Ua Tali Elder Ballard i Fesili o Loo Fesiligia Pea

O se tuu faatasiga i ata video, o loo saunoa ai Elder M. Russell Ballard o le Korama o Aposetolo e Toasefululua, e uiga i ni fesili o loo fesiligia pea e ala i tala faasalalau lautele, ua uma ona faatulaga i luga o le LDS.org.

Ua talanoaina e Elder Ballard autu e pei o le Au Paia o Aso e Gata Ai o ni Kerisiano, ma pe e lagolagoina e le Ekalesia, pe leai sui faapolotiki.

O ata video e maua i le na o le faaPeretania, na faia e fesoasoani e faamanino atili ai le Ekalesia i manatu lautele—ae maise le au tusitala—talu ai le faateleina o le lauiloa i le Iunaite Setete. Ua faaalia i le tele o manatu faapalota i totonu o le malo e matua tele se vaega o le faitau aofai, e laitiiti lava pe leai foi se mea latou te iloa e uiga i le Ekalesia.

I le tali atu i se tasi o fesili masani—O Mamona ea o ni Kerisiano?—na saunoa ai Elder Ballard: “[O Iesu Keriso] o le totonugalemu o mea uma matou te fai, ma mea uma o loo matou faamoemoe i ai. O a matou miti uma ma faanaunauga mo le lumanai o loo taulai i lo matou talitonuga ia Iesu Keriso ma lo matou naunautaiga ia iloa Ana aoaoga, ma pulunaunau ia tausia Ana poloaiga.”

O lenei faatalatalanoaga e lei tusitusia pe saunia aloaia sa faatautaia e sui o le Ekalesia o Mataupu tau i le Va i Fafo, ma sa fofogaina i se fonotaga i luga o peau o le ea ma tusitala faalelotu o nusipepa eseese i totonu o le atunuu.

Na taua e sooupu o le Ekalesia o le tapenaina o se faatalatalanoaga ma se taitai iloga o le Ekalesia, e tele laasaga e uia, ina ia faamanino atili talitonuga o le Au Paia, ma mea o loo latou faia. Atonu o le a mulimuli mai ni isi faatalanoaga i le tele o mataupu, ma o le a aofia ai isi Aposetolo. O Elder Ballard o le taitaifono o le Komiti a le Ekalesia mo Mataupu tau i le Va i Fafo o loo i ai nei.

Na tali atu Elder Ballard i fesili: O Outou o ni Kerisiano? O le a le matafaioi a Iesu Keriso i lo outou faatuatuaga? Tou te tapuai ia Iesu Keriso i a outou Sauniga i Aso Sa? Aisea e fai mai ai ni isi o outou o se faalapotopotoga e ese le faiga o tapuaiga? O a auala e pei ai outou o isi Kerisiano? O a auala e ese ai outou mai isi Kerisiano? Pe o se perofeta ia Iosefa Samita? Pe tatau ona i ai ni perofeta i aso nei? Pe i ai ni faamaoniga faasaienitisi e lagolago ai e sa’o le Tusi a Mamona? Pe lagolagoina e le Ekalesia ia sui faapolotiki?

Ina ia maua ata faavitio, asiasi i le LDS.org, kiliki i le Newsroom, i le tulimanu i lalo i le taumatau, ona ta lea o le faaupuga “Elder Ballard interview” i le Search box.