Heuheuraa no te taata iho: Te mau haapiiraa e te mau hi‘oraa maitai o te mau peropheta

Elder Robert D. Hales

No te Pŭpŭ no te Tino Ahuru Ma Piti Aposetolo

Na roto i te heheuraa o te taata tata’itahi e ite ai tatou i te mau parau mau faufaa o to tatou nei oraraa.

I te omuaraa no teie nei tuhaa opaniraa o teie nei amuiraa tuiroo, te apiti atu nei au i to‘u aau mehara i te paturaa i te Peresideni Henry B. Eyring hoê tauturu i roto i te Peresideniraa Matamua, e Elder Quentin L. Cook i roto i te Pŭpŭ no te Tino Ahuru Ma Piti, e o Elder Walter F. González i roto i te hituraa o te Peresideniraa pûpû no te Hitu Ahuru. Te faatai atu nei au i to‘u here e i to‘u patururaa e te faaite papû nei au e, ua piihia raua e te Atua e te hoê peropheta ora, te peresideni Gordon B. Hinckley, « mai te au i te Varua o te heheuraa parau e te tohu ».¹

Ua haapii mai te mau ohipa tei tupu i roto i teie na mahana e piti e ma‘iri nei ia tatou i te titauraa i te heheuraa i roto i te ohipa a te Fatu e i te heheuraa no te taata iho i roto i to tatou iho oraraa. Na roto i te heheuraa o te taata tata’itahi e ite ai tatou i te mau parau mau faufaa o to tatou nei oraraa: te natura ora mau o te Atua, to tatou Metua Mure Ore, e Ta’na Tamaiti o Iesu Mesia; te parau mau o te evanelia tei faaho‘i-faahou-hia mai ; e te opuaraa a te Atua e Ta’na arata‘iraa no tatou.

Te rahiraa o te mau mea o ta‘u i ite no ni‘a i te heheuraa no te taata iho, ua haapii mai ïa vau i te reira na roto i te mau hi‘oraa maitai o te mau peropheta i tahito ra e o teie nei tau hopea nei. I teie avatea, te hinaaro nei au i te faaite i te tahi o teie nei mau hi‘oraa maitai to‘u e te pure nei au ia faauruhia tatou tata’itahi i te imiraa i te mau haamaitairaa o te heheuraa no te taata iho i roto i to tatou iho oraraa.

Ei ti‘a retioni apî, ua faauehia vau ia tauturu ia Elder Marion G. Romney i te faanahonahoraa i te hoê tĭtĭ. I roto i te tere maoro, e te hau e tae roa’tu i te amuiraa, ua paraparau noa maua no ni’a i te huru pae varua o ta maua ohipa. Ua haapii Elder Romney ia‘u e, e mea nahea ta te Fatu ia haamaitai ia tatou na roto i te heheuraa. Teie ta’na parau, « e Robert, ua haapii mai au e, ia rave tatou i te ohipa a te Fatu, e farii tatou i Ta’na haamaitairaa no te rave faaoti i te mea o tei faauehia ia tatou ia rave ». Ua faaite faahou mai Elder Romney e, ia tae maua i taua oire atea ra, e tuturi taua no te pure, e uiui taua i te feia o tei mau i te autahu‘araa, e tuturi faahou taua no te pure, e ei reira ïa te Varua Maitai e heheu mai ai ia taua te taata o ta te Fatu i ma‘iti ei peresideni titi apî. Ua fafau mai oia e, e riro te reira ei iteraa rahi no‘u i te pae varua no to‘u oraraa, e o oia mau atura.

Ua tonohia mai tatou tata‘itahi i te fenua nei e to tatou Metua i te Ao ra no te farii i te ora mure ore: « Teie ho‘i te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai ».² Nahea tatou iho nei e ite ai i te Metua e i te Tamaiti ? E mea na roto ïa i te heheuraa. Ua riro te heheuraa no te taata iho ei e‘a e nehenehe ai te Metua i te Ao ra e tauturu ai ia tatou ia ite Ia’na e i Ta’na Tamaiti, haapii e e ora i te evanelia, e e tape‘a maite e tae noa’tu i te hopea i roto i te parau-ti‘a, e ia faataahia no te ora mure ore – no te ho‘i atu i mua i to Raua aro.

