Peresideni Henry B. Eyring
Tauturu Piti i roto i te Peresideniraa Matamua

I to te Peresideni Henry Bennion Eyring feruriraa i te e‘a mana‘o-ore-hia i ravehia e to’na oraraa, ua ataata oia i te ite o te nehenehe i te Atua ia faatupu i te semeio i roto i te oraraa o Ta’na mau tamarii taa ê noa’tu i to ratou feaa e i to ratou mau mana‘o-ti‘a-ore.

Ua farii oia i te puai no roto mai i taua iteraa ra a feruri maite ai oia i te mea o ta’na i pii e « te hopoi‘a poto » o tei tae mai e to’na piiraa i roto i te Peresideniraa Matamua. Ua mono te Peresideni Eyring i teie parahiraa vata tei faatupuhia e te pohe o te Peresideni James E. Faust i te 10 no Atete 2007.

A hi‘o ti‘a’i oia i mua no te faarahi i to’na au-mnaite-raa e te Peresideni Gordon B. Hinckley e te Peresideni Thomas S. Monson, te mihi nei râ oia i te Peresideni Faust.

« Aita vau e imi nei ia faai i te parahiraa o te Peresideni Faust no te mea eita te reira e ti‘a », o ta’na ïa i parau. « Ua riro râ oia ei tauturu piti hoê roa tei faaineinehia ia rave maite i te ohipa i roto i te Peresideniraa Matamua. E horo‘araa hoê roa teie ».

I roto i te hoê apooraa titorotororaa parau i muri mai i te parau faaite no to’na piiraa i te 6 no Atopa, te haamana‘o nei te Peresideni Eyring i to’na titau manihiniraahia i roto i te piha toro‘a a te Peresideni Faust i muri noa mai i to’na piiraahia i roto i te Pŭpŭ no te Tino Ahuru Ma Piti Aposetolo i te 1 no Eperera 1995. Ahiri i te horo‘a mai i te hoê faaitoitoraa e mana‘ohia ra, faatano atura te Peresideni Faust i to’na rima i te ra‘i e ma te ataata e parau maira, « eiaha oe e parau mai ia‘u. E paraparau râ oe Ia’na ». Teie te tatararaa a te Peresideni Eyring, « ahiri oia i tatara i to‘u mau fifi atoa, faahaere atura râ oia ia‘u i te Atua. Tei ana ra te horo‘a no te aau mărû e te maitai – te hoê hoa here e te tiaau maitai roa‘e ».

Ma te faaite i to’na aau mehara i te Fatu no To’na ti‘aturi e no te ti‘aturi o te Peresideni Hinckley, teie ta te Peresideni Eyring i parau, « e rave‘a… rahi teie no te taviniraa i te mau taata o ta‘u i here e o ta‘u i paturu ei mau peropheta e ei mau hi‘o e ei mau heheu parau e ei mau Aposetolo na te Fatu ra o Iesu Mesia ».

Ma te haamauruuru i te patururaa a te Fatu, teie ta’na i parau, « e parau pinepine te Peresideni Hinckley e, ‘e tupu maite te mau ohipa’. Te vai nei teie faaroo i roto ia‘u oia’toa te amoraa i teie hopoi‘a poto ».

Fanauhia i te 31 no Mati 1933 i Princeton, New Jersey, o Henry B. Eyring ïa te tamaiti piti i na tamaroa e toru tei fanauhia ia Henry e ia Meldred Bennion Eyring. E taata tuiroo to’na metua tane i te ohipa maimiraa i faaitoito ai oia i ta’na mau tamaroa ia titau i te toro‘a i roto i te ihi [science]. Ua rave faaoti te Peresideni i ta’na haapiiraa i te pae no te ihi area râ, i muri mai i to’na taviniraa e piti matahiti i roto i te Nuu Marite, ua tapa‘o oia i to’na i‘oa i te Fare Haapiiraa no Harvard Graduate School no te Business, e ua roaa ta’na parau tuite i roto i te faatereraa no te ohipa.

