karineaia ae e a tia ni kakabwaiako. Kaota am koaua ibukin ana tangira Tamara are i Karawa ibukia Natina.

2. Buokia ataei ni katauraoi nakon te bootaki n utu n te tairiki bwa a na tibwauaia ma aia utu (ma ni karekea aia kariaia kaaro). Katauraoi teniua taabo (tara “Stations,” Teaching, No Greater Call, 179). Bwenauaia ataei nakon teniua te kurubu, ao tuangia bwa a na kakaibibiti inanon taabo ni mwakuri akanne. N te tabo 1 manga rinanon “Love Is Spoken Here” (Children’s Songbook, 190–91)—ke te anene teuana ibukin te utu—bwa aonga ni kona ataei n reireinia aia utu taian koaua inanon te anene. N te tabo 2 taekina karakinan te moan aomata inanon te utu ni kaaina te Ekaretia. Kaewenakoia ataei bwa a na kakaei oin aia karaki ibukin aia bakatibu ke kaain aia utu are a na tibwauaia inanon te bootaki n utu n te tairiki. N te tabo 3 reireinia ataei bwa a na katauraoa te bwai ae bebete karaoana ni kakukureia temanna. Rinea te bwai ae bebete arona ao n aki bobuaka ibukin te ataei bwa e na karaoia.

   Anenea “The Family” (Children’s Songbook, 194; Liahona, Apr. 2004, F11). Kaota am koaua bwa e kanga te tataro n te utu, kamatebwaian koroboki aika tabu n te utu, ao te bootaki n te utu n te tairiki ni bobotia utu.

3. Kaotan aron te anene: “Love Is Spoken Here” (Children’s Songbook, 190–91). Kaoti kanikina n aron ae “Te Taetae n Ingiriti Ikai,” “Te Taetae n Russia Ikai,” “Te Taetae ni France Ikai” rinanon te ruu. Titirakinia ataei bwa e taekinaki ia te taetae arei. Kaota teuana riki te kanikina ae kangai taekana, “Love Is Spoken Here.” Titiraki bwa te aekaki n tabo ra ngkanne aei. Kamataata bwa e kakaawaki taekinan taeka n tatangira n te mweenga, n aki tabeakinaki bwa te taetae ra ae taekinaki iai.

   Titirakinia ataei bwa a na buokiko ni karaoa tamnein te tabo ike e tataekinaki iai te tangira. Titirakinia bwa a na kakauongo ngkana ko a moana korean te tamnei. Anenea, “I see my mother kneeling.” Kaoa te ataei ae te aine bwa e na tei ibukin te tina. Te ataei are e riki bwa te tina e na kona ni kaoti nanon taeka ni katean kaina. N aron aei, te ataei e kona ni kabaouai bubuaniwaena ngkana te anene e taekina, “katorobubua”; te ataei e kona ni kotea wiina ngkana te anene e taekina, “wirikiriki”; te ataei e kona ni katokai baina iaon wiina ngkana te anene e taekina, “tai karongoa.” N tokin te mwanewe, tuanga te ataei bwa e na kotea te kanikina “Love Is Spoken Here.”

   Kaoa te ataei ae te mwaane bwa e na tei ibukin te tama ibukin kauouan mwakoron te anene. Kabonganai kanikina naba ni kamatoa nanon te taeka. Manga kotea te kanikina arei n tokina. Reireinia te kabanea n rain n te anene ni katea tamnein te Tia Kamaiu irarikin te kanikina ae “Love Is Spoken Here”.

   Kamataata nakoia ataei bwa te tamnei are ko a tia ni karaoia e kona ni kaokoro ma are a na rinanona inanon maiuia. Vicki F. Matsumori, kauoman ni kauntira n te beretitentii ni kabuta n te Moanrinan, e taku: “Ibukina bwa ikawairake inanon mweengan ae tiaki kaain te Ekaretia, I aki noora tinau ni katorobubua n tataro ke n rinanon te waaki are kamwakura te nakoanibonga iai tamau. Te anene e tei ibukin te katooto ae I kantaningaia bwa oin natiu a na karekea inanon mweengara ao te kainibaire aei e na reitinako inanon rooro ibukin ara utu.” Kaewenakoia ataei bwa a na katauraoi ni karekea aia utu ae akea tokina.