E ui paha outou e, « nahea tatou ia imi i te heheuraa no tatou iho ? » Ua a‘o Paulo i te feia mo‘a ia turu‘i i ni‘a i te Varua, eiaha râ i te paari o te ao nei.³ No te farii i te Varua, e haamata ïa tatou na roto i te pure. Ua haapii te peresideni Lorenzo Snow i te evanelia rave rahi matahiti hou oia i tomo ai i roto i te Ekalesia. Aita râ to’na iteraa papû i roaa e tae roa’tu e piti a aore ra e toru hepetoma i muri mai i to’na bapetizo-raa-hia e i to’na pureraa i roto i te mo‘emo‘e. « Ua pou mai te Varua o te Atua i ni‘a ia‘u », o ta’na ïa parau. « Aue te popou e te oaoa o ta‘u i ite… [ no te mea] ua farii au i te hoê iteraa papû e te ora nei te Atua, e e Tamaiti Iesu Mesia na te Atua, e ua faaho‘i-faahou-hia mai te autahu‘araa e te îraa o te Evanelia ».⁴

Ua haapii mai au e, e horo‘a te pure i te hoê niu pa‘eta‘eta mau no te hoê heheuraa no te taata iho. Area râ, e hau atu â te titauraa. A vai noa’i au ei ti‘a retioni, ua haapii-atoa-hia mai au e te hoê aposetolo Elder Boyd K. Packer. Ua tonohia maua no te faanahonaho i te hoê tĭtĭ e ua haamata na roto i te tuturi-amui-raa i roto i te pure. I muri mai, te uiuiraa ïa i te feia faatere o te autahu‘araa e ua pure, ua horo‘a mai Elder Packer i te hoê mana‘o tauturu ia haere haaati maua i teie nei fare. A hahaere noa’i maua, ua faaite oia ia‘u i te hoê parau tumu faufaa no te imiraa i te heheuraa no te taata iho – oia te parau tumu o ta te Fatu i haapii ia Oliver Cowdery: « Area râ, inaha… ia imi maite oe i te reira i roto i to oe aau e tia‘i ».⁵ Ua feruri hohonu maua i ta maua ohipa, e ua tau‘a parau apipiti, e ua faaroo i te reo o te Varua. I to maua ho‘iraa’tu, ua pure faahou e ua tai‘o faahou, i reira, ua ineine maua no te farii i taua heheuraa ra.

E fariihia te heheuraa ia au i te hinaaro o te Fatu, to’na auraa ra, e mea ti‘a ïa ia tatou ia nuu na roto i te faaroo, noa’tu e aita maua i faarii i te taato‘araa o te mau pahono o ta maua i titau. Ei Huimana Faatere Rahi, ua tonohia vau no te tauturu i te faanahonahoraa i te hoê peresideniraa tĭtĭ i raro a‘e i te arata‘iraa a Elder Ezra Taft Benson. I muri mai i te pure, e i te uiuiraa, e i te tai‘oraa e i te pure-faahou-raa, ui maira Elder Benson e ua itehia nei ia‘u e o vai ra te peresideni apî. Pahono atura vau e aita â vau i farii i taua faaururaa ra. Hi‘o maira oia i ni’a ia’u i te hoe taime roa e ua faaite atoa maira oia e, aita atoa ta’na e pahonoraa. Tera râ, ua faauruhia maua ia ani e toru melo autahu’araa ti‘amâ ia a‘o i roto i te tuhaa pureraa o te amuiraa o te mahana maa. Tau taime i muri mai i te haamataraa te a‘oraa a te toru o te taata, ua faauru maira te Varua ia‘u e o oia te peresideni apî. Hi‘o atura vau i te peresideni Benson e ite atura vau i te pape mata i te taheraa i ni‘a i to’na papari‘a. Ua horo‘ahia mai te heheuraa ia maua toopiti atoa ra – na roto râ i te imi tamauraa i te hinaaro o to tatou Metua i te Ao ra, a nuu ai i mua i roto i te faaroo.

