Arou ni Uneaki ma te Tamnei n Tangako

E aki kaotaki te ara

Akea te kangaanga ngke I rangi ni kataia ni kam mwaawa man arou n reketaati, I aki toki ni kokonaaki. I kunea bwa I aki kona ni karaoia bon tii irou.

Ai tibwa 10 au ririki n te moan tai are I kaitibo iai ma te tamnei n tangako. I mena n ana auti raoraou ae e a maan, ao ti mataku n te terewition. E tanrikaaki nakon ana kaombiuta man tuangai bwa iai te bwai ae e na kamatakuai iai. Ngke I titirakinna bwa tera, e taku, “Tamneia aine aika a kabwakabwaka.” I tungnga bwa e kaitaraa au aro bwa nna mataku n aekakin bwaai akanne, ma e taku, “Eng, e rangi n eti. Aomata ni kabane a mamataku n aekan tamnei aikai—bon te bwai ae kakaraoaki.” I rawa ni mataku iai ao I a kitanna.

Uoua te ririki imwiina I a manga okira riki ana auti raoraou. Te kaokoro n te tai aei I a bita au iango ni rangi ni kan mataku are e a tokanikai iaou, ao ni kariaia bwa n na noora te bwai are e a tia ni kaotia nakoiu. Bon te kairua ae korakora are I a tia ni karaoia inanon maiu. Au kantaninga ni katoa bong bwa n na aki manga iangoa te iango aei.

I reitanako aron matakuu n te tamnei n tangako ni bon oin au kaombiuta. Bon te tabo ae onoti, ma ngkana iai ae rin ni kawarai, I tuangiia bwa bon te bwai ae karina ni kaoti ke I karaoa au anga ni baka n aki ataia. Inanon te ririki are imwiina, I baka n aki ataa te kairua are I namakinna ao n aki kona ni kan katoka aron matakuakinan te tamnei n tangako. I taku ibon irou bwa e bon kakaraoaki ao n aki tabe ma reirei tabeua man te Ekaretia ake a tutuangai bwa a bon aki riai. I aki ataia n te moan tai, ma I a tia n reketaati nakon noran te tamnei n tangako. Te kawai are I nooria iai aine ao e moanna ni bitaki, ao I maamaa n aron iango ake irou.

N aia maungatabu kairake e taetae nakoira te beretitebti n te titeiki bwa e kanga norakin tamnei n tangako n aki kakororaoia ataeinimwaane bwa a na kamwakura mwaakan te nakoanibonga. Ana taetae e ana nanou bwa N na riai n toki. N te moan tai I iangoia bwa n na karaoia ibon irou. I aki tangiria n tuanga te bitiobi ibukina bwa I aki tangiria bwa e na motika taekau ibukin are I karaoia. N onean mwiin anne, I a tia ni iangoia bwa N na aki manga oki ni matakuakin. I tekebuaka, bwa e a aki teimaan katokana. I berita nakoiu ni katoa tai bwa kabanean au tai n taai nako, ma tangiran tarakina kanga e a reke bwa kateiu ao n tokina I a manga reketaati n taraia riki.

Bure ake tabeua a reke ibukin karaoan aei. I reitanako aron rorokou n te ekaretia ma akea nanou nako iai. I kariaia Tatan bwa e na tautaekana maiu ma ni kabua ana mwakuri ni kairiiri te Tamnei. I kewe naba n au ribooti n te Tikauti n Ataeinimwaane. I a tia naba ni kewe n te reirei. I a tia n riki nakon bwaai tabeua ake I aki reireiaki bwa n na riki n arona.

Nimaua te ririki n nako ngke I kataia n tokanikai n arou n reketaati ma te tataro ao katamaroan aroarou. Ma I aki kona n tokanikai n arou n reketaati ibon irou.

N tokina ao I kaotia nakoia au karo bwa iai au kangaanga ibukin te tamnei n tangako. I tuangiia, “I kainanoa te ibuobuoki. I aki kona ni karaoia n tii ngai.” E ngae ngke e rangi ni kangaanga irouia, a oota iai ao a kataia ni buokai. A kaungaai au karo bwa n na riai ni kaitibo ma te bitiobi.

I ataia bwa a eti au karo, ma I maaku n taetae ma au bitiobi. I a taku irou bwa bon raoraou, ao I aki tangiria bwa e na atai au bure ake I kakarabai. Ngke I a tia ni karekea te ungannano n tokina bwa n na kaitibo ma ngaia, I rangi ni miimi n arona bwa e kanga n rangin n oota. I aki namakinna bwa e motika taekau ni bwaai ni kabane; e tii rangi ni kan buokai.

