A titau i te mau mau maitai rahi roa i parauhia maira
Ua rave te Fatu i te mau fafauraa faahiahi, e te haapapû atoa mai nei Oia e, eita roa Oia e faahuru ê i teie mau fafauraa.
Te hopoi mai nei au i te here e te aroha o te Feia Mo‘a faaroo o Patitifa Apato‘a.
Te parau tumu matamua o te evanelia o te faaroo ïa i te Fatu ra ia Iesu Mesia. Oia hoi, te faaroo i roto i To’na fanauraa hanahana e To’na faturaa ai‘a i te ra‘i ra, e te faaroo e, i raro a’e i te arata’iraa a To’na Metua, ua hamani Oia i te fenua e i te mau mea atoa i ni’a iho ra(hi‘o Ioane 1:10 ; Mosia 3:8). I roto i te hohonuraa o to tatou faaroo i te Mesia, te vai ra te iteraa e, na roto i Ta’na tusia taraehara noa’tu e ua uteute roa ta tatou hara, e riro mai ïa mai te hiona (hi‘o Isaia 1:18).
Te faaroo i te Mesia o te iteraa ïa e, i muri iho i To’na faasatauro-raa-hia, ua ti‘a-faahou Oia mai roto mai i te menema, e na roto i To’na ti‘a-faahou-raa, ua ti’a i te mau taata atoa ia ora faahou (hi‘o 1 Korinetia 15:21-23). Te faaroo i te Mesia o te ite-papû-raa ïa e, ua fâ mai Oia e To’na Metua i te ao ra, i te hoê tamaiti apî, o Iosepha Semita, no te faaineine i te e‘a no te faaho‘i-faahou-raa mai i te mau mea atoa i roto i te tau tuuraa no te îraa o te mau tau. O Iesu Mesia te upoo faatere o te Ekalesia tei mau i To’na ra i’oa mo’a.
E itehia te faaroo i te Fatu ia Iesu Mesia mai te mea e, te ti’aturi nei tatou i Ta’na mau haapiiraa e te titau nei tatou i Ta’na « mau maitai rahi roa i parauhia maira » e ia noaa ia tatou « te huru Atua » (2 Peter 1:4). E rave rahi te mau fafauraa tei faaitehia mai e Ta’na mau peropheta, e ua haapapû mai te Fatu ia tatou e, « eita Ta’u parau e mou, e faatupuhia râ te reira, na roto i to’u iho reo, e aore ra, na roto i te reo o ta’u mau tavini, hoê â ïa » (PH&PF 1:38).
I teie anotau hopea nei, ua heheu mai te Fatu e « e ia noa‘a mai ia tatou te hoê haamaitairaa no ô mai na i te Atua ra, ua na roto ïa i te haapa’oraa i taua ture i faatumuhia’i no te reira » (PH&PF 130:21). Ua rave te Fatu i te mau fafauraa faahiahia, e te haapapû atoa mai nei Oia e, eita roa oia e faahuru ê i teie mau fafauraa, no te mea, te na ô ra Oia e, « ua ruuruuhia vau, o te Fatu, ia rave outou i te mea ta’u i parau ra ; ia ore râ outou ia rave i ta’u i parau ra, e ore ïa ta outou e fafauraa i reira » (PH&PF 82:10).
Te mau maitai rahi roa i parauhia maira
Teie te mau maitai rahi roa ta te Fatu i parau na, oia hoi, te faaoreraa i ta tatou mau hara mai te mea e, « e fai tatou i te reira e e haapae ê roa’tu » (PH&PF 58:43 ; hi‘o atoa PH&PF 1:32). Te Iritiraa i te mau haamaramarama o te ra‘i o te hoê ïa fafauraa e titauhia e te feia e aufau i te hoê tuhaa ahuru ti’a (hi‘o Malaki 3:10), e te iteraa i « te mau tao‘a rahi no te ite » e roaa ïa te reira i te feia e haapa’o i te ture no te Parau Paari (PH&PF 89:19).
Ia ore ia viivii i te mau mea no teie nei ao, o te hoê ïa fafauraa i te feia e haamo‘a i te mahana Sabati (hi‘o PH&PF 59:9 Exodo 31:13). Ua fafau-hia mai te arata’iraa e te faaururaa i te feia e « popou i te parau a te Mesia » (2 Nephi 32:3) e o te « faaau i te mau parau papa’i mo’a atoa » i ni’a ia ratou iho (1 Nephi 19:23).