I te omuaraa o ta‘u taviniraa i roto i te Ekalesia, ua haapii mai Elder Harold B. Lee i teie haapiiraa i to’na haereraa mai e faanahonaho i te hoê tĭtĭ apî i roto i te mataeinaa o ta‘u e noho ra. Ui maira Elder Lee ia‘u, ei episekopo pii-apî-hia, ia amui ia’na i roto i teie rururaa na te ve‘a. I reira, te hoê taure‘are‘a apî papa‘i ve‘a i te tamataraa i te paari o Elder Lee. Na ô atura oia i ni’a ia’na e, « te parau nei oe e, e peropheta oe. I nahea te taime hopea oe i farii ai i te heheuraa, e eaha ïa ? » Ua faaearii Elder Lee, ma te hi‘o ti‘a’tu ia’na, pahono atura ma te màrû, « i nanahi ra i te hora toru. Te pure ra maua e o vaira te ti‘a ia piihia ei peresideni no te tĭtĭ apî, e ua faaitehia ia maua o vai ra teie taata ». Ua taui te aau o te papa’i ve‘a. Eita roa e mo‘ehia ia‘u te varua tei tae mai i roto i taua piha ra a faaite ai Elder Lee i to’na iteraa papû puai no ni‘a i te heheuraa e fariihia e te feia faaroo e imi ra i te rave i te hinaaro o te Fatu.

Ei mau tamarii faaroo, ei feia apî, ei mau metua, ei mau orometua e ei mau feia faatere, e farii pinepine tatou ma te maere i te heheuraa no te taata iho. Te rahiraa o te heheuraa no te taata iho o ta tatou e farii e o ta tatou e ite, e hau atu â to tatou iho iteraa papu i te tupu i te rahi. Ei episekopo, ua tupu to‘u iteraa papû i te rahi i te mau taime atoa e farii ai au i te heheuraa no te pii i te mau melo o te paroita i roto i te mau ti‘araa. Taua iteraa papu ra, ua haapuaihia ïa i te mau taime a tauturu ai au i te mau Huimana Faatere Rahi e i te feia faatere, te mau Hitu Ahuru Area, e te mau peresideni tĭtĭ ia pii e aore râ, ia tono haere. Te mea faufaa roa’tu râ, ua haapuaihia vau e te mau heheuraa no te taata iho o ta‘u i farii i roto i to‘u ti‘araa ei tamaiti na te Atua, ei tane faaipoipo e ei metua tane. Te oaoa nei au no te arata‘iraa e no te faatereraa a te Varua i roto i to matou utuafare a ani ai matou i te arata‘iraa i roto i te mau ohipa o te utuafare.

No tatou paato‘a, e iteahia ïa te hoho‘a o te heheuraa e fariihia e te mau peropheta i roto i ta tatou heheuraa no te taata iho, mai te au i te faaiteraa a te mau papa‘iraa mo‘a. Ua pure Adamu e o Eva i te i‘oa o te Fatu e ua farii i te heheuraa no te taata iho, oia’toa te ite no ni‘a i te Faaora.⁶ Ua imi atoa Enoha, Aberahama e Mose i te maitai no to ratou mau taata e ua horo‘ahia mai te mau heheuraa nehenehe roa mai tei papa‘ihia i roto i te buka Poe Tao‘a Rahi.⁷ Te heheuraa no te taata iho o ta Elia i farii, e mea na roto mai ïa i te reo iti ha‘iha‘i ;⁸ Ua tae mai ta Daniela na roto mai i te ta‘oto.⁹ Te heheuraa no te taata iho o ta Petero i farii, ua horo‘ahia ia’na te hoê iteraa papû e o Iesu te Mesia.¹⁰ Ua farii Lehi e o Nephi i te mau heheuraa no ni‘a i te Faaora e i te faanahoraa no te ora, e inaha, te taato‘araa o te mau peropheta o te Bibilia e o te buka a Moromona ua farii ïa i te mau heheuraa no te faaara, no te haapii, no te haapuai e no te tamahanahana ia ratou iho e i to ratou mau taata.¹¹ I muri mai e rave rahi mau pure i roto i te hiero, ua farii te peresideni Spencer W. Kimball i te heheuraa no ni‘a i te autahu‘araa.¹² E i muri mai i te pureraa no ni‘a i te horo‘araa i te mau haamaitairaa no te hiero i te mau melo e rave rahi o te Ekalesia, ua farii te peresideni Hinckley i te heheuraa no ni‘a i te hamaniraa i te mau hiero na‘ina‘i.¹³

