Manatu Faaopoopo i Taimi o Fetufaaiga 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Fepuari 2008. Mo le lesona, faatonuga ma le gaoioiga e o faatasi ma nei manatu, tagai i le “O Le Mana Ou Te Maua i Taimi Uma Ou Te Faitau Ai” i itulau U4 ma le U5 o le vaega a tamaiti o le lomiga lenei.

1. Faamatala atu tatou te ola i le talalelei e ala i mea tatou te faia ma upu tatou te tautatala i ai. Tusi le Ola i le Talalelei, i luga o le laupapa. Fai ni koluma se lua i lalo ifo o le Ola i le Talalelei. I le pito i luga o le tasi o koluma, tusi ai le upu Fai. I le pito i luga o le koluma lona lua, tusi ai le upu Ta’u.

Faamatala ni tala mai le Tusi Paia (Tanielu, Mose, Noa, Ioane le Papatiso ma isi). Faatonu tamaiti e faalogo pe sa faapefea e tagata o loo ta’ua ona ola i le talalelei e ala i mea sa latou faia ma tautatala ai. Tusi tali a tamaiti i luga o le laupapa.

Toe iloilo tali a tamaiti. Saunia ni tala pupuu e faatino ai e tamaiti ala e mafai ona latou ola ai i le talalelei. (tagai O Le Aoao Atu, E Leai Se Isi Valaauga e Sili Ai [1999], 170) Vaevae le Peraimeri i ni vaega, ma tuu atu i vaega taitasi se tulaga faatusa e aoao ai. Ia lava se taimi e tuu atu i vaega taitasi e talanoaina i la latou tala ma fuafua pe o a mea latou te faia ma tautatala ai. Ona fetufaai lea o latou manatu i le Peraimeri. Tusi o latou manatu i luga o le laupapa. Faamalosia le manatu, e tatou te ola i le talalelei i mea tatou te faia ma mea e tautatala ai. Usu le “Ou Te Fiaola i le Talalelei,” (Tusipese a Tamaiti, 72). Molimau atu o tala o le Tusi Paia e aoao mai ai ia te i tatou le ala e ola ai i le talalelei.

2. I le faaaogaina o le “Mulimuli i le Perofeta” (Tusipese a Tamaiti, 58) po o ni fuaiupu filifilia o le “Tala o le Tusi a Mamona” (Tusipese a Tamaiti, 62) fatufatu se taaloga faamatematega, ma ni faailoga e fesoasoani ai i tamaiti ia iloa gofie le tagata mai tusitusiga paia, ma le mataupu faavae o le talalelei na latou ola ai ma aoaoina (tagai O Le Aoao Atu, E Leai Se Isi Valaauga e Sili Ai, 177). (Mo tamaiti laiti atonu e te manaomia le faaaoga o ata mai le Pusa Ata o le Talalelei e fesoasoani ia iloa ai le tagata e faatatau i ai le mau.)

Faia le taaloga matemate. A maua e tamaiti le tagata mai le mau, faamatala faapuupuu le tala, ma talanoa i le mataupu faavae o le talalelei sa ola ai le tagata. Usu le fuaiupu mai le pese faatatau i le tagata o ta’ua e le mau ma talanoaina ni auala e mafai e tamaiti ona ola ai i lea mataupu faavae o le talalelei i o latou olaga. Faaauau pea seia mafai ona iloa tagata uma o ta’ua i mau, ma maea ona usuina fuaiupu e faatatau i ai. Molimau atu o tusitusiga paia e aoao mai ai le ala tatou te ola ai i le talalelei.

3. Tuuina atu o Pese: “Ta’u Mai Tala Ia Iesu” (Tusipese a Tamaiti, 36). Aumai se ata o se tamaitiiti, fesili i tamaiti e faasoa mai, po o le a so latou manatu, o le a se mea e manao se tamaitiiti e fai i ona matua e faia mo ia. Usu le laina mulimuli o le fuaiupu muamua mo tamaiti, ma fesili, “O le a le mea o loo manao i ai lenei tamaititi?” Aumai tali mai tamaiti. Valaaulia tamaiti tou te usuina faatasi lea fuaiupu. Ta’u atu le igoa o le pese ma faamatala, o se talosaga, e fia faalogo i tala ia Iesu.

Faaali atu upu o le pese i luga o se siata lapoa. Usu atu le laina muamua o le fuaiupu muamua i tamaiti, fai i ai e faalogo mo le fuaiupu “O te fia faalogo.” Talanoaina pe aisea e taua ai le faalogo o o tatou taliga ma o tatou loto.

Usu le laina lona lua i tamaiti, ona toe usu faatasi lea. Valaaulia tamaiti e faasoa mai manatu po o le a se mea o le a latou fesili ai ia Iesu “pe a na i ai o Ia iinei.”

Usu le laina lona tolu i tamaiti. Faaali atu vaaiga mai le Feagaiga Fou, mai le Pusa Ata o le Talalelei, e faaali ai i tamaiti faailoilo patino mo le laina lona tolu. Usu faatasi le laina lona tolu. Fesoasoani i tamaiti ia malamalama i uiga o upu.

Usu faatasi le fuaiupu muamua. Faamanatu i tamaiti o tala ia Iesu o loo maua i tusitusiga paia. Molimau atu pe na faapefea ona faamanuiaina lou olaga i tala ia Iesu.