Ua fafau atoa mai te Fatu e « te mau mea atoa ta outou e ani i te Metua i to’u ra i’oa, o te ti’a ïa, a faaroo ai e noa‘a taua mau mea ra, e noa‘a ïa ia outou » (3 Nephi 18:20). Ua fafauhia mai ia tatou e, e vai tamau noa te Varua Maitai i pihai iho ia tatou mai te mea e « î noa atoa hoi to [tatou] mau aau i te aroha », (hi‘o PH&PF 121:45-46). E nehenehe atoa ta tatou e titau i te fafauraa no te faati’amâraa i te pae varua o te haapaeraa maa, o te te tatara « i te rùrù ra o te ino », o te haama‘iri i ta tatou « hopoi’a teiaha ra », o te tuu i « tei nene‘ihia e tei hamani ino ra », e o te tauturu ia tatou ia ofati i « te mau zugo atoa ra » (Isaia 58:6).
O ratou tei ta‘atihia i roto i te mau hiero mo’a e tei haapa’o maite i ta ratou fafauraa, e noa‘a ia ratou te hanahana o te Atua « o te îraa ïa e te faatupu-noa-raa o te huaai e a muri e a muri noa’tu » (PH&PF 132:19).
I te tahi taime, i roto i to tatou huru faaoroma‘i ore, e riro tatou i te ore e ite i te mau maitai rahi a te Fatu i parauhia maira, a mo‘ehia’tu ai ia tatou e, te tupuraa o teie mau fafauraa, tei te huru ïa o to tatou haapa‘o. I parau mai hoi te Fatu e:
« O vai hoi au, te na reira maira te Fatu, o tei parau mai e aita i faatupuhia ?
« Te faaue atu nei au e aore te taata nei e haapa’o ; e faaore atu vau e aita ratou e farii i te haamaitairaa.
« E i reira ratou e parau mai i roto i to ratou ra mau aau e: E ere teie te ohipa a te Fatu, no te mea aita ta’na mau parau fafau i faatupuhia. E ati râ to te reira huru taata, no te mea, no raro mai to ratou ra utu‘a, e ere no ni’a mai » (PH&PF 58:31-33).
Te hi’oraa i te mau fafauraa i te atea ê.
Te mau tuhaa faufaa o te faaroo o te faaoroma‘i ïa, te faaoroma‘i rahi e te tape‘araa e tae noa’tu i te hopea ra. Te faati’a nei te aposetolo Paulo i te aamu no te faaroo o Abela, o Enoha, o Noa, o Aberahama e o Sara, ma te parau e « i pohe ana’e atura taua feia ra ma te faaroo, aita i noa‘a tei parauhia maira, ua hi’o râ ratou i taua mau mea i te atea ê, e ua faaroo papû e ua farii maite, e ua fai hua e, e taata êê ratou e te purutia i teie nei ao » (hi‘o Hebera 11:4-3). Ua ite teie feia mo’a haapa’o e, teie oraraa i te fenua nei, e taime ratereraa noa ïa, e ere râ i te tipaeraa hopea.
E 75 matahiti to Aberahama i fafau mai ai te Fatu ia’na e: « E faariro hoi au ia oe ei nunaa rahi » – i te reira i te hoê taime aita a raua o Sara e tamarii (Genese 12:2). E 86 to’na matahiti i te taime, to te tavini o Sara o Hagara te i‘oa « i fanau ai i te tamaiti na Aberahama ia Isemaela » (Genese 16:16).
E ua taui te Fatu i te i’oa o Aberama, o Aberahama e te i’oa o Saria, o Sara, e ia hanere a’era to’na matahiti e to Sara e 90, ua fafauhia mai ia raua e, e fanau o Sara i te hoê tamaiti i te i’oa ra o Isaaka (hi‘o Genese 17:17,19). I roto i to raua ti’aturi ore, ui maira te Fatu e: « Te vai atura anei te hoê mea e ore e ti’a Ia Iehova ia rave ? » (Genesis 18:14). E « ua tô ihora hoi Sara, e e tamaiti ta’na i fanau na Aberahama i to’na ruhiruhiaraa ra » (Genese 21:2), e ua fafau maira te Fatu ia Aberahama e: « E faarahi au i to hua‘ai mai te fetia o te ra‘i ra, e mai te one tahatai ra » (Genese 22:17).
