O Se Faaiuga Faanatinati
I le umi e mafai ona ou manatua, na i o’u autafa se polo soka ma se miti ia avea a’u ma se tama taalo faapolofesa. Sa lagolagoina a’u e o’u matua a o ou tuliloaina lena miti. Sa la uunaia foi au ou te alu i le lotu. Peitai, ina ua oo ina ou matua, na o le taimi lava e leai ai sa’u taaloga ou te alu ai i le lotu. Sa ou iloaina o le talalelei, o gaoioiga a le Ekalesia, ma a’u uo o le a fesoasoani tele ia te au i le olaga, peitai o le mea sa ou naunau moni lava i ai, o le faataunuuina lea o la’u miti e taalo soka.
A o ou koleni, sa amata ona maua a’u uo taua i totonu o kalapu soka tetele. Sa ou maua avanoa e taalo ai, ma koleni faatasi ai ma nisi o nei kalapu. Sa ou faimalaga i atunuu eseese e auai i tauvaga, ma sa ou matua sagisagi ma fiafia i le avanoa e ola ai i le olaga o se tagata taalo soka faapolofesa. I se tasi o nei malaga i Asia, sa toeitiiti lava a taunuu la’u miti. Sa i ai se kalapu tele sa fiafia i le tulaga na latou vaaia ina ua ou taalo ma sa mananao ia te au ia ou auai i le latou au. Peitai, sa maua e sui na vaaia a’u ia ni faaletonu i le taimi o le feutagaiga, ma o lea na matou le sainia ai le konekarate.
I lo matou nuu, o la sa faatumu pepa o isi a’u uo mo le misiona; o isi ua taliu mai a latou misiona ma faamatala ma le naunautai o latou lagona i le avea ai ma se faifeautalai. Sa susulu o latou mata ma ni lagona faagaeetia i taimi taitasi e talanoa ai, ma sa matua malosi lava le Agaga. Sa ou lagonaina le manao e auauna atu foi i se Misiona; sa ou manao ia maua foi nei aafiaga. Peitai, sa ou popole afai ou te filifili e fai se misiona, o le a le taunuu la’u miti mo le soka aua o le a le toe maua lo’u malosi faaletino ma le mataalia. Sa matua maoae lo’u manao e avea ma se tagata taalo faapolofesa; sa tolopo la’u aoga i le iunivesite ae galue ma ola ia tau lava ina faataunuu lenei miti.
I a’u malaga i soka, ou te aumaia lava se kopi o le Tusi a Mamona i taimi uma. Sa ou fiafia lava i upu a perofeta, o o latou soifuaga, o lo latou naunau e usitai i poloaiga, ma a latou faataitaiga lelei mo o latou tagata. Sa ou lagona le maasiasi ona e le o au o se faataitaiga mo isi tagata taaalo ma le le faamuamua o mea a le Atua. O nisi taimi sa ou taumafai ai e faasoa o’u talitonuga, ae o le mea ou te faalogo i ai i taimi uma o le “Tatou olioli i le malaga. Faagalo na lapisi. Tatou o tatou fiafia!” Sa amata ona ou itagofie i talanoaga, o le le faamaoni, ma isi vaega o le olaga soka. E tele taimi sa ou lagona ai le faaesea ma le faanoanoa, ma sa ou iloa sa i ai se nofoaga sa ou lagona ai le fiafia i taimi uma ma sa i ai uo sa amanaiaina a’u—o uo sa faatasitasi i gaoioiga ma siva, o vasega seminare ma le inisititiuti—o uo faaselesitila. Sa ou matua misia lava na mea.
