Fesili & Tali

“O nisi taimi ma te feeseesea’i ai ma lo’u tina. Ma te faia tala e le tatau ona fai ma i’u ai ina tiga o ma faalogoga. Ou te tatalo ina ia ou alofa ia te ia, ae e na o sina taimi e maua ai faalogoga lelei. O le a se mea e mafai ona ou faia e faaleleia ai la ma’ua sootaga?”

Talanoa i lou tina pe a o toafilemu oulua uma ma lou tina, ma taumafai ia malamalama ia te ia.
Ia mautinoa e mafai ona outou faatasi ma le Agaga Paia pe a oulua talanoa ma lou tina.
Mafaufau i mea e mafai ona e suia ia te oe lava ina ia atili lelei ai la oulua sootaga ma ia.
Tatalo mo le lotomaulalo, alofa mama, ma se suiga o le loto.

Liahona

E lelei tele lena, ona ua e manao ia faaleleia la oulua sootaga ma lou tina. O se sootaga lelei ma ia o le a avea ma se faamanuiaga. Peitai, o se sootaga lelei e le faapea o le a e ioe atu ai ia te ia i mea uma. Ma o lena e lelei. O le mea e le lelei, o le faatiga lea o le tasi i le isi a o faaali atu le eseesega o o oulua manatu.

Ia avea o se laasaga muamua o le faaleleia o la oulua sootaga ma lou tina, taumafai ia e malamalama ia te ia. O le a faigata ona fai lena mea, pe a i ai ni o oulua faalogoga tiga, o lea la, talanoa pe a oulua taufai maua le toafilemu. E mafai ona oulua amata i le faitauina faatasi o le tala lenei, ona talanoa lea e uiga i le mataupu o loo oulua finau ai—ia tasi le mataupu i le taimi. A oo ina e malamalama ia te ia, ona e faasoa foi lea i ai o ou mafaufauga ma faalogoga, e aunoa ma le tuua’ia o ia.

E mafai lava foi e oe ma lou tina ona malilie faatasi i ni nai tulafono faigofie e pei o le tautala ma le agalelei, talanoa e uiga i mea ao lei oo ina avea ma se faafitauli telē, ma feauaua’i e faalogo atu le tasi i le isi. Ua aoao mai le Alii, “O le tali filemu e liliueseina ai le ita: a o le upu faatiga e tupu ai le ita” (Faataoto 15:1), ma le, “Ia tuuina atu i tagata taitoatasi e [tautala] ma ia faalogo [tagata] uma” (MFF 88:122). E tuumuli le Agaga pe a i ai le feitaga’i—o le faia o mea e pei ona ta’ua i luga, o le a fesoasoani tou te mafuta ai ma le Agaga.

E le gata i lea, ia e vaai ifo ma le faamaoni ia te oe lava. O le a lau mea lena e fai o loo taofia ai oe mai se sootaga lelei ma lou tina? Pe o e usitai ea i tulafono faaleaiga? Pe o manaomia lou talanoa atili atu i lou tina ma faaali atu i ai ou lagona? Pe o manaomia le faateleina o lou faaaloalo?

E taua aiga i le Tama Faalelagi, o lea o le a fesoasoani ai le tatalo. E mafai ona e tatalo mo se suiga o le loto agai i lou tina. O le mea e faafetai ai, e mafai ona avea i tatou ma tagata sili atu i le fesoasoani mai o le Alii. O le i ai o se suiga o le loto, e mafai ai ona e talanoa atu i lou tina ma le alofa ma le malamalama, ona ono mafai ai foi lea ona talanoa mai o ia ia te oe i lena lava ala.

E mafai ona e tatalo ina ia e vaai i ona uiga taua lelei. Faamalo atu i ai. Ta’u atu ia te ia e te alofa i ai. Faafetai atu ia te ia mo mea na te faia mo oe.

E mafai foi ona e tatalo mo le lotomaulalo. O le lotomaulalo o le a fesoasoani e te iloa ai e alofa moni lava lou tina ia te oe, ma e taua lou faalogo ia te ia, ma o loo ia ta’u atu mea e mafai ona fesoasoani ai ia te oe. O le lotomaualalo o le a fesoasoani e te iloa ai po o le a le mea e sa’o, e sili atu ona taua nai lo le po o ai e sa’o.

O le mea mulimuli, ia manatua ua poloaiina matua e le Alii ina ia taitai ma aoao a latou fanau, ma ua Ia poloaiina foi le fanau ina ia ava i o latou matua. Ia manatua lena mea, aemaise lava pe a talanoa atu lou tina e uiga i tulafono faaleaiga po o le mea sa’o ma le mea sese.

E i ai le taimi, afai e te loto tatalo ma loto alofa ma taumafai e ava i lou tina, o le a faaleleia la oulua sootaga ma ia.

