Elder Quentin L. Cook
No te Pŭpŭ no te Tino Ahuru Ma Piti Aposetolo

Noa’tu e ua parau oia e, aita roa’tu teie taviniraa ei melo i roto i te Pŭpŭ no te Tino Ahuru Ma Piti Aposetolo i mana‘ohia, te haapii nei râ Elder Quentin La Mar Cook i te ora ei ite no te Faaora ra o Iesu Mesia mai to’na vai apîraa.

« I roto i to‘u nei oraraa, ua haamaitaihia vau e te feia o tei here i te Faaora », o te parau ïa a Elder Cook.

Fanauhia i te 8 no Setepa 1940 i Logan i Utaha ia J. Vernon e ia Bernice Cook, ua mauruuru Elder Cook no teie na metua here oia to’na mama e to’na papa o tei « here i te Faaora. Ua rave raua i te mau mea tano ia faaamu ia matou i roto i te parau-ti‘a.

Te mauruuru nei oia i to’na taea‘e e to’na tuahine e te haamana‘o nei oia i te rae‘a-raa-hia to’na 15 matahiti, ua tupu te hoê tau‘araa parau e to’na tuane Joe, i feruri ai oia e, e mea faufaa ia roaa te hoê iteraa papu no te Faaora. Titauhia ia Joe ia feruri e vaiiho anei oia i ta’na haapiiraa taote no te tavini i roto i te hoê misioni. « I muri mai i teie tau‘araa parau, ua riro te haapapuraa o ta’na i farii na roto i te pure no ni‘a i te parau mau o te Ekalesia e te mo‘araa o Iesu Mesia ra, ei tumu faufaa no to’na oraraa ».

Ua tavini to’na tu‘ane e ua tavini atoa Elder Cook i roto i te Misioni no Peretane. Ua riro mau to’na mau peresideni misioni, tae noa’tu ia Elder Marion D. Hanks, Tauturu Matamua i roto i te Pŭpŭ Hitu Ahuru i taua taime ra, i te faauru mau ia’na.

« E mea faufaa ia roaa te iteraa papu no te Faaora e ia amui i te feia o tei here i te Faaora », o te parau ïa a Elder Cook. Ua matau oia i te hoê atu taata e to’na i‘oa o Mary Gaddie, o ta’na i faaipoipo atu i roto i te Hiero no Logan i Utaha i te 30 no Novema 1962.

I muri mai i to’na faahanahana-raa-hia i te Fare Haapiiraa Tuatoru no Utah State e i te roaaraa ia’na te parau tu‘ite i roto i te ihi politita, ua faanuu teie na taata faaipoipo i Kalifonia, i reira te parau tu‘ite a Elder Cook ei Taote no te ture i roaa’i i te Fare Haapiiraa Tuatoru no Stanford. Ua faaamu raua i ta raua e toru na tamarii, e ua rave o Elder Cook i te ohipa i roto i te ture, e ua riro ei hoa apipiti i roto i te ohipa no te ture i San Francisco Bay Area, e ei peresideni e ei ti‘a faatere no te Faanahoraa no te ‘Ea i Kalifonia, e ei mono ti‘a faatere no te Faanahoraa ‘Ea no Sutter.

I taua taime ra te tavini ra ïa oia ei episekopo, ei peresideni titi e ei tauturu, ei ti‘a retioni e ei Hitu Ahuru Area. I te taime tei roto oia i te peresideniraa titi, e hopoi‘a ta’na eiaha noa no te mau paroita reo Peretane te hoê atoa râ mau amuiraa reo Paniola, Tonga, Hamoa, Tagalog, Mandarin e Cantonais.

« E mea au na’na te rauraa o te mau melo e ta ratou fafauraa i roto i te evanelia a Iesu Mesia. Ua riro ratou ei faaururaa i roto i to‘u nei oraraa ».

Area râ, i roto i to’na oraraa ohipa i te pae tino, e rave Elder Cook i te ohipa i pihai iho i te feia melo ore no te Ekalesia. Ua haapii mai oia e, « rave rave feia e ora nei i rapae i te Ekalesia o te here nei i te Faaora. E ua riro atoa ratou ei faaururaa no‘u. Ia parau ana‘e au ia amui outou i te feia maitai, aita ïa vau e parau nei i te faatea ia outou i to te ao nei ».

I muri mai i to’na pii-raa-hia i roto i te Pŭpŭ Piti no te Hitu Ahuru i te 6 no Eperera 1996 ra, e i to’na pii-raa-hia i roto i te Pŭpŭ Matamua i te 4 no Eperera 1998, ua tavini na Elder Cook i roto i te Peresideniraa Area no Philipino/ Micronesie e ei Peresideni Area no Patitifa e no Marite Apato‘erau e no te mau Area Apato‘erau o te Ekalesia.

Na ta’na taviniraa ei Huimana Faatere Rahi i haapuai i to’na ti‘aturiraa e « e nehenehe outou e farerei i te mau taata maitata‘i o tei here i te Faaora i te mau vahi atoa tei reira outou ». Te ti‘aturi nei Elder Cook e te rave‘a no te farereiraa i teie feia e mea na roto ïa i te ora-haehaa-raa i te evanelia ma te haama-ore.

« Te mana‘o nei au e, te hape rahi roa‘e o ta te Feia Mo‘a e rave nei oia ïa o te faaite-ore-raa e o vai ratou », o ta’na ia i parau. « Aita rave rahi mau melo e faaite nei i to ratou mau hoa e i to ratou mau fetii o vai mau râ ratou e eaha o ta ratou e ti‘aturi nei e i te topa-roa-raa’tu i roto i te mau ti‘araa fifi. Te feia o te faaite nei ia ratou ei Feia Mo‘a ma te haapapu i te mea o ta ratou e ti‘aturi nei, e iti mai ïa to ratou mau fifi ».

Ua ite atoa oia e, e mau misionare maitai roa ratou a tavini ai oia ei Ti‘a Faatere Rahi no te Aupŭpŭ Misionare hou oia a piihia’i i roto i te Peresideniraa no te Hitu Ahuru i te ava‘e Atete 2007.

I roto i ta’na a‘oraa matamua o te amuiraa i muri mai i to’na paturu-raa-hia ei Aposetolo i te 6 no Atopa 2007, ua a‘o o Elder Cook i te fifi o te mau melo no te « hunaraa » e ua faaitoito ia ratou ia ora « na roto i te faaroo ma te feaa-ore ».

Ua parau oia e, « E rave rahi o te tahitohito e ‘aita ratou [e] ite i te vahi te reira e itea mai ai [te parau mau]’ » (PH&PF 123:12). « E mai te mea te vaira te hoê taata haavare-ore na roto i te hoê rave‘a faaoroma‘i, e te maitai, e maere-mau-hia te rahiraa o te taata e farii mai ».

Te ti‘aturi nei râ Elder Cook e e pahono mai te mau taata na roto i teie rave‘a i roto i to’na nei piiraa apî, ma te ite e noa’tu te rava‘i-ore o ta’na e mana‘o nei, e mea ti‘a râ ia’na ia ora na roto i te faaroo eiaha râ na roto i te mata‘u i te faaiteraa i te mau taata e o vai mau oia e eaha o ta’na e ti‘aturi nei ei ite taa-è no te Mesia.

« Te here nei au i te Faaora », o ta’na ïa i parau. « Te popou nei au ia horo‘a i to‘u iteraa papu no Iesu Mesia i to te ao atoa nei ».