Pei o Nifae
“Ia oulua filifili ma le Atua i au mea uma e te faia, na te faatonu foi ia te oe i mea lelei” (Alema 37:37).
Na ou sioa atu i le faamalama o lo’u potumoe ma vaaia ai se faamoega apogaleveleve taufaafefe i fafo. Ia, o se tasi lena o mea o le a ou le misia e uiga i lenei fale: o apogaleveleve. Atonu o le a leai ni apogaleveleve i lo matou fale fou. Atonu o le a ou le misia mo’i lava lenei fale tuai.
“Pe a mo’i,” na ou mumumumu ai ia te au lava, ma ou taoto i lalo ma pulou lo’u ie afu. Le misia lenei fale, lenei vaituaoi, la’u vasega i le aoga, la’u uo lelei? Seiloga ou te faasaga i se fale e tumu atoa i apogaleveleve ona faatoa ou alu ese lea ma le loto i ai.
“Tanya?” o le valaau mai lea a Aunt Carrie i fafo o le faitotoa o lo’u potumoe. O ia sa vaaia i matou ma ou tuagane.
Na faaonoono atu i fafo lo’u ulu mai ie afu. “O le a?”
“E mafai ona ou alu atu i totonu e faamanuia atu le po?” o lana fesili lea.
“Ia masalo,” o lau mumumumu lea. A na faapea o se isi lava tagata, semanu ou te fai i ai e leai. Ae o Aunt Carrie o le tamaitai lea e sili ona ou fiafia i ai. Na te faatagaina au e faataitai i ana vali mata, na te aumaia ni a matou koko vevela ae matou te le’i momoe, ma na te faitauina mai ia te au ni tala mai le api o talaaga na ia tusia a o 11 ona tausaga, e pei o a’u.
Na sau o ia i totonu o le potu ma nofo mai i vae o lo’u moega. “Ua e filemu lava i lenei po, Tanya. O e popole i le siitia atu i lo outou fale fou?”
Sa ou tomumu. “E nonofo uma iinei a’u uo. O ai o le a matou savavali faatasi atu i le aoga? O ai o le a matou nonofo i le taimi o le malologa? Sa tuu ou te amata i Tamaitai Talavou iinei ma ou alu i le tolauapiga i le taumafanafana a sau—ae o lenei o le a leai se isi ou te iloaina. O le a ou toe amata lava mai le amataga.”
Na mou atu lo’u leo ina ua tumu ou mata i loimata. Na tuu mai e Aunt Carrie ia te a’u se pepa solo. “O le a le faigofie le tuua o tagata uma e te alofa i ai ae toe amata i se isi nofoaga e te le iloaina se isi,” o lana tala lea.
Na lulu lo’u ulu. Sa matua le faigofie lava.
Sa faaauau ona fai mai Aunt Carrie. “E te iloa Tanya, pe a ou mafaufau i le siitia ese, ou te mafaufau ia Nifae.”
“Aisea e te mafaufau ai ia Nifae?” na ou fesili ai.
“Ia, atonu e lei matua teisi atu nai lo oe i le taimi na faailoa atu ai e lona tama o le a siitia ese lona aiga.”
Sa ou mafaufau lava ia Nifae o se tagata matua. “O anafea na pei ai o au le matua o Nifae?” o la’u fesili lea.
Na uu mai e Aunt Carrie la’u Tusi a Mamona mai le laulau i talaane o lo’u moega. Sa ia susueina i le 1 Nifae ma amata ona faamatala mai. “E te manatua le tala ia Liae, a ea?”
Na luelue atu lo’u ulu. Na ou iloaina le usitai o le aiga o Liae ma tuua ai lo latou fale.
Na faitau mai Aunt Carrie mai le tusi na matala i luga o ona vae. “O le 1 Nifae 2:4 lenei: ‘Ua oo ina te’a atu o ia [Liae] i le vao. Ua na tuua lona fale ma le fanua o lona tofi, ma lana auro ma lana ario ma ana mea taua, ma ua le ave se mea e tasi ma ia, ua na o lona auaiga, ma mea e ai, ma fale ie, ma ua te’a atu i le vao.’”
“Na e fai mai na pei o a’u le matua o Nifae?” o la’u faalavelave atu lea.
Na ataata Aunt Carrie. “Ou te le iloa pe o le a tonu lona matua, ae ua ia tau mai ia i tatou i le fuaiupu e 16 e faapea na ‘taulealea lava’ o ia. E tusa pe na matua atu foi nai lo oe, ou te manatu, sa le faigofie foi ia te ia ona tuua lona fale. Ou te matea na te lei iloaina se tagata se tasi i le vao. Atonu na leai foi ni tagata e iloa!”
Na ou ataata. O le mea e sili ai a matou siitia o le a i ai ni o matou tuaoi. “O le a la le mea na fai e Nifae?” na ou fesili ai. “E lei faitio lava o ia. Na fai mai Lamana ma Lemuelu, ‘Aisea o le a tatou tuua ai Ierusalema? Aisea o le a tatou tuua ai a tatou oa ma le tatou fale ma a tatou uo?’ Ae sa lei faitio lava Nifae. Aisea na le faitio ai [o ia]?”
Na emoemo mata o Aunt Carrie, e pei sa talotalo ina ia ou fesili atu. “Ou te le iloa ia tali uma, ae ua tuuina mai e Nifae se faaataata i le fuaiupu e 16: ‘Ua oo ai ina ou tagi atu i le Atua; faauta foi, ua na asiasi mai ia te au, ma na faamalulu lo’u loto, ma ua ou talitonu ai i upu uma na fai mai e lo’u tama; o lea, na ou le fouvale ai ia te ia e pei o o’u uso.’ ”
Na tilotilo mai o ia ia te a’u, e su’e i la’u pupula pe na ou malamalama.
“O lea, na tatalo o ia,” na ou fai atu ai.
“Ioe.” Na faasolo ina malu le leo o Aunt Carrie, ma ia oomiina lo’u lima. “Tanya,” na fai mai ai, “o loo i ai sau filifiliga. E mafai ona e faitio i lo outou siitia ese atu, e pei o Lamana ma Lemuelu, po o le, e mafai ona e aveina atu ou mafatiaga i le Tama Faalelagi i le tatalo. Afai o le a e ole atu ia te Ia, o le a Ia faamalosia oe e pei ona Ia faamalosia o Nifae.”
Na ou vaai atu ia Aunt Carrie ma lagona le mafanafana i lo’u tino atoa. Na ou nofo a’e i luga ma tuu atu ia te ia se opoopo lapoa. “Faafetai, Aunt Carrie,” o lau musumusu lea.
“Ou te alofa ia te oe, Tanya. Manuia le po.”
Ina ua ia tapeina lo’u moli ma tapuni atu le faitotoa ina ua alu ese atu, na ou seesee ese mai lo’u moega ma tootuli i luga o le fola. Atonu lava e faatasi ai ma le fesoasoani a le Tama Faalelagi, o le a mafai ai ona ou taulimaina lenei siitia ese atu.