Au faitau

Ia faaauau ona tatalo ia e alofa i lou tina, ma tatalo ina ia fesoasoani atu le Tama Faalelagi ia te oe e tausisia le lelei ma le faagaeetia o ou mafaufauga ma upu. A e manao e tumau faalogoga alofa, e manaomia ona e atiina ae “le alofa mama o Keriso” (Moronae 7:47). A faigata ona ma galulue ma sa’u soa faifeautalai, sa ou iloa o le auauna atu ia te ia e fesoasoani ai ia te au e atiina ae le alofa mama mo ia ma faaleleia ai la ma’ua sootaga.

Elder Toby Pontious, 21, Misiona Kalefonia Arcadia

Sa ou aoaoina talu ai ni nai mea ua fesoasoani ai ia te au e aua nei o ma tauaiupu ma lo’u tina. Sa ou aoaoina faapea o se upu faitio e tupu ai le ita, ae o se upu alofa e mafai ona foia ai le faafitauli po o le faaleleia ai foi. Sa ou aoaoina faapea, o se tina e “sa’o” lava i taimi uma, aua tusa lava pe sese, e taumafai lava e fai le mea sili mo lana tama. Tatalo ia maua le Agaga, ona faigofie ai lea.

Fernando V., 18, Sā)o Paulo, Pasila

Fai mea e ta’u atu ai i lou tina e te alofa ia te ia ma e taua o ia ia te oe. Fesoasoani ia te ia i feau. Valaaulia o ia lua te o i se gaoioiga malie. Ia e lotomaulalo, ma tatalo e le aunoa i lo tatou Tama Faalelagi mo ia. O le mea e aupito sili ona taua o lou fai atu lea i ai, “Ou te faamalie atu.”

Gena G., 19, Basilan, Filipaina

I se tasi aso sa ou tali faasa’eā ai i lo’u tina. Sa taufai ‘e’ē atu le tasi i le isi. Sa tiga a ma upu. Mulimuli ane, sa ou susu’eina a’u tusitusiga paia ma faitau ai e uiga i le alofa. Sa tonu ia te au ou te talosagaina lo’u tina e faamagalo mai au. Sa alu o ia, ma ina ua toe foi mai, sa ia tuu se tusi i luga o lo’u aluga. Sa ia faamalie mai. Sa na ona manao lava o ia ou te fesoasoani atu i feau i le fale. Ina ua uma ona ou faitauina lana tusi, sa ou faatopetope atu e ta’u atu i lo’u tina ua ou matua salamo lava, ma ou te alofa tele ia te ia, a’o ou matua opoina lava o ia. O se taimi matagofie. Mai lava i lena taimi, o le savali o le alofa na faaalia mai ia te au i tusitusiga paia, na tumau ai lava ia te au, ma ua ou taumafai lava e aloese mai le feupua’i e ala i lo’u tautala atu ma le agalelei ia te ia. Fai i lou tina e te alofa ia te ia, ma o le a ia faia foi lena lava mea. Ia pulea oe lava pe a i ai se mea na te faia e oso ai lou ita, ma nai lo lou ita, ia e mafaufau i ona uiga lelei uma. Saili ia e iloa mea e manao e te faia. Ou te talitonu o lou faia o lenei mea, o le a foia ai e le tulaga ia lava.

Raquel L., 21, Bourgogne, Farani

Filifili se aso lua te o ai o se tina-ma lana tama teine. Faaalu faatasi lo oulua aso, e fai ai soo se mea lava e fesoasoani ai ia iloa ai e le tasi uiga lelei o le isi. Ta’u i ai lou alofa tele mo ia. E le pine ae amata ona oulua ioe faatasi ma iloa mea e tutusa ai oulua.

Lydia H., 14, Iowa, ISA

Ou te lei manao i a ma talanoaga ma lo’u tina e faaiu i se feupuaiga i taimi uma, o lea sa tonu ai ia te au e sui le auala ou te talanoa ai. Sa ou taumafai e fai se tatalo a o lei oo ina ma feupuai. Sa ou taumafai foi e vave mafaufau i upu ou te tautala ai po o mea foi e aua ou te tautala ai. Talu mai lava lena taimi ua sili atu ona lelei la ma mafutaga ma lo’u tina.

Lin H., 17, Taichung, Taiwan

Taumafai e faaalu ni taimi ‘anoa ma lou tina. Fai se mea lua te fiafia uma i ai, se mea lua te galulue faatasi ai. Pe taumafai foi se mea fou e mafai ona oulua taufai aoao mai ai. E le gata i lea, tuu oe lava i ona seevae. Atonu o loo i ai se mea ua mafatia ai. Fesili i ai pe na a lona aso. A o le mea sili, ia saga tatalo pea.

Kyelee S., 12, Iuta, ISA

O tali ua faamoemoe mo se fesoasoani ma se manatu, ae le o se faasilasilaga o aoaoga faavae a le Ekalesia.