Savali a le Au Peresitene Sili
Fafagaina o Ana Mamoe
Sa aoao atu e le Faaola ia Peteru ma isi Ana Aposetolo ma Ona soo le mafuaaga ma le auala latou te fafagaina ai isi. E te manatua lena mea i le tala a le Tusi Paia sa Ia fafagaina i latou ona faatoa Ia aoao atu ai lea. Na faasatauroina o Ia ona toetu ai lea. Sa malaga atu Ana auauna i Kalilaia. Sa latou fagogota i le po atoa ae leai se i’a na maua. Ina ua latou latalata atu i le matafaga i le vaveao, sa latou le matauina o Ia. Sa Ia fetalai atu ia te i latou, ma faasino atu le mea e lafo i ai a latou upega, ma ina ua latou faia e pei ona Ia tau atu ia i latou, sa faatumulia a latou upega. Sa latou faataalise atu e faafetaia’i ia te Ia i le matafaga.
Na latou maua atu se afi malala o loo tunu ai i’a, ma areto. Sa masani ona ou mafaufau, po o ai na faia le afi, mauaina i’a, kukaina taumafa, ae o le Matai sa saunia Ona soo ina ia fafagaina, e sili atu nai lo i’a ma areto. Sa Ia tuuina atu i latou e taumamafa muamua. Ona Ia aoao atu lea ia i latou e uiga i taumafa faaleagaga. Ma sa Ia tuuina atu se poloaiga o loo i ai pea lava mo i tatou taitoatasi.
“Ua uma ona latou aai, ona fetalai atu lea o Iesu ia Simona Peteru, le atalii o Iona, pe sili mai lou alofa ia te au, i lo latou nei? Ua fai mai o ia ia te ia, Ioe, le Alii e; ua e silafia ou te alofa ia te oe. Ona fetalai atu lea o ia ia te ia, Ia e fafaga i au tamai mamoe” (Ioane 21:15).
O La Tatou Feagaiga e Fafaga
O le Au Paia a le Atua o loo i ai pea i lalo o se feagaiga e fafaga ai isi i le faaleagaga, ae maise lava i latou faatoa liliu mai, vaivai, pe le malolosi foi i le talalelei. Ua faamanuiaina i tatou e ola i se taimi ua tatau ona faateleina ai le faatupulaia o le mana e tausia tagata fou o le Ekalesia ma o le a tuuina atu i luga o le Au Paia faatuatua. O lena mana sa tuuina atu muamua i le nuu o le Alii. O se faamatalaga lenei o le auala na faia ai e le nuu o le Alii, i se taimi faamanuiaina e pei ona taua i le Tusi a Mamona: “Na faitauina i latou … ina ia manatulia i latou ma tausia ma le afioga lelei a le Atua, ina ia faatumauina i latou i le ala tonu, ina ia tutumau i latou i le mataala pea ma le tatalo, ua na o le alofa o Keriso e faalagolago i ai, o Ia o Le na faia ma Le na faaatoatoaina lo latou faatuatua” (Moronae 6:4).
Ua tatou taumafai uma lava i nisi taimi e fafaga le faatuatua o se tasi. O le toatele o i tatou ua tatou lagonaina le popole o isi i lo tatou lava faatuatua, faatasi ai ma lena mea, ua tatou lagonaina ai lo latou alofa. E toatele nisi o i tatou o loo i ai se tamaitiiti o loo vaavaai mai ia te i tatou ma faapea mai, “Ta te o i le lotu?” po o le faapea foi, “Ta te tatalo faatasi?” Ma e i ai foi ni mea sa tatou le fiafia ai. O se tasi tatou te alolofa i ai atonu o le a le taliaina a tatou taumafaiga e fafaga lona faatuatua. Ua tatou iloa mai mea faigata na oo ia i tatou, e amanaia foi e le Atua le filifiliga a Lana fanau ia lē fafagaina. Ae o le taimi lenei ua tatou lagona ai le uunaiga ua toe faafou ma le faamoemoe o le a faateleina lo tatou mana e fafagaina ai.
