MANATU MO AFIAFI FAALEAIGA

O nei fautuaga mo aoaoga e mafai ona faaaogaina i le potuaoga faapea foi i le aiga. E mafai ona e fetuunaia nei manatu i lou aiga po o le vasega.

“O Se Faaiuga Faanatinati,” i. 8: Ia talanoaina le manatu e faapea, o le ositaulaga e mafai ona faauigaina o le tuua o se mea lelei ina ia maua ai se mea e sili atu ona lelei. Ia faamatala atu, “o taulaga e aumaia ai manuia o le lagi” (Viiga, nu. 15). Faitau le tala a Hugo; ona talanoaina lea o faamanuiaga na ia mauaina ona o lona ositaulaga.

“Filifilia o le Saolotoga ma le Ola Faavavau,” i. 26: A uma ona faitauina le aafiaga o Elder Craig A. Cardon, fesili atu i tagata o le aiga e filifili se autu (e pei o aoaoga, mea tautupe, meaai paleni), ma valaaulia i latou e tusi i lalo ni faataitaiga e faatatau i le faia o filifiliga lelei i lena eria e taitaiina atu ai i le saolotoga tele. Tuu atu ia i latou e faasoa mai a latou faataitaiga. Ia faamamafa atu ua tatou saoloto e filifili a tatou amioga ae le o taunuuga.

“Ola i se Olaga Paleni,” i. 38: Tuu atu i se tagata o le aiga ia se faaputuga o ni aitema tetele e uu. A uma ona tuu atu i le tagata e taumafai e faapaleni ia aitema mo se taimi, ia tuu atu i le tagata se taga po o se ato e tuu ai i totonu ia aitema. Ia faatusatusa ia aitema i o tatou tiutetauave, a o le ato i le tuuina o a tatou avega i le Alii. Ia fefaasoaai i manatu mai le vaega “Taitaiga a le Agaga,” ma ia talanoaina pe faapefea ona tatou maua le paleni pe afai tatou te faatagaina le Alii e fesoasoani mai ia i tatou.

“O La’u Vavega o Talafaasolopito o Aiga,” i. U6: I le avea ai o se aiga, ia fai ni taui laiti (e pei o kuki) lea e alu ai sina taimi i le faiga. Faitau leotele le tala lenei, ma faamamafa atu ia le vaega e faatatau i le faatalitali mo le mauaina o igoa o augatama. E faapefea ona tutusa lenei manatu ma le faatalitali mo le taui laitiiti? Ia fuafua se taimi e asiasi atu ai i le faletusi o talafaasolopito o aiga e amata ai pe faaauau ai sailiga o lo’u lava talafaasolopito o aiga.

“Pei o Nifae,” i. U12: A uma ona toe faamatala le tala a Tanya, ia talanoaina le mea na faia e Nifae ina ua tuua e lona aiga lo latou nuu (tagai 1 Nifae 2:16). O a ni aafiaga o lou olaga e mafai ona e faatatauina i ai le faataitaiga a Nifae?