Taitaiga e Suia-ai-Olaga
O Se Taitai o le Toatasi
Ina ua atoa lo’u 12 tausaga, sa na o au le alii talavou i la’u uarota i Cape Town, i Aferika i Saute. Ae tusa lava, sa musuia lo’u epikopo e tofia se au Peresitene o Alii Talavou.
Semanu e mafai ona faapea ifo lo’u peresitene o Alii Talavou ia te ia lava, “O le a la’u mea a fai i le na o le toatasi o le alii talavou? E le mafai ona faatulaga ni gaoioiga mo le na o le toatasi.” Nai lo lena, sa ia faia le mea sili ma faalautele lona valaauga. Sa faatulaga e le au peresitene ia savaliga sopo, o tolauapiga, o gaoioiga a le Sikauti, o afiafi o Mutuale i po o Aso Lua, o lesona i Aso Sa, o faaseega i le oneone, ma gaoioiga i le matafaga. Ina ua mavae sina taimi, sa amata ona o mai i le lotu isi alii talavou—e toalua, ona toatolu lea, ma sosoo ai ma le toafa.
Ua faatumulia au i le agaga faafetai ona o le faamaoni o nei taitai o Alii Talavou i o latou valaauga, ma latou faia se taumafaiga mo se alii talavou e toatasi—o a’u. Ua avea a’u ma se tagata lelei, aua latou te le’i faamaamulu, e faapena foi isi sa auai i le polokalama a Alii Talavou i la matou uarota.
Greg Burgoyne, Aferika i Saute.
Na Faasolosolo Malie, Ona Ou Aoao e Taitai
Ina ua mavae ni nai vaiaso ina ua uma ona ou papatiso ma faamauina, sa tofia au o se failautusi i le Peraimeri i le Uarota a Valle Dorado i Mekisiko. O se mea na ou ofo ai aua ou te fou atu i le talalelei, peitai sa ou alofa i lo’u Faaola ma sa ou manao e auauna atu.
Sa ou fai i lo’u epikopo e toatele isi tagata e mafai ona latou faia lelei le galuega, peitai o le auauna atu sa ou aoaoina ai na musuia lo’u valaauga. O le mafuta ai ma tamaiti o le Peraimeri, sa ou aoaoina ai mataupu faavae o le talalelei, o viiga matagofie, ma Mataupu Faavae o le Faatuatua. Sa ou alofa lava i tamaiti, ma sa ou feiloai foi i o latou matua ona o i latou.
Ae o la’u aoga silisili lava na maua mai i le galulue ai ma le peresitene o le Peraimeri ma ona fesoasoani. Sa latou fesoasoani ma le onosai ia te au, sa latou faamagalo i o’u sese, ma sa faasolosolo malie lava, ona ou aoao i le auala e faataunuu ai lo’u valaauga. Sa matou galulue faatasi i le Peraimeri mo le tolu tausaga ma avea ai ma ni uo mafana.
Ina ua faamalolo matou, sa tofia i matou e galulue i le Aualofa. O le taunuuga o le alofa sa matou faasoaina, sa matou galulue faatasi i le lotogatasi mo le isi lua tausaga. Sa aoao mai e nei uso ia te au ina ia faamatuu atu i isi ia tiutetauave ma faataga isi tagata e aoao ina ia avea foi ma taitai. Sa matou faasoa i meaai sa teuina, anapopogi mo se faamoemoega, ma matou o faatasi foi i le malumalu. Sa latou fesoasoani mai ina ia avea au ma se taitai faamaoni, galue punouai, ma le alofa. Ua ou lagona ua tatau ona ou faasoa atu mea sa ou aoaoina mai ina ia maua foi e isi uso lea lava ituaiga o poto masani sa ou maua i le galulue faatasi ai ma uso sa aoaoina au.
Laura Viga D’Alva, Mekisiko.