O le Alii lava e ala mai i Lana perofeta soifua na fetalai mai o le a Ia faasaoina se vaega tele o tagata liliu mai e uia le vai o le papatisoga. Ma o le a faataunuuina e le Alii e ala ia i tatou. Ina ia tatou mautinoa, o le faia o mea faigofie, ma mea e mafai e se tamaitiiti ona fai, o le a tatou maua ai le mana sili e fafagaina ai le faatuatua mu’amu’a.
O le nofoaga e amata ai o o tatou lava loto. O mea o loo tatou mananao i ai ma o tatou loto atoa o le a fuafuaina ai se tulaga maualuga pe mafai ona tatou faatagisia la tatou aia mo le faatasi mai o le Agaga Paia, afai e le faia lea tulaga, e mafai ona leai se faafailelega faaleagaga. E mafai ona tatou amata i le aso i lo tatou sailia lea o i latou e tatau ona tatou faafaileleina, e pei ona silafia e lo tatou Tama Faalelagi, ma ia tatou lagonaina mea o loo Ia lagonaina mo i latou.
O na tagata fou o le Ekalesia, o Lana fanau foi. Sa Ia silafia i latou e pei ona tatou iloa o Ia i le muai olaga. O Lona faamoemoega, e faapena foi ma Lona Alo, le Alii o Iesu Keriso, o lo latou toe foi atu lea ia te Ia ma tuuina atu ia i latou le ola e faavavau, pe afai lena latou te filifilia. Sa Ia taitaiina ma lagolagoina Ana faifeautalai e ala i le Agaga Paia, e saili ma aoao ma papatiso ia i latou. Sa ia tuuina atu Lona Alo e totogi ai a latou agasala. O lo tatou Tama ma le Faaola o loo silasila atu i na tagata liliu mai, o ni tamai mamoe mu’amu’a, ua faatauina i se tau tatou te le malamalama i ai.
E mafai ona talisapaia e se matua faaletino, i ni auala laiti, lagona o se Tama Faalelagi alofa. Pe a oo a tatou fanau i tausaga e tatau ai ona tuua la tatou tausiga, tatou te atugalu mo lo latou saogalemu, ma talotalo ia le toilalo i latou e tatau ona maua ai lo latou fesoasoani. E mafai ona tatou lagonaina nisi vaega o le alofa o le Tama ma le Faaola mo tagata fou o le Ekalesia ma lo Laua faatuatuaga ua tuuina mai ia i tatou mo le faafaileleina.
O Lo Tatou Faalagolago i le Agaga
O na lagona o loo i o tatou loto mo tagata fou, o le a agai atu i se mamao e mafai ai ona tatou agavaa mo le fesoasoani a le Agaga, ma faatoilaloina ai le atugaluga, lea e mafai ona taitaieseina ai i tatou mai lo tatou tiutetauave paia. O se tulaga atamai le popole ina nei le talafeagai o tatou tomai ma le matafaioi ua tuuina mai tatou te faafailele ai le faatuatua o isi. O o tatou tomai, po o le a lava le tele o loo i ai, o le a le lava. Ae o lena vaaiga moni faatapulaaina, e tulai mai ai le lotomaulalo e mafai ona taitaiina atu ai i le faalagolago i le Agaga ma lona mana.
