Ola i se Olaga Paleni
Mai se saunoaga i se faigalotu na tuuina atu i le Kolisi Faapisinisi a le AAG i le aso 1 o Mati, 2006.
Ou te matea o le toatele lava e mananao i le ituaiga olaga e maua ai le fiafia tumau. Ou te talitonu, o lea mea, o le a oo mai i le fuafuaina o se ala e tau atu ai i le ola e faavavau. O le a faavavevave ma faigofie ai i le gauai atu i uunaiga a le Agaga ma le ausiaina o le paleni e tatau ai.
A ou tautala e uiga i le paleni, ou te faatatau i mea moni faaleagaga, faalemafaufau, faaletino, faalevafealoai, ma faaletamaoaiga. Ua faauigaina le paleni o le mausali faalemafaufau ma faalelagona; o le aumaia o se mea po o se tagata i le tulaga laugatasia po o le tulaga talafeauga.
O Le Luitau o le Ausiaina o le Paleni
E pei ona outou silafia, o le feagai ma luitau o le olaga i aso faisoo, e mafai ona faaletonu ai le paleni ma le sologa lelei o loo tatou sailia. E toatele i tatou e lofituina a o tatou saili ia maua ma tausisia le paleni i o tatou olaga. Ua ou aumaia ata faataitai nei na sii mai i se saunoaga a Elder M. Russell Ballard o le Korama a Aposetolo e Toasefululua.1
Fai mai se tamaitiiti aoga nofofua, “Ou te iloa o loo fai mai tusitusiga paia ma taitai o le Ekalesia i ona po nei, e le tatau ona faatuatuai ona fai faaipoipoga ma aiga. Peitai ua 26 o’u tausaga. E lei maea a’u aoga, e leai foi sa’u galuega e mafai ai ona tausi se aiga. E mafai la ona faanoi a’u mai le faaipoipo, mo le taimi nei?”
Fai mai le tasi, “O au o se mafine, ma e lei fai mai lava foi se tasi ia te au ma te faaipoipo. E mafai faapefea ona ou tausia le poloaiga ia faaipoipo?”
Fai mai se tina talavou, “Ua ou matua pisi lava i le faamaeaina o la’u aoga ma le tausiga o la’u fanau. E tau le maua so’u taimi e mafaufau ai i se isi lava mea. O nisi taimi ou te manatu ua tele naua mea ua faamoemoe mai le lalolagi ma le Ekalesia ia te au e fai. Tusa lava po o le a lo’u galue malosi, o le a le mafai lava ona ou faataunuuina faamoemoega o tagata uma. Ou te tauivi ma le i ai o le talitonuga mautu ma le lagona o le tausalaina, mamafatu o le avega, ma le lotovaivai ona o le le faia o mea uma e faatonu mai ia te au e tatau ona fai ina ia maua ai le malo selesitila.”
Fai mai se tasi o le au aooga, “E tatau ona ou faigaluega e totogi ai la’u aoga. E le lava se taimi e fai ai a’u meaaoga ma auauna ai i le Ekalesia. E mafai faapefea ona ou ola i se olaga paleni?”
Ua ou faalogo o faapea mai nisi e toatele, “Ou te malamalama lelei lava e pei foi o isi i le taua o le faamalositino, ae e leai so’u taimi e fai ai.”
Sa faapea mai se isi tamaitai, “E mafai faapefea e se tane ma se ava i lenei vaitau ona tausi lo la’ua aiga pe afai e le faigaluega le ava? E matua le lava tupe e totogi uma ai mea e tatau ona totogi pe afai e le faigaluega o ia.”
Sa faaopoopo mai se tamā talavou, “O la’u pisinisi fou e manaomia uma ai lo’u taimi. Ua ou iloaina ua tuulafoai lo’u toalua, le fanau, ma valaauga o le Ekalesia, ae afai e mafai ona maea le tausaga lenei, o le a lava a’u tupe, ona sologa lelei lea o mea uma.”