Tei reira oia i te haapiiraa i Harvard i te tau ve‘ave‘a o te matahiti 1961 i matau mai ai oia ia Kathleen Johnson, o tei haere mai i te haapiiraa i Boston i taua tau ve‘ave‘a ra. Ua haamatau raua i taua taime ra, e ua papa‘i rata i muri mai i to teie tamahine ho‘iraa i to’na utuafare i Kalifonia, e ua faaipoipohia i roto i te hiero no Logan i Utaha i te ava‘e Tiurai 1962. I taua ihoa matahiti ra, riro mai nei te Peresideni Eyring ei tauturu orometua haapii i Stanford Graduate School i te ohipa Business, e ua haapii oia i reira mai te matahiti 1962 e tae atu i te matahiti 1971.

Ua faati‘a te Peresideni Eyring i te huru o ta’na vahine e « vahine o tei hinaaro noa ia riro vau ei taata maitai roa‘e ». Ua haapapûhia te reira i te tu‘iraa pô o te matahiti 1971 i to’na hitima‘ueraa ma te parau atu i ta’na tane, « ua papû anei ia oe i te mea o ta oe e rave nei i roto i to oe oraraa ? » I reira to’na uiraa’tu i ta’na tane aita anei oia e hinaaro i te rave i te ohipa i pihai iho ia Neal A. Maxwell Ti‘a Faatere i taua taime ra no te Faanahoraa Haapiiraa a te Ekalesia.

E mea au roa na te Peresideni Eyring ia haapii i Stanford, piri ti‘a’tu ïa i pihai iho i to’na na metua hoovai e i te taviniraa ei episekopo no te paroita matamua no Stanford area râ, haamata ihora i te pure no ni‘a i te uiraa a ta’na vahine. Aita roa’tu te utuafare Eyring i matau i te Ti‘a Faatere Maxwell area râ, i roto i te tahi noa mau mahana te maoro, ua niuniu Maxwell i te Peresideni Eyring i Roto Miti e ani atura ia’na ia riro ei peresideni no te Fare Haapiiraa Tuarua no Ricks tei riro i teie mahana o BYU–Idaho. Ua farii te Peresideni Eyring i teie piiraa e ua faanuu i to’na utuafare – i teie mahana e 4 tamaroa e e 2 tamahine e e 25 mootua – i Rexburg i Idaho nei.

Ua riro oia ei auaha faatere no te Faanahoraa Haapiiraa a te Ekalesia no na matahiti e ono e ei Ti‘a Faatere no te FHE e toru matahiti i muri mai, e ua tavini oia e tae noa’tu i te ava‘e Eperera 1985 ei Tauturu Matamua i roto i te Episekoporaa Faatere Rahi. I te ava‘e Setepa 1992, ua pii-faahouhia oia ei Ti‘a Faatere no te FHE, e ua tavini apipiti i roto i taua ti‘araa ra e ei melo no te Pŭpŭ Matamua no te Hitu Ahuru i reira oia i piihia’i hoê ava‘e i muri mai.

Ua itehia te Peresideni Eyring no ta’na mau a‘oraa no roto mai i to’na aau e to’na varua haehaa, e ua parau no teie nei na 12 matahiti taviniraa i roto i te Pŭpŭ no te Tino Ahuru Ma Piti Aposetolo e ua haapiihia oia i te hoê haapiiraa faufaa no ni‘a i te tautururaa i te mau tamarii a te Metua i te Ao ra.

« No to‘u mau iteraa rau i roto i te Pŭpŭ no te Tino Ahuru Ma Piti , te ti‘aturi nei au e ahiri e nehenehe au e amui i te mea o ta to tatou e to tatou Metua i te Ao e te Faaora e hinaaro nei, e riro tatou i te rave maitai atu â i ta tatou i rave na », o ta’na ïa i parau. « E faauru hau atu â te Atua i te oraraa o te taata na roto atu ia tatou ma tei mana‘o-ore-hia e tatou, e e haamaitai atu â Oia i to tatou oraraa ma tei mana‘o-ore-hia e tatou ».

Taa-ê-noa’tu to tatou feaa e to tatou mau hapehape, teie faahou â ta’na i parau, e arata‘i noa â to tatou Metua i te Ao ra ia tatou. « Mai te mea e nuu tatou i mua na roto i te faaroo e mai te mea e mea haehaa tatou, e faaroo outou i To’na reo », o ta’na ïa i parau.