Sa fautuaina e Peresitene Polika Iaga (1801–77) i tatou e lototetele, tusa lava pe tatou te vaivai: “Pe a lauga atu se tasi i se faapotopotoga, ma ua le mafai e le failauga ona fai atu ni upu e sili atu i le ono fuaiupu, ma o na fuaiupu e le lelei lona faatulagaina, ae afai o lona loto o loo mama i luma o le Atua, e sili atu le taua o na fuaiupu le lelei nai lo lagona loloto sili ae aunoa ma le Agaga o le Alii, ma e sili atu lona taua moni i le silafaga a le Atua, agelu, ma alii sili. I le tatalo, afai o upu a le tagata e laiti pe le lelei foi ona faaali atu, ae afai e mama le loto i luma o le Atua, e sili atu ona taua lena tatalo nai lo lagona loloto sili o se failauga Roma [o se tulafale Roma o le seneturi muamua T.L.M]. O le a se mea o loo popole i ai le Alii, le Tama o i tatou uma, i le ala tatou te faaali atu ai o tatou lagona? O le loto faamaoni e sili atu ona taua i le Alii nai lo pomu, manatu faamaualuga, mea feilafi, ma faaupuga anoa ua tusia e le tagata. Pe a ia silasila atu i se loto ua faatumulia i le faamaoni, amiotonu, ma ua faapei o tamaiti, ua ia silasila i se aoaoga faavae o le a tumau e faavavau—’O le agaga lena o lo’u lava malo—le agaga sa ou tuuina atu i la’u fanau.’”1
E mafai e se tamaitiiti ona ia faia mea e aumai ai ia i tatou le mana e tausi ai le faatuatua o isi. E mafai e tamaiti ona latou valaauliaina se tagata fou liliu mai latou te malaga atu i se sauniga. E mafai e tamaiti ona faaali atu le laufofoga fiafia ma faafeiloai se tagata fou ua malaga mai i le falesa po o se vasega. E faapena foi i tatou. Ma afai tatou te faia lena mea, o le a avea le Agaga Paia ma a tatou soa tumau. O le popole i le le iloa o se upu e tautala atu ai, ma le teena e tagata, o le a aveesea ia i tatou. O le tagata fou o le a le avea ma se tagata ese ia i tatou. Ma o le a amata ona tausia i latou e le Agaga Paia tusa lava pe tatou te le i talanoa atu ia te ia i upumoni o le talalelei.
E le tau manaomia se valaauga e sili atu nai lo le avea ma se tagata o le au paia mo se tausiga, e ala i lou aapa atu ma le lotoalofa. O i tatou e le o valaauina e aoao atu pe talai atu e mafai ona faafaileleina i le upumoni a le Atua pe a tatou saunia mo lea tulaga. E mafai ona tatou faia i soo se taimi lava tatou te talanoa ai ma se tagata fou, ma taimi uma foi tatou te auai atu ai i se lesona i vasega. Soo se upu lava tatou te tautatala ai, e mafai ona faamalosia pe faavaivaia ai foi le faatuatua. Tatou te manaomia le fesoasoani mai le Agaga e tautatala atu ai i upu o le a faafailele ai ma faamalolosia.
O Ki e Lua i le Mauaina o le Fesoasoani
E lua ki maoae mo le valaauliaina o le Agaga e taitaia soo se upu tatou te tautatala ai mo le faafaileleina o isi. O le suesue lea i tusitusiga paia i aso taitasi ma le tatalo o le faatuatua.
O le a taiala e le Agaga Paia mea tatou te tautatala ai pe afai tatou te suesue ma mafaufau i tusitusiga paia i aso taitasi. O upu o tusitusiga paia latou te valaauliaina le Agaga Paia. Sa taua faapea e le Alii: “Aua le saili e talai atu la’u upu, ae muai saili ia maua la’u upu, ona matala ai lea o lou laulaufaiva; o lea, afai e te manao ai, o le a e maua lo’u Agaga ma la’u upu, ioe, o le mana lea o le Atua i le faatalitonuina o tagata” (MFF 11:21). Faatasi ai ma suesuega i aso taitasi i tusitusiga paia, e mafai ona tatou faalagolago i lea faamanuiaga i talanoaga faasamasamanoa po o le vasega foi pe a fesiligia i tatou e se faiaoga mo se tali i se fesili. O le a tatou iloa ai le mana sa folafola mai e le Alii: “Aua nei popole muamua outou i mea o le a outou fai atu ai, a ia teu pea i o outou mafaufau upu o le ola, ma o le a tuuina atu ia te outou i lea lava itula lena vaega e tatau ai mo tagata taitoatasi” (MFF 84:85).