Oi, ua na o se faimiti. E le faasolo ina faigofie le olaga; e atili ai ona lavelave. Aua nei moemiti mo a taeao faapea e tele le taimi o le a maua ai ma tuuitiitia ai tiutetauave. Sauniuni e fetaiai ma mea o le a oo mai e ala i le faataitai nei i ai, i tulaga o e i ai nei, i mea o le a manaomia ona e faia i le taimi lena.
Pe tatau ea ona tatou lafoai i le tulimata’ia o se aoaoga e maualuga atu ma atiina ae ma faamalolosia i tatou lava? Pe tatau ea ona tatou lafoai le tulimata’ia o le faaipoipoga ma le aiga? Pe tatau ea ona tatou faamutaina le tapenapena e saunia mea e manaomia mo o tatou aiga ma i tatou lava? Pe tatau ea ona tatou faagalogalo i le auauna atu i le Ekalesia?
O le tali i fesili taitasi o le, leai. E ui lava e le mafai ona tali atu i nei atugaluga uma ua ou ta’ua, faamolemole ia mafaufau i manatu nei.
E Manaomia le Paleni
Sa aoao mai e le Perofeta o Iosefa Samita, “O se tasi o mataupu faavae autu o le ‘FaaMamona’ o le mauaina lea o le upumoni, po o fea lava e oo mai ai.”2 Sa ia faailoa mai foi “o le mamalu o le Atua o le malamalama lea” (MFF 93:36) ma le “o soo se mataupu faavae o le malamalama tatou te maua i lenei olaga, o le a tutu mai faatasi ma i tatou i le toe tutu” (MFF 130:18).
Sa saunoa Peresitene Gordon B. Hinckley: “Ou te fia aioi atu ia te outou ina ia tausisia le paleni i o outou olaga. Aua nei e mātele i le mea lea e mafai ona ta’ua ‘o le taotasi i se mataupu e tasi faaletalalelei.’ O se taumafataga lelei, e aofia ai i taimi uma ni ituaiga taumafa eseese. E tatau ona i ai se malosiaga tele i lau mataupu e te lelei ai … ua e filifilia. Peitai, ou te lapataia oe ia aua nei avea na o lena mataupu ma mea e te fiafia i ai… .
“… Ia faaeteete i mea e pupū i ai le mafaufau. Ia faaeteete i le manatu papau. Ia tele ni mataupu e te fiafia i ai ao e galueaiina le malosi faatupulaia i le mataupu e te faigaluega ai.”3
Na aoao mai foi Peresitene Hinckley e i ai lo tatou tiute valafa—i o tatou aiga, o o tatou falefaigaluega, i le Alii, ma i tatou lava. Sa Ia fautuaina i tatou, ina ia “faaavanoa sina taimi e mafaufau loloto ai, e fai ai sina faamalositino laitiiti.“4
A ou malaga i se vaalele, ou te matauina e amata loa ona lele a’e le vaalele mai le malaevaalele, ona tautala mai lea o se tasi o le aufaigaluega ma o se tasi o mea na te ta’ua e faapea, “Ia, afai e leai se ea i totonu o vaalele, o le a pau ifo se faamanava okesene mai i ou luga a’e. Afai o loo e vaaia ni tamaiti laiti po o se tasi e i ai ni manaoga faapitoa, ia mautinoa e faamaulu muamua lau faamanava okesene ona faatoa e taumafai ai lea e fesoasoani atu i isi.“ Aisea e fai mai ai faapena le tagata faigaluega? E mautinoa lava, afai e te matapogia, e le mafai ona e fesoasoani atu i se isi tagata. O lea la, e faapena foi la tatou tautua i tagata ma la tatou tautua i le Ekalesia ma a tatou galuega. Afai tatou te le faamalolosia i tatou lava, o le a le mafai ona tatou oo i se tulaga e faamalolosia ai isi.
Ua saunoa mai foi Peresitene James E. Faust, o le Fesoasoani Lua i le Au Peresitene Sili e faapea“ e sili atu ona faigofie mo i latou e i ai se tulaga paleni o le amiotonu ona gauai atu i ‘galuega alofa a le Agaga Paia’ (Mosaea 3:19). Ona tatou lafoai ai lea o uiga o se alii po o se tamaitai o le lalolagi… .