N te tai are I a tia ni kaoti au bure ni kabane nakon te bitiobi ao ni moana te rairanano, e waekoa n tamaroa maiu. I oota bwa te rairannano ae bwanin ibukin arou n reketaati ibukin te tamnei n tangako, I kainnanoa te rairannano man au bure ni kabane. I karokoi bwaain au kaniwanga n te tieminari ao metera aika a kakawaki n te Tikauti, ni butimwaea ae a na bon riai n aki reke nakoiu. I kaota naba au bure nakoia au taan reirei n te reirei ake I a tia ni kairua nakoia iai.

N ana ibuobuoki te bitiobi, I kunea aron kakawakin kaotan am kangaanga nakon te bitiobi ao nakon te Uea (tara D&C 58:43). Ma imwaina, I kataia ni uneaki ma arou n reketaati n tii ngai, ma ngkai ai raou au karo, au bitiobi, ao ae rangi ni kakawaki riki, ai bon te Uea irarikiu. Bon aikai taan kaitara te kariiri.

Iai rokan aia kombiuta ara karo, ao I moana ni karin tamnein te tembora ke burabeti ni kaan bwa e aonga ni katuka au iango iaon bwaai aika tabu. I kunea bwa kamatebwaian koroboki aika tabu ni katoa bong bon teuana mai ibuakon te buoka ae rangi ni ibuobuoki n anga ni karikirakea au tautia n tamnei. Ngkana I tarai tamnei n tangako, I aki iangoia bwa I ataia naba bwa a mena ia booki aika tabu. Ma ngkai I ataia bwa I kainanoa warekan booki aika tabu ni katoa bong bwa I aonga n totokoi kariiri.

I a tia n rangi ni kakaraurau ibukin bwaai ake I mataku ao n ongora nako iai. A mwaiti kamataku n te terewition ao tamnei ake a taekin katei aika buakaaka bwa aikai bon bwaai aika e tataneiai te aba iai ao akea buakakaia. I a tia n ataia bwa te bwa te anua n aomata, bon ana kairiribai te Atua (tara Motiaea 3:19). Bon ti man rinanon ana mwakuri ni kamaiu Kristo ae te Uea ao n riki bwa te aro n aomata ao ni kabwarai au bure. I ataia bwa ngkana iai ae oota n te nanokaawaki are I a tia n rinanona ibukin au bure, bon te tia Kamaiu, are e a tia ni maraki ni bwaai ni kabane.

I a tia ni kabwarai au bure n aron reketaatiu n te tamnei n tangako. I a tia n oota bwa rinanon ana Mwakuri ni Kamaiu, iai te kantaninga ibukin te maiu ae na roko. E ngae ngke N na riai n reitanako arou n taratara raoi, ni ikotaki ma ana ibuobuoki ma te Tamnei inanon maiu, N na moanna n te buaka. I ataia ae te riaboro e na kataia ni kaririai, ma e na bon aki tokanikai ngkana iai te Tia Kamaiu n au itera.

I a tia n reiakina te kawai ae kangaanga bwa e karekea ti teuana te tai ni karika te reketaati are e na ti karekea te karawawataki. I kariaia te nano ni kan ataibwai ni kairai nakon te bure ao te katuaeaki, ma e kaungaaki nanou bwa n na kararoai man te katuaeaki inanon maiu ae abwabwaki. I rangi ni ingainga nakon te mwakuri ni mitinare, te mare n te tembora, ao te maeka naba ma Tamau are i Karawa ao Iesu Kristo.

Te mwakuri n totoko

Te kabanea n nakoraoi ni mwakuri n totoko ni kaitara te tamnei n tangako bon aki karaoakina. Aikai iango tabeua ake e na buokiko n totokoiko man moanakin karaoan te moan kawai nakon te reketaati ao ana kangaanga ni kabane:

Aomata ake iai aia kanganga ma tamnei n tangako a kaotaki nakoia irouia raoraoia. Ngkana iai ae tangiria ni kan kaota te tamnei n tangako nakoim, kitanna n te tai ae waekoa. Rineia raoi aomata ake ko kabanea am tai ma ngaia.
Karekea te ungannano ni kamatea te tamnei are e kaota ke n taekin bwaai aika bubuaka, n aki tabe ma karinanna.
Katuka te terewition ao te kaombiuta n te tabo ae a na kona ni kabonganaki n tainako n te auti. Tai kabongana te kaombiuta ngkana tii ngkoe n te mweenga.
Kakoaua bwa te kaombiuta are ko kabongana n rin n te Intanete iai te bwai n tutuki are e na bonota te tamnei n tangako nakon te Web sites. Kataniko man angibuakan tamnei n tangako (tara te kabwarabwara iroun Beretitenti Hinckley ni iteraniba 34).
Tai kauka te e-mail mai iroun temanna are ko aki kina. Ngkana ko kuba ni kaitibo ma tamnein te tangako iaon the Web, kawaekoa ni kamatea te kaombiuta ao tuanga ae ikawai riki.
Kakauongo nakon ana wirikiriki te Tamnei ae Raoiroi. E na bon kauringko ngkana ko a reke n te kangaanga.