Tatou te tolo’a’i afioga a le Atua e le na o le faitau o upu i tusitusiga paia ae ia tatou suesue i ai. E mafai ona fafagaina atili i tatou e ala i le mafaufau loloto i ni nai upu, ma faatagaina le Agaga Paia e fai ma mea taua ia i tatou, nai lo le faitau vave i ai ma faamaeaina mataupu uma o tusitusiga paia.
E pei lava o le mafaufau loloto i tusitusiga paia e valaaulia ai le Agaga Paia, e faapea foi i a tatou olega i le tatalo i aso taitasi. Afai tatou te le ole atu i le tatalo, o le a seasea oo mai o Ia ia i tatou, ma a aunoa ma a tatou talosaga, o le a le latalata mai lava o ia ia i tatou. “O le a tuuina atu foi le Agaga ia te outou i le tatalo i le faatuatua; ae afai tou te le maua le Agaga aua tou te aoao atu“ (MFF 42:14). O lagona moni, ma olega faifai pea mo le faatasi mai o le Agaga Paia, ma le loto faamaoni e tausia fanau a lo tatou Tama, o le a auala mai ai faamanuiaga mo i tatou ma i latou o loo tatou alolofa ma auauna atu i ai.
O le afioga lelei a le Atua lea e tatau ona tatou tausia, o le mataupu faavae faigofie lena o le talalelei. E le manaomia lo tatou popole i le tulaga o le faigofie po o le fai soo. O le Alii lava Ia sa ia faamatalaina le auala e oo atu ai lena mataupu faavae i loto o alii ma tamaitai mo le faafaileleina o i latou:
“O la’u mataupu lenei, o le mataupu lea na tuuina mai ia te au e le Tama, ou te molimau atu i le Tama, o le Tama foi e molimau mai ia te a’u, a o le Agaga Paia e molimau i le Tama atoa ma a’u. Ou te molimau atu foi, o le Tama o loo poloai atu i tagata uma o i mea uma, ia latou salamo ma talitonu mai ia te a’u.
“O i latou uma foi o e talitonu mai ia te au, ma papatisoina, e faaolaina i latou, o i latou ia e fai mo latou tofi le malo o le Atua.
“Ai se le talitonu mai foi ia te a’u, ma le papatisoina, e faasalaina ia.
“E moni, e moni, ou te fai atu ia te outou, o la’u mataupu lea, o a’u foi ou te molimau atu mai le Tama, ai se talitonu mai ia te a’u, e talitonu foi o ia i le Tama, o ia lena e molimau i ai foi le Tama ia te au, aua na te asiasi ia te ia ma le afi ma le Agaga Paia” (3 Nifae 11:32–35).
Sa faaauau pea ona faamatalaina e le Alii i latou o le a fafagaina i lena mataupu faigofie ma sa latou tumau ai, o i latou o le a latou maua le malo selesitila, e faapei i latou o tamaiti. E manaomia le loto faatamaitiiti mo le mauaina o musumusuga a le Agaga, ina ia gauai atu i na poloaiga ma usitai. O le mea lena e manaomia mo le fafagaina i afioga lelei a le Atua.
O Le Mu’amu’a o Tamai Mamoe
O le mafuaaga lena e mafai ai ona tatou matua faamoemoe i la tatou matafaioi mo le faafaileleina o tagata fou o le Ekalesia. Ae peitai, e tusa lava pe itiiti pe tele so latou malamalama i aoaoga, ua tuuina atu i latou lava ma le lotomaulalo i feagaiga o le papatisoga ma maua le avanoa e taitoalua ai ma le Agaga Paia. O le mea lea, ona o le mu’amu’a o lo latou faatuatua, lea e mafua ai ona faatusa i latou e le Faaola o tamai mamoe, e oo mai se taimi e faamaonia ai e i latou lava le naunautai, e fai le mea ua finagalo le Faaola latou te faia.
Afai o mea uma o loo moomia mo lo latou faatoa auai i le Ekalesia ua manino lona faamalamalamaina ma le alofa, ma afai ua tuuina atu i ai le avanoa e faalautele ai lo latou malamalama i le Ekalesia, ma o lo latou galulue ai i lena auaunaga ua faia ma le alofa, ma faafaileleina i le onosai ma se faamalosiauga, o le a faamalolosia i latou e le Agaga Paia ma o le a faafaileleina foi i latou e mana e sili atu ia i tatou. A latou tutumau, e le manumalo foi faitotoa o seoli ia te i latou.