Ou Te Le’i Saunia
I le tolu vaiaso talu ona uma lo’u papatisoga ma le faamauga, ae faatalanoa au e Epikopo Ayala ma sa fesili mai pe o faapefea mai lo’u alualu i luma. Sa ou tali atu, “O loo lelei lava. Ua maea ona ou faitauina le Tusi a Mamona mo le taimi lona lua. O lea foi e faitau le tusi lesona o Mataupu o le Talalelei ina ia mafai ai ona ou aoao atili ma faaaoga mea o loo ou faitauina.”
Ona fai mai lea o ia, “Ua silafia e lou Tama Faalelagi oe ma mea e te manaomia, ma ua valaauina oe e avea ma se faiaoga o le Aoga Sa mo le tupulaga talavou e 14 i le 17 tausaga.”
Na vave ona ou iloa e toatele le autalavou i le vasega, o ē e laiti teisi ifo ia te au, sa ola mai i le Ekalesia ma sili atu lo latou iloa i le talalelei nai lo a’u.
Sa ou fai atu ia te ia, “Ou te le’i saunia mo lena ituaiga o galuega.”
Sa tali mai le epikopo, ma saunoa mai ma le loto i ai, “Roberto, o le Tama Faalelagi o ia lea o loo tuuina atu lenei valaauga ia te oe. Na te silafia ou tulaga gafatia ma lou faamaoni.”
“Ou te le’i sauni. Ou te manaomia se taimi e umi atu,” sa ou saga fai atu ai.
Sa tilotilo sa’o mai le epikopo i o’u mata ma fai mai ma le to’a ae i se leo malosi, “A e lagona e le mafai ona e taliaina lenei valaauga, e le tatau ona e ta’u maia ia te au. Tootuli ma ta’u atu i lou Tama Faalelagi. O le a tali atu o Ia ia te oe, ona ou taliaina lea o lau faaiuga.”
Sa sosoo ai ma se sāō umi. Ona tilotilo mai lea ia te au e faapei ona tilotilo atu o se tama i sona atalii, ma fai mai, “Roberto, e le se lotu a ni tagata palaaai lenei; o se lotu a tagata lotototoa.”
Sa faafuasei ona salamo lo’u loto. Faatasi ai ma loimata
i o’u mata ma se leo ua faatumulia i lagona ootia, sa ou fai atu, “Epikopo, o afea ou te amata ai?”
Sa ia opoina au, ma po lo’u papatua ma faapea mai, “O le a ou fesoasoani ia te oe e sauni lau lesona muamua i le vaiaso lenei.”
Sa faatumulia au i le olioli ina ua ou iloa ua tuuina mai e le Tama Faalelagi ia te au se taitai faapitoa, o se epikopo sa aoao mai e le gata i upu a o le faataitaiga.
Sa le aunoa ona ou manatuaina lenei aafiaga i le taimi o la’u misiona ma a o ou galue i isi valaauga. Ua ou mafaufau nei i ai, ma lagonaina ai le agaga faafetai i le Tama Faalelagi i le avea ai o se tasi o le Ekalesia a le Alii.
Roberto Carlos Pacheco Pretel, Peru
Tiakono Tuuto
E i ai se tasi o o’u tuafafine faaletulafono i Kuatemala na feagai ma se taimi mafatia, ma afua ai ni faafitauli o le soifua maloloina. Sa ma tatalo ma lo’u toalua mo ia, ae sa ma le iloaina po o le a se isi mea e fai. Sa mafai ona ou asiasi i le aiga o lo’u toalua i sa’u malaga faapisinisi i lo matou atunuu o Kuatemala, lea na ou aoaoina mai ai le lesona matagofie lenei faaletaitai.