Te tokanikai

Ngkana ko reke n ana kamane te tamnei n tangako, ko na riai n raira nanom ao n tokanikai man te mwakuri n reketaati. Mwakuri rinanon am rairannano ma ana ibuobuoki am bitiobi ke te beretitenti n te mwaanga. LDS Family Services (Mwakuri n Ibuobuoki n Utu Irouia Aika Itiaki Ni Boong Aika Kaitira) anga iango ni ibuobuoki ibukin reketaati aikai n aron:

Tai tautaekanaki. Ko na riai ni katoka kateim n reketaati.
Urua aron rorokon tangirana. Totokoa aron rorokon tangirana ma okiokirana:
- Mwakoro 1: Tabetaben te Iango— tabeaiangan ana iango iaon iango ake e na kairia nakon te wene ni bure.
- Mwakoro 2: Kamatenikunana—katabetabe inanon te mwakuri are e kairiiri nakon kabonganaan tamnei n tangako.
- Mwakoro 3: Norakin ao kabonganan tamnei n tangako.
- Mwakoro 4: Bwarannano.
Ko kona n tokanikai iaon te kariiri n norakin tamnei n tangako man uruakan rauniakina man mwakoro ake aua. Aikai anga ake a na katoka teuana te mwakoro nakon are imwiina:
1. 1.Tararuai ami iango ao nanomi. Kamanena te onimaki, te aki mamatam, te tataro, ao kamatebwaian booki aika tabu ni katoki iango aika aki raraoi. Onoi mwiin iango aika aki raraoi n te tai are a roko n am iango man ongoraean anene aika a na karekei waaki aika tamaroa, kaokiokan kiibu aika tabu, ao iangoan bwaai aika raoiroi.
2. 2. Onoi am mwakuri. Karaoa te mwakuri ae kaokoro, n aron te nakonako, warekan booki aika tabu, kakaraki ma raoraom, ao kataneiam n te takakaro ke katangan bwai ni katangitang.
3. 3. Kamaunai taai aika a na kaoti. Katoka arom ni matakuakin tamnei n tangako man totokoan kaotakina.
4. 4. Tataro ibukin te kantaninga are e na onea mwiin te nanokawaki. Tai kariaia bwa ko na karaoa te kairua bwa kona bwaran nano. Rinanon te raira n nano ao te kabwara bure, ko kona n namakina te kantaninga ae raoiroi n onea mwiin te nanokawaki. Te tokanikai iaon te bwai ae kareketaati bon te mwakuri ae kainanoa te tai. Ake a tokanikai iai a kona n tokanikai aki barannano.
Kakaea te buoka ae tamaroa. Te reketaati ae korakora e kona ni kainanoa te reirei ae tamaroa. N tabo tabeua, am bitiobi ke te beretitenti n te mwaanga a kona ni kanakoko nakon aobitin te LDS Family Services (Mwakuri n Ibuobuoki n Utu Irouia Aika Itiaki Ni Boong Aika Kaitira) ae kaan, are e kona ni buoka aron te aro n reketaati n ana burokaraem ni katokia. Kawara www.ldsfamilyservices.org ibukin riki rongorongona. Ana boki ni kaongora te Ekaretia ae uarereke Let Virtue Garnish Thy Thoughts (item no. 00460) iai naba inanona rongorongo ake a kona ni ibuobuoki iaon te tokanikai man tamnei n tangako.

Kakaea katanam

“Man karekean te anga aei are karaoaki bwa [tamnei n tangako] a kangaanga totokoaia, anne e rangi n eti ngkai a rangi ni waekoa karekeaia. Iangoia bwa aongkoa e rangi ni korakora ao ni buaka te ang ao ko mangao ibuakon te tino. Ko bon aki kona ngkoe ni katokia. Ma ko kona ni kunnikainiko raoi ao ni kakaea katanam, ao e na bon aki korakora te angi buaka n roko iroum.”

Beretitenti Gordon B. Hinckley, “A Tragic Evil among Us,” Riaona, Nobembwa. 2004, 61.

Kararoa te bwai ni kamwane

“Tamnein bwaitangako e uota te waaki ae moan te aki tamaroa, uruakin mweenga, ao uruakin te maiu. Tamnein bwaitangako e na kamemerea korakoran te maiu n tamnei n te aro ni imanono. Tamnein bwaitangako bon aron te tano ae tau mwaaka. Ko bon kona ni kakai mwane ao ni konaaki ngkana ko tei inanona man aki ataa te kangaanga are ko mena iai. Ko na bon kainnanoa buokam n otinako man te tano ae tau mwaaka ae te tamnei ni bwaitangako. Ma mwaitira riki raoiroin ae ko bon aki roko n tei inanona.”

Unimwaane Joseph B. Wirthlin man te Kooram n Abotoro ake Tengaun ma Uoman, “Press On,” Riaona ao Ensign, Nobembwa 2004, 103.