“O le tulaga paleni i se fua faatatau tele, o le iloaina lea o mea e mafai ona suia, faatulaga i latou i manatu tonu, ma iloa mea o le a le suia.”5
O Aafiaga Patino e Tolu
Sa ou ola ae i Panguitch, Iuta, o se taulaga laitiiti e 1,500 ona tagata. Sa avea au ma se ia tele i totonu o se vaituloto laitiiti. Ina ua ou faauu mai le aoga maualuga, sa ou maua se sikolasipi ou te aoga ai i le Iunivesite o Polika Iaga. Ina ua ou taunuu atu iina, na vave lava ona ou iloaina, o au o se ia laitiiti i totonu o se vaituloto tele, ma sa ou lagona ai le lotovaivai. Sa ou manatu ifo, “Ua ou fia alu ese ma iinei.” Sa amata ona ou alu i lo’u aiga i faaiuga o vaiaso. Sa ou alu i le lotu i lo matou aiga—ae le o lotu i le aoga. Sa ou le faatumauina ou togi i se tulaga sa tatau ona ou i ai. Ou te le’i masani i tagata. E oo atu i le faaiuga o le tausaga, na ou faapea ifo, “O le a ou le toe foi atu. E le o le mea lenei mo au.”
Sa ou alu i lo’u aiga i le taumafanafana lena. E tusa o le ogatotonu o Aokuso, na ou iloaina ai, ua ou toe fia foi atu i le aoga. O lea na ou toe alu ai. O le taimi la lenei, sa vave lava ona ou auai i se faalapotopotoga fegalegaleai a alii ma se faalapotopotoga auauna atu. Sa ou nofo i fale nofotumau. Sa amata ona ou auai i le lotu i totonu o le lotoa nai lo le alu i lo’u aiga i faaiuga o vaiaso. Sa alualu i luma ou togi. Na amata ona ou iloaina o le olaga i totonu o le lotoa [o le aoga] o se olaga manaia ma sa ou fiafia i lo’u i ai iina.
Mulimuli ane na ou aoga i le aoga faaloia. Sa faigata lo’u tausaga muamua ona sa ou suesueina se ituaiga aoaiga e ese mai nai lo le mea sa ou aoaoina a o lei maua so’u faailoga, ma sa toe faalelelei foi ou togi nai lo le mea sa tatau ona i ai. O le tausaga lona lua, na maua ai sa’u galuega faavaitaimi i se ofisa loia a o ou aoga lava. Na toe alu i luga ou togi. I le faaiuga o lo’u tausaga muamua, na ou faaipoipo ai i lou toalua o Joy. E ui lava i a’u matafaioi faaopoopo, sa sologa lelei lava mea uma. Sa sili atu le lelei o o’u togi nai lo se isi lava taimi.
O le aafiaga mulimuli ou te fia faasoaina atu na oo mai ina ua pasi la’u suega e avea ai ma se loia faamaonia. Na oo mai se loia ua leva ma ua masani i le galuega ma fai mai, “Bob, e le mafai ona avea oe ma se loia faamanuiaina ma lelei e tulai mo se tasi ma se tagata toaga o le Ekalesia o le AAG i le taimi lava e tasi.” Sa ou mafaufau i isi tagata o e na faamanuiaina i a latou galuega faaloia ma toaaga i le Ekalesia, ma sa ou naunau ai ina ia ou toaga i le Ekalesia. O la’u filifiliga sa lei aafia ai lo’u tulaga faamanuiaina o se loia e tulai mo se tasi. O le mea moni, na faaleleia atili ai aua sa paleni lo’u olaga. Sa ou taumafai e fai le mea na finagalo le Alii ou te faia, ma sa Ia tuuina mai ia te au le malosiaga, malamalama, ma le fesoasoani faaopoopo.
Taitaiga a le Agaga
O tali i a tatou filifiliga iloga o le a sili atu ona foliga mai e maua ai le paleni ma le fiafia pe afai e oo mai e ala i uunaiga a le Agaga. E faapefea ona tatou maua le Agaga ma tali o loo tatou sailia?