Sa ma talanoa ma le tamā o lo’u toalua i le poletito, ae pasi ane se tasi o tamaitiiti e 12 tausaga le matua o le uarota ma faatalofa mai. Ina ua pasi ese atu o ia, sa fai mai le tamā o lo’u toalua, “O le tamaitiiti le la ma isi tamaiti e toalua e tutusa lava le matutua, sa matua faateia lava au i le isi aso. Na o mai le toatolu lena, e ofutino papae uma ma fusiua. Ina ua uma ona faatalofa mai, sa ou te’i i lo’u vaai atu ua agai atu i le potu malolo e asiasi i lo’u afafine. Sa latou fai atu ia te ia na o mai e asiasi mai ia te ia, aua ua latou iloa o loo feagai o ia ma faigata faale-soifua maloloina. Sa latou fai i ai, e ui lava o latou o tiakono ma e le mafai ona latou tuuina atu ia te ia se faamanuiaga, ae e mafai ona latou tatalo mo ia, ona faamanuiaina lea o ia e Iesu Keriso.
“Sa tootutuli na alii talavou e toatolu ma faia se tatalo matagofie lava ma ole atu i lo tatou Tama Faalelagi e faamanuia lo’u afafine. Ona latou tula’i ai lea, ma ina ua uma ona ta’u atu ia te ia o latou alofa, sa latou tuumuli ese.
“E te iloa la?” sa faaauau ai le tala a le tamā o lo’u toalua. “Sa matua faagaeetia lava au i le faataitaiga maoae a na alii talavou.”
O le aso na sosoo ai sa ou alu ai i le sauniga Faamanatuga, ma sa ou vaaia ai alii talavou nei e toatolu o fai lelei o latou laei ma sauni e tufa le Faamanatuga. Sa ou maua le lagona faamemelo ma le faaaloalo mo i latou. Ina ua tuua le sauniga, sa ou alu ou te faatalofa atu ia i latou, o o latou lima e laiti ae mamana i lo latou mafaia ona sii a’e i latou ua vaivai ma mafatia i le agaga. Ia faamanuia atu le Atua i na alii talavou mo la latou faataitaiga o le auauna atu, alofa, ma le faatuatua.
Óscar Abad Gutierrez, Iuta
Sa Manao o Ia e Talanoa i Lo’u Tina?
Talu ona avea au ma se tasi o le Ekalesia, sa ia te au se naunautaiga faamaoni e tausi i poloaiga. Peitai, o le totogi o le sefuluai, o se luitau aua o lo’u tina, e le o se tasi o le Au Paia o Aso e Gata Ai, na te le faatagaina.
Ina ua maua lo’u totogi, sa ou tuueseina i se tasi o a’u pusatoso le tupe mo le sefuluai. Ae ina ua oo mai le aso e faafoi atu ai le tupe i le Alii, ua le o i ai. Sa ou fesili i lo’u tina pe na vaai i ai, ae sa tali mai ua uma ona ia faaaogaina aua e le manaomia e le Alii. Ou te lei tali atu i ai, aua sa ou talitonu e i ai se isi auala e foia ai lenei faafitauli.
Talu ai sa le mafai ona ou totogiina la’u sefuluai, sa umi se taimi o o’u faanoanoa. Ina ua ou alu i le ofisa o lo’u epikopo mo le faatalanoaga mulimuli o le sefuluai, sa fesili mai o ia pe o au o se totogi sefuluai atoa, ma sa ou tali atu ma loimata e leai aua na ave e lo’u tina a’u tupe o le sefuluai. Sa faamafanafana mai lo’u epikopo ia te au i lona faapea mai, ua silafia e le Alii le manao o lo’u loto. Ona fai mai lea ia te au ma te o atu ma lo’u tina mo se faatalanoaga i le Aso Lulu. Sa ou ioe i ai.
I lena vaiaso, sa ou fesili ifo ia te au lava, “E mafai faapefea ona ou ave lo’u tina mo se faatalanoaga ma le epikopo pe afai e le o ia o se tagata o le Ekalesia? Na te le taliaina le valaaulia!”
Ina ua oo mai le Aso Lulu, ou te lei fai lava i ai i se mea, o lea sa na ona ou fai ai lava ma te o i le falelotu, ma faamatala atu i ai ou te le fia alu na o au. E laki ona, sa fai mai ma te o.