E farii te mau peropheta i te mau heheuraa no ratou iho no te tauturu ia ratou i roto i to ratou iho oraraa e i te faatereraa i te mau ohipa tahuti o te Ekalesia. Ta tatou râ hopoi‘a maori râ, o te imiraa ïa i te mau heheuraa no tatou iho e no te mau hopoi‘a o ta te Fatu i horo‘a ia tatou.

I teie mau hepetoma i mairi a‘e nei, ua imi te peresideni Hinckley i te heheuraa no ni‘a i te mau piiraa o te faaitehia’tu i roto i teie nei amuiraa. Hoê ava‘e i mairi a‘e nei, i roto i ta matou putuputuraa i te hiero o te Mahana Maha na te Peresideniraa Matamua e te Pŭpŭ no te Tino Ahuru Ma Piti Aposetolo, ua faaroo vau a pûpû ai te peresideni Hinckley i te hoê pure ohie, e te aau tae no te arata‘iraa pae varua. Te pahonoraa o teie pure haehaa, ua faaitehia ïa ia matou paato‘a.

Te ite ra anei tatou i te hoho‘a o te heheuraa i roto i te oraraa o te mau peropheta ? Ua raraa-atoa-hia anei teie mau taura i roto i to tatou oraraa ?

Ua ite tatou i te hoho‘a o te Taraehara.¹⁴ Ua farii tatou i te mau haamaitairaa o te Taraehara ia tatarahapa tatou i ta tatou mau hara e ia haapa‘o i te mau faaueraa. E ua fafau tatou i te rave i te reira i to tatou bapetizo-raa-hia, e ua faaapî tatou i taua fafauraa ra i te mau hepetoma atoa a rave ai tatou i te oro‘a. A ora tamau noa’i tatou i roto i te parau-ti‘a, te faataa ra ïa tatou ia tatou iho ia parau e o Samuela i parau ra e, « e parau mai e te [Fatu] ; te faaroo nei ho‘i to tavini ».¹⁵ E pahono maira te Fatu, ua maitai râ to outou mau mata, te hi‘o nei ho‘i ïa, e to outou mau tari‘a, te faaroo nei ho‘i ïa ».¹⁶

E faaineine tatou i te farii i te heheuraa a te taata iho mai ta te mau peropheta i rave, na roto i te tai‘oraa i te mau papa‘iraa mo‘a, te haapaeraa, te pure, e te paturaa i te faaroo. Ua riro te faaroo ei taviri. A haamana‘o i te faaineineraa a Iosepha no te Orama Matamua :

« Te ere ra râ te hoê o outou i te ite, e ani oia i te Atua ra…

« Te ere ra râ te hoê o outou i te ite, e ani oia i te Atua ra. »¹⁷

Na roto i te faaroo tapetepeta tatou i haapiihia mai ai e, « no te faaroo ho‘i e ravehia’i te semeio ».¹⁸

Tera râ, e ere taua mau semeio ra i te mau faaiteraa noa no te mana o te Atua i te pae tino – te vahiraa i te Miti Uteute, te faati‘araa i tei pohe, te haapuehuraa i te mau papa‘i o te fare tape‘araa i raro e aore râ, te fâraa mai o te mau ve‘a o te ra‘i. Mai te au i te opuaraa a te Atua, rave rahi mau semeio i te pae varua e mau faaiteraa no te mana o te Atua – te aroha faaherehere o tei niniihia mai na roto i te mau faahoruhoruraa, te mau mana‘o, te mau iteraa papu, te mau hopea o te mau fifi, te puai no te ‘aroraa i te mau tamataraa e te tamahanahanaraa i te mau hepohepo e te oto.