Sa tuuina atu e Peresitene Polika Iaga se folafolaga i le auala e tumau ai ma faatupulaia lo latou malosi: “O e faamaulalo i latou lava i luma o le Atua, ma faatalitali ia te ia ma le loto atoa ma le loto fiafia, o le a maua sina vaega itiiti o le upu ma le upu, o le fuaiupu ma le fuaiupu, o sina mea itiiti iinei ma sina mea itiiti iina, ‘o le taimi nei ma ou te toe fai atu,’ e pei ona saunoa mai le [Uso] o Ioane Teila, seiloga ua latou maua se vaega mautinoa. Ona latou tausia lea ma faapelepele mea ua latou maua, ma avea ma a latou soa i taimi uma e faamalosia ai manatu lelei uma, mataupu ma aoaoga faavae ma le faia o galuega lelei uma e mafai ona latou faia, ina ua maea sina taimi, ua avatu e le Alii ia i latou le vai, e puna i luga i le ola e faavavau.”2
O le uiga lena o le fuaitau o loo i le Moronae, “Ua na o le alofa o Keriso e faalagolago i ai, o ia o Le na faia ma Le na faaatoatoaina lo latou faatuatua” (Moronae 6:4). O lo tatou Faaola lava na faaavanoaina lo tatou faamamaina e ala i Lana Togiola ma lo tatou usiusitai i Ana poloaiga. Ma o le Faaola, o le a ia tausia i latou o le a ui ifo i le vai o le papatisoga ma maua le meaalofa o le Agaga Paia. Pe a latou manatua pea o Ia ma pe a latou faaauau pea ona usiusitai e pei o tamaiti, o Ia lava o le a faamautinoa o le a i ai pea Lona Agaga e faatasi ma i latou.
E mafai ma o le a avea i tatou ma sina vaega o lenei galuega maoae. O le a tatou suesue ma tatalo ma galulue ina ia agavaa mo le mafutaga ma le Agaga Paia. O le a faatagaina i latou e feiloai atu i tagata fou o fanau pele a lo tatou Tama Faalelagi, ma o le a taitaiina i tatou e faafailele i latou ma le alofa, maua avanoa e auauna atu ai, ma afioga lelei a le Atua. Ona tatou iloa ai lea i o tatou lava taimi le faifeautalai sili sa faamatalaina atu e Amona i ana soa faifeautalai, e pei lava ona avea i tatou ma soa i faifeautalai o loo talafaauto i soo se vaega o le lalolagi:
“Faauta, sa afu le tosaito, ma ua manuia outou, aua na outou tuu atu le selesaito, ma ua selesele ma lo outou malosi, ioe, o le ao atoa na outou galulue ai; faauta foi, o a outou fusi saito e tele! E faaputuputuina ai foi i falesaito, ina ia le faamaumauina ai.
“Ioe, e le lafoina i le afa i le aso gataaga; e le suatia foi i le asiosio; ae peitai, a sau le afa, e faapotopotoina i latou i le mea e teu ai, ina ia le ati atu le afa ia te i latou, ioe, e le lelea foi i latou i matagi tetele i le mea e loto ai le ita mai ona ave i ai i latou.
“Ae peitai, faauta, e i ai i latou i aao o le Alii o le seleselegasaito, e ona foi i latou; na te faatuina foi i latou i le aso gataaga” (Alema 26:5–7).
E mafai i le usiusitai faatauvaa ona tatou fesoasoani i le Alii i le aveina atu o mamoe, o Ana mamoe, i Ona aao ma aveina atu i latou e Ona aao i lo latou Tama, ma lo tatou Tama. Ou te iloa o le a liligi mai e le Atua mana o le lagi i o tatou luga a o tatou auai atu i le faasaoina o se vaega paia o agaga.