Sa taliaina ma le agalelei o ia e Epikopo Feitosa ma avatu o ia i lona ofisa. Sa ou matua popole lava a o i ai i totonu lo’u tina. Na iu ina sau lo’u tina i fafo ma le ofisa—ma ataata mai.
A o ma agai atu i le fale, sa tilotilo mai lo’u tina ia te au ma faapea mai, “E amata atu i le taimi nei ona totogi lau sefuluai i masina taitasi.” Oka se olioli na faatumuina ai lo’u loto! Sa saunia e le Alii se auala e malamalama ai lo’u tina i lo’u naunautaiga i lenei poloaiga paia.
Na amata ai ona auai lo’u tina i le Ekalesia. Na te totogi lana sefuluai ma na te faamautinoaina foi ua totogi la’u sefuluai. Sa matou mauaina faamanuiaga ofoofogia mai le tausiga o lenei poloaiga ona sa talanoa se taitai musuia i lo’u tina e uiga i le ositaulaga, tuuto, ma le faamaoni i le Alii.
Evanilda Gomes do Nascimento, Pasila
Alu E Talanoa ia te Ia
I le 1998, a o ou peresitene i Alii Talavou i le matou uarota, sa ou auai i se tolauapiga a le autalavou o le siteki. A o ou malolo ina ua maea se taaloga, sa ou vaaia se alii talavou ou te le masani ai. Sa nofonofo lava na o ia i luga o se tama’i maupuepue i talaatu o le tolauapiga. Sa le fiafia ona foliga. Sa ou lagona e tatau ona ou alu ou te talanoa i ai.
Sa ou faailoa atu lo’u igoa ma fesili atu mo lona igoa. Ou te le manatuaina mea uma sa ma talanoa ai, ae ou te manatua sa maligi o’u loimata. O se talanoaga faapitoa na faatoa uma ina ua valaau mai i ma’ua mo le isi a matou gaoioiga. Sa seasea o’u toe vaai i le taulealea ina ua maea, ma sa leai se isi avanoa ou te toe talanoa ai ia te ia.
I le masina o Aokuso 2005, sa fai ai sa matou sauniga i le faleautu o le siteki. O le alii talavou lava foi lenei na sau tuu mai ia te au se tusi: E faitauina faapea:
Sa amata ona ou mafaufau i le asō e uiga i la ta’ua talanoaga i le Paka i Sana Matini, pe tusa o le 1998. E na ona faamanatu atu ia te oe, sa ou nofonofo na o au ma sina lagona faanoanoa. Na e sau ia te au ma faapea mai e te manao e talanoa mai ia te au. Sa e fai mai … ua oo mai le taimi e filifili ai—pe nofo ai i le Ekalesia ma mulimuli ia Iesu Keriso po o le tuua ma lē maua ai le fiafia i faamanuiaga e maua mai i le toaga i le Lotu. O le mea e tasi na matua tamau i lo’u loto, ina ua e fai mai afai ou te pa’ū, o le a pa’ūū uma foi lo’u aiga, ae afai ou te agai pea i luma, o le a faapena foi i latou.
… Sa tupu mai ia te au se naunautaiga tele e fesoasoani ia te i latou… . O lea, mai lava i le aso na ta talanoa ai, sa ou faia ai le faaiuga ia ou faamaoni i le Alii, e oo mai lava i le taimi nei, ina ua mavae le fitu tausaga, o lea lava ou te faamaoni, ma ua mausali lo’u aiga i le talalelei ma faamaoni i le Alii… . Faafetai tele lava i lou tautala sa’o mai ma le faamaoni ia te au. O le a e le iloaina lava le tele o mea lelei ua tupu mai ai.
O lenei taulealea ua foi mai lana misiona ma ua faaipoipo i le malumalu. Ou te faafetai lava i le Alii ona o le avanoa na ia aumaia e avea ai a’u o se taitai. Ou te faafetai ina ua ou iloa le taua o le tuu o a’u i seevae o isi ina ia mafai ai ona ou malamalama i mea o loo latou feagai.
Alejandro Humberto Villarreal, Atenitina