E tae mai teie nei mau semeio ia tatou a faaoroma‘i ai tatou i te mea o ta te mau papa‘iraa mo‘a i parau e, e « tamataraa o to [tatou] faaroo ».¹⁹ I te tahi mau taime e riro taua taime tamataraa ra ei tia‘iraa no te farii i te hoê pahonoraa. I to te peresideni David O. McKay taure‘are‘araa e haaputuputu oia i te mau puaatoro, ua hinaaro oia i te hoê iteraa papû area râ, aita te reira i tae mai e tae roa’tu a tavini ai oia i ta’na misioni i Ekotia. Teie ta’na i parau, « e au mai te hoê fâraa o ta te hoê taure‘a i feaa, ua pure au i roto i te mo‘emo‘e – i te hiti o te aivi e i roto i te aua. E haapapûraa ra ia‘u e, e pahonohia te hoê pure haavare-ore ‘i te hoê taime e i te hoê vahi’ ».²⁰

E ere paha te pahonoraa « no teie nei – e faaoroma‘i râ e e tia‘i ».

Te faaite papû nei au noa’tu e tei te hiti aivi e aore râ, tei roto i te aua, i roto i te uru raau e aore râ, i roto i te piha, i teie nei e aore râ i roto i te mau tau mure ore e tae mai, e rave faaotihia ihoa te mau parau a te Faaora ia tatou tata‘itahi: « E ani, e horo‘ahia mai ta outou, e imi, e itea ïa ia outou ; e patoto atu, e iritihia mai te opani ia outou ».²¹ E no te mea ua faauehia tatou eiaha e ani i mau tapa‘o, titau-atoa-hia râ tatou ia « imi – onoono i te mau horo‘a maitai roa ra ».²² Tei roto atoa i teie mau horo‘a te heheuraa a te Varua Maitai e ta te taata iho. E tae mai teie heheuraa « e ua na ni‘a iho i te faau‘e, ua a‘o, e ua na ni‘a iho i te a‘o », mai ta te Faaora i parau e, « e horo‘a’tu vau [te Fatu] ia’na i tei farii maira ».²³

Ia ho‘i haere tatou mai teie atu amuiraa, te pii nei au ia tatou atoa ia imi rahi atu â e ia farii atu â i te Varua o te Atua. Ua pure te Faaora ia farii Ta’na mau pĭpĭ o te Ao Apî [pae apatoerau o te fenua Amerika] i te Varua. I muri iho, mai te hoê himaitai no tatou paato‘a, ua faaru’e maira Oia i Ta’na mau pĭpĭ e na roto i te pure ua haamauruuru Oia i To’na Metua i te Ao ra no To’na niniiraa mai i te reira.²⁴ A pee ana‘e tatou i To’na hi‘oraa maitai e a pure ia farii i te Varua o te Atua, ma te haamauruuru i te mau haamaitairaa nehenehe roa i fariihia i roto i to tatou oraraa.

Te faaite nei au i to‘u iteraa taa è papû e te ora nei Iesu Mesia e te arata‘i nei i Ta’na Ekalesia na roto i te hoê peropheta ora, te peresideni Gordon B. Hinckley. Ua ite au – ua ite au – e te arata‘i nei te peresideni Hinckley i teie Ekalesia na roto i te heheuraa. I roto i te mau parau a Alama, « te parau atu nei au ia outou [teie mau mea] na e, na roto i te Varua Maitai o te Atua i ite ai au i te reira. Inaha ho‘i, i haapae a‘enei au i te maa e i pure a‘enei au i na mahana e rave rahi… E te ite mai e nei au e, o te parau mau ïa ; na te Fatu na te Atua iho ho‘i i faaite mai ia‘u i te reira… ; o te varua heheuraa parau teie tei roto ia‘u nei ».²⁵

Ia farii tatou tata‘itahi i taua Varua ra, ia farii i te mau haamaitairaa no te heheuraa no te taata iho, e ia ite no tatou iho e e parau mau teie mau mea o ta‘u ïa pure mau na roto i te i‘oa o Iesu Mesia, amene.