Muamua, sei ou fautua atu e manaomia ona tatou auai i sauniga faamanatuga i vaiaso taitasi, ma e tatau ona tatou aai ma feinu i le faamanatuga. A o tatou faia faapea, tatou te manatua ai Keriso ma Lona puapuagatia mo i tatou. Tatou te osifeagaiga, e pei ona tatou faia i le papatisoga, o le a faapea ona tatou tauaveina i o tatou luga ia Lona suafa. Ma tatou te faafouina a tatou feagaiga ina ia tausia ai poloaiga. Aisea tatou te faia ai nei mea uma? O le fuaitau mulimuli o le tatalo o le faamanatuga e taliina ai le fesili lena: “Ina ia latou maua pea Lona Agaga e faatasi ma i latou” (MFF 20:77).
O iina o loo taoto ai le ki o le mauaina o le mafutaga a le Agaga Paia, o le a faapea ona fesoasoani ia i tatou i le taliina o fesili taua tatou te fetaiai. Ma le isi, e tatau ona tatou tootutuli ma tatalo e le aunoa. E tatau ona tatou naunau e auauna atu i o tatou uso a tagata. E tatau ona tatou aapa atu i le alofa ma ia le matatau (tagai 1 Ioane 4:18).
Afai tatou te ole atu i le Alii mo le Agaga ma faia ia mea e alagatatau ina ia maua ai Lana uunaiga mo i tatou, o le a aoao mai le Agaga ia i tatou ia mea uma lava. O le a fesoasoani o Ia ia tatou suesuega. O le a fesoasoani o Ia ia i tatou i le faia o faaiuga e faatatau i sailiga o le olaga. Ma o le a Ia tuuina mai ia i tatou le filemu ma se lagona o le toafimalie.
O Se Faataoto e uiga i le Tatalo
Ou te faaiu atu i se fuaitau mai le Luka 18:1–8:
“Ua fetalai atu foi [le Alii] le faataoto ia te i latou, ina ia tatalo soo e tatau ai, a e aua le faavaivai;
“Ua faapea atu, Sa i le tasi aai le faamasino, ua le mata’u i le Atua, e le ava foi i tagata:
“Sa i lea aai foi le tasi fafine ua oti lana tane, ua alu atu ia te ia, ua faapea atu, Ia e faamasino atu i le ua i ai a’u mea.
“O nai aso e lei mafai ai o ia: ae mulimuli ane ua faapea ifo o ia i lona loto, E ui lava ina ou le mata’u i le Atua, ma a’u le ava i tagata;
“Ae peitai ona o le faasoesa mai ia te au o le fafine nei ua oti lana tane, ou te faamasino i ana mea, ina nei faatiga mai ia te au i lona sau soo.
“Ona fetalai atu ai lea o le Alii, Ia outou faalogo mai i le upu a le faamasino amioletonu.
“E ui lava ina tuai mai le Atua i e na ia filifilia, o loo alalaga i latou ia te ia i le ao ma le po, pe le faamasino ea o ia i a latou mea?
“Ou te fai atu ia te outou, e vave ona faamasino e ia o a latou mea.”
E faafofoga ma tali mai le Alii i tatalo. O nisi taimi tatou te vave fiu ai pe a tatou tatalo atu ia te Ia. E tatau lava ona tatou lava papale pea.
I le avea ai o se molimau faapitoa ia Iesu Keriso, ua valaauina e molimau atu i atunuu o le lalolagi (tagai MFF 107:25), ou te molimau atu o loo soifua o Ia. O Ia o lo tatou Faaola. Na te silafia oe, ma Na te silafia a’u. Na te silafia mea o loo i o tatou mafaufau ma totonu o o tatou loto. O le a avea o Ia ma o tatou fautua i le Tama pe afai tatou te tausia feagaiga tatou te osia a o tatou aai ma feinu i le faamanatuga i vaiaso taitasi.
E mafai ona tatou faatoilaloina le lalolagi pe afai tatou te taumafai ia paleni o tatou olaga. Afai tatou te saili ia mafuta le Agaga ma i tatou i taimi uma ma ia faamaoni i le tali atu i Ana uunaiga, o le a faamanuiaina i tatou.