Ua tupu te tamaiti ra o Isaaka i te paari, e ia 40 to’na matahiti ra, faaipoipo atura oia ia Rebeka. « Ua pure atura Isaaka i te vahine na’na ra, no te mea, e ui oia ; ua faaroo maira Iehova i ta’na pure, e ua tô ihora ta’na vahine o Rebeka » e na tamaiti maehaa, o Esau e o Iakoba, i te 60 o te matahiti o to raua metua tane (hi‘o Genese 25:20-26).
Ia paari a’era o Iakoba, e ia tae hoi i te matahiti au ra, ua tono atura to’na na metua ia’na i te utuafare o Labana i reira oia i te farereiraa e piti na tamahine a Labana, o Lea e o Rahela. Na ô atura o Iakoba ia Labana: « E tavini au i ô nei ia oe nei e ia hitu a’e matahiti, no te tamahine hope nei o Rahela… Ua tavini atura Iakoba e a hitu atura matahiti no Rahela: e no to’na hinaaro ia’na, riro atura taua mau matahiti ra, mai na mahana rii aita rea nei te huru ia’na » (Genese 29: 18,19).
Te haamana’o ra outou i te huru no to Labana haavareraa i te tamaiti apî ra o Iakoba ia faaipoipo na mua ia Lea e i muri iho ia Rahela. « E ia hi’o maira Iehova e aore Lea i herehia, ua horo’a maira oia i te tamarii na’na: area o Rahela ra, te vai ui noa ra ïa » (hi‘o Genese 29:31). E fanau maira Lea ia Reubena, e muri iho ia Simeona, e muri iho ia Levi e Iuda. I taua taime ra, ua faaea noa o Rahela e aita e tamarii (hi‘o Genese 29 :32-35).
E na roto i te feii e te hiaai e te oto rahi, i te hoê mahana ani atura Rahela ma te riri rahi ia Iakobo e, « ho mai i te tamarii na‘u a pohe au » (Genese 30:1). I muri noa mai, fanau-faahou maira Lea e piti tamaiti e hoê tamahine.
Aore te Fatu i faaro‘aro‘a i ta’na i parau maira
Ua faaite papû mai te aposetolo Petero e, « aore te Fatu i faaro‘aro‘a i ta’na i parau maira, mai ta te tahi pae i parau ra e, e faaro‘aro‘a ; e faaoroma‘i rahi râ » ia tatou nei (2 Peter 3:9). I teie tau no te pu‘araa i te ahu hoê noa hora te maoro ua mâ, e te maa hoê minuti noa ua oti, e riro tatou i te tahi taime, i te feruri e, ua hape paha to tatou Metua Here i te Ao ra i ni’a i ta’u aniraa, e aore ra, Ta’na mau haamaitairaa rahi roa, ua faataimehia paha, e aore ra, ua hape paha te i’oa o te apaparaa i reira te tuu-raa-hia’tu. Mai te reira ïa te huru mana’o o Rahela.
Tera râ, a ma‘iri noa ai te tau, te ite nei tatou e hitu mau parau nehenehe roa a’e i roto i te papa’iraa mo’a: « Ua haamana’o maira te Atua ia Rahela ». (Genese 30:22) Ua haamaitaihia oia e piti na tamaiti, o Iosepha e o Beniamina. E rave rahi milioni taata i ni’a i te fenua nei i teie mahana e hua‘ai ratou no Iosepha, tei farii i te fafauraa a Aberahama e, na roto i ta ratou tutavaraa « e haamaitaihia’i te mau opu atoa o te fenua nei, oia i te mau haamaitairaa o te Evanelia, oia hoi, te mau haamaitairaa o te ora, oia te ora mure ore » (Aberahama 2:11).
Mai te mea e, i te tahi taime, e mea atea rii te mau fafauraa o te ra‘i, te pure nei au ia farii tatou tata‘itahi i teie mau maitai rahi roa i parauhia maira e eiaha roa’tu e faaru‘e. E mai ta Atua i haamana’o ia Rahela ra, e haamana’o atoa mai te Atua ia outou. Te faaite papû nei ua i te reira na roto i te i’oa o Iesu Mesia ra, amene.