I se tasi Aso Sa na ou le malaga ai, sa ou alu i le lotu i le matou uarota i Pasila. I le faaiuga o sauniga, sa valaau mai le epikopo ou te alu atu i lona ofisa ma te talanoa. Sa ou iloaina o le a ma talanoa e uiga i se misiona, aua ua taliu mai tagata uma matou te tupulaga i o latou aiga [mai misiona]. Sa tuu mai e le epikopo se lu’i ia te au ina ia ou alu i se misiona, ma sa ou taumafai e sui le mataupu, i lo’u fai atu i ai ou te lei sauni. Sa ou taumafai i soo se auala e faauilavea i le epikopo, peitai sa ia taumafai pea ma faatalitonuina au i le taua o se misiona. Na i’u le ma talanoaga i le faatuina o se sini mo la’u tapenaga.
I ni nai masina mulimuli ane, sa ave i totonu a’u pepa ma sa faaauau pea foi a’u koleniga. O le taimi lena, ua mafai ona ou tuufaatasia le soka ma le Ekalesia i lo’u mafaufau. Ae ou te lei iloa, e le mafai ona tumau mo se taimi umi. E tatau lava ona ou filifili.
Ina ua taunuu mai lo’u valaauga, sa potopoto mai lo matou aiga i le fale. Sa matou matua sagisagi fiafia uma. Ona tatagi mai lea o le telefoni.
I le isi itu o le laina, sa ta’u mai ai e lo’u sui e vaaia la’u soka ua ia mauaina se konekarate lelei mai se kalapu mai Europa. Sa titi’i a’e ou mafaufauga! Sa mafai ona ou vaai faalemafaufau i le faatumulia o le malae taalo i tagata e maimoaina taaloga. Sa ou mafaufau i le fale matagofie ma le taavale ma le totogi e mafai ona ou maua. Ua toetoe lava ina a taunuu la’u miti. Ua i o’u lima lava—ona ou tilotilo atu lea i le teutusi o loo i ai lo’u valaauga o i tafatafa o le telefoni.
Sa amata ona loimatā o’u mata. I sina taimi itiiti, a ua pei o se ata tifaga faasolo lo’u olaga. I le telefoni, sa fesili mai lo’u sui mo le soka pe o le a so’u manatu i le talafou. Sa ou le gagana. Sa le mafai ona ou tautala, ma sa gatete o’u vae. Sa ou le manao e oo moni mai le taimi lenei, ae na oo mai lava! Ua tatau ona ou faia se faaiuga, o le faaiuga e aupito sili ona faigata i lo’u olaga.
I lo’u leo gatete, sa i’u ina ou fai atu ia te ia ua ou mauaina se konekarate e sili atu. O le a avea au ma se faifeautalai o le Ekalesia a Iesu Keriso o le Au Paia o Aso e Gata Ai mo le lua tausaga. Sa ou faafetai atu i le sui mo le avanoa ma mo lana galuega ma taumafaiga mo au. Ona tuu lea i lalo o le telefoni ae ou alu i lo’u potu, ma ou tagi ai mo se taimi umi. Sa ou iloaina o le a le faatali lena avanoa mo ni tausaga se lua, ma o le a le taunuu lava la’u miti mo le soka.
Sa ou tootuli ma tatalo atu i le Tama Faalelagi, ma ole atu mo se faamafanafanaga. Sa ou lagonaina se tali mai o se leo filemu ma le malu, e faamafanafana ai lo’u loto i le faapea mai, “Lo’u atalii e, o lena ua avea oe ma se vaega o le ‘au sili i le lalolagi.” Sa ou mafaufau i nei upu ma o loo ou mafaufau pea lava i ai i le taimi nei.
O le taimi nei, ua fo’i mai la’u auaunaga i le Misiona a Pasila Fortaleza, ou te le tu’itino lava i la’u filifiliga i soo se itu. Ua avanoa le Ekalesia moni a Iesu Keriso i soo se tasi e manao ia fiafia. O la’u misiona foi sa ou aoaoina ai, o le auala sili e fiafia ai, o le faia lea o le mea e finagalo ai le Tama Faalelagi tatou te faia. O la’u misiona o le filifiliga aupito sili lea ua ou faia i lo’u olaga. Sa aoao mai ai ia te au, o i latou uma o e saili muamua le malo o le Atua o le a i ai se tulaga i le ‘au a le Alii (tagai Mataio 6:33).